Nta̱m A̱yaata̱m 7
7
Itifanut Tak Ta̱fwat a̱zaghyi A̱tung Sot A̱cha̱chet A̱yahudawa
1A̱jawa a̱gba̱ndang pris wu si̱ lyip Itifanut, “A̱hyiak nang á̱niet bani bat ang a̱ni; a̱tsak a̱lyiat wa a?”
2Itifanut si̱ nwuak gu shim nyia̱, “Nyin a̱yaatyia̱ ma̱ng á̱na̱nyiuk nung ba, nyi myiai a̱fufwuo nyi fa̱k ta̱fwat ji nang mbyia̱ na nhyia̱ a̱ni. A̱gwaza nzi̱t wu a̱ byia̱ a̱gba̱ndang a̱kyenkyai shi a̱ni, ku tyai a̱pyia̱ nggu da̱ a̱vwuo a̱tyia̱ a̱khwop nzi̱t wu Ibrahim, nang gu shya̱ ma̱ a̱byin Mesopotamiya, neet nang gu ka̱n nat swat ma̱ a̱keang Haran bah. 3A̱gwaza si̱ nyia̱ ma̱ng a̱nggu,
‘Doot a ghwon á̱niet ang ba, ma̱ng a̱byin ang ka.
A nat ma̱ a̱byin ka nang n na ntak ang a̱ni.’
4“A̱jawa gu si̱ doot ma̱ a̱byin A̱ka̱ldiyawa ka. A̱ si̱ nat, a̱ si̱si̱ swan ma̱ a̱keang Haran ka. Nang a̱tyia̱ nggu wu ba̱ nkhwu a̱ni, A̱gwaza si̱ bai ma̱ng a̱nggu ma̱ a̱byin kani nang nyi nswan ma̱nini a̱ni.
5“A̱wot nang á̱ ka̱n nang gu gado a̱byin hu di̱n jen a̱ja bah. Mi̱ da̱ mba á̱ ka̱ nang nggu a̱bavwuo ma̱ chunchwiit ma̱ a̱byin ka bah. A̱gwaza ku nyia̱ nggu a̱li̱ka̱uli a̱ na nwuak nggu ma̱ng kwai nggu ji a̱mgba̱m a̱byin ka; ku di̱ nang gu ka̱n shya̱ nggwon a̱ni bah. 6A̱gwaza si̱ tak ma̱ng Ibrahim nyia̱,
‘Kwai ang ji na swan ma̱ a̱byin a̱ghyang
da̱ ka̱ yet a̱si̱ mba a̱ni bah.
Á̱ na tyia̱ mba ba̱ nyia̱ khwo ma̱ a̱byin a̱kya
si̱ nat ndyia̱ chyi nyaai.
7Mat a̱nia, nung A̱gwaza,
n na ntyia̱ á̱niet ba̱ tyei mba khwo hu a̱ni swuo a̱bung.
A̱wot di̱ ngaan hu, ba̱ na ghwut ma̱ a̱byin a̱kya,
ba̱ bai ba̱ dyep nung da̱ a̱vwuo kani.’#7:7 A̱ts 12:7; 15:13-14; Ghw 3:12.
8“Di̱n jen a̱ja, A̱gwaza si̱ bu la̱p a̱li̱ka̱uli tyei mi̱ nchen ma̱ng Ibrahim. Mat a̱nia, jen nang Ibrahim ku mbyin Ishaku a̱ni, a̱ si̱ tyia̱ nggu mi̱ nchen a̱tuk mam a̱ni̱nai. A̱wot á̱ si̱ ya a̱son ma̱ng tyei mi̱ chen hu. Jen nang Ishaku ku mbyin Yakubu a̱ni, a̱ si̱ tyia̱ nggu mi̱ nchen. Ma a̱nia wa, Yakubu si̱ ma ntyei a̱yaatyia̱ a̱khwop swak ma̱ a̱feang Isi̱rela ba mi̱ nchen hu.
9“Á̱na̱nyiuk Isuu ba#7:9 Lyuut cha̱chaat: “A̱yaatyia̱ khwop ba.” si̱ kwi swam di̱ Isuu. A̱wot ba̱ si̱ lyap gu a̱ si̱ nyia̱ khwo ma̱ a̱byin Ma̱sa̱r. A̱mgba̱m ma̱ng a̱nia, A̱gwaza si̱ shya̱ dundung ma̱ng a̱nggu. 10A̱wot a̱ si̱ ti̱n nggu mi̱ swuo a̱bung hu. A̱ si̱ nyia̱ nggu shok a̱zaghyi Fi̱ra̱una, a̱ ku yet a̱gwam a̱byin Ma̱sa̱r wu a̱ni. A̱gwaza si̱ bu nang Isuu mumwang ku vwuon ma̱ zan a̱ni. Mat a̱nia, Fi̱ra̱una si̱ kup gu tyok; a̱ si̱ yet gwomna a̱mgba̱m a̱byin Ma̱sa̱r ka. A̱wot a̱ si̱ tyia̱ nggu gu chok a̱li tyok Fi̱ra̱una ka.
11“A̱jawa a̱gba̱ndang zong si̱ kwa ma̱ a̱byin Ma̱sa̱r ma̱ng Ka̱nana. Zong ji si̱ tyia̱ á̱niet ba si̱ swuo a̱bung ba̱t. A̱wot a̱yaatyia̱ a̱khwop nzi̱t ba si̱ nyia̱ kushin nkyayak. 12Nang Yakubu nfa̱k nkhang nang yak nshya̱ Ma̱sa̱r a̱ni, a̱ si̱ ta̱m mman nggu na, ba̱ ku yet a̱yaatyia̱ a̱khwop nzi̱t ba a̱ni; ba̱ ka san yak hu Ma̱sa̱r. A̱chyet kani kya ku yet a̱si̱ ntsa ka.
