A̱ga̱la̱tiyawa 4
4
1Kyang hu nang n fa a̱ji a̱ni, huhwa yet; ka̱ a̱tyu a̱ na ya gado a̱ni, ni̱ yet a̱banggwon, a̱ vwuon ma̱ng a̱khwo a̱li da̱ a̱lyiat tyok ya gado bah. A̱mgba̱m ma̱ng a̱nia, nggwon kikya byia̱ gado a̱li hu. 2Neet nang nggwon ka ni̱ yet a̱da̱dei, á̱ na tyia̱ á̱niet ba̱ nyia̱ tyok tazwa nka, ba̱ chok ka. Ba̱ bu beang nkaa, si̱ nat jen nang a̱tyia̱ nka wu nsak ka̱ na ngya gado a̱li hu a̱ni. 3Ma a̱nia wa nzi̱t meang, jen ji nang zi̱ ku ngyet mman di̱ khwi Kristi a̱ni, zi̱ ku yet á̱khwo bya di̱ khwi a̱tyin taada ma̱ng doka á̱nietbishyi mi̱ swanta huni.
4A̱wot nang a̱tsatsak njen nang A̱gwaza la̱p a̱ sak nnyia̱ a̱ni, A̱gwaza si̱ ta̱m ma̱ng Nggwon nggu ka. Ka̱ ku byia̱ a̱yang byin, ka̱ si̱ swan ma̱ng á̱niet ba̱ khwi doka Musa ji a̱ni. 5A̱gwaza ku ta̱m ka, mat ka̱ ka san á̱niet ba̱ shya̱ mbwak tyok doka Musa ji a̱ni; da̱nian ka̱ ka kyiak nzi̱t ka̱ tyia̱ nzi̱t zi̱ yet á̱tsatsak mman A̱gwaza.
6Mat nang nyin ma̱ng a̱nzi̱t ngyet mman nia a̱ni, A̱gwaza si̱ ta̱m ma̱ng A̱za̱za̱rak Ntswa Nggwon nggu wu mi̱ nfwuo nzi̱t na. Nggu wa tyei nang zi̱ ngyei A̱gwaza, “Abba, A̱tyia̱!” 7Mat a̱nia, nyi bu yet á̱khwo bah. Nyi yet mman nia. Nang nyi ngyet mman nia a̱ni, A̱gwaza na tyia̱ nyi ya gado nggu hu.
Bulut Byia̱ A̱fi̱fa tazwa Á̱niet Khwi A̱ga̱la̱tiyawa
8Di̱n jen jhyang, neet nang nyin Nnwap na̱ nwai yet A̱yahudawa a̱ni ka̱n nwuo khwi Yesu hu bah, nyi ku lyen a̱tsatsak A̱gwaza wu bah. Nyi si̱ yet á̱khwo bya mbwak a̱yaagwaza sang swuan á̱ghyang, ba̱ nwai yet á̱tsatsak a̱ni#4:8 Ku: “Tswá ji ji̱ nwai yet á̱tsatsak a̱ni.”. 9A̱wot ma̱ninika, nang nyi ndyen A̱gwaza a̱ni, (n fa nang A̱gwaza wa ndyen nyin a̱ni); yihwa mbyia̱ nang nyi nchat bwuok lilyim nyi khwi a̱buk taada ma̱ng doká swanta da̱ ji̱ byia̱ nyin kpangti̱n a̱ni bah?
10Nyi ni̱ khwi mmam a̱yet njhyáng, ku mmam a̱yet yong zwát swai, ku mmam a̱yet jen chak yak, ma̱ng mmam a̱yet ndyia̱ jhyang, di̱ chat khwi A̱gwaza, da̱nian nyi ka shya̱ shok nggu ji. 11Si̱ a̱hwa tyia̱ n byia̱ a̱fi̱fa tazwa nyin! Ku li á ngyei n byian a̱pyia̱ nung kya jen nang n tang a̱lahyia̱ di̱ nyia̱ nta̱m ma̱ng a̱nyin a̱ni! 12Nyin á̱niet khwi Yesu ba nang n chat a̱ni, ma̱sa̱kut, nyi swan swat nyin hu ma̱ sa̱t, di̱ nwai khwi doká A̱yahudawa ma̱nang a̱nung a̱ni. Mat n ka̱n swan tangka̱i swat yet Nnwap na̱ nwai yet A̱yahudawa nang a̱nyin a̱ni. N si̱ ngyet a̱sa̱t a̱yin mi̱ tyok doká a̱hwa.
