1
Ɨ tɨ cɨn autyejche i yuꞌuxari
1Jajcua ɨmɨ pu seijraꞌacaa aɨjna ɨ tɨ jee tɨcɨn ɨ nyuucari. Ajta, aɨjna ɨ nyuucari, aɨ pu seijraꞌacaa ɨ Dioj jemi. Ajta aɨ pu Dioj puéenyaꞌa aɨjna ɨ nyuucari. 2Aɨ pu jajcua ɨmɨ seijraꞌacaa ɨ Dioj jemi tɨꞌɨj cai xɨ maꞌahuaꞌacaa ɨ chaanaca. 3Nain tɨj naꞌa tɨ tiꞌiseijreꞌe, aɨjna nyuucari jetze pu ayan tyuꞌutaseijre. Aɨ pu ɨ Dioj, ajta aɨjna ɨ nyuucari, aɨ mu naijmiꞌi tyuꞌutaahuacaꞌa tɨj puaꞌamua yen tiꞌiseijreꞌe. Ajta, capu tiꞌitɨ ayan tiꞌiseijraꞌa aꞌameꞌencheꞌe tɨ puaꞌa cai aɨn nyuucari ayan tyuꞌutaxajtancheꞌe.
4Tɨj naꞌa jajcua ɨmɨ tɨ yu eꞌireꞌenye, aɨj pu jetze eꞌiráninyeicaꞌa aɨjna tɨ iꞌiruuri rusen cɨmeꞌe. Ajta aɨj pu cɨn ayan huanyeeriꞌicɨcaa huaꞌa tzajtaꞌa ɨ tyaɨte aɨjna cɨmeꞌe tɨ cɨn iꞌiruuri mej mi meyan raamuaꞌaree aꞌij tɨ een ɨ Dioj jemi. 5Ajta aɨjna tej teyan tyajta ratamuaꞌamua tɨcɨn tatzari, aɨ pu huanyeeriꞌicɨ aꞌaraa aɨme tzajtaꞌa ɨ tyaɨte ɨ maj áꞌujhuaꞌanyaꞌa tɨcaꞌamisteꞌe. Majta aɨme ɨ mej meyan tɨcaꞌamisteꞌe áꞌujhuaꞌanyaꞌa, camu raayɨꞌɨtɨhuaꞌa maj raꞌujeꞌica ɨ tatzari tɨ huaꞌatzajtaꞌa huanyeeriꞌicɨcaa.
6Seij pu ayan u aꞌuveꞌeme tɨ Dioj ayan yaꞌutaityacaꞌa. Ayaa pu antyahuaacaꞌa tɨcɨn Juan. 7Ayaa pu een cɨn u aꞌuveꞌeme tɨ ij ayan aɨjna cɨn tyaꞌanxájta aꞌij tɨ ari tiꞌijmuaꞌareeracaꞌa aɨjna cɨmeꞌen tɨ iꞌi tatzari, mej mi naimiꞌi meyan tyaꞌantzaahuateꞌen aꞌij tɨ aɨn ayan tihueꞌixaateꞌe. 8Ajta aɨjna ɨ Juan, capu aɨn puéenyaꞌa ɨ tatzari silu ayaa puꞌu een cɨn aꞌuveꞌeme tɨ ij aɨjna cɨn tihuaꞌutaꞌixaateꞌen aɨjna jetze maꞌacan aɨjna ɨ tatzari. 9Ajta aɨn tɨ tzaahuatiꞌiraꞌa cɨn tatzari pueen, tɨ ajta huatatátza huanyeeriꞌi aꞌayeꞌi huaꞌa tzajtaꞌa ɨ tyaɨte, aꞌachu maj puaꞌamua yen seijreꞌe, aɨ pu mu aꞌuvéꞌemaꞌacaa iiyan chaanaca japua.
