กง-โฒ่ 27
27
แปง ต้อ เปาโล เปียะ ฑั้ง มี่ง โลมา ฒี่ง
1โลมา เจียน ตี่ง เฮญี้ยว ปุน เยีย บัว เปียะ ฑั้ง มี่ง อิตาลี เต่ย-ปูง. นิ่น บัว ฯฒฯ เฒาะ เปาโล เหธา เต๋ย ฒุ์ย-เมี่ยน จิว ปุน เต้า ออกัดตัด ฮู่ง วั้ว กวั้น แปง เญย แปง-เปย๊ย, ต้ง กุ๊น เหยียด แป๊ะ เต้า แปง เญย แปง-เปย๊ย, บั๋ว เห่ว ยูเลี้ยด. 2เยีย บัว ฯฒฯ เปียะ โผว อัดลามิดทิยุม มู้ง เญย ฑั้ง. น้าย โผว ฑั้ง อ๋อย กัน ค้อย-เฮลน, เอเซีย แซ้ง เญย ฑั้ง-โป่ว เจี๋ย. ฑั้ง ฯฒฯ มี่ง อ๊ะ. ม่าย เต้า มาซีโดเนีย เต่ย-ปูง, เทสะโลนิกา ฒี่ง เญย เมี่ยน, บั๋ว เห่ว อาลิดทาคัด, หย่า เหธา เจี๊ยน เยีย บัว มี่ง.
3ตะเหญ่ย ฮนอย เยีย บัว เถา ไซดอน มู้ง, ยูเลี้ยด แปง-เปย๊ย ค้อ-เลี่ยน เปาโล, ปุน นิ่น มี่ง ล์อ นิ่น เญย ก๋อ-โย์ว เหว่ย ปุน นิ่น เญย ก๋อ-โย์ว หลิ่ว เล์ย เต๋ย นิ่น. 4แอ๋ง เยียม หน่าย แฑง ฑั้ง มี่ง, หฑยาว เหยียด อ๋า ไม้ สุน, เยีย บัว ฯฒฯ เจี๋ย หฑยาว ไม้ ป่วน โฮล วั้ว ปูง ไซปัด ค้อย-โฑว, 5แอ๋ง เจี๋ย ค้อย, เจี๋ย หฒุ ซีลีเซีย เหธา ปัมฟีเลีย มี่ง เถา ลีเซีย เต่ย-ปูง, มิลา มู้ง. 6เยียม วั้ว แปง-เปย๊ย แอ๋ง ล์อ ตุ๊ โผว ฑั้ง เยียม อาเล้กซานเดเลีย ฒี่ง ต้าย, อ๋อย มี่ง อิตาลี เต่ย-ปูง. นิ่น ฯฒฯ ต้อ เยีย บัว เปียะ วั้ว โผว ฑั้ง. 7น้าย เต๋ย เหฒีย ฮนอย, ฑั้ง มี่ง ตุ๊ ต่น ไห่. อะ ตุ๊ มี่ง ไห่, เล่า เญย หธีง ต้าย เถา คานีดัด มู้ง. หลาย หฑยาว ไม้ สุน, ไม้ ไฮ่ แปง หฒะ มี่ง. เยีย บัว ฯฒฯ แป้ง ป์าย สันโมเน แอ๋ง เจี๋ย หฑยาว ไม้ ป่วน โฮล วั้ว ปูง เคลี้ด ค้อย-โฑว. 8ฑั้ง เก้ง! อะ ตุ๊ มี่ง ไห่, มป่า เยีย บัว นิด เจี๊ยน ค้อย-โฑว หมั่นๆ มี่ง ฯฒฯ เถา นอม ต๋อง บั๋ว เห่ว, “ฑั้ง-โป่ว เหฑว่ย,” เล่ย ลาเซีย มู้ง ไม้ หนั่ง โก.
