โยฮัน 4
4
เยซู ปวั้ง หฒุ เต้า สะมาเลีย จั๋น-มวั์ง
1ฟาลิสี เมี่ยน ไฮ์ ก๊อง เยซู ตุ๊ ไซ-ก๋อ เก้า ธั้ม หย่า เถง ไซ-ก๋อ เจี๋ย ววม เญย เล์ย เก้า ธั้ม โยฮัน. 2มป่า เฒียน สี่ เซ ไม้ เฒ์ย เยซู เถง เมี่ยน เจี๋ย ววม เญย เล์ย. ขูง นิ่น เญย ไซ-ก๋อ บัว เถง ฮนั้ง. 3เยซู ฮิ้ว ตุ๊ เมี่ยน ฮนั้ง น้าย นอ ก๊อง, นิ่น ฯฒฯ ธ้วด ยูเดีย แซ้ง แอ๋ง หฑวน กาลิลี. 4นิ่น ไฮ์ ฮนั้ง หาย อ๋อย หฒุ ยั่ง สะมาเลีย แซ้ง หฑวน.#4:4 เหยียด เกา ฟาลิสี เมี่ยน ซิ้ม, ไม้ ยั่ง น้าย ติ้ว เจ๊า มี่ง, มป่า เยซู อ๋อย หฒุ ยั่ง เหว่ย เอย ทิน-ฮู่ง เญย เอ๋ย โหฒว.
5กัน สะมาเลีย แซ้ง มี่ง เกา, เถา นอม มู้ง เห่ว สิคา, เล่ย ยาโค้บ ปุน นิ่น เญย ตอน, โยเซ้บ, วั้ว ฑง เดา ไม้ โก.#ทิน เต่ย โต้ว 33:19; โยซูวา 24:32 6ยาโค้บ เญย ววม-ค้วด หย่า เยียม วั้ว นอม ต๋อง. เยซู ยั่ง เกา เจ๊า, โค้ว ไห่, ฯฒฯ เฒว์ย เหฌี่ย ววม-ค้วด เฮลน. วั้ว หฒั่น ลู่ง อ๊า ลั่ม เต๋ย อ๋าน อ๊ะ.
7ม่าย เต้า สะมาเลีย จั๋น- มวั์ง มี่ง วั้ว ววม-ค้วด ฒ่าง ววม. เยซู ก๊อง บั๋ว นิ่น, “ต่อ อ่า, โท้ เม่ย ปุน เต๋ย ววม เยีย ฮบ โอ่.” 8(ต๋อย เจี๊ยน วั้ว นอม เฒี่ยง โห่ ไซ-ก๋อ บัว เปียะ มู้ง ม์าย กะน้าย หญั่น.)
9วั้ว เต้า สะมาเลีย มวั์ง ก๊อง, “เม่ย ยิวไท เมี่ยน ฝู่ง โท้ เยีย สะมาเลีย มเซียะ ตอน ปุน ววม เม่ย ฮบ?” (เหว่ย หฒุ ยิวไท เมี่ยน ไม้ เหธา สะมาเลีย จั๋น จิว ทง.)#4:9 กีก หว่า ก๊อง “สะมาเลีย จั๋น เญย หฑ่อม เยี้ยน ยิวไท เมี่ยน เก่ ไม้ หล่ง.”#เอสะลา 4:1-5; เนหะมี 4:1-2
10เยซู เตา, “สี ก๊อง เม่ย ฮิ้ว ตุ๊ ทิน-ฮู่ง ปุน เญย ฒี่ง เหญ่ย, หย่า ฮิ้ว ตุ๊ เถง เม่ย โท้ ววม ฮบ เซ ต้ง หาย เต้า, เม่ย ฯฒฯ โท้ นิ่น, นิ่น หย่า อ๋อย ปุน ยู์ง แหม่ง เญย ววม เม่ย ฮบ.”
11วั้ว เต้า มเซียะ ตอน ก๊อง, “ต้ม ก๋อ อ้า! เม่ย เลี่ยม ไม้ ม่าย หาย หญู่ง เธีย ววม. ววม-ค้วด หย่า โด เญย. ยู์ง แหม่ง เญย ววม เม่ย มี่ง หาย ล์อ ต้าย? 12เยีย บัว เญย อง-ถาย-แงะ, ยาโค้บ, เฒาะ น้าย นอม ววม-ค้วด เลี่ยว เยีย บัว หล่ง. นิ่น กั้น เหธา นิ่น เญย ตอน-เจว๊ย, แซง-คู้ เหยียด ฒู้ง หย่า ฮบ น้าย นอม ววม-ค้วด เญย ววม. เม่ย โหฒว เก้า โฮล เจี๋ย ยาโค้บ ไฟ?”