10Aɨ pu ayan huatyajturaa iiyan chaanaca japua. Ajta, aɨ pu nain tyuꞌutaahuacaꞌa tɨj naꞌa tɨ yan chaanaca japuan tiꞌiseijreꞌe. Ma majta maɨn, ɨ mej yan huachaatɨmaꞌacaa iiyan chaanaca japua, camu raamuáꞌa. 11Aɨ pu mu aꞌuvéꞌemaꞌacaa, ajta aɨme jemi ɨ rutyaɨtestyamuaꞌa huatyajturaa. Majta aɨme, camu raꞌancureꞌeviꞌitɨ. 12Ma majta, seica mu xaa raꞌancureꞌeviꞌitɨ aɨme ɨ tyaɨtestyamuaꞌameꞌen. Ajta aɨn, ayej tihuaꞌutaꞌa aɨmej ɨ maj raꞌastijre mej mi yaujmuaꞌameꞌen pueenyaꞌa muaꞌaraꞌani ɨ Dioj aꞌachu maj puaꞌamuaca. 13Majta aɨme, camu meyan tyetyaca jetze aꞌiráninyeicaꞌa maɨjna cɨmeꞌe tɨ tyaataꞌa ayan tiꞌijxeꞌevaꞌacaa. Camu aꞌatzu xaa nyaꞌu, silu ayaa muꞌu maɨjna jetze ajtyamaꞌacan ɨ Dioj.
Aɨ pu huataujtevistacaꞌa ɨ nyuucari.
14Ajta aɨn ɨ nyuucari aɨ pu ayan huataujtevistacaꞌa. Aɨ pu ajta ityejmi jemi huatyajturaa. Tyan tu tyajta teyan raaseij tyaɨjna ɨ tɨ cɨn rɨꞌɨ tiraataꞌa ɨ Dioj. Tyan tu raaseij ɨ tɨ cɨn Dioj rɨꞌɨ tyuꞌutaꞌa aɨjna cɨmeꞌe tɨ aɨ naꞌa caj tiꞌiyaujraꞌan ɨ Dioj. Aɨ pu eꞌemaꞌacan ɨ ruyaꞌupua jemi. Nain pu cɨn rɨꞌɨ titájchaɨcaꞌa ruxéꞌeviꞌiraꞌa cɨmeꞌe. Ajta, nain pu ayan tzaahuatiꞌiraꞌa cɨn tyuꞌutaxajtacaꞌa. 15Ajta aɨn ɨ Juan, ayaa pu aɨjna cɨn tyuꞌutaxajtacaꞌa, ayan tiꞌixaata tɨcɨn:
—Ai pu aɨn pueen ɨ nyaj cɨmeꞌen nyeri tyajamueꞌixaa yee aɨjna tɨ yeꞌeveꞌeme nyaj cujtaꞌan, eitzeꞌe pu vaꞌacan cɨn tiꞌityejvee nyacai inyaa, aꞌini aɨ pu anacai seijraꞌacaa nyacai inyaa. —Ayaa pu tyuꞌutaxajtacaꞌa.
16Naijmiꞌi ityan tuꞌuri teyan tyaɨjna cɨn raꞌancuraꞌa tyaɨjna cɨmeꞌe ɨ tɨ nain cɨn rɨꞌɨ naa titataꞌaca. Ruxeꞌeveꞌeviꞌiraꞌa pu cɨn rɨꞌɨ titataꞌaca tɨj naꞌa tɨ yu aucaꞌitɨ aꞌame. 17Aꞌini ayaa puꞌu, aɨjna ɨ nyuucari ɨ maj cɨn tiꞌijta, Dioj pu ayan raatyajtuaa ɨ Moisés jemi. Dioj pu ajta ayan tiréijca aɨjna ɨ Jesús, tɨ ajta Cɨriistuꞌu pueen, tɨ ij aɨn ruxéꞌeviꞌiraꞌa cɨn rɨꞌɨ titaataꞌan, tɨ ij ajta tzaahuatiꞌiraꞌa cɨn titaataseijrateꞌen aꞌij tɨ tiꞌijxeꞌeveꞌe ɨ Dioj. 18Capu aꞌatɨ aꞌanaj raaseij ɨ Dioj, silu aɨ puꞌu tɨ aɨ naꞌa caj tiꞌiyaujraꞌan. Ruxeꞌeveꞌeviꞌiraꞌa pu cɨn rɨꞌɨ titataꞌaca tɨj naꞌa tɨ yu aucaꞌitɨ aꞌame. Capu aꞌatɨ aꞌanaj raaseij ɨ Dioj, silu aɨ puꞌu tɨ saɨj naꞌa yaujraꞌan pueen, tɨ ajta Dioj jemi seijreꞌe, aɨ pu ayan taatamuáꞌate aꞌij tɨ een.
