Injil 1: Moti Forisiti
Forisiti
Moti namor sifarar mul talim oilo, Hozrot Isa al-Mosi eḳzon bashsha. Alla Pakor boail ḳora bashsha. Tain i duniat toshrif ania manshore daot dila, tan ufre iman anar lagi. Zera tan ufre iman anba, era oiba Allar noya zati. Erar nam oibo, Allar proza ba behesti bashshair zon, ar Hozrot Isa al-Mosi-u oila ou bashshair malik. Alla Pake tanre boail ḳorla, zate Ruz Hashoror din tain duniar hokkol manshor bisar ḳoroin.
Ou Moti sifara tilaot ḳorle, amra Hozrot Isar talimor mulloban hoḳol boyanir bistarito deḳmu. Amra deḳmu, Hozrot Isar zonom kila oisil, tan duniabi baba mani Bibi Moriom (a:)or zamai Hozrot Iusufor zobanbondi faimu. Ou sifarat amra faimu, Hozrot Isae kila ḳam-ḳaz ḳorsoin, ḳemne zindegi kaṭaisoin, tain kuai taki bol-shokti faita. Amra aro deḳmu, bout zomana age Alla Pake Hozrot Musa (a:) ar Hozrot Daud (a:)or Fobitro Tourat ar Zobur Shorifor maze, erloge bad-baki aro nobi-rosul oḳlor gese zeta zeta bataisoin, Hozrot Isar zomanat aia tan ato ota hoḳolta folise.
Moti sifarar 5 ruku 17, 20 ayato ase, Hozrot Isae ḳoira, “Tumra ikan mono ḳorio na, ami Tourat Kitab ar nobi oḳlor sohifa batil ḳorat aisi. Ami to ita batil ḳorat nae, borong fura ḳorat aisi. Huno, ami tumrare ḳoiram, alim-ulamar amol taki-o tumrar amol zudi aro bala na oy, te kunumonte-u behesti bashshait hamaitae fartae nae.”
Ar 11 ruku 28-30 ayato ase, Hozrot Isae ḳoira, “Bar-buza boite boite tumra zera heran oigeso, tumra hoḳol amar gese ao, ami tumrare aram dimu. Amar zual tumrar ḳando tulo ar amar ges taki talim lo, teu tumrar aram oibo. Amar zual boia neoa shuza, amar deoa bar kub fatla. Amar mizaz kub norom ar ṭanḍa.”
Leḳok forisiti ar shomoy
Alla Pakor hukum mafik ou sifara leḳsoin, Hozrot Isa al-Mosir sahabi Hozrot Moti (ra:). Hozrot Isar ufre iman anar age tan fesha asil ḳazna adae ḳora. Tain manshor ges taki kazna tulia Ruman shorḳaror ato shomzai dita. Hozrot Isae tanre imanor daot dile tain iman ania Isa al-Mosir ummot oila. Ar Hozrot Isae behesto toshrif neoar onuman 25-35 bosor bade ou sifara kitab aḳare tain leḳsoin.
Ermaze ase,
(1) Hozrot Isar forisoy ar foyla zindegi 1—2 ruku
(2) Hozrot Isae ḳam shuru ḳorla 3—4 ruku
(3) Faṛor feṭo Hozrot Isar talim 5—7 ruku
(4) Hozrot Isar dosh keramoti 8—9 ruku
(5) Barozon sahabire fosond ar talim 10 ruku
(6) Hozrot Isare shondoy ar birudita ḳora 11—12 ruku
(7) Hozrot Isar batail shat kichcha 13:1–52 ayat
(8) Hozrot Isae ḳene toshrif anchoin 13:53—17:27
(9) Ummotor lagi Hozrot Isar zoruri talim 18 ruku
(10) Shomazor manshor lagi Hozrot Isar talim 19—22 ruku
(11) Neta oḳolre Hozrot Isar hushiari 23—25 ruku
(12) Hozrot Isar ufat ar zinda oa 26—28 ruku
Currently Selected:
Injil 1: Moti Forisiti: sylL
Highlight
Share
Copy
Want to have your highlights saved across all your devices? Sign up or sign in
© Ahle Kitab Society. All rights reserved.