13เยซู เตา, “หาย เต้า ฮบ น้าย นอม ววม-ค้วด เญย ววม, ฆะฮ้า จาง แอ๋ง ไฮ่ ฆ้าด เญย. 14มป่า หาย เต้า ฮบ เยีย ปุน เญย ววม, จาง เหยียด ลิ์ว ไม้ ไฮ่ ฆ้าด. เยีย อ๋อย ปุน วั้ว หญู่ง ววม เยียม นิ่น เญย เฮญี้ยว ฮนั้ง เหยียด ฒี้ง ววม แป๊ด ธ้วด ต้าย นอ, ปุน นิ่น ตุ๊ เหยียด ลิ์ว เญย แหม่ง.”
15วั้ว เต้า มเซียะ ตอน แอ๋ง ก๊อง, “ต้ม ก๋อ อ้า! โท้ ปุน เต๋ย หน่าย หญู่ง ววม เยีย ฮบ ม่าะ! เยีย ฯฒฯ เหยียด ลิ์ว จาง ไม้ ฆ้าด หย่า ไม้ หฒุ ต้าย น้าย ฒ่าง ววม.”
16เยซู บั๋ว นิ่น, “หฑวน มี่ง เห่ว เม่ย เญย โหฆ เหธา เจี๊ยน ต้าย น้าย ม่าะ!”
17วั้ว เต้า จั๋น- มวั์ง เตา, “เยีย ไม้ ม่าย โหฆ.”
เยซู ก๊อง, “เม่ย ก๊อง ไม้ ม่าย โหฆ เก้ง เฒ์ย เญย. 18เม่ย หล่ง เจี๋ย ปยา ถอง โหฆ หมี่ อ๊ะ. อี้ หฒั่น หล่ง เจี๊ยน น้าย เต้า หย่า ไม้ เฒ์ย เม่ย เญย โหฆ. เม่ย เญย หว่า เก้ง เฒียน เญย.”
19จั๋น- มวั์ง ก๊อง, “ต้ม ก๋อ อ้า! เยีย ปวัด เม่ย โหฒว เต้า โต่ว หว่า เมี่ยน. 20เยีย บัว เญย อง-ถาย เยียม น้าย นอม บง หฒั่ง ทิน-ฮู่ง, มป่า เม่ย บัว ยิวไท เมี่ยน ก๊อง หอบ หฒุ เยียม เยลูซาเลม ฒี่ง หฒั่ง ทิน-ฮู่ง.”
21เยซู ก๊อง บั๋ว นิ่น, “ต่อ อ้า! เสียน เยีย เญย หว่า ม่าะ! เฒี่ยง โห่ อ๋อย เถา, เม่ย บัว ไม้ เยียม น้าย นอม บง หย่า ไม้ เยียม เยลูซาเลม ป๋าย หฒั่ง เตี๋ย. 22เม่ย บัว สะมาเลีย เมี่ยน ไม้ ฮิ้ว ตุ๊ เม่ย บัว หฒั่ง หาย เต้า. มป่า เยีย บัว ยิวไท เมี่ยน หฒั่ง หาย เต้า เยีย บัว ฮิ้ว เญย, เหว่ย หฒุ เหฌียว เอน เยียม ยิวไท เมี่ยน ต้าย. 23วั้ว นอม เฒี่ยง โห่ อ๋อย เถา, ฒู้ง เถา ต้าย อ๊ะ. เฒียนๆ ปัวะ หฒั่ง หฒั่ง เตี๋ย วั้ว เต๋ย, อ๋อย หล่ง สีง ลี่ง หย่า หล่ง เฒียน เล์ย หฒั่ง, เหว่ย หฒุ หฒั่ง เตี๋ย ล์อ น้าย หญู่ง เมี่ยน หฒั่ง นิ่น. 24ทิน-ฮู่ง เซ สีง ลี่ง. หฒั่ง ทิน-ฮู่ง เญย เมี่ยน อ๋อย หฒุ หล่ง สีง ลี่ง เหธา เฒียน เล์ย หฒั่ง.”
25วั้ว เต้า จั๋น- มวั์ง ก๊อง บั๋ว นิ่น, “เยีย ฮิ้ว ตุ๊ เมสิยา, ต้ง บั๋ว เห่ว กีตู่ วั้ว เต้า, อ๋อย ต้าย. เถา ต้าย วั้ว หฒั่น นิ่น ฒู้ง อ๋อย บั๋ว เหฑ่ง หญู่งๆ เยีย บัว.”
26เยซู ก๊อง, “ต้ง อี้ หฒั่น เหธา เม่ย ก๊อง เจี๊ยน หว่า น้าย เต้า เซ ต้ง วั้ว เต้า อ๊ะ.”
