โลมา 2
2
ทิน-ฮู่ง อ๋อย เซี้ยม เต้าๆ เมี่ยน เญย ฒุ์ย
1เมี่ยน มั์ว อ่า, ฮนั้ง หน่าย, ไม้ กุ๊น เม่ย ต้ง หาย เต้า, เม่ย ตี่ง โหฒว น้าย หญู่ง สี่ เญย เมี่ยน เญย ฒุ์ย, เม่ย ไม้ ลั่ม ไจ๊ ซิน อ๊ะ. เม่ย ฮนั้ง หาย นอ ตี่ง เมี่ยน เญย ฒุ์ย, เม่ย ฯฒฯ ตี่ง กั้น เญย ฒุ์ย, เหว่ย หฒุ เม่ย โหฒว เญย เหธา นิ่น บัว โหฒว เญย เซ ฟี่ ฮนั้ง เญย.#มัดทาย 7:1; ลูกา 6:37 2บัว ฮิ้ว ตุ๊ ทิน-ฮู่ง ตี่ง โหฒว วั้ว หญู่ง สี่ เญย เมี่ยน ม่าย ฒุ์ย เซ หอบ เญย. 3เมี่ยน มั์ว อ่า, เม่ย ตี่ง เมี่ยน เญย ฒุ์ย มป่า เม่ย หย่า ฮนั้ง นิ่น บัว นอ โหฒว ต่อง. เม่ย ฮนั้ม เม่ย ไฮ่ เปย๋า ตุ๊ ดุ๊ด, ไม้ หฒุ ทิน-ฮู่ง ตี่ง เม่ย เญย ฒุ์ย ไฟ? 4ทิน-ฮู่ง เญย เอน จ๋าย ไห่, นิ่น หย่า เฮญี้ยว ด๊าว, ม่าย หน่อย, มป่า เม่ย หมั่ง เผีย ไฟ? เม่ย ไม้ ฮิ้ว ตุ๊ เซ ทิน-ฮู่ง เญย เอน อ๋อย ต้อ เม่ย ก๊อย เฮญี้ยว ไฟ?
5มป่า เม่ย เญย เฮญี้ยว แหง่ง, ไม้ คั้ง ก๊อย. ฒั้ว เถา ทิน-ฮู่ง ปิ๋ว เม่ง นิ่น โน์ว เมี่ยน เญย ฒุ์ย, ต้ง นิ่น แป้ง ฟิม เญย เซี้ยม ฒุ์ย วั้ว ฮนอย, เม่ย ฯฒฯ หฒุ ตี่ง เก้า เฮนี้ย. 6เหว่ย หฒุ ทิน-ฮู่ง อ๋อย หฒิว โม์ว ล่าน เมี่ยน โหฒว เญย สี่ วิ่น ปุน นิ่น บัว.#สีง ฑูง 62:12; ธง-เม่ง หว่า 24:12 7ม่าย เต๋ย เมี่ยน หฒั่นๆ หล่ง เฮญี้ยว โหฒว คู้ สี่, ล์อ เยียม ทิน-ฮู่ง ต้าย เญย ฌัง-หล่าง, อ๋อย นิ่น ท่าย หย่า ปุน ไม้ ไฮ่ หฒิด เญย แหม่ง. ต้ง น้าย หญู่ง เมี่ยน ทิน-ฮู่ง อ๋อย เหธย เหยียด ลิ์ว เญย แหม่ง ปุน นิ่น บัว. 8มป่า ขูง โต้ว กั้น ตุ๊ หลง, แหง่ง เฒียน เล์ย, โหฒว หว่าย สี่ วั้ว เต๋ย, ทิน-ฮู่ง ฯฒฯ เฉีย เจี์ย, โน์ว ไห่ นิ่น บัว. 9เต้าๆ โหฒว เอ๊าะ เญย ป้าม เมี่ยน ฒู้ง อ๋อย หฒุ ปวั้ง โค้ว เญย หน่าน ฒี่ง. ยิวไท เมี่ยน หฒุ ด่าง, จั๋น หฒุ ฆะฮ้า. 10มป่า ต้ง โหฒว หลง เญย เมี่ยน, ทิน-ฮู่ง อ๋อย ปุน ฌัง-หล่าง, อ๋อย ท่าย, หย่า อ๋อย ปุน แป้ง ออน นิ่น บัว. ปุน ยิวไท เมี่ยน ด่าง, ฆะฮ้า ปุน จั๋น, 11เหว่ย หฒุ ทิน-ฮู่ง ไม้ หมั่ง หาย เต้า เญย เฮมียน.#หฑั่ม เล์ย-หลัด 10:17