13“Nang ba̱ ku nnat a̱byin Ma̱sa̱r a̱ka̱feang a̱ni, Isuu si̱si̱ tyai a̱pyia̱ nggu da̱ a̱vwuo á̱na̱nyiuk nggu ba. A̱wot a̱tuk a̱kya kya Fi̱ra̱una meang si̱ ndyen kwai nang Isuu nneet a̱ni. 14A̱jawa Isuu si̱ ta̱m da̱ a̱vwuo Yakubu, a̱tyia̱ nggu wu ma̱ng á̱na̱nyiuk nggu ba, á̱ tyia̱ ba̱ bai Ma̱sa̱r. A̱mgba̱m ba, ba̱ ku yet á̱niet nswak a̱natat ma̱ a̱fwuon bya. 15Huhwa, Yakubu si̱ kuut a̱ nat Ma̱sa̱r. A̱ja wa gu si̱si̱ nkhwu ma̱ng a̱yaatyia̱ a̱khwop nzi̱t ba. 16Á̱ si̱ kwok nkwom mba na á̱ bwuok á̱ nat ndyo Shekem. Á̱ si̱si̱ niat ba ma̱ a̱bi ka nang Ibrahim ku san ma̱ng kurum da̱ a̱vwuo mman Hamor mi̱ Shekem a̱ni.
17“Nang jen ji mbai kpa̱mkpaan nang A̱gwaza na nnyia̱ kyang hu nang gu nyia̱ a̱li̱ka̱uli wu ma̱ng Ibrahim a̱ni, á̱niet nzi̱t ba ba̱ shya̱ Ma̱sa̱r a̱ni si̱ mbeang á̱kpa ka. 18A̱wot nang a̱gwam a̱fai nnwuo nyia̱ tyok Ma̱sa̱r hu a̱ni, a̱ ku lyen kyang tazwa Isuu bah. 19A̱gwam a̱ni si̱ shyok á̱niet nzi̱t ba. A̱ si̱ ya̱shuk mbaa. A̱wot a̱ si̱ tyia̱ a̱yaatyia̱ ma̱ng a̱yaayang ba̱ weam a̱chyuang mman mba wu, na̱ ka kwi.
20“Di̱n jen a̱ja ja nang á̱ ku mbyin Musa. A̱ si̱ yet a̱sham ba̱t a̱zaghyi A̱gwaza. Á̱niet mbyin nggu ba ku nyia̱ na̱mbwon nggu zwát tsat. 21A̱wot jen ji nang ba̱ na nji̱p nggu a̱ni, nggwon a̱nap Fi̱ra̱una si̱ ta̱taat Musa nang gu ni̱ yet a̱banggwon. Ka̱ si̱ kyiak guu, a̱wot ka̱ si̱ go gu nang nggwon a̱pyia̱ nka a̱ni. 22Á̱ si̱ tyiet Musa a̱mgba̱m mumwang á̱niet Ma̱sa̱r hu. A̱wot a̱ ku yet a̱gba̱ndang a̱yin da̱ á̱lyiat nggu na ma̱ng ta̱m nang gu nyia̱ a̱ni.
23“Jen nang Musa ku ntat a̱lyia̱ nswak naai di̱ mbyin a̱ni, a̱ si̱ nyia̱ a̱di̱dam mi̱ fwuo nggu gu naat a̱ byiat á̱na̱nyiuk nggu ba, ba̱ yet á̱niet Isi̱rela ba a̱ni. 24Nang gu ndi á̱ nyia̱ a̱tyo nyiung ma̱ á̱na̱nyiuk nggu ba a̱ka̱kpa̱t a̱ni, a̱ si̱ beang a̱tyu nang á̱ nyia̱ gu a̱ka̱kpa̱t na a̱ni. A̱ si̱ tan gu ndyo, a̱ si̱ lwi a̱tyu Ma̱sa̱r wu a̱ hyat. 25Musa ku fa á̱niet Isi̱rela ba ba̱ yet á̱na̱nyiuk nggu ba a̱ni, na fi̱k nang A̱gwaza nta̱m nggu gu bai a̱ ti̱n mba mi̱ khwo hu. A̱mgba̱m ma̱ng a̱nia, ba̱ si̱ fi̱k bah.
26“Da̱ a̱tsotson tat ka, a̱ si̱ bu nat byiat baa. A̱wot a̱ si̱ li nang á̱niet Isi̱rela a̱feang nyia̱ jhya̱ ma̱ng á̱ghyang mba. A̱ si̱ nat khap baa. A̱ si̱ nyia̱ ma̱ a̱mba, ‘Á̱na̱nyiuk, nyi yet á̱na̱nyiuk bya. Yihwa mbyia̱ nang nyi nyia̱ jhya̱ ma̱ng á̱ghyang nyin?’
27“A̱jawa nang a̱tyu a̱ nyia̱ a̱tyo nyiung a̱ka̱kpa̱t na a̱ni, si̱ yuut Musa a̱ ta zan. A̱ si̱ nyia̱, ‘A̱nyan wa kup ang tyok ma̱ng yet a̱tyu nyia̱ shi̱ri̱ya tazwa nzi̱t? 28A chat a hyat nung ma̱nang a ku nhyat a̱tyu Ma̱sa̱r wu lyuo a̱ni a?’ 29Nang Musa nfa̱k a̱nia a̱ni, a̱ si̱ tyong a̱ ghwut Ma̱sa̱r. A̱ si̱ nat a̱chi̱chen ma̱ a̱byin A̱ma̱da̱niyawa. A̱ja wa gu si̱si̱ ntyei zám sweang.
30“Nang Musa nnyia̱ a̱lyia̱ nswak naai ma̱ a̱byin A̱ma̱da̱niyawa ka a̱ni, a̱ta̱m Ntswa A̱gwaza a̱ghyang si̱ tyai a̱pyia̱ nggu da̱ a̱vwuo Musa ma̱ a̱lya̱ra̱p ndong mi̱ sop mi̱ ntswa a̱yit kpa̱mkpaan ma̱ng A̱fan Si̱nai. 31Nang Musa ndi a̱nia a̱ni, ku si̱ yet gu kyang a̱ga̱de! A̱ si̱ shoot a̱ nat kpa̱mkpaan a̱ ka li nhu shansham. A̱jawa gu si̱ nfa̱k a̱nwuat A̱gwaza ka ka̱ nyia̱,
32‘Nung gwa ngyet A̱gwaza a̱yaatyia̱ a̱khwop ang ba;
A̱gwaza Ibrahim, Ishaku, ma̱ng Yakubu.’