ไซ-ก๋อ บัว มี่ง มู้ง หฑวน ต้าย อ๊ะ
27วั้ว หฒั่น ไซ-ก๋อ บัว หฑวน ต้าย ปวัด เยซู เหธา วั้ว เต้า จั๋น- มวั์ง ก๊อง หว่า ฯฒฯ ฮนั้ม ไม้ เม่ง แปะ. มป่า ไม้ ม่าย หาย เต้า หน่าย วั้ว เต้า มเซียะ ตอน, “เม่ย ต้าย ล์อ หาย หญู่ง?” ไฟ หน่าย เยซู, “โหฒว หาย หญู่ง เหธา นิ่น ก๊อง หว่า?”
28วั้ว เต้า จั๋น- มวั์ง ฯฒฯ กวั่ง เจี๊ยน นิ่น เญย เนีย-หะโล่ว วั้ว, หฑวน มู้ง มี่ง บั๋ว เยียม มู้ง เญย เมี่ยน, 29“เม่ย บัว ต้าย หมั่ง ก๋า, ม่าย เต้า เมี่ยน นิ่น ก๊อง เหฑ่ง เยีย โหฒว เจี๋ย เญย หญู่งๆ สี่. น้าย เต้า ไม้ เฒ์ย กีตู่ ไฟ?” 30หฒวัง เมี่ยน ฯฒฯ ธ้วด มู้ง มี่ง หมั่ง เยซู.
31จั๋น- มวั์ง หฑวน มี่ง วั้ว หฒั่น, ไซ-ก๋อ บัว เห่ว เยซู, “ไซ-เตี๋ย อ้า! หญั่น หฮนาง อ๊ะ.”
32มป่า เยซู บั๋ว นิ่น บัว, “หญั่น ฮบ เยีย ม่าย เญย. ต้ง เยีย ม่าย เญย วั้ว หญู่ง หญั่น ฮบ เม่ย บัว ไม้ ฮิ้ว.” 33ไซ-ก๋อ บัว ล่าน หน่าย ล่าน, “ม่าย เมี่ยน ต้อ หฮนาง ต้าย ปุน นิ่น หญั่น ไฟ นี?”
34เยซู เตา, “เยีย เญย หญั่น ฮบ เซ เยีย เอย เจี๊ยน พ้าย เยีย ต้าย วั้ว เต้า เญย หฒะเอ๋ย โหฒว, หย่า โหฒว เหฒียง นิ่น เญย กง. 35เม่ย บัว ม่าย โจ๋ว หว่า ก๊อง, ‘แอ๋ง ม่าย เปยย หฮลา เหญียะ เซียว แกง-หฒวัง เญย เฒี่ยง โห่ เถา อ๊ะ.’ เยีย บั๋ว เม่ย บัว หลงๆ เญย หมั่ง วั้ว เด่ย. ธุน-แกง หฒัวะ, เซียว ตุ๊ อ๊ะ. 36อี้ หฒั่น เซียว แกง-หฒวัง เญย เมี่ยน ตุ๊ นิ่น บัว เญย กง-ฒิ่น หย่า เซียว แกง-หฒวัง เหว่ย ปุน ตุ๊ เหยียด ลิ์ว เญย แหม่ง. หฒวัง เญย เมี่ยน เหธา เซียว เญย เมี่ยน ฯฒฯ ล่ม ฑ่อย อะเฮน้ย. 37เหว่ย หฒุ เมี่ยน ก๊อง, ‘ม่าย เต้า หฒวัง, ม่าย เต้า เซียว,’ วั้ว โจ๋ว หว่า หฒะเก้ง เฒียน. 38เยีย พ้าย เม่ย บัว มี่ง เซียว ต้ง เม่ย บัว ไม้ ด๊อด ชะ หฒวัง เญย. กั้น เต้า ด๊อด ชะ หฒวัง มป่า เม่ย บัว แปะๆ ตุ๊ นิ่น เญย ชะ.”
สะมาเลีย เมี่ยน เสียน ธั้ม เญย
39วั้ว นอม มู้ง เญย สะมาเลีย เมี่ยน ธั้ม เญย เสียน เยซู เหว่ย หฒุ วั้ว เต้า สะมาเลีย จั๋น- มวั์ง โหฒว ฒอง-เหฒง ก๊อง, “นิ่น ก๊อง ธ้วด เหฑ่ง เยีย โหฒว เจี๋ย เญย หญู่งๆ สี่.” 40ฮนั้ง หน่าย, สะมาเลีย เมี่ยน ต้าย ล์อ เยซู วั้ว หฒั่น, นิ่น บัว โท้ เยซู เหธา นิ่น บัว เยียม วั้ว. เยซู ฯฒฯ เหธา นิ่น บัว เยียม อี ฮนอย. 41เหว่ย เยซู ก๊อง เญย หว่า แอ๋ง ม่าย เมี่ยน ธั้ม เญย เสียน นิ่น.