Ɨ Juan tɨ huaꞌamuaɨꞌɨhuacaraꞌa pu tyaꞌanxájta cɨmeꞌen ɨ Jesús tɨ iꞌi Cɨriistuꞌu
(Mt. 3:11-12; Mr. 1:7-8; Lc. 3:15-17)
19Majta aɨme ɨ maj Israel jetze ajtyamaꞌacan, maj majta tejeꞌijta maujna Jerusalén, aɨ mu huajaꞌutaityacaꞌa ɨ Juan jemi seica ɨ maj tiꞌivaɨraꞌacaa u huaꞌateyujtaꞌa, majta seica ɨ maj maɨjna jetze aꞌiraanye aɨjna ɨ Leví tyaacan mej mi meyan tiraataihuaꞌu tɨ cɨmeꞌen yee: “¿Aꞌataani paj pɨrɨcɨ?” 20Ajta aɨjna ɨ Juan, capu huaꞌutaꞌijmɨjriꞌi maj raamuaꞌati silu ruxéꞌeviꞌiraꞌa pu cɨn ayan tihuaꞌutaꞌixaa mejseiiraca naijmiꞌi ɨ tyaɨte. Ayan tɨcɨn:
—Canu nyaa nyaɨn pueen ɨ Cɨriistuꞌu tɨ Dioj raꞌantihuau.
21Matɨꞌɨj mi meyan tiraataihuaꞌuriꞌi tɨcɨn:
—¿Aꞌataajni paj pueen? ¿Ni paɨn pueen aɨjna ɨ Elías?
Ajta ayan tihuaꞌutaꞌixaa tɨcɨn:
—Canu nyaɨn pueen.
Majta meyan tɨcɨn:
—¿Ni paɨn pueen ɨ tyaj rachuꞌeveꞌe, aɨjna tɨ Dioj jetze maꞌacan titaataꞌixaateꞌesin?
Ayaa pu tyuꞌutanyúu tɨcɨn:
—Canu nyaɨn pueen.
22Matɨꞌɨj mi meyan tiraataꞌixaa tɨcɨn:
—¿Aꞌataani nyaꞌu paj pueen muaa? Pataꞌaj taataꞌixaateꞌen aꞌa cɨmeꞌen tej ti tyajta teyan tihuaꞌutaꞌixaateꞌen aɨme ɨ maj tajaꞌutaityacaꞌa. ¿Aꞌini petiꞌixa aꞌa cɨmeꞌen?
23Aj puꞌi ayan Juan tyuꞌutanyúu tɨcɨn:
—Nyaa nu nyaɨn pueen aɨjna tɨ ayan cɨmeꞌen tyuꞌutaxajtacaꞌa aɨjna ɨ Isaías tyaacan tɨ nuꞌu ayan aꞌatɨ pu aꞌa avéꞌejijhua aujna huaꞌɨtzita. Ayan tɨcɨn: “Rɨꞌɨ xu huaujruuren sej si seyan tyamuaꞌa naa raꞌancureꞌeviꞌitɨn saɨjna ɨ tavastaraꞌa.”
24-25Majta seica ɨ fariseos, ɨ maj tyuꞌutaijtiꞌire, ayaa mu tiraataihuaꞌuriꞌi tɨcɨn:
—Tɨ puaꞌa peyan muaa cai aɨn pueen aɨjna ɨ Cɨriistuꞌu, pajta cai muaa aɨn pueen ɨ Elías, pajta cai muaa aɨn pueen aɨjna ɨ tyaj rachuꞌeveꞌe tɨ Dioj jetze maꞌacan titaataꞌixaateꞌesin, ¿aꞌini een cɨn peyan huaꞌamuaɨꞌɨhua ɨ tyaɨte?
26Ayaa pu tyuꞌutanyúu aɨjna ɨ Juan tɨcɨn:
—Nyaa nu aꞌamuamuaɨꞌɨhua jaj cɨmeꞌe. Ma ajta, seij pu ayan muejmi jemi seijreꞌe ɨ saj cai ramuaꞌate. 27Ai pu aɨn pueen ɨ tɨ auj me eꞌeveꞌeme. Aꞌini inyaa cɨleenyaꞌa nu cɨn tiꞌityejvee ɨ jemin, capu ayan tiraavijteꞌe nyaj raꞌajtaɨꞌɨpɨꞌɨn ɨ caꞌacairaꞌan.