“A̱jawa Musa si̱ ta̱dyuut ma̱ng a̱wun, a̱ si̱ shya̱ gbang a̱lyia̱ a̱ nwuan bah!
33“Huhwa nang A̱gwaza nyia̱ ma̱ng a̱nggu,
‘Ti̱n á̱kwatak ang ba!
Mat a̱vwuo nang a ngyong a̱ni,
ka̱ yet a̱za̱za̱rak wa.
34A̱tsak a̱lyiat, n di si̱sak nang á̱ ngya̱shuk á̱niet nung ba mi̱ Ma̱sa̱r a̱ni.
N si̱ nfa̱k a̱nwurung mba wu.
Huhwa mbyia̱ nang n chyok mbai n ka san mbaa.
Bai, n ta̱m ang a bwuok nat Ma̱sa̱r!’
35“Mat a̱nia, A̱gwaza si̱ ta̱m Musa da̱ a̱vwuo á̱niet gu ba ba̱ ku mi̱ ndak gu a̱ni, nyia̱, ‘A̱nyan wa kup ang tyok a yet a̱tyu nyia̱ shi̱ri̱ya tazwa nzi̱t?’ A̱gwaza ku ta̱m ma̱ng Musa a̱ yet a̱gwam ma̱ng a̱tyusan á̱niet Isi̱rela; nang a̱yaata̱m A̱gwaza wu ku tyai a̱pyia̱ nggu da̱ a̱vwuo Musa ma̱ a̱lya̱ra̱p ndong mi̱ sop ji mi̱ ntswa a̱yit ji a̱ni.
36“A̱wot di̱n vak nyia̱ nkyang a̱ga̱de ma̱ng a̱ri̱bi̱di hwa nang gu nghwut ma̱ng á̱niet Isi̱rela ba Ma̱sa̱r. Ba̱ si̱ byia̱k A̱shong Kyai A̱sa̱khwot. A̱wot ba̱ si̱ chong mi̱ tswa a̱yit, ba̱ng si̱ nat a̱lyia̱ nswak naai.
37“Musa ma̱ a̱pyia̱ nggu ku nyia̱ ma̱ng á̱niet Isi̱rela ba, ‘A̱gwaza na khai, a̱ bu ta̱m a̱yin ma̱ nyin a̱ yet A̱ta̱m a̱kwonu nggu; ma̱nang gu nkhai nung a̱ni. A̱ na yet a̱tyo nyiung mami nyin.’ 38Musa ku shya̱ ndung ma̱ng a̱yaatyia̱ a̱khwop nzi̱t ba, ma̱ng á̱kpa á̱niet A̱gwaza ka mi̱ ntswa a̱yit ji, di̱n jen nang a̱ta̱m tswa A̱gwaza wu ku ndyiat ma̱ng a̱nggu da̱ A̱fan Si̱nai ka a̱ni. A̱ja wa Musa ku nsan a̱lyiat nwuat swuan na nang gu tak ma̱ng a̱nzi̱t a̱ni.
39“A̱wot a̱yaatyia̱ a̱khwop nzi̱t ba si̱ lak khwi á̱lyiat Musa na. Da̱ a̱kwonu a̱kya, ba̱ si̱ lak gu. A̱wot ba̱ si̱ chat ba̱ bwuok á̱ nat Ma̱sa̱r. 40A̱jawa ba̱ si̱ nyia̱ ma̱ng Haruna, ‘Fwu nzi̱t nghwughwu a̱yaagwaza ba̱ na kwak zi̱t a̱son a̱ni ma̱ng a̱kpeap! Mat zi̱ lyen kyang hu ku shya̱ Musa a̱wa a̱ ti̱n nzi̱t a̱ ghwut ndyo Ma̱sa̱r ka a̱ni bah!’
41“Huhwa, Haruna si̱ fwu mba ghwughwu fi̱ng nyak! A̱wot ba̱ si̱ neap ghwughwu hu za̱nang. Ba̱ si̱ bu song a̱yet tazwa ghwughwu a̱gwaza hu nang á̱ fwu mba ndyo a̱ni; á̱ nwuat hu shi. 42Huhwa si̱ mbyia̱ A̱gwaza si̱ mbwuak a̱ma a̱ nang mba. A̱ si̱ kai mba a̱ ghwon. Ba̱ si̱ ya a̱son ma̱ng kwok á̱ta̱ngwat kyai tswazwa ntong nang a̱yaagwaza mba a̱ni! Mman Isi̱rela, ma̱nang a̱yaata̱m a̱kwonu A̱gwaza ba ndyuut a̱ni nyia̱,
‘Nung gwa nang nyi ku fak nung nkyang zwá na;
nyi si̱ nnan nung za̱náng ji ma̱ng nsa̱da̱ka na,
mi̱ lilyia̱ nswak naai hu mi̱ ntswa a̱yit Isi̱rela ji a?
43Kaai, nyi ku kyiak a̱yaagwaza sang swuan nyin ba chong ndyo!
Bibya yet suswak Molek,
ma̱ng ghwughwu a̱ta̱ngwat nang á̱ ngyei Ra̱fan a̱ni.
Bibya yet nghwughwu a̱yaagwaza sang swuan nyin ba,
nang nyi kwok na ntong a̱ni!
Mat a̱nia, n na ntyia̱ nyi nat khwo ma̱ gbang ma̱ a̱byin Babila!’
44“Gbangbang, a̱yaatyia̱ a̱khwop nzi̱t ba ku tat A̱za̱za̱rak Suswak hwa, ba̱ si̱ kyiak á̱ nat ndyo mi̱ tswa a̱yit ji. Á̱ ku tat hu ma̱ cha̱chaat ma̱ng kidee nang A̱gwaza ku ntak Musa a̱ni. 45Ndyia̱ ma̱ a̱di̱di̱t si̱ swak. Jen nang Joshuwa ku nkwak a̱son a̱yaatyia̱ a̱khwop nzi̱t ba mi̱ zwang nang ba̱ ku nyia̱ ma̱ng nnwap nang A̱gwaza ku vwuong mbaa, a̱ ghwut ndyo ma̱ a̱byin kani a̱ni. Ba̱ si̱ kyiak A̱za̱za̱rak Suswak wu á̱ nat ndyo ma̱ a̱byin a̱fai mba ka. A̱ja wa A̱za̱za̱rak Suswak wu si̱ nswan si̱ nat jen A̱gwam Da̱wuda ji.
