1
Jesucristo yom tepyala jupj.
1Jesucristo vele cupj qjuis lal Dios poꞌó.
Jupj pꞌiyá liji mpes qjuisin ꞌyüsa Dios mpes.
Jesucristo lovin pǘꞌütsja jupj.
Pajal püna nosis cjuwatsja na,
pues pjü cjuwatsja na,
jupj newa tüpǘꞌütsja.
Jupj lovin Dios lal tüpüꞌü,
ne jupj pꞌiyá Dios watsja jupj.
2Jupj pꞌiyá Dios lal pǘꞌütsja
nosis cjuwatsja na pꞌin.
3Dios pjü la tjiji jupj lal.
Pues pjü way Dios la tjiji,
Jesucristo lal la tjiji jupj.
4Jesucristo mpes pátjatsja pjü.
Jupj se ꞌaya ꞌücj jis la pütꞌüs.
Jupj püꞌü mpes,
nosis casá patja ꞌücj sin ꞌyüsa wa Dios poꞌó.
5Nosis püste jinwá malala nyuca lajay mpes.
Jesucristo jaw jinwá nosis ntꞌa.
Sin ꞌyüsa liji Dios poꞌó.
Gente malala lajay ma jisas jupj.
Newa ma sin ꞌyüsa Jesucristo poꞌó.
6Yom tjacꞌ wa cupj ntꞌa.
Juan lotsja jupj.
Dios jas tjejyama tjacꞌ jupj.
7Juan tjacꞌ la veles jupj seletsja poꞌó.
Jupj tjevele yom pjaní jyawca jinwá ca nsem
cupj qjuilal, qjuisin ꞌyüsa la mijis Dios mpes.
Juan jostsja pjü ca mponecj yom niná poꞌó.
8Jesucristo niná pꞌiyá,
jyawca jinwatsja nosis ntꞌa.
Juan pꞌa watsja. Jupj tjacꞌ la veles
Jesucristo poꞌó, jupj seletsja mpes.
9Locopyaya Jesucristo nosis ntꞌa tjacꞌ wa.
Tꞌücꞌ way jupj jyawca jinwatsja nosis ntꞌa.
Jupj pjü gente sin ꞌyüsa liji.
10Dios pjü la tjiji nosis ntꞌa jupj lal.
Jupj tüpüꞌü nosis ntꞌa,
mopꞌin nosis casá patja ma salejeptsja
pjacj cuscú jupj.
11Jupj tjacꞌ jupj jyüꞌta ntꞌa;
nin pꞌiyá jupj si jütüta sin popé
ma jisastsja jupj.
12Nepénowa jisastsja jupj.
Yupj topon jupj mpes ca ꞌücj mpatjam Dios lal.
Nin mpes jupj jis tjeꞌyaya
ꞌücj Dios tsꞌuyupj ca jis mpalas yupj.
13Dios pꞌiyá liji jupj tsꞌuyupj se palá yupj,
mpes nin.
Sejamay niswa se jamanun mpes tulucj.
Jis papay, sejamay sin popa jisas mpes tulucj.
Yom jos mpes tulucj; Dios pꞌiyá liji
jupj tsꞌuyupj se palá Jesucristo lal japon.
14Jesucristo liji mpes qjuisin ꞌyüsa Dios poꞌó.
Yom tepyala jupj püná.
Jupj pǘꞌütsja ncupj pyatjaquecj ntꞌa wa.
Tjinyucucj jupj pajal ꞌüsüs la tjiji,
tꞌücꞌ way pünetsja jupj.
Jupj Popay Dios pjaní way Popa,
mpes ꞌüsüs jupj pajal.
Qjuis Papay Dios mpe tjacꞌ.
Cupj ꞌüsüs tuluctsja, mopꞌin nin,
jupj pajal ꞌüsüs la tjiji cupj mpes.
Jupj tꞌücꞌ way qjuisin ꞌyüsa liji Dios poꞌó.
