哥林多後書 5

1𠊎等知，𠊎等所住、在這地上个帳篷若係拆掉，上帝會賜𠊎等天頂个屋，係佢所起、永遠存在个。 2𠊎等這下在這位透大氣，盡想愛住天頂个屋，像愛著衫一樣； 3著好後，就毋會打赤膊。 4𠊎等住在這地上个帳篷肚，像係揹等重擔，透大氣；這毋係講愛脫下地上个身體，係愛著屬天个身體，使會朽爛个被生命吞滅。 5上帝親自造就𠊎等來接受這個變化；佢賜聖靈給𠊎等做擔保。

6所以，𠊎等一直恁好膽。𠊎等知，住在這身體底背，𠊎等就係離開主為𠊎等準備个住所遠遠。 7因為𠊎等行事做人係憑信心，毋係憑所看个。 8𠊎等盡好膽，樂意離開這地上个身體，去同主共下住。 9最重要个係，無論住在這地上个身體底背，抑係著屬天个身體，𠊎等決心愛俾主歡喜。 10因為𠊎等攏總愛企在基督个面前，受佢審判。逐個人愛照本身在世間个行為，係善抑係惡，接受報應。

通過基督㧯上帝和好

11𠊎等既然知愛樣般敬畏主，就勸話人。上帝完全認識𠊎等；𠊎希望你等也對心內認識𠊎。 12𠊎等毋係愛對你等再推薦自家，係愛俾你等有誇口𠊎等个理由，俾你等有話好應看重外表、看輕內心該兜人。 13𠊎等若發癲，係為到上帝个緣故；𠊎等若清醒，係為到你等个關係。 14因為基督个痛惜催迫𠊎等；𠊎等清楚知，一個人代眾人死，所以眾人攏總死了。 15佢代眾人死，愛使該兜生等个人無再為自家生，愛為該代佢等死又復活个基督來生。

16所以，𠊎等從今以後毋用人个標準來看人。雖然𠊎等識用人个標準來看基督，總係這下𠊎等無再恁樣做了。 17無論麼人，若同基督結連，就係新創造个人；舊个已經過去，全部變做新个了。 18這一切攏總係上帝做个；佢通過基督使𠊎等㧯佢和好，又將勸人㧯佢和好个職務賜給𠊎等。 19佢喊𠊎等傳个就係：上帝通過基督同人類建立和好个關係 #5:19 「上帝…關係」抑係譯做「上帝在基督底背使人類㧯自家和好」。；佢無愛追究佢等个過犯。佢也將這和好个道理交託𠊎等。

20所以，𠊎等做基督个大使，就像上帝通過𠊎等來勸你等一樣。𠊎等代基督求你等：愛㧯上帝和好！ 21基督係無罪个，總係為到𠊎等，上帝喊佢揹𠊎等个罪，使𠊎等通過佢同上帝有正確个關係。

Currently Selected:

哥林多後書 5: THV12Hdb

Highlight

Copy

Want to have your highlights saved across all your devices? Sign up or sign in

Learn more about 客語聖經 – 現代臺灣客語譯本，新舊約全書客語聖經 – 漢字版