2 A̱korontiyawa 8
8
Yok Á̱niet Khwi ba̱ Beang Á̱ghyang ma̱ng Fwuo Nyiung
1Á̱na̱nyiuk nzi̱t ba nang zi̱ chat a̱ni, ma̱ninika zi̱ chat zi̱ tak ma̱ng a̱nyin shok nang A̱gwaza wu nyia̱ susot á̱niet khwi ji, ji̱ shya̱ mi̱ fam a̱byin Ma̱kidoniya a̱ni. 2A̱mgba̱m ma̱ng si̱sak nang á̱ mmai mba ma̱ a̱di̱di̱t ma̱ng a̱gba̱ndang swuo a̱bung, ma̱ng a̱dodo kunak nang ba̱ byia̱ a̱ni, ba̱ si̱ byia̱ a̱gba̱ndang a̱gwai. Ba̱ si̱ nyia̱ á̱niet shok gba̱mgbam ma̱ng fwuo nyiung.
3N tak ma̱ng a̱nyin a̱tsatsak a̱lyiat, ba̱ ku nwuak mi̱ kyang nang ba̱ byia̱ wa a̱ni ma̱nyin hu bah; a̱wot ba̱ si̱ nwuak a̱ swak kyang hu ba̱ byia̱ a̱ni. Ba̱ si̱ nwuak nang á̱ ntyei mba khwo hwa a̱ni bah. 4Ba̱ si̱ naai nzi̱t, á̱ fat a̱sa̱kut á̱ yok ba, ba̱ shya̱ a̱wat ba̱ ntyia̱ bwak di̱ beang á̱niet khwi A̱gwaza ba, ba̱ shya̱ mi̱ fam a̱byin Yahudiya a̱ni. 5Ba̱ si̱ nwuak a̱ swak kyang hu zi̱ ntyia̱ fwuo ba̱ na nwuak a̱ni. Di̱ ntsa hu, ba̱ si̱ nwuak á̱pyia̱ mba da̱ a̱vwuo Yesu, ba̱ sii bu beang nzi̱t, ma̱nang A̱gwaza nchat á̱ nyia̱ a̱ni.
6Mat a̱nia, zi̱ si̱ naai Titut a̱tyu a̱ ku tsa tyia̱ nyin gba̱gbak nyi nyia̱ ta̱m beang á̱niet khwi hu a̱ni, gu bwuok a̱ bai da̱ a̱vwuo nyin, a̱ bu tyia̱ nyin gba̱gbak nyi ngaan ta̱m shok huni. 7Ma̱nang nyi mbyia̱ kuzang kyang gba̱mgbam a̱ni; nwuak a̱chuchuk, lyen tak a̱lyiat, mumwang, ntyia̱ a̱lyia̱, ma̱ng si̱sak nang nyi nchat zi̱t a̱ni. Ma a̱nia wa n chat nyi byia̱ shok gba̱mgbam meang di̱ beang á̱niet ba̱ swuo a̱bung a̱ni, ma̱ng fwuo nyiung.
8N tyei nyin khwo hwa nyi beang bah. A̱wot n chat n mak n di̱ si̱sak nang chat á̱ghyang nyin hu ngyet a̱tsatsak a̱ni. N tyan hu ma̱ng di̱dang nang susot á̱niet khwi á̱ghyang byia̱ di̱ beang a̱ni. 9Nyi lyen nang A̱tyoli Yesu Kristi nzi̱t wu mbyia̱ shok gba̱mgbam, a̱ ni̱ nwuat mi̱ fwuo nyiung. Ku nang gu ngyet a̱tyu nzwa a̱ni, a̱mgba̱m ma̱ng a̱nia, a̱ si̱ ghwon zwá nggu ji da̱nian nyin, mami kunak nggu hu. A̱ si̱ tyia̱ nyin nyi ka yet á̱niet nzwá.
10Di̱ li nung hu: Ku yet a̱sham nyi tyak beang hu nang nyi ku tsa ma̱ a̱lyia̱ swak ka a̱ni. Nyin bya ku yet a̱son ka di̱ chat beang hu. A̱wot nyi si̱ bu yet a̱son di̱ tsa nwuat hu. 11A̱wot ma̱ninika, ku myim nyi ngaan ta̱m hu nang nyi ka̱n tsa a̱ni. Nyi yok di̱dang hu nang nyi ku tak di̱n tsa hu a̱ni, ku nat cha̱chaat ma̱ng kurum hu nang nyi na nwuak a̱ni. Nyi nwuak cha̱chaat ma̱ng zwá ji nang nyi byia̱ a̱ni. 12Ka̱ nfwuo nyin na byia̱ di̱dang nwuak hu, A̱gwaza na san kyang hu nang nyi byia̱ fwuo na nwuak a̱ni. A̱wot a̱yin si̱ mi̱n nwuak kyang hu nang gu sang a̱ni bah.