15Juan seletsja mpes ꞌüsüs tjevele Jesucristo poꞌó. Ninana jupj velá Jesucristo poꞌó, pjü ꞌücj jis la pjac: “Jupj ne niná yomen napj tjevelé poꞌó. Napj tjevelé napj mwalá way tjacuwis; tjevelé yom pꞌa wa ncuwim pꞌa jawas nun jis lal la veles Dios poꞌó. Más püné tepyala jupj napj lal. Jupj pajal püna tüpüꞌü, mpes más püné jupj napj lal.
16”Jupj lovin pajal quelel la qjuisiji. Mpes jupj pajal ꞌüsüs la tjiji cupj mpes. Newa qjuesé ꞌaya, jupj quelel la qjuisiji mpes. Nin pꞌiyá pjü way ncupj qjuilal. 17Moisés qjuis wala tjevele Dios tjijyüꞌtá, nin pꞌin. Jesucristo más ꞌüsüs Moisés lal. Jesucristo mpes Dios pajal ꞌüsüs la tjiji cupj mpes. Jesucristo mpes wa qjuisin ꞌyüsa liji tꞌücꞌ way jupj pꞌiyá poꞌó. 18Gente lovin ma jus tjunuc Dios, yupj yun lal. Dios Popa pjaní qjuisin ꞌyüsa liji ꞌonin niná Dios. Dios Popa pjaní jupj, pꞌa cjuwá. Lovin se con̈ca Popay. Quelel liji jupj pajal”, nin tjevele Juan Jesucristo poꞌó.
Juan ꞌüsüs way tjevele Jesucristo más püné jupj lal.
(Mateo 3.11-12; Marcos 1.7-8; Lucas 3.15-17)
19Judiopan jis jepapan Jerusalén ntꞌa tapatja. Yupj sacerdotepan sin tjajam Juan ntꞌa jis la veles jupj lal. Auxiliarpan sin tjajam wa yupj jis lal. Sin tjajam la tjüꞌüy, tjunuc tsjan mpes ꞌücj bautizar la tjiji. Juan seletsja mpes tjevele jupj.
20Niná pajal tülü way jis wala tjevele Juan:
—Dios tjevele püná jupj ca jas majamas Jepa Püné judiopan ntꞌa, jis capj la pꞌacj. Nam ꞌa jupj tulucj.
21Yupj tjowelepj Juan lal:
—Jipj velen ninana tulucj jipj. ¿Pjacj ne jipj? ¿Ncu Elías jipj, jupj ne pajal püna tüpüꞌü?
Juan jis wala tjevele:
—Napj Elías tulucj.
Yupj la tjüꞌüy:
—¿Ncu jipj profeta niná Dios tjevele ca jas majamas cupj ntꞌa la veles jupj mpes?
Juan jis wala tjevele:
—Jupj tulucj napj.
22Mpes jupj lal tjowelepj:
—Qjuis wala mvelen pjacj jipj ne ꞌücj nin la cüjay niná. Cupj quelel jis wala velecj ncupj qjuisin tjajam. ¿Tsjan velen jipj pꞌiyá poꞌó?
23Jupj tjevele:
—Isaías Dios mpes tjevele pajal püna. La pjaní napj nin poꞌó tjevele jupj. Tjevele:
‘Yom niná wa cjuwá ntꞌa ca mim.
Pajal ca quelel mveles gente jilal napj mpes. Mpes yümücj ca mveles:
“Malala nujola nun, jümücj la luꞌulú jinwá.
Po ma malala nujola tꞌas quinam.
ꞌÜsüs nujola tꞌas qjuis Jepa Püné jos jinwá.” ’
Nin tjevele Isaías ca nin mvelé napj —tjevele Juan.
24Fariseopan nepenowá Juan lal tjowelepj wa. Jepapan sin tjajam wa yupj.
25Yupj tjowelepj:
—Jipj velen jipj Yom niná tulucj, Yom niná Dios tjevele ca jas majamas jis capj la pꞌacj judiopan. Jipj velen Elías tulucj jipj. Jipj velen jipj profeta niná tulucj, profeta niná Dios tjevele ca jas majamas la veles jupj mpes. ¿Tsjan pjucj bautizar la sejay jipj?