46“A̱gwaza ku nyia̱ a̱gwam Da̱wuda shok. A̱ si̱ chat a̱ nok A̱li Nwuat Za̱nang A̱gwaza ka̱ na yong di̱n tyan jhyung a̱ni, da̱nian á̱ ka dyep A̱gwaza Yakubu wu. 47A̱wot a̱tsak a̱lyiat, Solomon wa si̱ nok A̱li Nwuat Za̱nang A̱gwaza ka. 48A̱mgba̱m ma̱ng a̱nia, A̱gwaza a̱ Swak ma̱ng A̱kyenkyai Shi a̱ni, ni̱ swan A̱mali Nwuat Za̱nang nang á̱nietbishyi bya nok ma̱ng mbwak mba a̱ni bah. Ma̱nang a̱ta̱m a̱kwonu A̱gwaza wu nhyia̱ a̱ni, nyia̱,
49“A̱gwaza si̱ lyip nyia̱,
‘Tswazwa ji yet a̱vwuo kya nang n swan nyia̱ tyok a̱ni.
A̱wot a̱byin ka si̱ yet a̱vwuo saai a̱ti̱tak nung kya.
Zang tangka̱i A̱li Nwuat Za̱nang hwa nang a̱tyubishyi na nok nung dyo?
A̱wot a̱ji wa yet a̱vwuo fwung nung ka?
50Nung gwa ku nyia̱ a̱mgba̱m nkyang nani
ma̱ng chet mbwak nung hu baa?!’
51“Nyin á̱niet byia̱ gba̱p a̱pyia̱! Nyi yet á̱niet chyi A̱gwaza bya mi̱ nfwuo nyin na!#7:51 Lyuut cha̱chaat: “Nyi yet á̱niet nang á̱ nwai tyia̱ mi̱ chen.” A̱wot a̱fufwuo nyin ba si̱ lak fa̱k a̱tsatsak a̱lyiat wu! Ku yet ta hwa nyi ya a̱son di̱ lak khwi A̱za̱za̱rak Ntswa wu si̱ nat sang sangba̱p a?! A̱nia wa nang a̱yaatyia̱ a̱khwop nyin ba ku nnyia̱. A̱wot nyin meang, a̱nia wa nyi nyia̱! 52Á̱ ku mbyia̱ a̱ta̱m a̱kwonu A̱gwaza a̱nyiung nang a̱yaatyia̱ a̱khwop nyin ba ku nwai ya̱shuk a̱ni a̱?! A̱wot ba̱ ku mun á̱ hyaai a̱yaata̱m a̱kwonu A̱gwaza ba, ba̱ ku shei á̱zanson di̱ chobai A̱tsotswat A̱khwo A̱gwaza wu! Nggu wa yet Kristi#7:52 Wa̱i a̱lyiat: Kristi fa “A̱tyu nang A̱gwaza kup gu tyok a̱ni.” Ma̱r 1:1; Yon 1:41. nang nyi ku lyap, nyi si̱ hyat a̱ni. 53Nyi ku lak khwi doka ji ma̱ kpa̱a̱t! Ku nang nyi ku nsan ji mbwak a̱yaata̱m tswa A̱gwaza ba a̱ni!”
Á̱ Mang Itifanut ma̱ng Nfang á̱ Hyat
54Nang a̱cha̱chet A̱yahudawa ba nfa̱k a̱nia a̱ni, lilyia̱ hu si̱ ya mba ba̱t. Ba̱ si̱ nywai gá̱swuong mba ji á̱ ya̱sang. 55A̱wot nang Itifanut nang A̱za̱za̱rak Ntswa wu tyia̱ gu chet a̱ni, a̱ si̱ gba̱t á̱ghyi ba, a̱ si̱ nwuan Ma A̱gwaza tswazwa. A̱ si̱ li Yesu nang gu yong da̱ a̱vwuo shi a̱zayak A̱gwaza ka ma̱ng a̱kyenkyai shi nggu wu! 56Huhwa Itifanut si̱ nyia̱ ma̱ng a̱mba, “Nyi li la! Ma A̱gwaza tswazwa ka khwuk! N si̱ ndi Nggwon A̱tyubishyi nang ka̱ yong a̱zayak A̱gwaza ka!”
57A̱jawa a̱cha̱chet á̱niet a̱tung ba si̱ koot a̱gugwong. A̱wot ba̱ si̱ kyiak mbwak á̱ nyim a̱fufwuo mba ba. Ba̱ si̱ ni̱m da̱ a̱ka̱nyiung á̱ jhyung Itifanut. 58A̱wot ba̱ si̱ kwak gu á̱ ghwut ndyo á̱ nat a̱ma̱nta a̱keang Urusha̱lima ka. Ba̱ si̱ nwuo mang nggu ma̱ng nfang! A̱wot á̱niet ba̱ ku bat gu a̱hyiak na a̱ni, ba̱ si̱ khwuk a̱yaatoot mba ba. Ba̱ si̱ nwuak nggwon seam a̱ghyang nang á̱ ku ngyei Sha̱wulu a̱ni, ka̱ si̱ chok mba ndyo.
59Nang ba̱ ku mmang Itifanut ma̱ng fang na a̱ni, a̱ si̱ naai A̱gwaza nyia̱, “A̱tyoli Yesu, san ntswa nung ji!” 60A̱jawa gu si̱ nkpaat a̱khwukhwut, a̱ si̱ naai A̱gwaza ma̱ng a̱gba̱ndang a̱nwuat nyia̱, “A̱tyoli, chi a̱ka̱tuk nyia̱ mba wu!” Nang gu nhyia̱ a̱nia a̱ni, a̱ si̱ khwu#7:60 Lyuut cha̱chaat: “A̱ si̱ kai nda.”.
