A̱fisawa 1

Byat

1Nung Bulut, a̱tyu nang á̱ khai mat shim A̱gwaza gu yet a̱ta̱m Kristi Yesu a̱ni. N dyuut wusika jini naat ndyo da̱ a̱vwuo á̱za̱za̱rak á̱niet khwi A̱gwaza ba̱ shya̱ ma̱ a̱keang A̱fisut#1:1 Lyuut ghyang mbyia̱ A̱fisut bah.. Ba̱ si̱ bu yet á̱tsotswat á̱niet khwi Kristi Yesu a̱ni.

2Yok A̱gwaza a̱ yet a̱tyia̱ nzi̱t wu a̱ni, ma̱ng A̱tyoli Yesu Kristi a̱ nyia̱ nyin shok. A̱wot a̱ nang nyin swat nyinyang.

A̱gwaza Nang zi̱t A̱li̱ba̱rka A̱za̱za̱rak Ntswa

3Yok zi̱ dyep A̱gwaza, a̱ yet A̱tyia̱ A̱tyoli nzi̱t wu Yesu Kristi a̱ni. Nggu wa nang nzi̱t kuzang a̱li̱ba̱rka A̱za̱za̱rak Ntswa a̱ neet ma̱ a̱ka̱vwuo Ma A̱gwaza tswazwa#1:3 Wa̱i a̱lyiat: A̱ka̱vwuo Ma A̱gwaza tswazwa. Swáng a̱lyiat jini á̱ lyuut ji a̱ka̱fwuon kya ma̱ A̱li̱ka̱uli A̱fai wu, a̱wot a̱mgba̱m ji ji̱ shya̱ mi̱ wusika A̱fisawa ja ma̱ nyin ji A̱fi 1:20b; 2:6b; 3:10; 6:12b. a̱ni, mat zi̱ mun á̱pyia̱ ma̱ng Kristi. 4A̱gwaza ku chat zi̱t, a̱ si̱ khai nzi̱t di̱ mun á̱pyia̱ ma̱ng Kristi, zi̱ yet á̱za̱za̱rak ma̱ng á̱niet sang a̱bun a̱zaghyi nggu, neet nang gu ka̱n mat swanta hu bah.

5A̱gwaza ku mi̱ nda̱p a̱ sak a̱ si̱ kyiak zi̱t nang mman nggu na a̱ni. A̱ si̱ bai ma̱ng a̱nzi̱t da̱ a̱vwuo nggu mat mun á̱pyia̱ nzi̱t hu ma̱ng Yesu Kristi. Ta̱m huni hwa gu ku chat a̱ nyia̱, a̱wot a̱ si̱ fa̱k nyinyang hu ba̱t. 6A̱gwaza ku nyia̱ a̱nia, da̱nian zi̱ ka dyep shok nggu ji. Ji̱ byia̱ a̱kyenkyai shi nang gu nyia̱ nzi̱t dyo; nzi̱t zi̱ yet á̱niet khwi Yesu a̱ yet nggwon nggu ka nang gu chat za̱m a̱ni. 7A̱gwaza fa̱k kunak zi̱t, a̱ si̱ nyia̱ nzi̱t shok gba̱mgbam. A̱ si̱ san nzi̱t ma̱ng a̱sok Nggwon nggu na, zi̱ ka yet á̱sa̱t á̱niet, a̱wot a̱ si̱ chi a̱ka̱tuk nyia̱ nzi̱t wu. 8Nang A̱gwaza nnyia̱ zi̱t shok ma̱ gba̱mgbam a̱mgba̱m a̱ni, a̱ si̱ nang nzi̱t mumwang ma̱ng lyen fi̱k kyang ku sang gak a̱ni.

9Ma̱ninika, A̱gwaza ka̱n tyai nzi̱t kyang ku shya̱ di̱ niat nang gu la̱p a̱ sak tazwa Kristi a̱ni. A̱wot la̱p sak huni ku na bai da̱ a̱nu ka cha̱chaat ma̱nang ku mmyim gu a̱ni. 10A̱wot si̱ huni hwa gu la̱p a̱ sak: Da̱ a̱cha̱chaat njen wu, A̱gwaza na tung a̱mgba̱m nkyang na̱ shya̱ Ma A̱gwaza tswazwa ma̱ng a̱byin a̱ni ndung. A̱ tyia̱ na mbwak tyok Kristi hu. 11Mbeang a̱nia, mat nang zi̱ mmun á̱pyia̱ ma̱ng Kristi a̱ni, A̱gwaza khai nzi̱t zi̱ yet á̱niet nang gado nggu a̱ni,#1:11 Ku: “Zi̱ ka̱n san gado da̱ a̱vwuo A̱gwaza.” da̱nian a̱ mi̱ nkhai nzi̱t neet nang gu ka̱n nyia̱ swanta hu bah. A̱wot a̱ si̱ tyia̱ kuzang kyang si̱ bai cha̱chaat ma̱ng kyang gu la̱p a̱ sak a̱ni.#1:11 KDok 32:9-10.

