MIKHA 1
1
Bungkaran kada
1:1
1Inde sia tu kadanNa PUANG rampo lako Mikha, to Moresyet, tu natiro diona a’ganna Samaria sia Yerusalem, tonna linona Yotam, Ahas sia Hizkia, datunna Yehuda.
Pa’nubua’ diona ukungan la urrampoi Samaria sia Yerusalem
1:2-7
2Perangiimi, e mintu’ bangsa, tanannimi talinga, e lino sola mintu’ issinna, kumua Puangta PUANG la titanan sa’bi la umpasalakomi, iamotu Puang lan mai banua maindanNa.
3Belanna iatu PUANG manassa tassu’ lan mai inanNa, anNa mengkalao umpopentengka lentekNa dao lu mintu’ inan matande dao kuli’na padang.
4Lolong tu mai buntu diong to’ lentekNa Puang sia menganga tu mai lombok, susito lilin nakande api sia susito sarambu dao mai aa’.
5Mintu’nate bannang dio kapatodo-tintinganna Yakub sia kasalanna to Israel. Apara tu kapatodo-tintinganna Yakub? Tangiaraka tu Samaria? Sia apara tu kasalanna inan madaona Yehuda? Tangiaraka tu Yerusalem?
6Iamoto iatu Samaria la Kupadadi misa’ inan daun lauan dio padang sia misa’ inan la digaragai pa’lak anggoro’; la Kutuan tu mintu’ batunna rokko lombok sia la Kupasombo tu parandanganna.
7Sia mintu’ rapang-rapang dipodeata dipa’na la dipoka, sia pamenganna tu dipennoloan lako deata la diballa api, sia mintu’ rapang-rapang dipodeatanna la Kunisak-nisak, belanna iatu saro bu’tu lu dio mai pa’gau’ salana naallianni tu rapang-rapang dipodeata narampun, na iatu apa iato la dadi duka saro gau’ sala.
Sarrona nabi
1:8-16
8Diona apa iato angku umbating sia sumarro, angku lumingka tang ma’sepatu sia ma’kambelang, sia melallak susi serigala sia kumarrak susi burung unta?
9Belanna iatu bangke malua’na tang dampi-dampiammo, belanna narua dukamo tu Yehuda sia nalambi’mo tu babanganna taungKu, sae lako Yerusalem.
10Da mipokadai tu apa iato dio Gat, da duka mitumangi’ dio! Pentombanganni tu kalemi diong to’ barra’-barra’ dio Afra.
11Tarru’komi male, e to Safir, situang siri’ belanna kama’kambelangammi. Iatu to Zaanan tae’ nabarani tassu’. Iatu kaumbatingan dio Bet-Haezel undampakomi torro inde to dio.
12Belanna iatu to Marot ma’parondo mataku’ belanna kameloan, saba’ songlo’mo tu kasanggangan dao mai PUANG sae lako babangan Yerusalem.
13Papasangi kareta tu darang, e to Lakhis. Iamo tiparandukna kasalanna anak dara Sion, belanna lan kalemu dinii unnappa’i tu kapatodo-tintinganna Israel.
14Iamoto benni pamengan kasisarakan Moresyet-Gat. Iatu banuanna Akhzib dadimo misa’ salu’-salu’ ma’pakena lako datu Israel.
15La Kuparampoi pole’komi misa’ to patalo, e to Maresya; iatu kamala’biranna Israel la rampo lako Adulam.
16Galettungi sia ku’ku’i tu ulummu, belanna mintu’ tu anak pa’kaboro’mu; papada lua’i galepo’mu tu galepo’ dio langkan maega, belanna toyangmo male dipali’ tu tau iato mai dio mai kalemu.
Currently Selected:
MIKHA 1: SDA
Highlight
Share
Copy
Want to have your highlights saved across all your devices? Sign up or sign in
Sura' Madatu, Toraja Bible 2009® © Indonesian Bible Society – Lembaga Alkitab Indonesia, 2009