Currently Selected:
Nta̱m A̱yaata̱m 7: TyapNT
Highlight
Share
Copy
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
Nta̱m A̱yaata̱m 7
7
Itifanut Tak Ta̱fwat a̱zaghyi A̱tung Sot A̱cha̱chet A̱yahudawa
1A̱jawa a̱gba̱ndang pris wu si̱ lyip Itifanut, “A̱hyiak nang á̱niet bani bat ang a̱ni; a̱tsak a̱lyiat wa a?”
2Itifanut si̱ nwuak gu shim nyia̱, “Nyin a̱yaatyia̱ ma̱ng á̱na̱nyiuk nung ba, nyi myiai a̱fufwuo nyi fa̱k ta̱fwat ji nang mbyia̱ na nhyia̱ a̱ni. A̱gwaza nzi̱t wu a̱ byia̱ a̱gba̱ndang a̱kyenkyai shi a̱ni, ku tyai a̱pyia̱ nggu da̱ a̱vwuo a̱tyia̱ a̱khwop nzi̱t wu Ibrahim, nang gu shya̱ ma̱ a̱byin Mesopotamiya, neet nang gu ka̱n nat swat ma̱ a̱keang Haran bah. 3A̱gwaza si̱ nyia̱ ma̱ng a̱nggu,
‘Doot a ghwon á̱niet ang ba, ma̱ng a̱byin ang ka.
A nat ma̱ a̱byin ka nang n na ntak ang a̱ni.’
4“A̱jawa gu si̱ doot ma̱ a̱byin A̱ka̱ldiyawa ka. A̱ si̱ nat, a̱ si̱si̱ swan ma̱ a̱keang Haran ka. Nang a̱tyia̱ nggu wu ba̱ nkhwu a̱ni, A̱gwaza si̱ bai ma̱ng a̱nggu ma̱ a̱byin kani nang nyi nswan ma̱nini a̱ni.
5“A̱wot nang á̱ ka̱n nang gu gado a̱byin hu di̱n jen a̱ja bah. Mi̱ da̱ mba á̱ ka̱ nang nggu a̱bavwuo ma̱ chunchwiit ma̱ a̱byin ka bah. A̱gwaza ku nyia̱ nggu a̱li̱ka̱uli a̱ na nwuak nggu ma̱ng kwai nggu ji a̱mgba̱m a̱byin ka; ku di̱ nang gu ka̱n shya̱ nggwon a̱ni bah. 6A̱gwaza si̱ tak ma̱ng Ibrahim nyia̱,
‘Kwai ang ji na swan ma̱ a̱byin a̱ghyang
da̱ ka̱ yet a̱si̱ mba a̱ni bah.
Á̱ na tyia̱ mba ba̱ nyia̱ khwo ma̱ a̱byin a̱kya
si̱ nat ndyia̱ chyi nyaai.
7Mat a̱nia, nung A̱gwaza,
n na ntyia̱ á̱niet ba̱ tyei mba khwo hu a̱ni swuo a̱bung.
A̱wot di̱ ngaan hu, ba̱ na ghwut ma̱ a̱byin a̱kya,
ba̱ bai ba̱ dyep nung da̱ a̱vwuo kani.’#7:7 A̱ts 12:7; 15:13-14; Ghw 3:12.
8“Di̱n jen a̱ja, A̱gwaza si̱ bu la̱p a̱li̱ka̱uli tyei mi̱ nchen ma̱ng Ibrahim. Mat a̱nia, jen nang Ibrahim ku mbyin Ishaku a̱ni, a̱ si̱ tyia̱ nggu mi̱ nchen a̱tuk mam a̱ni̱nai. A̱wot á̱ si̱ ya a̱son ma̱ng tyei mi̱ chen hu. Jen nang Ishaku ku mbyin Yakubu a̱ni, a̱ si̱ tyia̱ nggu mi̱ nchen. Ma a̱nia wa, Yakubu si̱ ma ntyei a̱yaatyia̱ a̱khwop swak ma̱ a̱feang Isi̱rela ba mi̱ nchen hu.
9“Á̱na̱nyiuk Isuu ba#7:9 Lyuut cha̱chaat: “A̱yaatyia̱ khwop ba.” si̱ kwi swam di̱ Isuu. A̱wot ba̱ si̱ lyap gu a̱ si̱ nyia̱ khwo ma̱ a̱byin Ma̱sa̱r. A̱mgba̱m ma̱ng a̱nia, A̱gwaza si̱ shya̱ dundung ma̱ng a̱nggu. 10A̱wot a̱ si̱ ti̱n nggu mi̱ swuo a̱bung hu. A̱ si̱ nyia̱ nggu shok a̱zaghyi Fi̱ra̱una, a̱ ku yet a̱gwam a̱byin Ma̱sa̱r wu a̱ni. A̱gwaza si̱ bu nang Isuu mumwang ku vwuon ma̱ zan a̱ni. Mat a̱nia, Fi̱ra̱una si̱ kup gu tyok; a̱ si̱ yet gwomna a̱mgba̱m a̱byin Ma̱sa̱r ka. A̱wot a̱ si̱ tyia̱ nggu gu chok a̱li tyok Fi̱ra̱una ka.
11“A̱jawa a̱gba̱ndang zong si̱ kwa ma̱ a̱byin Ma̱sa̱r ma̱ng Ka̱nana. Zong ji si̱ tyia̱ á̱niet ba si̱ swuo a̱bung ba̱t. A̱wot a̱yaatyia̱ a̱khwop nzi̱t ba si̱ nyia̱ kushin nkyayak. 12Nang Yakubu nfa̱k nkhang nang yak nshya̱ Ma̱sa̱r a̱ni, a̱ si̱ ta̱m mman nggu na, ba̱ ku yet a̱yaatyia̱ a̱khwop nzi̱t ba a̱ni; ba̱ ka san yak hu Ma̱sa̱r. A̱chyet kani kya ku yet a̱si̱ ntsa ka.
