MATTHAI 1
1
Jesuh Khrih i Puzung
(Lk 3:23-38)
1Abraham le David casuan Jesuh Khrih i puzung tangthu cu hi bangin hi.
2Abraham i ca Isaak, Isaak i ca Jakob, Jakob i ca Judah le a suahpih unau panote haw hi. 3Judah i ca Perez le Zerah (a nu haw Tamar hi), Perez i ca Hezron, Hezron i ca Ram hi. 4Ram i ca Amminadab, Amminadab i ca Nahshon, Nahshon i ca Salmon, 5Salmon i ca Boaz (a nu cu Rahab hi), Boaz i ca Obed (a nu Ruth hi), Obed i ca cu Jesse hi. Jesse i ca cu David Kumpipa hi. 6David khan pen Israel mite Babilon ngamah sal a tan haw tian a pu le pate cu a nuailam bangin hi.
David i ca Solomon (a nu cu Uriah zi hi), 7Solomon i ca Rehoboam, Rehoboam i ca Abijah, Abijah i ca Asa, 8Asa i ca Jehoshafat, Jehoshafat i ca Joram, Joram i ca Uzziah, 9Uzziah i ca Jotham, Jotham i ca Ahaz, Ahaz i ca Hezekiah, 10Hezekiah i ca Manasseh, Manasseh i ca Amon, Amon i ca Josiah hi. 11Josiah i ca Jeconiah le a unaupihte hi.#2Kum 24:14-15; 2Khang 36:10; Jer 27:20;
12Babilon saltannak pen Jesuh hin tian a pu le pate cu a nuailam bangin hi. Jeconiah i ca Shealtial, Shealtial i ca Zerubbabel, 13Zerubbabel i ca Abiud, Abiud i ca Eliakim, Eliakim i ca Azor, 14Azor i ca Zadok, Zadok i ca Akhim, Akhim i ca Eliud, 15Eliud i ca Eleazar, Eleazar i ca Matthan, Matthan i ca Jakob, 16Jakob i ca Jesuh hingtu Mary i pasal Josef hi.
17Mah hangin Abraham khan pen David khan tian, khang sawm le khang li hi. David khan pen Babilon tei sal a tan haw tian khang sawm le khang li, Babilon tei sal a tan haw pepan Khrih i hin tian khang sawm le khang li hi.
Jesuh Khrih Hinnak
(Lk 2:1-7)
18Jesuh Khrih i hinnak cu hi bangin hi. A nu Mary cu Josef in hamin, a huaidun haw deuh laih ngawlin Hawvang Thiangtho ca nei tung tih thei hi.#Lk 1:27; 19Josef cu midik le mipha a hih ten Mary i zahcak tuk deih ngawlin kuamah i theih ngawlno in zamsan tukin ngaisung hi. 20Mahnaven hi bangin a ngaihsut laihtakin, Topa i vancungmi pa khat cu a mangah langin hitih hin hilh hi. “David casuan Josef aw, Mary sung a ummi nau cu Hawvang Thiangtho i neihtikmi a hih hangin zi tukin lau pahsun. 21Amah in capa hing tuk a, a min Jesuh tin sa tuk ci, itahim titale a miphun tei sualnak pen a nun haw pan tuk hi,” tin ti hi.#Lk 1:31;
22 Topa in profet hum tawnin, a hilh hamsa bangin a kim theihnak tukin na hi. Mah thute cu; 23“Khanglai himin ca pai tuk a, capa hing tuk hi, a min cu Immanuel tin sam haw tuk hi,” tin a hilhsami a kimnak tukin hi bangin a piangmi hi. Immanuel tihmi cu, “Pathian eimu lakah um,” tihnak hi.#Isa 7:14;
24Josef cu a khatlawh ten Topa i vancungmi tei hilhnak bangin Mary cu huai hi. 25Mahnaven capa a hin tian zaupih ma hi. Capa hingin, a min cu Jesuh ti in sa haw hi.#Lk 2:21;
Currently Selected:
MATTHAI 1: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.