26Juan jis wala tjevele:
—Napj bautizar la nusejay la pꞌin ꞌüsǘ mpes. Yom pꞌa wa wine nun potjaqué ntꞌa, nun ma solejé pjacj ne jupj. 27Jupj jacꞌ locopyaya napj lal, Dios Popel vele jin. Jupj ca mveles wa nun jis lal Dios mpes. Pajal püné jupj napj lal. Napj pajal tsjicj way jupj lal. Po ꞌüsüs napj lal tsjiꞌ lejay jupj mpes. Napj jupj caite syoc la pꞌin, ꞌücj napj lal —nin tjevele Juan niyom jilal.
28Nin tepyala Betania moꞌó ꞌüsǘ naꞌaj poꞌó. Jordán lotsja ꞌüsǘ püné. Juan bautizar líjitsja neꞌaj.
Juan tjevele Jesucristo Dios Cjües ꞌyaya.
29Pꞌa jyawca Juan tjinyuca Jesús jactsja jupj ntꞌa. Mpes Juan tjevele neꞌaj tjatja jis lal: “¡Tjunucú nun! Niná Dios jas tjejyama. Jupj ca mpaꞌis gente mpes. Jupj tepeꞌe na, Dios ca perdonar lis mijis malala nyuca la tjajay. 30Tꞌan̈ pꞌin jupj mpes tjevelé. ‘Yom pjaní jacꞌ locopyaya napj lal —tjevelé—. Más püné way jupj napj lal. Mwalá way pǘꞌütsja napj lal, mpes más püné jupj napj lal’, nin tjevelé napj. 31Napj quelel sin ꞌyüsa lejaytsja israelpan pjacj ne jupj. Nin mpes tjacuwis, bautizar la sejay ꞌüsǘ lal. Püna pꞌin napj pꞌiyá ma seletsja pjacj ne jupj”, tjevele Juan.
32Juan pꞌa wa jis wala tjevele wa Jesucristo poꞌó. Tjevele: “Napj tjinyuc Dios Cjües sipipj jinwá tjacꞌ, jay la pꞌaꞌape tjacꞌ. Nayapé palá tjacꞌ Jesús ntꞌa, ne Jesús casá jáꞌasatsja. 33Püna pꞌin napj pꞌiyá ma seletsja Jesús niná Dios jas tjejyama cupj ntꞌa. Dios nin tjiꞌyüsa la tjiji niná. Jupj pꞌiyá nin tjejyama bautizar lis mejay napj. Jupj napj lal tjevele püna pꞌin: ‘Jipj ca nucun napj Neqjues palá ncuwim nayapé. Jupj yom pjaní ntꞌa ca mim lo pütꞌüs. Yom niná napj Neqjues se ꞌaya, gente jis lal la pütꞌüs, Dios Cjües ca jis capj ncon̈cos’, nin tjevele Dios napj lal. 34Jupj tjevele jin tjinyuc napj. Napj tjinyuc mpes nin tjevelé yomen niná ꞌa Dios Jatjam jupj”, nin tjevele Juan.
Juan discipulopan mátꞌeya Jesús ntꞌa tjil.
35Yaya Juan tón̈catsja niswá jupj discipulopan mátꞌeya jis lal. 36Jupj Jesús jus tjinyuca neꞌaj tjemey. Mpes Juan tjevele jupj discipulopan jis lal:
—Tjunuca nun. Niná Dios jas tjejyamá. Jupj ca mpaꞌis nosis casá patja mpes, oveja tsjicj jinwá. Jupj ca mpaꞌis malala nyuca la tjajay mpes, ca yupj mpatjam. 37Juan discipulopan mátꞌeya sin tjiꞌyüsa jupj tjevelá, mpes tjil cus la con̈ Jesús. 38Jesús la nujuya, yus tjinyuca cjüil jiquiltsja. Tjevele yupj jis lal:
—¿Tsjan nujisas nun?
Yupj tjowelepj jupj lal:
—Cupj quelel selecj caꞌaj pütꞌ jipj. Rabbí jipj. (Rabbí tjowelepj yupj jis tin; “jipj sin ꞌyüsa lejay”, velecj cupj.)