13A̱tsak a̱lyiat, n chat nwuat nyin hu ku tyia̱ á̱ghyang á̱niet ba̱ fa̱k nyinyang, a̱wot nyin nyi swuo a̱bung bah. Mi̱ kyang nang n fa a̱ni huhwa yet; ku myim nwuat hu ku nat cha̱chaat ma̱ng nkyang nang nyi shyat a̱ni. 14Nang nyi mbyia̱ zwá gba̱mgbam ma̱nini a̱ni, ku na yet a̱sham nyi beang á̱niet ba, ba̱ sang a̱ni. A̱wot di̱n jen jhyang mba meang, ka̱ ba̱ ma mbyia̱ gba̱mgbam, ba̱ na beang nyin di̱n jen nang nyi nsang a̱ni. Ka̱ nyi nyia̱ a̱nia, kuzang kyang na nat cha̱chaat.
15Ma̱nang á̱ ku ndyuut ma̱ A̱lyiat A̱gwaza na a̱ni, nyia̱,
“Á̱niet ba ba̱ ni̱ tung nkyayak#8:15 Lyuut cha̱chaat: “Mana.” Wa̱i a̱lyiat: Mana wu a̱ji fa, tangka̱i kyayak nang A̱gwaza ku ka̱u mman Isi̱rela na ba̱ ya mi̱ tswa a̱yit ji a̱ni. gba̱mgbam a̱ni,
ba̱ byia̱ á̱si̱ na̱ ku bwat a̱ni bah.
A̱wot á̱niet ba ba̱ ni̱ tung ma̱ a̱da̱dei a̱ni,
na̱ si̱ maai mbaa.”#8:15 Ghw 16:18.
Á̱niet Titut Chok Za̱nang Kurum Urusha̱lima Shansham
16A̱wot zi̱ gwai A̱gwaza nang gu ntyia̱ mi̱ fwuo Titut hu gu chat nyin, ma̱nang zi̱ nchat nyin a̱ni. 17Titut ku shim naai nzi̱t hu nang gu bu na mbai a̱ byiat nyin a̱ni. A̱tsak a̱lyiat, nggu ma̱ a̱pyia̱ nggu, a̱ ku byia̱ di̱dang ba̱t nang gu na mbai a̱ byiat nyin a̱ni. 18Zi̱ bu ta̱m ma̱ng a̱tyu khwi#8:18 Lyuut cha̱chaat: “A̱na̱nyiuk.” a̱ghyang da̱ a̱vwuo nyin dundung ma̱ng Titut. A̱mgba̱m á̱niet khwi ba chyin gu nang gu ngyet a̱tsatsak a̱tyu shei A̱sham Nkhang Yesu wa. 19Susot á̱niet khwi ji ku mun á̱ khai a̱na̱nyiuk nzi̱t wuni gu chong ma̱ng a̱nzi̱t, zi̱ nat ma̱ng za̱nang kurum ji mi̱ Urusha̱lima.#8:19 1A̱ko 16:3-4. Ta̱m a̱hwa ku nwuat A̱tyoli Yesu shi. Ku si̱ bu tak nang zi̱ mbyia̱ di̱dang ba̱t zi̱ beang.
20Zi̱ naat ma̱ng za̱nang kurum jini dundung, kalak á̱niet ba ba̱ bat zi̱t a̱hyiak di̱ si̱sak zi̱ mba̱ng a̱gba̱mgbam za̱nang kurum ji nang á̱ tyia̱ nzi̱t ndyo mbwak a̱ni. 21Zi̱ ya̱bam kwan wa. Zi̱ nyia̱ kyang ku myim a̱ni a̱zaghyi A̱gwaza ma̱ng á̱niet khwi ba, ba̱ ka fa̱k nyinyang nzi̱t.
22Zi̱ bu na ta̱m ma̱ng a̱tyu khwi#8:22 Lyuut cha̱chaat: “A̱na̱nyiuk.” a̱ghyang dundung ma̱ng a̱mba, a̱ ka̱n tak di̱n jen ma̱ a̱di̱di̱t nang gu mbyia̱ a̱tan za̱kwa, a̱wot a̱ si̱ bu tak di̱n jen ma̱ a̱di̱di̱t nang gu mbyia̱ di̱dang ba̱t di̱n ta̱m hu. Ma̱ninika, a̱ bu mbeang di̱dang hu mat a̱ ba̱ng fwuo ba̱t da̱ nyin. 23A̱wot tazwa Titut, ka̱ a̱yin byia̱ lyip da̱ nggu, nyi tak ma̱ng a̱tyu a̱wa nang Titut ngyet a̱kpa̱ndang ta̱m nung wa; a̱ nyia̱ ta̱m hu dundung ma̱ng a̱nung zi̱ ka mbeang nyin. A̱wot á̱kum á̱niet khwi ba̱ shya̱ ndung ma̱ng a̱nggu a̱ni, susot á̱niet khwi ja ta̱m mba#8:23 Lyuut cha̱chaat: “Bibya yet a̱yaata̱m susot á̱niet khwi ba.”, a̱wot ta̱m mba hu nwuat Kristi shi. 24Mat a̱nia, nyin á̱niet khwi ba, nyi tak ma̱ng a̱yaata̱m a̱bya nang nyi nchat ba. A̱wot nyi bu tak ma̱ng a̱mgba̱m susot á̱niet khwi ji nang tam hu zi̱ tam da̱ nyin a̱ni, ngyet a̱tsatsak tam wa.
Currently Selected:
2 A̱korontiyawa 8: TyapNT
Highlight
Share
Copy
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.