Di̱n jen nang n ku ntsa shei nyin A̱sham Nkhang ka a̱ni, nyi ku bwuo nung a̱bun bah. 13A̱tsak a̱lyiat, n chat nyi jhyung; jen nang n ku tsa shei nyin A̱sham Nkhang ka a̱ni, nang zwan nyia̱ nung. 14Ku nang vam hu ku nnyia̱ nung a̱nia a̱ni, ku si̱ yet a̱wat kya da̱ a̱vwuo nyin, nyi lak nung ku nyi jhyuai nung. A̱wot a̱mgba̱m ma̱ng a̱nia, nyi si̱ nyia̱ a̱nia bah. Da̱ a̱kwonu a̱kya, nyi si̱ san nung mbwak nfeang. Nyi si̱ chok nung nang n wa ngyet a̱ta̱m tswa A̱gwaza, ku Yesu Kristi wa ma̱ a̱pyia̱ nggu a̱ni. 15A̱lyia̱ sai nyin ka ma̱ng a̱gwai nyin na nang nyi ku fa̱k di̱n jen a̱ja a̱ni, shya̱ a̱ji wa? N hyia̱ a̱tsak a̱lyiat, ka̱ nyi wa byia̱ vak, nyi turung tswá a̱ghyi nyin ji, nyi nwuak nung jii! 16Ma̱ninika, nyi kyiak nung nang a̱tyu lak li nyin a̱ni, mat n tak ma̱ng a̱nyin a̱tsak a̱lyiat a?
17Sot á̱niet ba̱ tyiet khwi doka A̱yahudawa a̱ja a̱ni, ku ntyia̱ a̱lyia̱ ba̱t da̱ nyin. Ba̱ si̱ chat nyi mun á̱pyia̱ ma̱ng a̱mba. A̱mgba̱m ma̱ng a̱nia, nkyang nang ba̱ fa mi̱ nfwuo mba na a̱ni, na̱ ku yet a̱ka̱tuk wa. Ba̱ chat ba̱ ghai nyin ma̱ng a̱nzi̱t, da̱nian a̱mgba̱m nyin nyi ka nwuak mba nfwuo nyin na. 18Ka̱ á̱niet byia̱ fwuo di̱ nyia̱ nyin a̱tan kyang, ku yet a̱sham ba̱t. A̱wot ku myim ba̱ nyia̱ nyin dyo kuzang jen. Ba̱ yok chat nyia̱ nyin dyo di̱n jen nang n shya̱ ndung ma̱ng a̱nyin wa a̱ni bah.#4:18 Ku: “Ku yet a̱sham nyi nwuak á̱pyia̱ nyin da̱nian a̱yin, mat a̱tan ta̱fwat. Nyi na ya a̱son ma̱ng nyia̱ a̱nia kuzang jen, kang ma̱ng jen nang n shya̱ ndung ma̱ng a̱nyin wa a̱ni bah.”
19Nyin mman nung na nang n chat a̱ni! Ku li á ngyei n fwuong a̱khwu da̱ nyin, ma̱nang a̱byii̱k a̱fa ni̱ nfwuong a̱khwu ka̱ nggwon ka bwuak ma̱ gbi̱ri̱p di̱n jen twei ma̱ng byin a̱ni! A̱wot fwuong a̱khwu hu na ya a̱son si̱ nang nyi tyia̱ á̱niet khwi ba̱ tat á̱ghyi di̱ mun á̱pyia̱ di̱ khwi Yesu Kristi. 20N chat ba̱t si̱ n shya̱ ndung ma̱ng a̱nyin ma̱ninika, da̱nian n ka shyak a̱nwuat a̱lyiat nung ka, ka̱ nat cha̱chaat ma̱ng a̱di̱dam nyin wu a̱ja. N tyia̱ ma̱ tai. A̱wot n si̱ mbyia̱ a̱fi̱fa tazwa nyin!
Kidee tazwa Mman Ibrahim A̱feang
21Nyin á̱niet ba nyi chat doka Musa ji ji̱ nyia̱ tyok tazwa nyin a̱ni, nyi hyia̱ ma̱ng a̱nung; nyi fi̱k kyang hu nang á̱ lyuut mi̱ doka ji a̱ni shansham a? 22Á̱ lyuut ma̱ A̱lyiat A̱gwaza na nyia̱, Ibrahim ku byia̱ mman á̱sam a̱feang. Nggwon a̱sam a̱nyiung si̱ yet a̱si̱ a̱byii̱k a̱ yet a̱khwo a̱ni. A̱wot a̱nyiung ka si̱ yet a̱si̱ a̱byii̱k a̱ yet a̱yang a̱li a̱ni.#4:22 A̱ts 16:15; 21:2-3. 23Nggwon Ibrahim ka nang a̱byii̱k a̱ yet a̱khwo wu ku byin a̱ni, Ibrahim ku shya̱ nka di̱n vak chet a̱tyubishyi nang á̱ mmeang ma̱ng tyei mman a̱ni. A̱wot nggwon a̱feang ka nang a̱yang a̱li wu ku byin a̱ni, á̱ ku byin kaa di̱n vak nang chet A̱gwaza hwa ntyia̱ a̱li̱ka̱uli wu si̱ mbai da̱ a̱nu ka a̱ni.
