MATAIO 1
HMOTU93

MATAIO 1

1
Iesu ena tubuna edia ladana
1Iesu Keriso ia vara ena sivarai be inai: Ia be Davida ena natuna, bona Aberahamo ena natuna.
2Aberahamo ese Isako ia havaraia. Isako ese Iakobo ia havaraia. Iakobo ese Iuda mai ena tadina danu ia havaraia. 3Iuda ese Perese bona Sera ia havaraia, Tamara ena bogana dekenai. Perese ese Hesarona ia havaraia. Hesarona ese Rama ia havaraia. 4Rama ese Aminadaba ia havaraia. Aminadaba ese Nasona ia havaraia. Nasona ese Salamona ia havaraia. 5Salamona ese Boasi ia havaraia, Rahaba ena bogana dekenai. Boasi ese Obeda ia havaraia, Ruta ena bogana dekenai. Obeda ese Iese ia havaraia. 6Iese ese Davida, Israela taudia edia king, ia havaraia.
King Davida ese Solomona ia havaraia, Uria ena adavana ena bogana dekenai. 7Solomona ese Rehoboama ia havaraia. Rehoboama ese Abaisa ia havaraia. Abaisa ese Asa ia havaraia. 8Asa ese Iehosapata ia havaraia. Iehosapata ese Iehorama ia havaraia. Iehorama ese Usaia ia havaraia. 9Usaia ese Iotama ia havaraia. Iotama ese Ahasa ia havaraia. Ahasa ese Hesekaia ia havaraia. 10Hesekaia ese Manase ia havaraia. Manase ese Amona ia havaraia. Amona ese Iosaia ia havaraia. 11Iosaia ese Iehoiakini mai ena tadina danu ia havaradia, Babulonia taudia ese Israela taudia idia abidia lao Babulonia neganai.
12Idia noho Babulonia neganai, Iehoiakini ese Sealetiele ia havaraia. Sealetiele ese Serubabele ia havaraia. 13Serubabele ese Abiuda ia havaraia. Abiuda ese Eliakimi ia havaraia. Eliakimi ese Asora ia havaraia. 14Asora ese Sadoka ia havaraia. Sadoka ese Akimi ia havaraia. Akimi ese Eliuda ia havaraia. 15Eliuda ese Eleasara ia havaraia. Eleasara ese Matana ia havaraia. Matana ese Iakobo ia havaraia.
16Iakobo ese Iosepa, Maria ena adavana, ia havaraia. Maria dekena amo Iesu, idia gwauraia Keriso, ia vara.
17Unai dainai, uru ibounai Aberahamo ena nega dekena amo ia mai bona Davida be uru 14. Bona Davida ena nega dekena amo ia mai bona Babulonia dekenai, mai guia danu idia laohaia neganai, be uru 14. Bona Babulonia dekenai idia laohaia negana dekena amo ia mai bona Keriso, be uru 14.
Iesu ia vara
18Iesu Keriso be inai bamona ia vara. Iena sinana Maria be Iosepa ena maoheni, to idia ruaosi nega ta do idia mahuta hebou lasi, Lauma Helaga ese Maria ia harogorogoa. 19Maria ena maoheni Iosepa be kara maoromaoro tauna, bona hahine dekenai hemarai henia karana ia ura lasi, unai dainai hunia dala dekenai ia negea gwauraia.
20Unai bamona ia laloa noho neganai, Lohiabada ena aneru ta ese nihi dekenai ia hedinarai henia, ia gwau, “Iosepa Davida e, oiemu adavana Maria abia totona oi gari lasi, badina be inai mero, Maria ena bogana dekenai ia noho be, Lauma Helaga ese ia henia vadaeni. 21Ia be mero ta do ia abia. Ena ladana be do umui atoa Iesu, badina be ia ese iena bese taudia edia kara dika dekena amo do ia hamauridia.”
22Inai kara ibounai idia vara, Lohiabada ese peroveta tauna ena uduna dekena amo ia gwauraia herevana hamomokania totona. Ia gwau,
23“Umui kamonai, tau ia diba lasi kekeni ese ena natuna do ia abia, mero ta.
Iena ladana do idia atoa, Emanuela.”
Emanuela ena anina be, “Dirava ita dekenai ia noho.”
24Iosepa be mahuta dekenai ia noga, vadaeni Lohiabada ena aneru ese ia hamaoroa hegeregerena ia karaia. Iena adavana Maria ia abia dae. 25To Iosepa be Maria danu nega tamona idia mahuta lasi, ela bona Maria ese iena natuna ia abia. Vadaeni mero ena ladana be Iosepa ese ia atoa, Iesu.

Encouraging and challenging you to seek intimacy with God every day.


YouVersion uses cookies to personalize your experience. By using our website, you accept our use of cookies as described in our Privacy Policy.