Aposolo 22
22
Paulo Eŋe Wetine Maingeke Eya Wane Kisi Rake
1“O, ŋei kimakopne so magakopne, ŋine detpi, na ukude iwa ŋinane kaitŋino don turuŋine main gemaile, na sot mane mi okanile.” 2Pakiso eŋe detkau Paulo eŋe Hibru dongoka don raki eŋe mepeene qoeki, aŋaene kiwonege tik ŋaneŋka doŋ mane more, kok pak mi makoi, paki Paulo eŋe koso iwa yale rake.
3“Na Yuda naganeŋo Tarsus matko, Silisiya kepeo yewao neuke, paki na iwa Yerusalem mat suwaine iwao kibi medep neu sariu suwa more, Gameliyel wane kibi urumgo wakole, pakimo eŋe aso ŋabokopze eŋane ra rokop don tego yewa korop kito ninwareke. Pakimo ŋine ukude iwa Waom wane don mogare gemami, yalewaka na iwa manerop zok togole more mogat kakole. 4Na sogino mokaka, Waom wane numa musele iwa malipka more mogatmami, eŋe matali onikalane urata suwaine zok manerop makole. Paki na ŋei ŋerep korop engu more, lukone ebu ari mulap urumgo bira onikalane urata togoleka ma gemaŋkole. 5Pris wawaine ŋetne eŋe so ŋei ŋetne eŋane kaunsol korop, eŋe det waremami, edo maine eya wane don ra qelaŋanbi ŋine maine desikei, na don welekatne ŋidanmaile, eŋe kibi mane Damaskus doku tau tau kima natne gemami, eŋane qe ninbi Damaskus ma arikole, ŋei ŋerep mat yewa wane kotino numa iwa so mali malip korop, yewa eŋane tego eŋe mat yewa gekoi, na ŋei ŋerep yewa ebu lukone more, peik one more, iwa Yerusalem matko ebu sariwe, ŋei suwaine edo kine kine umatne so wikile, eŋe umatene eya wane rokop ebonikei wane arikole.”
6“Na arimage, 12 kilok kaiweo Damaskus osino lotkekole, pakimo ikop yewaka kiwa qelaŋane suwaine mane qeliwo ŋine ket naŋano qelaŋane more loliknange, 7paki na yewaka ket kepo rasu more, pa detpe, aŋa don maneŋo iwa yale nora nolatke, ‘Saulo, Saulo, ge onoka wane na matali qetali okan nanmaine me?’ 8Pakimo na don turuŋine iwa yale main gekole, ‘Ge maŋo Waom?’ Paki eŋe na nolale rake, ‘Na Yesu, Nasaret welaine, ge na matali nane more, urata eya magemaine.’ 9Ŋei narop gekoi, eŋe qelaŋan eya kakoi, ŋo eŋe ŋei yewaŋo nolatke eya eŋe mi detkoi. 10Pakimo na rakole, ‘Waom Suwaine na ukude iwa dalino okanikale?’ Raweso Waomŋo nolale rake, ‘Ge wiye more Damaskus matko arinom paki, mat yewao ŋei mane metmaike, oŋo geŋane urata don biŋek kine kine korop motkale eya golasiyake.’ 11Qelaŋan yewa yemo zok manerop qelaŋane teine, yale wane na dene mupkeki, kine kine mane deneŋo maine mi kaulukkole. Na yale okanbe, naŋane kimakopne eŋe meteno mau Damaskus matko arikone.
12Pakimo ŋei mane yewa Damaskus matko geke, eŋane eŋetine Ananiyas, eŋe kisi maep ŋei mane, oŋo ra rokop numaze eya teweke mageke, pakiso Yuda ŋei Damaskus gekoi, eŋe korop eŋane detpi waki, ewine kito ramaŋkoi, eŋe ŋei maine. 13Eŋe naŋane osono sari okoraki paki nolale rake, ‘Kimane Paulo, deŋone koso manerop potnom.’ Raki nasomde yewaka weneŋ dene koso ikopka menaŋgi potkole, pakiso eŋine kakole. 14Pakiso eŋe rake, ‘Aso ŋabokopze eŋane Kaisaleŋo ge eŋane simile detnom paki, Qelit Ŋeiine Koboboine ge more, eŋe kaikenane, so oŋo makoboe gangi detkanom, eŋane aŋa donineŋo rayakane oŋom ma wakonganike. 15Wane ge baŋ eŋane tanik manik onokaka ge iwa kawaremaine so det waremaine, eya wane don kisiine ŋei ŋerep korop ra qelaŋane edan warekene. 16Eya wane, ge onokawane koso naso kiroine iwa tomakene? Ge wiye more peyam doku taunom paki, eŋetine oranom, mo eŋe borikine ŋone eya saukgane more, sotŋone eya sauk ganiyake so ma biraki ariyake.’