42น้าย เต๋ย เมี่ยน ก๊อง บั๋ว วั้ว เต้า มเซียะ ตอน, “อี้ หฒั่น เยีย บัว ไม้ เฒ์ย เหว่ย เม่ย ก๊อง เญย หว่า เสียน. เยีย บัว กั้น ไฮ์ นิ่น ก๊อง หย่า ฮิ้ว ตุ๊ น้าย ล่าน เมี่ยน หฒะเก้ง โหฒว ป้าม เมี่ยน เญย เหฌียว เฒี้ยว.”
เยซู หฒ่อ หลง ต้ม เจียน เญย ตอน
43เจี๋ย ลิ์ว วั้ว เต๋ย อี ฮนอย, เยซู ธ้วด เจ๊า มี่ง กาลิลี แซ้ง. 44เยซู กั้น ก๊อง เจี๋ย, “โต่ว หว่า เมี่ยน เยียม กั้น เญย เต่ย-ปูง, กั้น เญย เมี่ยน ไม้ ท่าย นิ่น.”#มัดทาย 13:57; มาโค 6:4; ลูกา 4:24 45เถา กาลิลี แซ้ง, กาลิลี เมี่ยน ฒิบ นิ่น, เหว่ย หฒุ นิ่น บัว หย่า มี่ง เยลูซาเลม เจี๋ย เสีย แหม่ง ฒิบ ฯฒฯ ตุ๊ ปวัด เยซู โหฒว เญย เหยียด ฒู้ง สี่.#โยฮัน 2:23
46เยซู แอ๋ง หฑวน กาลิลี แซ้ง, คานา ล์าง, ต้ง ฒิ่น ด่าง นิ่น หล่ง ววม โหฒว เป๋น อะหงุ่น ติ๊ว วั้ว นอม ล์าง. ม่าย เต้า ฮู่ง เญย ต้ม เจียน, นิ่น เญย ตอน เยียม คาเปนาอุม มู้ง ปุ๊ด แป่ง หมี่ อ๊ะ.#โยฮัน 2:1-11 47ต้ม เจียน ไฮ์ ก๊อง เยซู เยียม ยูเดีย แซ้ง ต้าย เถา กาลิลี, นิ่น ฯฒฯ มี่ง ล์อ, โท้ เยซู มี่ง คาเปนาอุม หฒ่อ นิ่น เญย ตอน. นิ่น เญย ตอน ปุ๊ด แป่ง อ๋อย ไต่ ไห่ อ๊ะ.
48เยซู ก๊อง บั๋ว นิ่น, “สี ก๊อง เม่ย บัว ไม้ ตุ๊ ปวัด เยีย โหฒว จั๋ง-โห่ เหธา บัวะ ฮ่อง เญย สี่, เม่ย บัว ฒู้ง ไม้ เสียน เยีย.”
49ต้ม เจียน ก๊อง, “ต้ม ก๋อ อ้า! โท้ เม่ย กัน เยีย มี่ง ม่าะ! เฑ่า เหย เยีย เญย ตอน ไฮ่ ไต่.”
50เยซู ก๊อง, “เม่ย กุ๊น หฑวน อ๊ะ. เม่ย เญย ตอน หลง อ๊ะ.”
วั้ว เต้า เจียน เสียน เยซู เญย หว่า ฯฒฯ หฑวน หมี่ อ๊ะ. 51หฑวน เกา, ปวัด นิ่น เญย โปว บัว ต้าย บั๋ว นิ่น, “อี้ หฒั่น เม่ย เญย ตอน หลง หมี่ อ๊ะ.”
52นิ่น หน่าย นิ่น เญย โปว, “เยีย เญย ตอน เฒี่ยง หาย หลง?” นิ่น บัว เตา, “อะฮนอย ฆะฮ้า อ๋าน เหยียด นอม เฒี่ยง โห่ ซิน ล่าง หมี่ อ๊ะ.”
53วั้ว เต้า ตอน เญย เตีย ฯฒฯ จั๋ง หฒุ หฒะเก้ง ต๋อย เยซู ก๊อง บั๋ว นิ่น, “เม่ย เญย ตอน หลง อ๊ะ,” วั้ว นอม เฒี่ยง โห่. นิ่น เหธา นิ่น เญย เหยียด เปย๊า เมี่ยน ฯฒฯ เสียน เยซู เหฑ่ง.
54น้าย เซ เยซู เยียม ยูเดีย แซ้ง มี่ง กาลิลี แซ้ง โหฒว ตะเหญ่ย หฑุ่น บัวะ ฮ่อง ไห่ เญย จั๋ง-โห่.
Currently Selected:
โยฮัน 4: IuMiTH
Highlight
Share
Copy
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007