13“Nang ba̱ ku nnat a̱byin Ma̱sa̱r a̱ka̱feang a̱ni, Isuu si̱si̱ tyai a̱pyia̱ nggu da̱ a̱vwuo á̱na̱nyiuk nggu ba. A̱wot a̱tuk a̱kya kya Fi̱ra̱una meang si̱ ndyen kwai nang Isuu nneet a̱ni. 14A̱jawa Isuu si̱ ta̱m da̱ a̱vwuo Yakubu, a̱tyia̱ nggu wu ma̱ng á̱na̱nyiuk nggu ba, á̱ tyia̱ ba̱ bai Ma̱sa̱r. A̱mgba̱m ba, ba̱ ku yet á̱niet nswak a̱natat ma̱ a̱fwuon bya. 15Huhwa, Yakubu si̱ kuut a̱ nat Ma̱sa̱r. A̱ja wa gu si̱si̱ nkhwu ma̱ng a̱yaatyia̱ a̱khwop nzi̱t ba. 16Á̱ si̱ kwok nkwom mba na á̱ bwuok á̱ nat ndyo Shekem. Á̱ si̱si̱ niat ba ma̱ a̱bi ka nang Ibrahim ku san ma̱ng kurum da̱ a̱vwuo mman Hamor mi̱ Shekem a̱ni.
17“Nang jen ji mbai kpa̱mkpaan nang A̱gwaza na nnyia̱ kyang hu nang gu nyia̱ a̱li̱ka̱uli wu ma̱ng Ibrahim a̱ni, á̱niet nzi̱t ba ba̱ shya̱ Ma̱sa̱r a̱ni si̱ mbeang á̱kpa ka. 18A̱wot nang a̱gwam a̱fai nnwuo nyia̱ tyok Ma̱sa̱r hu a̱ni, a̱ ku lyen kyang tazwa Isuu bah. 19A̱gwam a̱ni si̱ shyok á̱niet nzi̱t ba. A̱ si̱ ya̱shuk mbaa. A̱wot a̱ si̱ tyia̱ a̱yaatyia̱ ma̱ng a̱yaayang ba̱ weam a̱chyuang mman mba wu, na̱ ka kwi.
20“Di̱n jen a̱ja ja nang á̱ ku mbyin Musa. A̱ si̱ yet a̱sham ba̱t a̱zaghyi A̱gwaza. Á̱niet mbyin nggu ba ku nyia̱ na̱mbwon nggu zwát tsat. 21A̱wot jen ji nang ba̱ na nji̱p nggu a̱ni, nggwon a̱nap Fi̱ra̱una si̱ ta̱taat Musa nang gu ni̱ yet a̱banggwon. Ka̱ si̱ kyiak guu, a̱wot ka̱ si̱ go gu nang nggwon a̱pyia̱ nka a̱ni. 22Á̱ si̱ tyiet Musa a̱mgba̱m mumwang á̱niet Ma̱sa̱r hu. A̱wot a̱ ku yet a̱gba̱ndang a̱yin da̱ á̱lyiat nggu na ma̱ng ta̱m nang gu nyia̱ a̱ni.
23“Jen nang Musa ku ntat a̱lyia̱ nswak naai di̱ mbyin a̱ni, a̱ si̱ nyia̱ a̱di̱dam mi̱ fwuo nggu gu naat a̱ byiat á̱na̱nyiuk nggu ba, ba̱ yet á̱niet Isi̱rela ba a̱ni. 24Nang gu ndi á̱ nyia̱ a̱tyo nyiung ma̱ á̱na̱nyiuk nggu ba a̱ka̱kpa̱t a̱ni, a̱ si̱ beang a̱tyu nang á̱ nyia̱ gu a̱ka̱kpa̱t na a̱ni. A̱ si̱ tan gu ndyo, a̱ si̱ lwi a̱tyu Ma̱sa̱r wu a̱ hyat. 25Musa ku fa á̱niet Isi̱rela ba ba̱ yet á̱na̱nyiuk nggu ba a̱ni, na fi̱k nang A̱gwaza nta̱m nggu gu bai a̱ ti̱n mba mi̱ khwo hu. A̱mgba̱m ma̱ng a̱nia, ba̱ si̱ fi̱k bah.
26“Da̱ a̱tsotson tat ka, a̱ si̱ bu nat byiat baa. A̱wot a̱ si̱ li nang á̱niet Isi̱rela a̱feang nyia̱ jhya̱ ma̱ng á̱ghyang mba. A̱ si̱ nat khap baa. A̱ si̱ nyia̱ ma̱ a̱mba, ‘Á̱na̱nyiuk, nyi yet á̱na̱nyiuk bya. Yihwa mbyia̱ nang nyi nyia̱ jhya̱ ma̱ng á̱ghyang nyin?’
27“A̱jawa nang a̱tyu a̱ nyia̱ a̱tyo nyiung a̱ka̱kpa̱t na a̱ni, si̱ yuut Musa a̱ ta zan. A̱ si̱ nyia̱, ‘A̱nyan wa kup ang tyok ma̱ng yet a̱tyu nyia̱ shi̱ri̱ya tazwa nzi̱t? 28A chat a hyat nung ma̱nang a ku nhyat a̱tyu Ma̱sa̱r wu lyuo a̱ni a?’ 29Nang Musa nfa̱k a̱nia a̱ni, a̱ si̱ tyong a̱ ghwut Ma̱sa̱r. A̱ si̱ nat a̱chi̱chen ma̱ a̱byin A̱ma̱da̱niyawa. A̱ja wa gu si̱si̱ ntyei zám sweang.
30“Nang Musa nnyia̱ a̱lyia̱ nswak naai ma̱ a̱byin A̱ma̱da̱niyawa ka a̱ni, a̱ta̱m Ntswa A̱gwaza a̱ghyang si̱ tyai a̱pyia̱ nggu da̱ a̱vwuo Musa ma̱ a̱lya̱ra̱p ndong mi̱ sop mi̱ ntswa a̱yit kpa̱mkpaan ma̱ng A̱fan Si̱nai. 31Nang Musa ndi a̱nia a̱ni, ku si̱ yet gu kyang a̱ga̱de! A̱ si̱ shoot a̱ nat kpa̱mkpaan a̱ ka li nhu shansham. A̱jawa gu si̱ nfa̱k a̱nwuat A̱gwaza ka ka̱ nyia̱,
32‘Nung gwa ngyet A̱gwaza a̱yaatyia̱ a̱khwop ang ba;
A̱gwaza Ibrahim, Ishaku, ma̱ng Yakubu.’