28Ayaa pu tyuꞌuruu aujna aꞌahuaꞌa tɨ ayan tyajaꞌarajtyahuaa tɨcɨn Betábara, u jetze pujmeꞌen, ɨ atyaꞌanaraꞌan jetze ɨ Jordán, aꞌu tɨ aɨn Juan huajaꞌamuaɨꞌɨhuacaꞌa.
Cɨmeꞌen ɨ canyaꞌa tɨ Dioj raatámuaɨꞌɨvajta
29Yaa ruꞌijmuaꞌa yee, aɨ pu huaseij aɨjna ɨ Jesús tɨ eꞌeveꞌemaꞌacaa ajna jemin. Aj pu i ayan tyuꞌutaxajtacaꞌa aɨjna ɨ Juan tɨcɨn:
—Casiꞌi xaaseij muan, mɨ canyaꞌa Dioj tɨ raatámuaɨꞌɨvajta. Ai pu aɨn pueen tɨ ruxéꞌeviꞌiraꞌa cɨn raꞌurauuna nain cɨmeꞌe aꞌij mej tityaꞌutyajturaa ɨ Dioj jemi aꞌachu maj puaꞌamua yen seijreꞌe iiyan chaanaca japua. 30Ai pu aɨn pueen ɨ nyaj cɨmeꞌen neyan tyuꞌutaxajtacaꞌa nyatɨꞌɨj neyan tyajamuaataꞌixaa yee: “Saɨj pu ye éꞌeveꞌemaꞌa aꞌame nyahuaritaꞌa majcaꞌihua, tɨ ajta eitzeꞌe vaꞌacan cɨn tiꞌityejvee nyacai inyaa, aꞌini aɨ pu anacai huataseijre nyacai inyaa.” 31Canu nyajta inyaa nyasaɨj ramuaꞌatyajcaa. Aru ayaa nu een cɨn mu aꞌuveꞌeme nyej ni neyan huaꞌumuaɨꞌɨhua ɨ jaj cɨmeꞌe tɨ ij aɨn ayan huataseijreꞌen aɨme jemi ɨ mej Israel jetze ajtyamaꞌacan.
32Aj puꞌi Juan ayan tihuaꞌutaꞌixaa tɨcɨn:
—Ayaa nu raaseij nyaɨjna ɨ xaijnyuꞌucaraꞌaraꞌan ɨ Dioj tɨ uteꞌe eꞌicámaꞌacaa. Yaa pu seijraꞌacaa tɨj cucuiꞌi. Aj pu i an múutzeꞌen aꞌujyeijxɨ. 33Canu aꞌatzu ramuaꞌatíncheꞌe tɨ puaꞌa cai ayan tinaataꞌixaateꞌencheꞌe aɨjna tɨ nyajaꞌutaityacaꞌa ayan tɨcɨn: “Tɨ puaꞌa hui peyan raaseij tɨ aɨn xaijnyuꞌucaraꞌaraꞌan ɨ Dioj ayan eꞌicaanyen tɨ ij seij japuan huatyaturan, aj paj ramuaꞌati tɨ aɨn pueen tɨ ayan tiraataijteꞌesin aɨjna ɨ xaijnyuꞌucaraꞌaraꞌan ɨ Dioj tɨ muejmi tzajtaꞌa huatyaturan sej si saɨjna jetze araujcaꞌanyen.” 34Nyaa nu neyan raaseij. Nyajta nu neyan tyajamuaataꞌixaateꞌesin tɨ aɨn pueen ɨ yaujraꞌan ɨ Dioj. —Ayaa pu tihuaꞌutaꞌixaa.