9มี่ง เกา, กวั่ง เฒี่ยง โห่ ธั้ม ไห่ อ๊ะ. ฒู้ง เจี๋ย ลิ์ว เฒย ไม้ หญั่น หาย หญู่ง เญย ฒิบ อ๊ะ. สี ก๊อง กัน ฑั้ง มี่ง นอ, ไฮ่ ปวั้ง หฒุ สี่ มเปย. เปาโล ฯฒฯ ขวิน หฒวัง เมี่ยน. นิ่น ก๊อง, 10“หฒวัง ก๋อ-โย์ว อ้า! เยีย ปวัด บัว ธ้วด น้าย หฑุ่น เจ๊า หฒะเก้ง อ๋อย ปวั้ง สี่ อ๊ะ. ไม้ ตาน ฑั้ง เหธา หัว ไฮ่ ล่าย หฒิด ฮนั้ง. เลี่ยม บัว เญย แหม่ง ฒู้ง อ๋อย หฒุ กวั่ง มเปย.” 11มป่า แปง-เปย๊ย เสียน ฑั้ง-เจียน เหธา ฑั้ง-เฒี้ยว เญย หว่า, ไม้ เสียน เปาโล เญย หว่า. 12เหว่ย หฒุ วั้ว นอม ฑั้ง-โป่ว ไม้ หนั่ง เป๋น เจี๋ย ตง-เกน ฮนอย, เยียม ฑั้ง อ๋อย มี่ง เญย เมี่ยน หย่า เก้า ธั้ม, นิ่น บัว ฯฒฯ ตี่ง เฮญี้ยว ไฮ่ ก๊าน ตุ๊ ฮี่ง นอ, อ๋อย มี่ง ฟีนิก วั้ว นอม ฑั้ง-โป่ว ฒั้ว ตง-เกน ฮนอย เจี๋ย. ฟีนิก เซ เยียม วั้ว เคลี้ด ค้อย-โฑว เญย เหยียด นอม ฑั้ง-โป่ว, ฮวิน มี่ง ไฟ ปูง เหธา ป๊ะ ปูง บุด๋ง หย่า ฮวิน มี่ง ไฟ ปูง เหธา น่าม ปูง บุด๋ง.
หฑยาว-เจี๊ยะ เนี้ยว ฑั้ง
13เยียม เกา วั้ว นอม ต๋อง, หฑยาว เยียม น่าม ปูง ป่วน ต้าย เสี่ยน เญย, หฒวัง เมี่ยน ฯฒฯ หล่าย มี่ง ตุ๊ เญย. ฑั้ง-โน่ว ฯฒฯ เซียว หฒุ่ย ฑั้ง เญย กะน้าย ฝาว ต้าย ฯฒฯ แฑง นิด เจี๊ยน เคลี้ด ค้อย-โฑว มี่ง. 14มี่ง ไม้ เล่า ปวั้ง กอง ต้ม หฑยาว-เจี๊ยะ, (ต้ง เมี่ยน เห่ว ป๊ะ ปูง เหธา ตง ปูง บุด๋ง เญย หฑยาว,) ป่วน ยั่ง ค้อย-โฑว วั้ว ปูง ต้าย. 15หฑยาว ฯฒฯ ต้าย เนี้ยว ฑั้ง, ฑั้ง ป์อง ไม้ ฮี่ง หฑยาว. เยีย บัว ฯฒฯ ปู๋ง ฑั้ง เซว่ย หฑยาว ป่วน มี่ง. 16หฑยาว ป่วน เจี๊ยน มี่ง เกา, นิด หฒุ นอม ค้อย-โฑว ตอน, บั๋ว เห่ว คาวดา, ค้อย-โฑว ฯฒฯ ท้อง เจี๊ยน เต๋ย หฑยาว. เยีย บัว ฯฒฯ เฒาะ ฑั้ง-ตอน โป้ว ฝาว ปั่ง ต้ม ฑั้ง โด้ เจี๊ยน, โหฒว ตุ๊ โค้ว ไห่. 17โด้ ลิ์ว ฑั้ง-ตอน, นิ่น บัว แอ๋ง โด้ ต้ม ฑั้ง, เฒาะ ฮลาง หธุน เหฌี่ย กะเดี๊ย แปง ฝาว ต้าย โด้ เจี๊ยน. กั้ม เหฑีย ฑั้ง ไฮ่ เหฑี่ยง หฒุ เซทิด วั้ว นอม ต๋อง เญย ซา-เฒียว ดุย, นิ่น บัว ฯฒฯ ปู๋ง เดีย-บวั้ง เหฌี่ย เซว่ย หฑยาว ป่วน มี่ง. 18หฑยาว-เจี๊ยะ หธ่อ เนี้ยว เจี๊ยน ฑั้ง. ตะเหญ่ย ฮนอย นิ่น บัว ฯฒฯ เฒาะ หัว กวั่ง วั้ว ค้อย, 19แอ๋ง ตะฟาม ฮนอย นิ่น บัว แอ๋ง เฒาะ เต๋ย ฑั้ง เญย หวัวะ กิ่น แกว๋ง กวั่ง ค้อย อ๊ะ. 20ตุ๊ เหฒีย ฮนอย เยีย บัว ไม้ ปวัด บะฮนอย, ไม้ ปวัด เหฮลย ธ้วด. ต้ม หฑยาว หธ่อ ป่วน เจี๊ยน เสย เญย. เยีย บัว ม่าย ลั่ม ฮนั้ม เหฌียว ตุ๊ แหม่ง ธ้วด เญย เจ๊า ป่า หมี่ อ๊ะ.
