Sat-kâ-li-â Sû 9

Sṳ́m-phan Lìn-koet

1Liá he Song-chú khí-sṳ ke fa:

Kì yí-kîn siên-pu oi chit-fa̍t Ha̍p-tet-lâ-thi lâu Thai-mâ-sṳ-kiet-sàng. M̀ tân-chhiang Yî-set-lie̍t kok kî-chhu̍k su̍k Song-chú, Si-li-â ke kîn-sàng ya su̍k Song-chú#9:1 “M̀ tân-chhiang ... Song-chú”: Hî-pak-lòi-vùn chhṳ̍t-yi̍t he “Sṳ-kiên-ngìn lâu Yî-set-lie̍t kok kî-chhu̍k ke muk-chû chhiòn-phu ngióng-mong Song-chú” ya-he “Song-chú khon-tén sṳ-kiên-ngìn lâu Yî-set-lie̍t kok kî-chhu̍k”.. 2Hàn-yû Ha̍p-tet-lâ piên-kie ke Ha̍p-mâ, pin Thai-ngì, Sî-tun lióng-sàng ke ngìn, put-kón kì-têu yû kí-thai ke chhòi-nèn, ya he su̍k Song-chú. 3Thai-ngì vi chhṳ-kâ hí sàng-pó, chit-chhùn kîm-ngiùn, tô-to chhiong kiê-lu ke nài-sâ. 4Chúng-he, Chú oi chiông kì só-yû ke chhiòn-phu nâ-chéu, fí-thet kì hói-song ke khièn-li#9:4 “fí-thet kì hói-song ke khièn-li” ya-he yi̍t-cho “chiông kì ke chhòi-fu fit-to hói-tú hi”.; liá-sàng voi pûn fó sêu-thet.

5Ke-sṳ̀, Â-sṳ̍t-kî-lùn khon-tó chhiu chho̍k-kiâng; Kâ-sat khon-tó chhiu thung-khú chṳ-khi̍t; Yî-kiet-lùn ya khiung-yong sṳt-mong to kien-seu. Kâ-sat voi sṳt-thet kiûn-vòng; Â-sṳ̍t-kî-lùn voi mò-ngìn he̍t. 6Ngoi-chhu̍k-ngìn voi he̍t chhai Â-sṳ̍t-thut. Song-chú kóng: “Ngài oi sṳ́ kiêu-ngau ke Fî-li-sṳ-ngìn pien pî-mì. 7Kì-têu m̀-voi chai sṳ̍t tai-hiet ke ngiuk, ngà-chhṳ́ phung m̀-voi yû tet-ngìn-nâu ke sṳ̍t-vu̍t. Só-chhûn ke ngìn voi sàng-cho Ngài ke chṳ́-mìn, chhiong Yù-thai ke yit-chhu̍k. Yî-kiet-lùn-ngìn voi sàng-cho Ngài ke chṳ́-mìn, lâu Yâ-pu-sṳ̂-ngìn#9:7 “Yâ-pu-sṳ̂-ngìn”: Yâ-lu-sat-lâng ngièn-lòi ke chhu-mìn; Thai-ví chṳ̂n-fu̍k pún-sàng heu, sàng-cho kì chhṳ-lî ke ngìn-mìn. khiung-yong. 8Ngài oi chhai Ngài ke kâ-yèn si-vì ôn-yàng, m̀ pûn kiûn-chhui chhîm-ngi̍p lòi chien-tha̍p. Ngài m̀-chún yû-ngìn chai khî-fu Ngài ke chṳ́-mìn, yîn-vi liá-ha Ngài ngin-chṳ̂n khon-tén Ngài ke kâ.”

Chiông-lòi ke Kiûn-vòng

9He̍t chhai Siak-ôn ke ngìn â, oi fôn-hí khoai-lo̍k!

Yâ-lu-sat-lâng ke ngìn-mìn â, oi fôn-hí na-thiên!

Khon â, ngì ke kiûn-vòng lòi lé!