Kaisale Eŋe Paulo Ma Birakaki Tego Natne Eŋano Arike
17“Ŋado na Yerusalem zinge sari more, Bakom Urum suwainane kotino wa meŋen kakole, so na kine kine me tanik yewa mo kulu kuluwo yale kakole. 18Na kawe so Waomŋo nolale rake, yale nolatmaike, ‘Ge esat, wiyenom paki, Yerusalem mat iwa qelige arinom, onoka wane, ŋo ŋei ŋerep korop iwa eŋe baŋ ge naŋane don kisine ra edanikene, yemo eŋe baŋ maine mi desikei.’ 19Pakiso na rakole, ‘Waom, eŋe mo detluk waremami, na Yuda lewa lewaŋ urumgo korop arimaŋkole, so ge det-ganmami na sogino Bakomurum korop yewao ari lolike more, ŋei ŋerep ge malip gane gekoi, eya korop ebu lukone morapŋo dime one more, mulap urumgo biraongole. 20So mokaka eŋe geŋane kisi maep rara ŋeiŋone Stiwen qeu seukke, naso yewao na noŋom yewa osino weneŋ okora more, wet pese dere simin nangi, na momo takot kakiene suwaine, eya wareka okora more onbe, eŋe qeu seukke.’ 21Raweso, Waomŋo nolale rake, ‘Arinom, onoka wane na baŋ biraganbe, ge abaran numa kiroine qelaŋ tego mane eŋano arikene.’ ”
Roma Wane Kawali Ŋei Ŋetne Oŋo Paulo Warekake
22Yuda ŋei eŋe Paulo wane don detkoi, naso yewao Pauloŋo don edane ari mage ŋei ŋerep abaran ŋine kepe kiroino gemami, eŋane raki, Yuda ŋei eŋe eŋane don wane bauwene waki, don togoleka kuroge rakoi, “Qeu seukkep! Ŋei yaline eŋe koso mi takotke geyake. Eŋe geyakane rokop mi okanmaike!” 23Eŋe yau yaup boka kuroge ra ari sari okane more, momo takotene suwaine eya ma qaliŋ qaliŋ kitou paki, kito qoke qakeu, yau yaup ariki, so lube lube, eya ma abarage qakeu wetela qeliwo wake. Masi tanik yewa okangoi, eya iwa yale, qe wakonge, eŋe Paulo wane zok mi onge. 24-25Eya wane kawali ware ware ŋetne suwaineŋo raki, eŋe Paulo kawali ŋei eŋane mat koto ma waketkoi, pakimo eŋe morapŋo dime ka more kineinane qesonkakoi, so kawali ŋei ŋetne eŋe det lukeyakane kawali ŋei edane rake, ŋei ŋerep eŋe kine onoka wane Paulo ŋabaka more wet gerep so don aro suwaine boka more, Paulo yale okankamami, Paulo kiye metine wokomkakoi, paki kawali ŋei ware ware ŋetne eŋe Paulo, wane osino okoraki, Pauloŋo iwa yale ra qesonkake, “Me ra rokop donŋo yale ramaike, ŋine Roma ŋei mane yalewa maine okankaikei me? Ŋine na dongo mi biranane more, mo ŋine na yaupka dime nanimi, masi tanik yewaŋo mo maine okanmaike me?”
26Kawali ŋei ware ware ŋetne eŋe don yale dere more, eŋe ari kibi qeqe ŋetne olale rake, “Ge dalino okan kaikene? Ŋei yewa eŋe Roma ŋei.”
27Rakimo kawali ware ware ŋetne suwaine eŋe Paulo wano sari more olatke, “Ge nolatnom, ge Roma ŋei wele me?”
Paulo eŋe rake. “Eyamo don welekatne.”
28Kawali ware ware ŋetne suwaine eŋe rake, “Na wesi lewine suwaine zok mo bira sa mage more, Roma ŋei okanmaile.”
Paki Pauloŋo rake, “Na yemo midakaka, na mo nabokŋo eya ge more neuke, eya wane na Roma ŋei okanmaile.”
29Eya wane ŋei eŋe dimeka more qesonkakei wane okangoi, eyamo kawali ŋei eŋe yeine yewaka kaet okane more qeliŋgoi, pakimo kibi qeqe ŋetne suwaineŋo Paulo eŋe Roma ŋei, yale dere more, seinŋo mo wokomkakei, wane rake, eya mo eŋe yaleka zok kaetkake.
30Kawali ware ware wane ŋetne suwaine eŋe Pauloŋo umat eya ma umatne mane okangi, eya wane Yuda ŋetne eŋe dere worik kakoi, yewa wane kine desiyakane, ŋado baŋ kaiwe maneo Paulo wane sein kitoqok kaki paki, eŋe don motki kisi maep mane mosop ŋei, pris ŋetne suwaine so Kaunsol korop eŋe sari lewaŋgoi, pakiso eŋe Paulo ma ket eŋane kaitko birakaki okorake.
Currently Selected:
Aposolo 22: onsNT
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.