12La̱p sak A̱gwaza hu hwa ku yet, nzi̱t A̱yahudawa zi̱ ku tsa tyia̱ fwuo di̱ Kristi a̱ni, da̱nian zi̱ ka dyep A̱gwaza zi̱ nwuak gu shi. 13A̱wot ma̱ninika, nyin Nnwap na̱ nwai yet A̱yahudawa a̱ni meang, nyi ka̱n fa̱k a̱tsatsak a̱lyiat wu, a̱ yet A̱sham Nkhang ka̱ tak si̱sak nang A̱gwaza nsan nyin a̱ni. A̱wot di̱n jen nang nyi nwuak fwuo da̱ Kristi a̱ni, a̱ si̱ tyia̱ nyin a̱timi nyi yet á̱si̱ nggu, a̱ si̱ nang nyin A̱za̱za̱rak Ntswa nang gu nyia̱ a̱li̱ka̱uli a̱ na nang nyin neet gbangbang a̱ni. 14A̱za̱za̱rak Ntswa nang A̱gwaza nang zi̱t a̱ni, nggu wa tak nang A̱gwaza na nnang zi̱t gado nang gu nyia̱ a̱li̱ka̱uli a̱ na nang nzi̱t a̱ni; a̱wot a̱ si̱ san nzi̱t zi̱ yet á̱niet guu. A̱ ku nyia̱ a̱nia, da̱nian zi̱ ka dyep, a̱wot zi̱ bu nwuak gu shi.

Yok Á̱niet Khwi ba̱ Lyen A̱gwaza Shansham

15N ku nfa̱k si̱sak nang nwuak fwuo nyin hu da̱ A̱tyoli Yesu mbyia̱ chet, ma̱ng si̱sak nyi bu nchat a̱mgba̱m á̱niet khwi A̱gwaza ba mi̱ kuzang a̱vwuo a̱ni. 16Nang n ku ntsa fa̱k a̱nia a̱ni, n ka̱n ghwon gwai A̱gwaza da̱nian nyin bah. A̱wot n ni̱ naai A̱gwaza nchi̱ri̱ng da̱nian nyin.

17N ni̱ ngya a̱son mi̱ naai A̱gwaza,

a̱ yet A̱tyia̱ a̱ byia̱ a̱kyenkyai shi,

a̱ si̱ bu yet A̱tyia̱ A̱tyoli nzi̱t wu Yesu Kristi a̱ni;

n naai gu nang nyin A̱za̱za̱rak Ntswa.

A̱za̱za̱rak Ntswa wu wa

na nang nyin mumwang,

a̱ bu tyai nyin A̱gwaza wu,

da̱nian nyi ka mbeang lyen nggu hu,

a̱wot nyi ka fi̱k gu shansham.

18N bu naai A̱gwaza gu khwuk

nfwuo nyin na ma̱ng sai nggu hu,

da̱nian nyi ka fi̱k gbang a̱lyia̱

di̱ tyia̱ fwuo nang gu nyia̱

a̱li̱ka̱uli a̱ na nang nyin,

di̱n jen nang gu ku ngyorong nyin a̱ni.

A̱ yorong nyin,

nyin á̱niet ba nyi yet á̱za̱za̱rak á̱niet nggu ba,

nyi si̱ bu yet zwá nggu ji,

ma̱ng a̱kyenkyai shi gado nggu wu a̱ni#1:18 Lyuut ghyang mbyia̱: “Gado ku yet zwa ku si̱ bu byia̱ a̱kyenkyai shi nang A̱gwaza nwuak á̱za̱za̱rak á̱niet nggu ba a̱ni.”.

19N bu naai A̱gwaza,

gu tyia̱ nyi fi̱k a̱gba̱ndang chet nggu wu,

da̱nang á̱ si̱ mi̱n tyan hu ma̱ng kyang a̱ni bah.

Chet huni yet si̱ nang gu nnyia̱ ta̱m da̱nian nzi̱t á̱niet

zi̱ nwuak fwuo da̱ nggu a̱ni.

20Ma̱ a̱gba̱ndang chet wuni wa,

nang A̱gwaza ku nta̱ngam Kristi ma̱ng swuan

ma̱ á̱niet ba̱ ka̱n kwi a̱ni;

a̱wot a̱ si̱ sak gu da̱ a̱vwuo shi tyok

a̱zayak Ma A̱gwaza tswazwa.

21Ma̱ninika, Kristi nyia̱ tyok tazwa

a̱mgba̱m a̱tan a̱yaata̱m tswá A̱gwaza,

ma̱ng kuzang á̱ka̱tuk ntswá, á̱gwam,

ntyok, nchet, a̱yaakwak a̱son,

ma̱ng kuzang kyang,

Yesu nyia̱ tyok mi̱ swanta

huni hwa ma̱nyin hu bah,

a̱wot ba̱ng si̱ nat swanta

ku chobai a̱ni meang.

22A̱gwaza ka̱n tyia̱ a̱mgba̱m kuzang

kyang bwak tyok Kristi.

A̱wot a̱ si̱ bu tyia̱ gu yet

a̱kwak a̱son tazwa a̱mgba̱m kuzang kyang,

a̱ bu yet a̱pyia̱ a̱mgba̱m

á̱niet khwi ba ba̱ ka shya̱ a̱li̱ba̱rka.

23A̱wot á̱niet khwi ba yet vam Kristi hwa;

nggu wa ma̱ a̱pyia̱ nggu

tyia̱ vam hu nshya̱ cha̱chaat

ku si̱ yet a̱jhyem.

A̱wot Kristi wa yet a̱kwak a̱son

di̱ kuzang kyang,

mi̱ kuzang a̱vwuo.

Currently Selected:

A̱fisawa 1: TyapNT

Highlight

Copy

Want to have your highlights saved across all your devices? Sign up or sign in

Learn more about A̠lyiat A̠gwaza na di̠n Tyap: A̠li̠ka̠uli A̠fai