Tan-yî-lî Sû 11

1Kì yu kóng: “Chhai Mí-tí-â-ngìn Thai-liù-sṳ cho vòng ke thi-yit ngièn, ngài fu-chit pông-chhu Mí-kâ-le̍t#11:1 “Mí-kâ-le̍t”: Hî-pak-lòi-vùn chhṳ̍t-yi̍t he “kì”., sṳ́ kì kiên-khiòng. 2Ngài liá-ha oi lâu ngì kóng ke fa hàn-he chṳ̂n-sṳ̍t ke.”

Âi-khi̍p-vòng lâu Si-li-â-vòng

Ke thiên-sṳ́ kóng: “Pô-sṳ̂ hàn-oi kîn-li̍t sâm-ke vòng ke thúng-chhṳ, chhṳ̍t-to thi-si ke vòng chhut-hien. Liá thi-si ke vòng pí khì-thâ ke vòng voi kâ-chhin hó-ngiak. Chhai kì chui yû khièn-sṳ, chui fu-khiòng ke sṳ̀, kì voi ngiâ-hí chhiòn-koet kûng-kit Hî-lia̍p-koet.

3“Yèn-heu yû yit-ke yúng-kám ke vòng voi chhut-hien; kì voi cheu chhṳ-kâ ke yi-sṳ lòi thúng-chhṳ khi̍t-thai ke ti-koet#11:3 Pún-chiet he chṳ́ Hî-lia̍p ti-koet thi-yit ke thúng-chhṳ-chá Â-li̍t-sân-thai Thai-ti.. 4Chúng-he, tông kì ke khièn-sṳ to chui khiòng-sṳn ke sṳ̀, kì ke ti-koet chhiu voi fûn-lie̍t cho si phu-fun. Kì ke heu-thoi mò fap-thu sṳ̀n-chiap kì ke vòng-vi, kì ke vòng-koet voi von phe̍t-ngìn thúng-chhṳ, chúng-he mò chhiong kì thúng-chhṳ ke sṳ̀ án-khiòng.

5“Âi-khi̍p-vòng#11:5 “Âi-khi̍p-vòng” Hî-pak-lòi-vùn chhṳ̍t-yi̍t he “Nàm-fông Vòng”, liá-chông chhut-hien kí-pái. voi pien tông-khiòng, chúng-he kì ke chiông-kiûn tông-chûng yû yit-ke pí kì hàn-kha khiòng ke voi chhut-hien, só thúng-chhṳ ke vòng-koet voi hàn-kha thai. 6Chhin-tô ngièn-heu, Âi-khi̍p-vòng voi lâu Si-li-â-vòng#11:6 “Si-li-â-vòng” Hî-pak-lòi-vùn chhṳ̍t-yi̍t he “Pet-fông Vòng”, liá-chông chhut-hien kí-pái. kiet-mèn, chiông moi-é ka-pûn kì. Chúng-he liá lièn-mèn m̀-voi vì-chhṳ̀ chhòng-kiú. Liá-ke Âi-khi̍p kûng-chú lâu kì ke ló-kûng, se-ngìn-è#11:6 “se-ngìn-è” he kîn-kí yit-têu kú yi̍t-pún, Hî-pak-lòi-vùn he “â-pâ”., pin thùng kì khiung-ha hi ke phu̍k-ngìn chhiòn-phu voi pûn-ngìn chhṳ̀-thet. 7Mò kí-kiú heu, kì ke yit-ke chhîn-chhit voi cho Âi-khi̍p-vòng, pin kûng-kit Si-li-â-vòng ke kiûn-chhui, chin-ngi̍p kì-têu ke sàng-pó, tá-yàng kì-têu. 8Kì voi chiông kì-têu ke sṳ̀n-siong lâu sṳ̀n-meu tú ke kîm-hi, ngiùn-hi chhiòn-phu tai-chón Âi-khi̍p. Kîn-ko kí-ngièn ke thai-phìn ngit-è heu, 9Si-li-â-vòng voi hi chhîm-lio̍k Âi-khi̍p, chúng-he chui-heu voi pûn-ngìn kiuk chón-hi.

