Lucas 21
21
Aĩbu nuitapaitũ inãkuĩkĩ pei itxapayabu binunikiaki, na hãtxarã
(Mc 12.41-44)
1Templo hemaĩtĩ anu tsaushũ Jesusũ uĩayã pei itxapayabũ ha hakia nuitapaibu merabewati bauki inãkuĩ nanekĩ mistubaĩbainaibũ 2ha haska waibu uĩayã aĩbu beneumari nuitapabiai hushũ pei heshe dabe hawa damahaira nanekĩ mistuaya 3Jesusũ hawẽ tsumabu yuikĩ:
—Txanima na beneuma nuitapaitũ hawẽ pei inãkuĩ nanekĩ dasibi pei itxapayabu hatu binumakĩ keyushuki. 4Eskaki, matu shabakabi yuinũ. Ha hunibu pei itxapayabũ hatũ pei pashkashũ teshe besti inãkuĩkãshuki. Hakia ha aĩbu nuitapaitũ dasibi hawẽ hawara biti pei inãkĩ keyushuki— hatu watã
Deus kẽwãti hiwe tekei purekei keyushanikiri Jesusũ hatu yuinikiaki, na hãtxarã
(Mt 24.1-2; Mc 13.1-2)
5hanua hemaĩtĩ anu mapushũ Templo inũ ha mixkipãwãwẽ hiwe wakĩ hawẽruawanibu inũ inãkuĩti hamapai xarabuwẽ dau wanibu uĩ hawẽ tsumabu bestibu hakiri hãtxaibu nĩkakĩ Jesusũ yuikĩ:
6—Na hiwe mã uĩaĩnã, hawẽruabia habianu mixki betsa ana matsamanama dasibi ha mixki hiwe tekekĩ purekĩ keyushãkanikiki— hatu wa
Haska tashninũbariai bebũkiri Jesusũ hatu yusĩnikiaki, na hãtxarã
(Mt 24.3-28; Mc 13.3-23)
7hawẽ tsumabũ yukakĩ:
—Yusĩnaã, ha mixki hiwe tekei purekei keyushanai mĩ nuku yuishurã, mia yukapa? Ma hanu kema taei haskai nũ unãtirumẽkaĩ? Nuku yuiwe— akabu
8Jesusũ hatu yuikĩ:
—Ẽ ana huriamakẽ haskai nuitapai taeshanaibu Deusũ yuini eskashãkanikiki. Shabakabi matu yuinũ nĩkakãwẽ. Ma ẽ hanu hua kemaya huni betsabu beshũ yuikĩ: “Ẽ Deusũ Messias Cristoki. Ea nĩkakãwẽ”, ikaibũ betsabũri yuikĩ: “Cristo dama huikiki. Matu uĩmanũ ea txibãkãwẽ”, iwanã, yuiaibu hatu nĩkayamashãkãwẽ, hau matu parãyamanũbunã. 9Ha inũ, yurabu nuitapai taeaitianã, detenamei kakaibu nĩkabiai e iki hawa dateyamashãkãwẽ, haskaibutiã ẽ huamakirã— iwanã, 10ana hatu yuikĩ: —Ha yurabu nuitapaibutianã, nawa betsa betsapa nawa betsabube detenameaibũ 11mai patxa sakuakeakeaya piti hayama buni teneaibũ isĩ betsa betsapa mae tibi anushũ teneakeakeaibũ nai anua hawẽ unãti mese haska tashnisma uĩaĩbũ hanu ẽ huriama ishanaii.
12Hakia na dasibi eskashanai iriamakẽ mã ea txibãkubainaibuwẽ taeshũ matu itxakawakĩ matu atxitã itxati hiwe anu matu yunuabu hanushũ bitxiti hiwe anu matu bitxitã shanẽ ibu betsa betsapa anu matu iyuabu habũ betsabu matu ekiri yuimashãkanikiki, mã ea txibaĩbuwẽ taeshunã. 13Matu haska wabiabu kakape ekiri mã hatu yuishanaii. 14-15Mã haskaibu eã matu merabewakĩ hãtxa pe yuiti xara ẽ matu inã hawẽ unãnepakĩ ha matuki sinataibũ nĩkakĩ hawa ekiri txakabu yuiama inũ matu nematirubuma ishãkanikiki. Haskakẽ hawa dateama “Harakiri yuishãpa?” ikĩ bebũkiri xinãyamashãkãwẽ.
16-17Ha inũ, ea txibãkĩ mã ekiri yusĩkubainaibu yura mirimabũ matu danaĩ hanubi matũ ibubu inũ matũ betsabu inũ matũ puibu inũ matunabu betsabu inũ matũ haibuaibũ matu danãkĩ habũ nawabu matu atximashũ betsabu matu hatiri tenãmashãkanikiki. 18Matu haska wabiaibũ Deus matu hakimamahaira ishanikiki. Matu haska waibuwẽ nuiyamashãwẽ. 19Ha inũ, tsuabũra ea txibaĩ txĩtuãmawẽ taeshũ hanu kupititiã ẽ matu piskumashanaii, matu kupiamarã.