“A̱jawa Musa si̱ ta̱dyuut ma̱ng a̱wun, a̱ si̱ shya̱ gbang a̱lyia̱ a̱ nwuan bah!
33“Huhwa nang A̱gwaza nyia̱ ma̱ng a̱nggu,
‘Ti̱n á̱kwatak ang ba!
Mat a̱vwuo nang a ngyong a̱ni,
ka̱ yet a̱za̱za̱rak wa.
34A̱tsak a̱lyiat, n di si̱sak nang á̱ ngya̱shuk á̱niet nung ba mi̱ Ma̱sa̱r a̱ni.
N si̱ nfa̱k a̱nwurung mba wu.
Huhwa mbyia̱ nang n chyok mbai n ka san mbaa.
Bai, n ta̱m ang a bwuok nat Ma̱sa̱r!’
35“Mat a̱nia, A̱gwaza si̱ ta̱m Musa da̱ a̱vwuo á̱niet gu ba ba̱ ku mi̱ ndak gu a̱ni, nyia̱, ‘A̱nyan wa kup ang tyok a yet a̱tyu nyia̱ shi̱ri̱ya tazwa nzi̱t?’ A̱gwaza ku ta̱m ma̱ng Musa a̱ yet a̱gwam ma̱ng a̱tyusan á̱niet Isi̱rela; nang a̱yaata̱m A̱gwaza wu ku tyai a̱pyia̱ nggu da̱ a̱vwuo Musa ma̱ a̱lya̱ra̱p ndong mi̱ sop ji mi̱ ntswa a̱yit ji a̱ni.
36“A̱wot di̱n vak nyia̱ nkyang a̱ga̱de ma̱ng a̱ri̱bi̱di hwa nang gu nghwut ma̱ng á̱niet Isi̱rela ba Ma̱sa̱r. Ba̱ si̱ byia̱k A̱shong Kyai A̱sa̱khwot. A̱wot ba̱ si̱ chong mi̱ tswa a̱yit, ba̱ng si̱ nat a̱lyia̱ nswak naai.
37“Musa ma̱ a̱pyia̱ nggu ku nyia̱ ma̱ng á̱niet Isi̱rela ba, ‘A̱gwaza na khai, a̱ bu ta̱m a̱yin ma̱ nyin a̱ yet A̱ta̱m a̱kwonu nggu; ma̱nang gu nkhai nung a̱ni. A̱ na yet a̱tyo nyiung mami nyin.’ 38Musa ku shya̱ ndung ma̱ng a̱yaatyia̱ a̱khwop nzi̱t ba, ma̱ng á̱kpa á̱niet A̱gwaza ka mi̱ ntswa a̱yit ji, di̱n jen nang a̱ta̱m tswa A̱gwaza wu ku ndyiat ma̱ng a̱nggu da̱ A̱fan Si̱nai ka a̱ni. A̱ja wa Musa ku nsan a̱lyiat nwuat swuan na nang gu tak ma̱ng a̱nzi̱t a̱ni.
39“A̱wot a̱yaatyia̱ a̱khwop nzi̱t ba si̱ lak khwi á̱lyiat Musa na. Da̱ a̱kwonu a̱kya, ba̱ si̱ lak gu. A̱wot ba̱ si̱ chat ba̱ bwuok á̱ nat Ma̱sa̱r. 40A̱jawa ba̱ si̱ nyia̱ ma̱ng Haruna, ‘Fwu nzi̱t nghwughwu a̱yaagwaza ba̱ na kwak zi̱t a̱son a̱ni ma̱ng a̱kpeap! Mat zi̱ lyen kyang hu ku shya̱ Musa a̱wa a̱ ti̱n nzi̱t a̱ ghwut ndyo Ma̱sa̱r ka a̱ni bah!’
41“Huhwa, Haruna si̱ fwu mba ghwughwu fi̱ng nyak! A̱wot ba̱ si̱ neap ghwughwu hu za̱nang. Ba̱ si̱ bu song a̱yet tazwa ghwughwu a̱gwaza hu nang á̱ fwu mba ndyo a̱ni; á̱ nwuat hu shi. 42Huhwa si̱ mbyia̱ A̱gwaza si̱ mbwuak a̱ma a̱ nang mba. A̱ si̱ kai mba a̱ ghwon. Ba̱ si̱ ya a̱son ma̱ng kwok á̱ta̱ngwat kyai tswazwa ntong nang a̱yaagwaza mba a̱ni! Mman Isi̱rela, ma̱nang a̱yaata̱m a̱kwonu A̱gwaza ba ndyuut a̱ni nyia̱,
‘Nung gwa nang nyi ku fak nung nkyang zwá na;
nyi si̱ nnan nung za̱náng ji ma̱ng nsa̱da̱ka na,
mi̱ lilyia̱ nswak naai hu mi̱ ntswa a̱yit Isi̱rela ji a?
43Kaai, nyi ku kyiak a̱yaagwaza sang swuan nyin ba chong ndyo!
Bibya yet suswak Molek,
ma̱ng ghwughwu a̱ta̱ngwat nang á̱ ngyei Ra̱fan a̱ni.
Bibya yet nghwughwu a̱yaagwaza sang swuan nyin ba,
nang nyi kwok na ntong a̱ni!
Mat a̱nia, n na ntyia̱ nyi nat khwo ma̱ gbang ma̱ a̱byin Babila!’
44“Gbangbang, a̱yaatyia̱ a̱khwop nzi̱t ba ku tat A̱za̱za̱rak Suswak hwa, ba̱ si̱ kyiak á̱ nat ndyo mi̱ tswa a̱yit ji. Á̱ ku tat hu ma̱ cha̱chaat ma̱ng kidee nang A̱gwaza ku ntak Musa a̱ni. 45Ndyia̱ ma̱ a̱di̱di̱t si̱ swak. Jen nang Joshuwa ku nkwak a̱son a̱yaatyia̱ a̱khwop nzi̱t ba mi̱ zwang nang ba̱ ku nyia̱ ma̱ng nnwap nang A̱gwaza ku vwuong mbaa, a̱ ghwut ndyo ma̱ a̱byin kani a̱ni. Ba̱ si̱ kyiak A̱za̱za̱rak Suswak wu á̱ nat ndyo ma̱ a̱byin a̱fai mba ka. A̱ja wa A̱za̱za̱rak Suswak wu si̱ nswan si̱ nat jen A̱gwam Da̱wuda ji.