10“Si-li-â ke-têu vòng-chṳ́ voi hó-hó chún-phi siông-chhṳ̀, seu-si̍p khi̍t-tô ke kiûn-chhui. Khì-chûng yit-ke vòng-chṳ́ voi chhiong thai-súi án-ngiòng kûng-tá thi̍t-ngìn ke sàng-pó. 11Âi-khi̍p-vòng voi thai fat-khién, tai-liâng kiûn-chhui chhut-hi siông-chhṳ̀, kûng-tá Si-li-â vòng, chok-tó kì khi̍t-tô ke kiûn-chhui. 12Âi-khi̍p-vòng voi yîn-vi sêu-me̍t kûi-van ngìn tet-tó sṳn-li, chhiu pien-to fî-sòng kiêu-ngau, chúng-he kì ke sṳn-li m̀-voi vì-chhṳ̀ chhin-kiú.

13“Si-li-â-vòng voi chón-hi seu-si̍p pí yî-chhièn kha-tô kha khiòng-thai ke kiûn-chhui; sṳ̀-kî yit-to, kì voi tai-liâng chông-phi liòng-hó ke khiòng-thai kiûn-chhui to-chón-lòi. 14Ke-sṳ̀, voi yû chhin-tô ngìn phoi-ngia̍k Âi-khi̍p-vòng. Tan-yî-lî â, ngì thùng-pâu chûng yû-têu phau-thù ya voi phoi-ngia̍k, sṳ́ yi-siong sṳ̍t-hien; chúng-he kì-têu voi pûn-ngìn tá-sû. 15Si-li-â-vòng voi vì-kûng pin cham-liâng fòng-ví ke sàng-chṳ́n; Âi-khi̍p chui chîn-liòng ke kiûn-chhui ya mò fap-thu tí-khong kì. 16Si-li-â-vòng ke chhîm-lio̍k voi tông sun-li, mò-ngìn yû phan-fap fán-khong. Kì voi cham-liâng ke tông-chiâng ke thi#11:16 “ke tông-chiâng ke thi” chṳ́ Yî-set-lie̍t., vàn-chhiòn khúng-chṳ kì.

17“Si-li-â-vòng voi kie-va̍k chhut-thung chhiòn-kiûn hi chṳ̂n-fu̍k Âi-khi̍p. Vi-tó oi sêu-me̍t Âi-khi̍p, kì kie-va̍k siên lâu Âi-khi̍p kiet-mèn, chiông chhṳ-kâ ke moi-é ka ko-hi; chúng-he kì ke kie-va̍k tui kì mò li-yit, m̀-voi sṳ̀n-kûng. 18Heu-lòi, kì voi kûng-tá hói-sùn ke-têu koet-kâ, pin cham-liâng khì-chûng chhin-tô koet. Chúng-he yû yit-ke ngoi-koet chiông-kiûn voi tá-yàng kì, chú-chṳ́ kì ke ok-hàng, sṳ́ kì ke ok-hàng pien-sṳ̀n chhṳ-kâ ke sún-hoi. 19Kì voi chha̍t-thui chón-hi chhṳ-kâ ke sàng-pó, to-mî pûn-ngìn sêu-me̍t; liá chhiu-he kì ke kiet-khiu̍k.

20“Kì yî-heu voi yû nang-ngoi yit-ke vòng chiap kì ke vi; liá vòng vi-tó oi chen-kâ vòng-koet ke chhòi-fu, chhiu phai yit-sà hi fu-chit chhû tông-chhûng ke soi lòi ap-pet ngìn-mìn. Chúng-he mò kí-kiú liá vòng chhiu voi pûn-ngìn am-sat, m̀-he sí chhai chan-chhòng song.”

Si-li-â ke Phau-kiûn

21Ke thiên-sṳ́ ki-siu̍k kié-sṳt kóng: “Liá-sṳ yî-heu, yû yit-ke sià-ok ke ngìn voi chhióng-tó Si-li-â ke vòng-vi. Kì mò khièn-li sṳ̀n-chiap vòng-vi, chúng-he chhai ngìn mò thì-fòng ke sṳ̀-chiet, yung kúi-cha ke sú-thon chhióng-tó chṳn-khièn. 22Kì voi chha̍t-tái sêu-me̍t só-yû fán-tui ke sṳ-li̍t, lièn Song-ti ke thai-chi-sṳ̂ ya chhai-nui. 23Kì yung kiet-yok lòi khî-phien phe̍t-koet; kì só thúng-chhṳ ke sûi-yèn he yit-ke se-koet, chúng-he ye̍t-lòi ye̍t khiòng-thai. 24Kì voi chhai ngìn mò thì-fòng ke sṳ̀-chiet chhîm-ngi̍p koet-chûng chui fûng-fu ke só-chhai, cho kì chú-siên chhṳ-chhiùng m̀-sṳt cho-ko ke sṳ. Kì voi chiông chan-li-phín pûn-pûn phu-ha. Kì voi kie-va̍k kûng-tá sàng-pó, chúng-he kì ke ngit-è pin m̀-voi chhòng-kiú.