24Á̱nyiuk a̱feang bani, yet kidee tangka̱i la̱p a̱li̱ka̱uli a̱feang A̱gwaza wa. A̱byii̱k a̱ yet a̱khwo wu nang á̱ ngyei Aja̱ra wu a̱ni, fa A̱fan Si̱nai kya nang A̱gwaza ku nnwuak mba doka ji. Ji̱ si̱ tyia̱ mba khwo hu a̱ni. 25A̱wot Aja̱ra yet kidee A̱fan Si̱nai kya ka̱ shya̱ ma̱ a̱byin A̱la̱ra̱bawa a̱ni. Nggu wa bu yet kidee a̱keang Urusha̱lima mi̱ swanta hu ma̱ninika.#4:25 Ku: “A̱fan Si̱nai yet kidee ma̱ a̱byin A̱la̱ra̱bawa a̱ni, ka̱ li nang Urusha̱lima ma̱ninika.” Mat nggu ma̱ng a̱mgba̱m mman nggu na, ba̱ yet á̱khwo bya di̱ khwi doka A̱yahudawa ji.
26A̱wot Sa̱raya, a̱ yet a̱yang a̱li wu a̱ni, yet kidee Urusha̱lima, a̱si̱ Ma A̱gwaza tswazwa hwa. Nggu wa yet a̱yang a̱li a̱ byia̱ sa̱t hu a̱ni. A̱wot nggu wa yet a̱yang byin nzi̱t, zi̱ yet á̱niet khwi ba a̱ni. 27Ma̱nang á̱ ndyuut ma̱ A̱lyiat A̱gwaza na tazwa Sa̱raya a̱ni, nyia̱,
“Gwai, nwan a̱byii̱k a yet a̱na̱khwu a̱ni;
nwan da̱ a ka̱n mak byin nggwon a̱ni bah!
Koot a̱gugwong da̱ a̱gwai,
nwan a̱byii̱k a ka̱n nwai twei ma̱ng byin,
a si̱ fa̱k a̱khwu a̱ni!
Mat a̱byii̱k nang á̱ kai á̱ ghwon a̱ni,
mman nggu na shi á̱kpa!
Ba̱ shi á̱kpa á̱ swak mman a̱byii̱k
a̱ shya̱ ma̱ng a̱tyok nggu wu a̱ni!#4:27 Wa̱i a̱lyiat: A̱byii̱k a̱ shya̱ ma̱ng a̱tyok nggu wu a̱ni Bulut lyiat a̱lyiat nani, a̱ fa Aja̱ra nang Ibrahim ku myia̱ a̱ni. Ibrahim si̱ kwan ma̱ng mumwang chet a̱tyubishyi, Aja̱ra a̱ ka byin nggu nggwon.”
28A̱wot nyin á̱niet khwi Yesu ba nang n chat a̱ni, ma̱ninika, nyin meang nyi yet kidee mman nang á̱ tyei mat a̱li̱ka̱uli nang A̱gwaza ku nyia̱ Ibrahim ndyo, ma̱nang á̱ mbyin Ishaku mat a̱li̱ka̱uli a̱ni. 29A̱wot sot á̱niet ji ji̱ chat nyi khwi doka ji a̱ni, bibya ya̱shuk nyin ma̱nini. Ba̱ nyia̱ a̱nia, ma̱nang Isi̱melu, nggwon ka nang a̱khwo a̱byii̱k wu ku byin di̱n vak chet nang a̱tyubishyi ntyei mman a̱ni. Ka̱ ku doot ka̱ si̱ ya̱shuk Ishaku, nggwon ka nang a̱yang a̱li wu ku byin mat chet A̱za̱za̱rak Ntswa hwa a̱ni.
30A̱wot yihwa nang á̱ lyuut ma̱ A̱lyiat A̱gwaza na? Nyia̱,
“Ti̱n a̱khwo a̱byii̱k wu
ma̱ng nggwon a̱sam nggu ka ba̱ nkat.
Mat nggwon ka nang a̱khwo
a̱byii̱k wu byin di̱ khwo a̱ni,
ka̱ na ya gado dundung ma̱ng
nggwon ka nang a̱yang a̱li wu
a̱ byia̱ sa̱t hu byin a̱ni bah.”#4:30 A̱ts 21:10.
31Mat a̱nia, nyin á̱niet khwi Yesu ba nang n chat a̱ni, nzi̱t, zi̱ yet kidee mman a̱byii̱k a̱ yet a̱khwo wa a̱ni bah. Zi̱ yet kidee mman a̱byii̱k a̱ yet a̱sa̱t wa a̱ni.
Currently Selected:
A̱ga̱la̱tiyawa 4: TyapNT
Highlight
Share
Copy
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.