20Ana betsarã, nawa soldadobu Jerusalém mae keshebaunabu uĩkĩ hawaira hatu yamawashanaibu mã unãshanaii. 21-22Ha inũ, Deusũ hãtxa yuishunikabũ Deusũ Jerusalém kupishanaikiri kenenibu samama keyunũ bariyuai unaĩ Judéia anuabu mati keyatapa anu hau pashashanũbũwẽ. Ha inũ, Jerusalém anuabu hau tashniriabaĩshanũbũwẽ. Ha inũ, bai anu dayaibu hatũ hiwe anu ana beama hau pashariashanũbũwẽ. 23Nukũ mae ewapa hirabi anuabu yumaĩbutianã Deus danaĩbu hatuki sinatakĩ Deusũ hatu kupiaya betsa betsapa teneaibũ tuyabu inũ ha hatũ bake txutxu amamisburã, nuitapahairashãkanikiki. 24Ha inũ, detenamekĩ nupe txaipawẽ betsabu detekĩ hatiri tenãtã betsabu atxishũ tsuma washũ mai pakea betsa betsapa anu hatu iyuaibũ Deusũ nawa kuxipabu hatu nemakĩ yamawariama habũ Jerusalém anuabu itxakawashãkanikiki— iwanã,
Nukũ Hutxi Kayabi Iuwa huirã, eskakiranũ barikiaki, na hãtxarã
(Mt 24.29-35, 42-44; Mc 13.24-37)
25-26Jesusũ hatu yuikubaĩkĩ:
—Hanushũ Deusũ bari inũ ushe inũ bixi betsa betsapa tashnimatanaya mai anu nawa shukua tibi hiweakeabu haskai tsuã nĩkaisma betsahairai iãnẽwã tũkash ikaiwẽ date paepai unãyamasi hawa dabanẽ nĩkai mesetxakayamaibũ habiatiãri nai anua betsa betsapai nai txuruãkĩ taka taka akaya ha yurabũ xinaĩ: “Ma nuku yamawaikiki”, ishãkanikiki. 27Ha haskaibũ ẽ matũ Hutxi Kayabi Iuwa shanẽ ibui kuxipahairai txashahaira nai anua nai kuĩ meranua ẽ huai uĩshãkanikiki. 28Haskai taeaya mã hawawẽ ana hawa teneama samama ẽ matu pepawẽ hiwemayuai unãtã benimahairai naiuri teskãtã uĩkĩ ea betxishãkãwẽ— iwanã,
29miyuiwẽ hawẽ unãti hatu yusĩkĩ:
—Hiwẽ mã unãtirubukiri matu yusĩnũ nĩkakãwẽ. 30Ha hi mebi hawẽ pei petakatã ana pei bena hui metubistã peiai uĩkĩ ma bari kemai mã unãmis 31keskai hawara ẽ matu yuishu ikai betxitã ẽ samama shanẽ ibui huai mã unãshanaii. 32Ha inũ, yurabu dasibi hiwebaunabu yamariabuma ikũkĩ dasibi ẽ matu yuishu haskai taeshãkanikiki. 33Hakia habiaskariai nai anua inũ mai anua Deusũ damiwani habu keyushãkanikiki. Hakia ẽ hãtxawẽ bebũkiri ẽ matu yusĩaĩnã, binuama menepakeshanikiki.
34-35Haska tibi kaĩshanaiwẽ taea matũ huĩtinĩ kemu betsa betsapa mekĩ kaneama uĩrashãkãwẽ. Hawara txakabu aki huĩti kuxiyamashãkãwẽ. Eskairã, paẽawẽ inũ hawara matũmebi mã haska xinaĩwẽs besti dabanã iki huĩti nixmayamakubaĩshãkãwẽ. Mã haskai hiweabũ yurabu mai hirabi anu ẽ hatu unãti watanũ ika huaya birũ merã hikitã kebẽmana keskama Deusunabu mã pashashanaii. 36Hamẽ matunã, ẽ hãtxa txibãkĩ heneama Deusbe bari tibi hãtxakubaĩshãkãwẽ. Haska mese tibi tashnishanai binutã mã ma pewẽ taea hanu matũ Hutxi Kayabi Iuwa ẽ matuki nukuaitiã ea bebũ mã mapushãkanaii— hatu wanikiaki.
37Hanushũ bariri Templo hemaĩtĩ anushũ Jesusũ hatu yusĩkubaini mexu merã tibi Jerusalém anua kaĩkaini Oliveiras Mati anu ushatãtanaya 38Jesusũ hãtxa nĩkanũ ika yurã kaiã penaya bestẽtã Templo hemaĩtĩ anu haki nukui itxabirãbiranibukiaki.
Currently Selected:
Lucas 21: cbsBR
Highlight
Share
Copy
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.