39Jupj tjevele yupj jis lal:
—Nculá, nucú nun.
Mpes tjil jupj lal. Tjunuc jupj tüpüꞌü ntꞌa. Tsꞌacꞌ niná jupj lal tjatja yupj. Las cuatro tꞌyaja na tjil jis la nuc Jesús tüpüꞌü ntꞌa.
40Mátꞌeya tjepjyacan̈ Juan tjevelá. Manas tjil cus la con̈ Jesús. Yupj popa pjaní Andrés lotsja. Andrés Simón Pedro tsüípetsja. 41Andrés Jesús jus tjinyuca na, len̈ way tjemey la tepyala jupj tsüipe Simón. Jus tjinyuca, tjevele jupj lal:
—Ncupj jus tjinyucucj Jepa niná Dios tjevele ca jas majamas cupj ntꞌa. Jupj ca qjuis capj mpꞌaꞌsas. ‘Cristo’ jupj velecj cupj. Nasa tjacꞌ jupj —tjevele Andrés.
42Andrés tsüipe lal tjacꞌ Jesús ntꞌa. Jesús Andrés tsüipe jus tjinyuca, tjevele:
—Simón jipj, Jonás jatjam jipj. Pꞌa wa ca lyá nsem jipj quinam. Cefas lyá nsem jipj. (Cefas “Pedro” javelepj tsꞌecj. “Pe püné” velecj cupj.)
Felipe, Natanael Jesús cus tocon̈ wa.
43Yaya Galilea ntꞌa quelel jámatsja Jesús. Mwalá way pꞌin, jupj Felipe jus tjinyuca, tjevele jupj lal:
—Ncapj tecyon̈ca. Najas ncapj cyon̈ lovin.
44Felipe Betsaida mpe ꞌeseptsja jupj. Pülücj patja Betsaida ntꞌa. Andrés, Pedro ꞌotsꞌipj, Betsaida mpe neꞌespan watsja yupj. 45Felipe Natanael la tepyala yacjaya. Jus tjinyuca na, jupj lal tjevele:
—Moisés tjevele Dios ca jas majamas Yom pjaní cupj ntꞌa, jupj ca qjuis capj la pꞌacj. Nin tepyaca jupj popel moꞌó. Profetapan nin pꞌiyá tapac Dios mpes. Nas tjinyucucj yomen niná yupj tjowelepj poꞌó. Jesús jupj, José jatjam jupj. Nazaret mpe ꞌesepj jupj.
46Natanael Felipe lal tjevele:
—Ma pyon Nazaret mpe ꞌesepj ca ꞌüsüs nacj jupj.
Felipe wola tjevele:
—Was, nucun jipj.
47Locopyaya Jesús Natanael jus tjinyuca, jactsja na. Jupj mpes tjevele:
—Israelpan popa tꞌücꞌ way jupj. Jupj Dios jos. Ma li tsuwile.
48Natanael tjevele jupj lal:
—¿ꞌOyn ne selen nus nyuc?
Jesús jupj wola tjevele:
—Napj jis tjinyuc, tsꞌoway ꞌalaꞌá jactsja na. Napj jis tjinyuc Felipe custjay ma jipj lal tjevele na pꞌin.
49Mpes Natanael Jesús wola tjevele:
—Rabbí, jipj Dios Jatjam. Israelpan jis Jepa Püné jipj.
50Jesús tjevele jupj lal:
—Napj tjevelé jipj lal jis tjinyuc tsꞌoway ꞌalaꞌá, mpes jipj pyon napj Dios Jatjam. Jipj ca nucun wa napj más ꞌüsüs ca la mejay wa niná lal.
51Jesús tjevele wa jupj lal:
—Nun ca nucú tsjun poꞌó jun cjol, Dios püꞌü ntꞌa. Tꞌücꞌ way velé. Ca nucú wa Dios angelpan viyá ca mal napj mpe, ca palá ncul wa niswá napj ntꞌa. Napj pꞌiyá niná Yomen Dios jas tjejyama —nin tjevele Jesús.
Loading reference in secondary version...