12จั๋น ไม้ ม่าย โมเซ เญย เล์ย-หลัด. นิ่น บัว ป์าม ฒุ์ย นิ่น บัว หฒุ เหมียด มป่า ไม้ เฒ์ย เล์ย-หลัด ตี่ง. ยิวไท เมี่ยน ม่าย โมเซ เญย เล์ย-หลัด. นิ่น บัว ป์าม ฒุ์ย, ฯฒฯ หฒิว เล์ย-หลัด หฒุ ตี่ง ฒุ์ย. 13ไม้ เฒ์ย เมี่ยน ไฮ์ ลิ์ว เล์ย-หลัด ฯฒฯ ไฮ่ ตุ๊ เหธา ทิน-ฮู่ง หอบ เฮญี้ยว. ขูง ต้ง เอย เจี๊ยน เล์ย-หลัด โหฒว วั้ว เต๋ย ฮนั้ง ตุ๊ เหธา นิ่น หอบ เฮญี้ยว. 14จั๋น ไม้ ม่าย โมเซ เญย เล์ย-หลัด. มป่า สี ก๊อง นิ่น บัว เอย กั้น เญย เฮญี้ยว ฮนั้ม ธ้วด ต้าย โหฒว หอบ เล์ย-หลัด, ไม้ กุ๊น นิ่น บัว ไม้ ม่าย เล์ย-หลัด, นิ่น บัว กั้น เซ โหฒว นิ่น บัว กั้น เญย เล์ย-หลัด. 15นิ่น บัว โหฒว เญย สี่ ปุน ธีง เล์ย-หลัด เฟี้ย เจี๊ยน นิ่น บัว เญย เฮญี้ยว อ๊ะ. นิ่น บัว เญย เฮญี้ยว ปุน นิ่น บัว ฮิ้ว ตุ๊ นิ่น บัว โหฒว หอบ ไฟ ไม้ หอบ. ม่าย เฒี่ยง โห่ เฮญี้ยว โก๋ นิ่น บัว, ม่าย เฒี่ยง โห่ ปุน นิ่น บัว ฮิ้ว ตุ๊ โหฒว ตุ๊ หอบ. 16หฒิว เยีย ฒุ่น เญย คู้ เฝียน, เถา เซี้ยม เญย ฮนอย, ทิน-ฮู่ง อ๋อย หล่ง กีตู่ เยซู ฮนั้ง น้าย นอ เซี้ยม เมี่ยน เกม เจี๊ยน เญย สี่.
เล์ย-หลัด ฮนั้ง หาย นอ เถง ยิวไท เมี่ยน
17เม่ย กั้น นี? เม่ย ก๊อง เม่ย โหฒว ยิวไท เมี่ยน หย่า เขา เล์ย-หลัด. เม่ย ปู๋ง หว่า-เหมา ก๊อง กั้น เก้า ฮิ้ว ตุ๊ ทิน-ฮู่ง, 18หย่า ฮิ้ว ตุ๊ ทิน-ฮู่ง อ๋อย เม่ย ฮนั้ง หาย นอ โหฒว. เม่ย หย่า ก๊อง เม่ย โหะ เจี๋ย เล์ย-หลัด หธีง ต้าย ฮิ้ว ตุ๊ โหฒว หาย หญู่ง เก้า หอบ เจี๋ย. 19เม่ย หย่า เสียน เม่ย ไฮ่ เคน มฒีง แม่ง เญย เมี่ยน, หย่า โหฒว ฌัง ปุน เยียม หฮมวัง เญย เมี่ยน ปวัด, 20เม่ย ไฮ่ หฌาว หฮงง เญย เมี่ยน, หย่า โหฒว ฟิน-แซง หฌาว ฝุเจว๊ย, เหว่ย หฒุ เม่ย ม่าย โมเซ เญย เล์ย-หลัด. เยียม เล์ย-หลัด ม่าย ว่วน ฒาง เหธา เฒียน เล์ย.