21ตุ๊ เหฒีย ฮนอย หฒวัง เมี่ยน ไม้ หญั่น หาย หญู่ง. เปาโล ฯฒฯ โซ้ว เจี๊ยน นิ่น บัว บุด๋ง ก๊อง, “หฒวัง ก๋อ-โย์ว อ่า, สี ก๊อง เม่ย บัว หมวัง เยีย เญย หว่า, ไม้ ธ้วด เคลี้ด วั้ว นอม ค้อย-โฑว นอ, บัว ไม้ หฒุ ปวั้ง น้าย เต๋ย สี่ ห่อย บัว กวั่ง กะน้าย ธั้ม. 22ฮนั้ง หาย หย่า ป่า, กุ๊น ปู๋ง ตี่ง เฮญี้ยว, เม่ย บัว ไม้ ม่าย เหยียด เต้า ไฮ่ หฒุ กวั่ง แหม่ง. ขูง กวั่ง น้าย โผว ฑั้ง ฮนั้ง, 23เหว่ย หฒุ ต้ง เยีย เป๋น นิ่น เญย หย่า ปัวะ หฒั่ง เญย ทิน-ฮู่ง, ม่าย เต้า นิ่น เญย ฟิน-เมี่ยน อะหฮมวัง ต้าย โซ้ว เจี๊ยน เยีย เญย กะเฮลน. 24นิ่น ก๊อง, ‘เปาโล อ้า! เม่ย ไม้ ตู๋ง กั้ม เหฑีย. เม่ย ฮนั้ง หาย อ๋อย หฒุ มี่ง โซ้ว เจี๊ยน โลมา ต้ม ฒิ่ว ฮู่ง เญย หฑะเฮมียน. ทิน-ฮู่ง อ๋อย เหว่ย เม่ย ปุน เหยียด ฒู้ง จวั่ง ฑั้ง เญย เมี่ยน ตุ๊ แหม่ง ธ้วด.’ 25หฒวัง ก๋อ-โย์ว อ้า! กุ๊น ปู๋ง เฮญี้ยว ม่าะ! เยีย เสียน ทิน-ฮู่ง. นิ่น ฮนั้ง หาย นอ ก๊อง หฒะเก้ง อ๋อย ฮนั้ง วั้ว นอ โหฒว. 26มป่า บัว เญย ฑั้ง ฒู้ง อ๋อย หฒุ พิว มี่ง โต๋ บัว กวั่ง เหยียด นอม ค้อย-โฑว.”
27เถา เหฒียบ เฝย ฮนอย วั้ว ม์วน เยีย บัว เญย ฑั้ง หฒุ หฑยาว ป่วน เบี้ยว มี่ง เบี้ยว ต้าย เญย เยียม วั้ว เมดิเตเลเนียน ค้อย. ด๊าม ม์วน เญย ต๋อง, ฑั้ง-โน่ว ไฮ์ ฮนั้ง นิด เบี๋ยน ฟัด เต๋ย อ๊ะ นอ. 28นิ่น บัว ฯฒฯ หล่ง ติ้ว ฮลาง โด้ เจี๊ยน กะน้าย เฮนี้ย เญย ปู๋ง เหฌี่ย เดาะ หมั่ง ก๋า ด่ง หาย โด, ปวัด ม่าย หญี่ เหฒียบ ฒั่ม โด. เหยียด หฒั่น เจี๋ย นิ่น บัว แอ๋ง เดาะ หฑุ่น ปวัด เหฒียบ ฮม์ ฒั่ม โด. 29นิ่น บัว กั้ม เหฑีย ฑั้ง ไฮ่ เหฑี่ยง หฒุ หละเปย๊ย, ฑั้ง-โน่ว ฯฒฯ ปู๋ง เปยย นอม หฒุ่ย ฑั้ง เญย กะน้าย เยียม วั้ว ฑั้ง-เตว๊ย. หฒุ่ย เจี๊ยน, หมั่ง ไม้ ตุ๊ ลู่ง ก๊าน ฌัง อ๊ะ. 30ฑั้ง-โน่ว ฮนั้ม อ๋อย เปย๋า, ฯฒฯ เฒาะ ฑั้ง-ตอน ปู๋ง เหฌี่ย ค้อย โหฒว ฮนั้ง อ๋อย ปู๋ง ฑั้ง-มฆ้อง เญย กะน้าย-หฒุ่ย เหฌี่ย นอ. 31มป่า เปาโล ก๊อง บั๋ว แปง-เปย๊ย เหธา แปง, “สี ก๊อง ฑั้ง-โน่ว ไม้ เยียม น้าย ฑั้ง นอ, เม่ย บัว ไม้ ไฮ่ ตุ๊ เหฌียว.” 32แปง ฯฒฯ ฮงะ ตั๋ง โด้ ฑั้ง-ตอน เญย ฮลาง ปู๋ง กวั่ง หมี่ อ๊ะ.