Cɨmeꞌen ɨ maj anacai áꞌujhuaꞌanyaꞌa jamuan ɨ Jesús
35Yaa ruijmuaꞌa yee, ajtahuaꞌa pu aun aꞌutyavaacaꞌa aɨjna ɨ Juan. Ajta aɨme ɨ tɨ huaꞌuviꞌitɨjmaꞌa, huaꞌapua mu jamuan áꞌujhuaꞌanyaꞌa. 36Tɨꞌɨj raaseij tɨ aun aꞌatamaꞌacaa aɨjna ɨ Jesús, ayaa pu tyuꞌutaxajtacaꞌa tɨcɨn:
—Xaaseij muan, ɨ canyaꞌa Dioj tɨ raatamuaɨꞌɨvajta.
37Matɨꞌɨj meyan tiraanamuajriꞌi aɨme ɨ maj huaꞌapua, matɨꞌɨj mi Jesús huataven. 38Ajta aɨn Jesús, tɨꞌɨj pɨ aꞌureꞌeve, aj puꞌi huaꞌuseij maj raavájrajmeꞌe. Aj puꞌi ayan tihuaꞌutaihuaꞌuriꞌi tɨcɨn:
—¿Aꞌini setiꞌijxeꞌeveꞌe muan?
Aj mu meyan tyuꞌutanyúu tɨcɨn:
—Rabí, ¿aꞌuni peꞌeche muaa?
Aijna i nyuucari tɨcɨn Rabí, ayaa pu huataujmuaꞌa tɨcɨn Tevi tɨ Tihuaꞌamuaꞌate.
39Aj pu i Jesús ayan tihuaꞌutaꞌixaa tɨcɨn:
—Sataꞌaj ya vaꞌajuꞌun sataꞌaj yaꞌuseij.
Matɨꞌɨj mi aꞌucɨj jamuan. Majta u yaꞌuseij aꞌutɨ eꞌechajcaꞌa. Majta mu jamuan aun aꞌutyajturaa aꞌachu puaꞌan oora tiꞌituraacaꞌa aɨjna xɨcajraꞌa jetze. Yaa pu tyauumaꞌaca tyaꞌacáaráꞌa tacuarixpua.
40Ajta, saɨj tɨ huaꞌajetze ajtyamaꞌacantacaa ɨ maj huaꞌapua ɨ maj Jesús jamuan aꞌucɨ́j, ayaa pu antyahuaacaꞌa tɨcɨn Andrés. Aɨ pu juutzajraꞌan pɨrɨcɨ aɨjna ɨ Simón, tɨ ajta iꞌi Pedro. 41Aj puꞌi aɨn Andrés anacai raꞌantinajchacaꞌa aɨjna ɨ rujaꞌa, ɨ Simón. Aj puꞌi ayan tiraataꞌixaa tɨcɨn:
—Tuꞌuri ráatyau tyaɨjna ɨ Mesías. (Mesías, ayaa pu huataujmuaꞌa aɨjna ɨ nyuucari tɨcɨn Cɨriistuꞌu tɨ Dioj Raꞌantihuau.)
42Tɨꞌɨqui yaꞌaraaviꞌitɨ aɨjna ɨ Simón ɨ Jesús jemi. Ajta aɨn Jesús, tyamuaꞌa pu tiraꞌaraaseij. Ayaa pu tiraataꞌixaa tɨcɨn:
—Muaa paj aɨn pueen ɨ yaujraꞌan ɨ Jonás. Ayaa paj antyahuaa puaꞌame tɨcɨn Cefas. (Cefas, ayaa pu huataujmuaꞌa tɨcɨn Pedro, tɨ ajta tetej pueen.)
Cɨmeꞌen aɨjna ɨ Felipe, ajta ɨ Natanael
43Yaa ruijmuaꞌa yee, Jesús pu aun áꞌuyeꞌimɨjcaa. Ayaa pu tiraaxaꞌapɨꞌɨntare tɨ aun áꞌumeꞌen aujna ajtyapua, Galileeya aꞌahuaꞌa. Tɨꞌɨj i aɨn raꞌantinajchacaꞌa aɨjna ɨ Felipe. Ayaa pu tiraataꞌixaa tɨcɨn:
—Pataꞌaj nya jamuan áꞌuchaꞌacanyeꞌen.