25“Kì voi chhin yúng-kám tai-liâng thai-kiûn kûng-tá Âi-khi̍p-vòng; Âi-khi̍p-vòng ya voi yung khiòng-thai ke kiûn-chhui lòi lâu kì siông-chhṳ̀, chúng-he m̀-voi sṳ̀n-kûng, yîn-vi kì voi pûn phan-thù mèu-hoi. 26Kì chui chhîn-sin ke ngìn sióng-oi sêu-me̍t kì; kì ke kiûn-chhui voi pûn-ngìn sêu-me̍t, chhin-tô ngìn voi chhai chan-chhòng pûn-ngìn chhṳ̀-sí. 27Liá yî-heu ke lióng-ke vòng voi khiung-chok sṳ̍t-fan, chúng-he kì-têu sîm-chhùn ok-yi, fu-siông khî-phien. Kì-têu m̀-voi tha̍t-sṳ̀n sîm-ngien, yîn-vi chṳ́-thin ke ngit-khì hàn-màng to. 28Si-li-â-vòng voi mân-chai chan-li-phín chón-hi pún-koet; kì kiet-sîm oi sêu-me̍t Song-ti chṳ́-mìn ke sin-ngióng, chhiu sùi chhṳ-kâ ke yi-sṳ lon-cho, yèn-heu chang chón-hi pún-koet.

29“To-liáu chṳ́-thin ke ngit-khì, kì voi chai hiong Âi-khi̍p chhièn-chin; chúng-he liá-pái ke chhìn-khóng lâu yî-chhièn mò khiung-yong. 30Lò-mâ-ngìn#11:30 “Lò-mâ-ngìn” Hî-pak-lòi-vùn chhṳ̍t-yi̍t he “Kî-thì-ngìn”. ke chan-sòn voi lòi kûng-tá kì, hoi kì kiâng-to mò-kat mò-sat.

“Si-li-â-vòng voi tông yen-than chha̍t-thui, pin nâ pho-fái Song-ti chṳ́-mìn ke sin-ngióng lòi chhut thai-hi. Kì voi thâng-sin ke-têu phoi-ngia̍k sin-ngióng ke ngìn ke kien-ngi. 31Kì phai-lòi ke kiûn-chhui voi siet-thu̍k sṳn-thien, kim-chṳ́ tak-ngit yin-kôi hien ke chi, yu chiông ke ‘Fí-me̍t-sin, sià-ok ke tûng-sî’ piong chhai sṳn-thien tî-poi. 32Kì voi yung kúi-kie lòi phien-tó vì-poi sṳn-yok chá ke chṳ̂-chhṳ̀; chúng-he ke-têu chûng-sîm thèn Song-ti ke ngìn voi kông-khiòng hí-lòi fán-khong. 33Mìn-kiên ke-têu chhûng-mìn ke liâng-chhiu voi kau-thô chung-ngìn, sṳ́ kì-têu mìn-pha̍k; chúng-he, voi yû yit-chham sṳ̀-kiên, yû-têu ngìn voi chan-sí, pûn fó-sêu sí, pûn-ngìn chhióng-kiap, pûn-ngìn chok-chéu. 34Thù-sat chin-hàng ke sṳ̀, Song-ti ke chṳ́-mìn voi tet-tó yit-si̍t-é pông-chhu thin-thin; sûi-yèn chhin-tô ngìn lòi lâu kì-têu kiet-mèn, chúng-he mò sṳ̀n-sṳ̍t. 35Yû-têu chhûng-mìn ke liâng-chhiu voi pûn-ngìn chhṳ̀-thet, chúng-he kì-têu ke hî-sên voi sé-chhiang, thon-lien ngìn-mìn, sṳ́ kì-têu sàng-cho sùn-kiet. Liá-sṳ voi ki-siu̍k, chhṳ̍t-to Song-ti só-thin ke kiet-khiu̍k lòi-to.