Kì he kûng-ngi ke, kì he tet-sṳn ke,

chúng-he chhin khiâm-pî khì-tén lì-è lòi,

khì-tén yit-thiàu se lì-è.

10Song-chú kóng:

Ngài oi nâ-chéu Yî-fap-lièn ke chan-chhâ,

chhù-thet Yâ-lu-sat-lâng ke chan-mâ;

chan-chhòng ke kiûng ya oi áu-thet.

Ngì-têu ke vòng oi hiong kok-koet kóng fò-phìn;

kì oi thúng-chhṳ liá-hói to ke-hói,

tui Yu-fat-lâ-tí-hò to thi-khi̍t.

Song-ti Chṳ́-mìn ke Fu̍k-hîn

11Song-chú kóng:

Yîn-vi Ngài sṳt yung hiet lâu ngì li̍p-yok,

Ngài oi chiông ngì-têu pûn-ngìn chok-hi koân ke,

tui châu súi-fut tî-poi piong chhut-lòi.

12Pûn-ngìn koân hàn-yû chṳ́-mong ke ngìn â,

oi chón-lòi! Chón-to ôn-chhiòn ke sàng-pó!

Ngài kîm-pû-ngit lâu ngì-têu kóng,

Ngài oi kâ-phi su-fuk lòi pú-sóng ngì-têu.

13Ngài oi yung Yù-thai cho Ngài ke kiûng,

yung Yî-fap-lièn cho Ngài ke chien;

Siak-ôn â, Ngài oi sṳ́ ngì ke ngìn-mìn hong hí-lòi,

chhiong yúng-sṳ ke tô, hi kûng-tá Hî-lia̍p-ngìn.

14Song-chú oi chhai Kì chṳ́-mìn ke táng-kô hién-hien;

Kì sa ke chien chhiong ngiap-lang.

Chṳ-kô ke Song-chú oi phùn yòng-kok;

Kì oi chhô-tén nàm-phién ke phau-fûng-yí lòi.

15Song-chú — Van-kiûn ke Ngièn-soi oi pó-fu Kì ke chṳ́-mìn;

kì-têu oi sêu-me̍t tui-thi̍t,

tha̍p-tén thi̍t-ngìn fit ko-lòi ke sa̍k-thèu#9:15 “tha̍p-tén ... sa̍k-thèu” ya-he yi̍t-cho “yung fit ko-hi ke sa̍k-thèu tá-vang thi̍t-ngìn”.,

thai-sâng vè-sê, chhiong sṳ̍t chiú-chui ke ngìn.

Kì-têu oi chhiong hien-chi sṳ̀ chông-hiet ke vón-kûng khiung-yong, mân-sṳ̂n he thi̍t-ngìn ke hiet;

hiet liù-tén hâ, chhiong thèu-sâng ke hiet chhai chi-thàn ke si-chak kok liù-tén hâ#9:15 Pún-chiet chhai Hî-pak-lòi-vùn yi-sṳ mò chhîn-chhú..

16Chhai ke-ngit, Song-chú — kì-têu ke Song-ti oi chṳ́n-kiu kì-têu,

chhiong mu̍k-ngìn kiu yòng-khiùn thot-lì ngùi-hiám.

Kì-têu voi chhai Kì ke thú-thi song fat-kông,

chhiong miên-liù táng ke pó-sa̍k yit-yong.

17Kì-têu he ngióng-pân ke chiâng#9:17 “Kì-têu he ngióng-pân ke chiâng” ya-he yi̍t-cho “Kì he ngióng-pân ke liòng-san, ngióng-pân ke yùng-kông”.!

Yû ńg-kuk sṳ́ seu-ngièn sṳ̂n-thí chap-chen,

yû sîn-chiú sṳ́ seu-ńg yùng-mau pien-chiâng.

Currently Selected:

Sat-kâ-li-â Sû 9: THV12Rdb

Highlight

Copy

Want to have your highlights saved across all your devices? Sign up or sign in

Learn more about HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)