21ฮนั้ง หน่าย, เม่ย หฌาว เมี่ยน, โหฒว หาย หญู่ง ไม้ หฌาว เม่ย กั้น? เม่ย ฒุ่น บั๋ว เมี่ยน, “ไม้ ตู๋ง โหฒว หฒะ.” ต๋าว หฑวน เม่ย กั้น โหฒว หฒะ ไฟ? 22เม่ย ก๊อง, “ไม้ ตู๋ง เหฮยียน เอ๊า เหฮยียน โหฆ.” เม่ย กั้น เหฮยียน เญย ไฟ? เม่ย ฑอง หมิ่ว-ฝัง มป่า เม่ย หนิ่ม หมิ่ว-เปย๊า เญย กะน้าย ไฟ? 23เม่ย ปู๋ง หว่า-เหมา ก๊อง เม่ย ม่าย ทิน-ฮู่ง เญย เล์ย-หลัด, มป่า เม่ย ป์าม เล์ย-หลัด คี ทิน-ฮู่ง ไฟ? 24กีง-โซว เฟี้ย เจี๊ยน ก๊อง, “หลาย เม่ย บัว ยิวไท เมี่ยน, จั๋น หธีง ต้าย คี ทิน-ฮู่ง.”#อิสะยา 52:5; เอเสเคน 36:22
25สี ก๊อง เม่ย เอย เจี๊ยน เล์ย-หลัด โหฒว, เม่ย เจี๋ย ก๊าด เญย เล์ย ฯฒฯ ม่าย ลั่ม หล่ง เญย. มป่า เม่ย ป์าม เล์ย-หลัด นอ, เม่ย เจี๋ย ลิ์ว ก๊าด เญย เล์ย หย่า ไม้ ลั่ม หล่ง. 26สี ก๊อง จั๋น ไม้ แก้ง เจี๋ย ก๊าด เญย เล์ย มป่า เอย เจี๊ยน เล์ย-หลัด โหฒว นอ, ทิน-ฮู่ง อ๋อย ฝุน นิ่น เซ ฮนั้ง เจี๋ย ก๊าด เญย เล์ย ไม้ เฒ์ย? 27ไม้ เจี๋ย ก๊าด เญย เล์ย มป่า เอย เจี๊ยน เล์ย-หลัด โหฒว เญย เมี่ยน ฯฒฯ ตี่ง เม่ย บัว เญย ฒุ์ย, ต้ง ม่าย เล์ย-หลัด เฟี้ย เจี๊ยน, หย่า เจี๋ย ก๊าด เญย เล์ย, มป่า หธ่อ ป์าม เล์ย-หลัด เญย เมี่ยน.
28เฒียนๆ ยิวไท เมี่ยน เซ ไม้ เฒ์ย ขูง เอย เป้ย หฒั่ง ฝุน. เฒียน เจี๋ย ก๊าด เญย เล์ย หย่า ไม้ เฒ์ย ขูง เอย ซิน ก๊าด ฮนั้ง. 29เฒียนๆ ยิวไท เมี่ยน เซ ต้ง เยียม เฮญี้ยว กะญั์ว โหฒว เญย. นิ่น เญย เฮญี้ยว เจี๋ย ก๊าด เญย เล์ย. น้าย เซ สีง ลี่ง โหฒว เญย กง, ไม้ เฒ์ย เล์ย-หลัด โหฒว. น้าย หญู่ง เมี่ยน, ป้าม เมี่ยน ไม้ เธง, มป่า ทิน-ฮู่ง เธง.#หฑั่ม เล์ย-หลัด 30:6
Currently Selected:
โลมา 2: IuMiTH
Highlight
Share
Copy
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007