36“Si-li-â-vòng voi sùi-yi lon-cho, chhṳ-khoâ kì pí só-yû sṳ̀n-mìn hàn-kha ví-thai, sṳm-chṳ kô-ko van-sṳ̀n ke Sṳ̀n — Song-ti. Kì voi ki-siu̍k án-ngiòng lon-kóng, chhṳ̍t-to Song-ti chit-fa̍t kì ke ngit-è. Song-ti yit-thin voi sṳ̍t-hien Kì ke kie-va̍k, chhie̍t-tui m̀-voi kói-pien. 37Liá-ke vòng m̀-voi kin-chhung chú-siên só-pai ke sṳ̀n-mìn, ya m̀-voi chûn-chhung ke-têu fu-ngìn-kâ só-oi ke sṳ̀n-mìn. Khì-sṳ̍t, kì m̀-voi chûn-kin só-yû ke sṳ̀n-mìn, yîn-vi kì chhṳ-kâ láu-tó pí só-yû ke sṳ̀n-mìn hàn-kha ví-thai. 38Kì fán-chón voi hi pai chú-siên mò pai-ko, ke pó-fu sàng-pó ke sàng-vòng. Kì hiong liá sṳ̀n-mìn hien kîm, ngiùn, pó-sa̍k, lâu khì-thâ kui-chhung ke lî-vu̍t. 39Kì voi yung sin-fung yi-kau sṳ̀n-mìn ke kiûn-chhui pó-sú kì ke sàng-pó. Chung-yi kì thúng-chhṳ ke ngìn, kì voi su kì-têu kô-kôn thi-vi chhṳ-lî mìn-chung, yu fûn-fûng thú-thi, lòi cho po-sóng.

40“Kiet-khiu̍k lòi-to ke sṳ̀, Âi-khi̍p-vòng voi chhut-pîn kûng-tá Si-li-â-vòng. Si-li-â-vòng voi si̍p-ha̍p kì só-yû ke kiûn-li̍t, yung chan-chhâ, chan-mâ, lâu sòn-chhui chhiong phau-fûng lòi kûng-kit chón-hi. Kì voi chhîm-lio̍k chhin-tô koet-kâ, chhiong cho thai-súi chhûng-to mân-thi, 41sṳm-chṳ voi chhîm-ngi̍p ke tông-chiâng ke thi#11:41 “ke tông-chiâng ke thi” chṳ́ Yî-set-lie̍t., chhṳ̀-sí kûi-van ngìn; chúng-he Yî-tûng-ngìn, Mô-ap-ngìn, lâu thai-phu-fun ke Â-mùn-ngìn voi thot-lì kì ke sú. 42Kì kûng-tá ke-têu koet-kâ ke sṳ̀, lièn Âi-khi̍p ya m̀-voi leu-thet. 43Kì voi kón-lî Âi-khi̍p tú-chhùn ke kîm-ngiùn chhòi-pó lâu khì-thâ kui-chhung ke tûng-sî. Kì voi chṳ̂n-fu̍k Li-pí-â lâu Kú-sṳ̍t. 44Heu-lòi tui tûng-phién lâu pet-phién chhòn-lòi ke fûng-sâng hoi kì chhin chho̍k-kiâng; kì voi thai fat-khién lòi chhut-pîn, oi chiông chhin-tô ngìn chhṳ̀-sí me̍t-chhie̍t. 45Kì voi chhai thai-hói lâu chhin-chiâng ke sṳn-sân chṳ̂-kiên chiông vòng-kiûng ke thai chong-phùng tap hí-lòi. Chúng-he kì ke sí-khì to lé, mò-ngìn nèn pông-chhu kì.”

Currently Selected:

Tan-yî-lî Sû 11: THV12Rdb

Highlight

Copy

Want to have your highlights saved across all your devices? Sign up or sign in

Learn more about HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)

Tan-yî-lî Sû 11

Popular Bible Verses from
Tan-yî-lî Sû 11

Bible:

Hakkafa (Roman script)

Version: HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán) - THV12Rdb

Tan-yî-lî Sû 11

Tan-yî-lî Sû 11

Popular Bible Verses from Tan-yî-lî Sû 11

Bible:

Hakkafa (Roman script)

Version: HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán) - THV12Rdb

Tan-yî-lî Sû 11

Popular Bible Verses from
Tan-yî-lî Sû 11