46“A̱gwaza ku nyia̱ a̱gwam Da̱wuda shok. A̱ si̱ chat a̱ nok A̱li Nwuat Za̱nang A̱gwaza ka̱ na yong di̱n tyan jhyung a̱ni, da̱nian á̱ ka dyep A̱gwaza Yakubu wu. 47A̱wot a̱tsak a̱lyiat, Solomon wa si̱ nok A̱li Nwuat Za̱nang A̱gwaza ka. 48A̱mgba̱m ma̱ng a̱nia, A̱gwaza a̱ Swak ma̱ng A̱kyenkyai Shi a̱ni, ni̱ swan A̱mali Nwuat Za̱nang nang á̱nietbishyi bya nok ma̱ng mbwak mba a̱ni bah. Ma̱nang a̱ta̱m a̱kwonu A̱gwaza wu nhyia̱ a̱ni, nyia̱,
49“A̱gwaza si̱ lyip nyia̱,
‘Tswazwa ji yet a̱vwuo kya nang n swan nyia̱ tyok a̱ni.
A̱wot a̱byin ka si̱ yet a̱vwuo saai a̱ti̱tak nung kya.
Zang tangka̱i A̱li Nwuat Za̱nang hwa nang a̱tyubishyi na nok nung dyo?
A̱wot a̱ji wa yet a̱vwuo fwung nung ka?
50Nung gwa ku nyia̱ a̱mgba̱m nkyang nani
ma̱ng chet mbwak nung hu baa?!’
51“Nyin á̱niet byia̱ gba̱p a̱pyia̱! Nyi yet á̱niet chyi A̱gwaza bya mi̱ nfwuo nyin na!#7:51 Lyuut cha̱chaat: “Nyi yet á̱niet nang á̱ nwai tyia̱ mi̱ chen.” A̱wot a̱fufwuo nyin ba si̱ lak fa̱k a̱tsatsak a̱lyiat wu! Ku yet ta hwa nyi ya a̱son di̱ lak khwi A̱za̱za̱rak Ntswa wu si̱ nat sang sangba̱p a?! A̱nia wa nang a̱yaatyia̱ a̱khwop nyin ba ku nnyia̱. A̱wot nyin meang, a̱nia wa nyi nyia̱! 52Á̱ ku mbyia̱ a̱ta̱m a̱kwonu A̱gwaza a̱nyiung nang a̱yaatyia̱ a̱khwop nyin ba ku nwai ya̱shuk a̱ni a̱?! A̱wot ba̱ ku mun á̱ hyaai a̱yaata̱m a̱kwonu A̱gwaza ba, ba̱ ku shei á̱zanson di̱ chobai A̱tsotswat A̱khwo A̱gwaza wu! Nggu wa yet Kristi#7:52 Wa̱i a̱lyiat: Kristi fa “A̱tyu nang A̱gwaza kup gu tyok a̱ni.” Ma̱r 1:1; Yon 1:41. nang nyi ku lyap, nyi si̱ hyat a̱ni. 53Nyi ku lak khwi doka ji ma̱ kpa̱a̱t! Ku nang nyi ku nsan ji mbwak a̱yaata̱m tswa A̱gwaza ba a̱ni!”
Á̱ Mang Itifanut ma̱ng Nfang á̱ Hyat
54Nang a̱cha̱chet A̱yahudawa ba nfa̱k a̱nia a̱ni, lilyia̱ hu si̱ ya mba ba̱t. Ba̱ si̱ nywai gá̱swuong mba ji á̱ ya̱sang. 55A̱wot nang Itifanut nang A̱za̱za̱rak Ntswa wu tyia̱ gu chet a̱ni, a̱ si̱ gba̱t á̱ghyi ba, a̱ si̱ nwuan Ma A̱gwaza tswazwa. A̱ si̱ li Yesu nang gu yong da̱ a̱vwuo shi a̱zayak A̱gwaza ka ma̱ng a̱kyenkyai shi nggu wu! 56Huhwa Itifanut si̱ nyia̱ ma̱ng a̱mba, “Nyi li la! Ma A̱gwaza tswazwa ka khwuk! N si̱ ndi Nggwon A̱tyubishyi nang ka̱ yong a̱zayak A̱gwaza ka!”
57A̱jawa a̱cha̱chet á̱niet a̱tung ba si̱ koot a̱gugwong. A̱wot ba̱ si̱ kyiak mbwak á̱ nyim a̱fufwuo mba ba. Ba̱ si̱ ni̱m da̱ a̱ka̱nyiung á̱ jhyung Itifanut. 58A̱wot ba̱ si̱ kwak gu á̱ ghwut ndyo á̱ nat a̱ma̱nta a̱keang Urusha̱lima ka. Ba̱ si̱ nwuo mang nggu ma̱ng nfang! A̱wot á̱niet ba̱ ku bat gu a̱hyiak na a̱ni, ba̱ si̱ khwuk a̱yaatoot mba ba. Ba̱ si̱ nwuak nggwon seam a̱ghyang nang á̱ ku ngyei Sha̱wulu a̱ni, ka̱ si̱ chok mba ndyo.
59Nang ba̱ ku mmang Itifanut ma̱ng fang na a̱ni, a̱ si̱ naai A̱gwaza nyia̱, “A̱tyoli Yesu, san ntswa nung ji!” 60A̱jawa gu si̱ nkpaat a̱khwukhwut, a̱ si̱ naai A̱gwaza ma̱ng a̱gba̱ndang a̱nwuat nyia̱, “A̱tyoli, chi a̱ka̱tuk nyia̱ mba wu!” Nang gu nhyia̱ a̱nia a̱ni, a̱ si̱ khwu#7:60 Lyuut cha̱chaat: “A̱ si̱ kai nda.”.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.