33ลู่ง อ๊า ลั่ม เต๋ย ฌัง อ๊ะ, เปาโล ขวิน หฒวัง เมี่ยน หญั่น เต๋ย กะน้าย. นิ่น ก๊อง, “ตุ๊ เหฒียบ เฝย ฮนอย อ๊ะ, เม่ย บัว เฑ่า ไม้ หญั่น หาย หญู่ง. 34ฮนั้ง น้าย เยีย ขวิน เม่ย บัว อ๋อย หฒุ หญั่น เต๋ย กะน้าย หธีง ต้าย ไฮ่ ตุ๊ แหม่ง ธ้วด. เม่ย บัว เก๊าะ-เมี่ยน เญย บะเปยย เลี่ยม เหยียด ติ้ว ไม้ หฒุ เหมียด.” 35ก๊อง เซ้ด, เปาโล ฯฒฯ เฒาะ ฌั้ว ต้าย ตอง เจี๊ยน หฒวัง เมี่ยน แล์ง ฒี่ง ทิน-ฮู่ง ฯฒฯ แมะ ต้าย หญั่น. 36หฒวัง เมี่ยน ฯฒฯ ไฮ์ เฮญี้ยว หลง เต๋ย, เหยียด ฒู้ง ฯฒฯ หญั่น อ๊ะ. 37เยีย บัว เยียม ฑั้ง เญย เมี่ยน เหยียด ฒู้ง ม่าย หญี่ แป๊ะ เธี้ยด เหฒียบ หลัวะ ล่าน. 38เต้าๆ หญั่น เป๊ว ฯฒฯ เปี้ยน เบย้า กวั่ง วั้ว ค้อย, อ๋อย ปุน ฑั้ง เฮง เต๋ย.
ฑั้ง หว่าย มป่า เมี่ยน ตุ๊ แหม่ง ธ้วด
39ลู่ง ฌัง ต้าย, ไม้ ม่าย หาย เต้า เฒียะ ตุ๊ วั้ว นอม ต๋อง, มป่า นิ่น บัว ปวัด ม่าย นอม ววม-เก๊าะ ม่าย ซา-เฒียว ย่วน เญย, คู่ ธ้วด เญย, ฯฒฯ ตี่ง อ๋อย ต้อ ฑั้ง ธ้วด วั้ว นอม ต๋อง. 40นิ่น บัว ฯฒฯ ฮงะ ตั๋ง หฒุ่ย ฑั้ง เญย กะน้าย กวั่ง, แอ๋ง ไจ๊ ฆอย ฑั้ง-เบียด เญย ฮลาง. นิ่น บัว แอ๋ง ธอง เจี๊ยน ฑั้ง-มฆ้อง เญย เดีย-บวั้ง ปุน หฑยาว ป่วน หูง เจี๊ยน มี่ง ธ้วด วั้ว เบี๋ยน. 41มป่า มี่ง เกา, ฑั้ง ปวั้ง หฒุ ววม- กั๊บ, ฑั้ง-มฆ้อง เหฑี่ยง หฒุ ซา-เฒียว ดุย เก๊าะ เจี๊ยน, ไม้ ไฮ่ มี่ง. ฑั้ง-เตว๊ย ฯฒฯ หฒุ ววม เนี้ยว ฮู้ หมี่ อ๊ะ.
42แปง ฮนั้ม อ๋อย ไต๋ กวั่ง ฒุ์ย-เมี่ยน, เหฑีย นิ่น บัว ไฮ่ เฒี่ยว ววม เปย๋า มเปย. 43มป่า แปง-เปย๊ย อ๋อย เลี่ยว เปาโล ฯฒฯ ไม้ ปุน นิ่น บัว ไต๋ เหยียด เต้า. นิ่น เห่ว หาย เต้า ไฮ่ เฒี่ยว ววม กุ๊น ถิว เหฌี่ย ววม เฒี่ยว ธ้วด วั้ว เบี๋ยน อ๊ะ. 44หาย เต้า ไม้ ไฮ่ เฒี่ยว ววม อ๋อย หฒุ ชัม เดี๋ยง-เป๊น ไฟ เยียม ฑั้ง ไฮ่ เบี้ยว เญย กะน้าย เฒี่ยว ธ้วด เบี๋ยน. ฮนั้ง น้าย เหยียด ฒู้ง ฯฒฯ ธ้วด เบี๋ยน, ไม้ หฒุ กวั่ง แหม่ง.
Currently Selected:
กง-โฒ่ 27: IuMiTH
Highlight
Share
Copy
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007