44Aɨjna ɨ Felipe, au pu eꞌemaꞌacantacaa, aujna chajtaꞌa tɨ ayan tyajaꞌarajtyahuaa tɨcɨn Betsaída. Au mu majta eꞌemaꞌacan aɨjna ɨ Andrés, ajta aɨjna ɨ Pedro. 45Aj puꞌi aɨn Felipe aɨn huátyau ɨ Natanael. Ayaa pu tiraataꞌixaa tɨcɨn:
—Tuꞌuri ráatyau tyaɨjna tɨ cɨmeꞌen Moisés tyaacan ayan raꞌuyuꞌuxacaꞌa aɨjna jetze ɨ yuꞌuxari, ɨ nyuucari ɨ maj cɨn tiꞌijta. Ai pu hui ajta aɨn pueen ɨ maj majta cɨmeꞌen raꞌuyuꞌuxacaꞌa aɨme ɨ mej Dioj jetze maꞌacan tiꞌixaxaꞌataꞌa. Ai pu aɨn pueen aɨjna ɨ Jesús, Nazaret tɨ eꞌemaꞌacan. Aɨ pu yaujraꞌan pueen ɨ José.
46Ajta aɨjna ɨ Natanael, ayaa pu tiraataihuaꞌuriꞌi tɨcɨn:
—¿Ni qui Nazaret eꞌemaꞌacan? ¿Ni ayan tiꞌirɨꞌɨri tɨ aun Nazaret tiꞌitɨ aꞌiraanyen tɨ tiꞌireꞌen?
Aj puꞌi ayan tiraataꞌixaa aɨjna ɨ Felipe tɨcɨn:
—Cheꞌere, pataꞌaj yaꞌuseij.
47Tɨꞌɨj Jesús raaseij tɨ eꞌeveꞌemaꞌacaa aɨjna ɨ Natanael, ayaa pu tyuꞌutaxajtacaꞌa cɨmeꞌen aɨjna tɨcɨn:
—Xaaseij, puꞌuri eꞌeveꞌeme seij tɨ tzɨteꞌe Israel jetze ajtyamaꞌacan. Capu tiꞌihueꞌitzi aɨjna jemi. Capu aꞌanaj tiꞌihueꞌitaca.
48Aj puꞌi aɨn Natanael ayan tiraataihuaꞌuriꞌi tɨcɨn:
—¿Aꞌuni pe nyajaꞌumuáꞌa? ¿Aꞌini pej pi een cɨn nyamuaꞌate?
Jesús pu ayan tyuꞌutanyúu tɨcɨn:
—Nyaa nu nyaun muajaꞌuseij patɨꞌɨj paun eꞌiracatii jeten aɨjna ɨ huarej, tɨꞌɨj cai xɨ muaatajeeva aɨjna ɨ Felipe.
49Aj puꞌi ayan tiraataꞌixaa aɨjna ɨ Natanael tɨcɨn:
—Rabí, muaa paj paɨn pueen pej iꞌi yaujraꞌan ɨ Dioj. Muaa paj aɨn pueen ɨ pej titaataijteꞌesin ityejmi i tyej Israel jetze ajtyamaꞌacan.
50Aj puꞌi Jesús ayan tiraataꞌixaa tɨcɨn:
—Muaa paj peyan tyaꞌatzaahuateꞌe paɨjna cɨmeꞌe nyej neyan timuaataꞌixaa yee nyaj nyaun muajaꞌuseij patɨꞌɨj paun eꞌiracatii ɨ huarej jete. Ayaa nu tiꞌimueꞌixaateꞌe pej pauj peyan tiꞌiseiran tiꞌitɨ cɨmeꞌe tɨ eitzeꞌe ruxeꞌeveꞌe cai aɨjna.
51Ajta ayan tiraataꞌixaa tɨcɨn:
—Ayaa nu tiꞌimueꞌixaateꞌe tzaahuatiꞌiraꞌa cɨmeꞌe pej peyan raseijran tɨ ayan antacúuniꞌihua aꞌame u tajapua. Majta aɨme ɨ mej maun tiꞌivaɨreꞌe Dioj tɨ eꞌeseijreꞌe, aɨ mu yavaꞌacaninyeicaꞌa muaꞌajuꞌun inyeetzi jemi, i nyaj nyajta tyaataꞌa jetze aꞌiraanye. Majta mu aun aꞌujninyeicaꞌa muaꞌajuꞌun maujna u tajapua.
Loading reference in secondary version...