Lucas 24
24
Jesús chokꞌai pꞌirabaida
(Mateo 28.1-10; Marcos 16.1-8; Juan 20.1-10)
1Tomia ewate tapꞌeweda ma wẽraarã wãjida Jesús kꞌapꞌɨa ɨadapꞌedaamaa. Ateejida kꞌera ne–inaa tꞌũa ome ãchia oodapꞌedaa. 2Panadakꞌãri, unujida chi mãu te uria tꞌai mãupa tꞌapꞌa bada awara ãi bɨ. 3Tꞌĩudakꞌãri, Tachi Waibɨa Jesús kꞌapꞌɨa unuda–e paji. 4Kꞌawadakꞌaa paji kꞌãata oodaitꞌee. Mãga nɨde unujida ɨmɨkꞌĩraarã omé pꞌaru tꞌo–tꞌoo uchiterree jɨ̃ bainɨ̃ pꞌanɨ ãchi ikꞌaawa. 5Mãpai ãchobeepa bedabaidachida tau bɨɨrɨ eujãde tꞌõbairutamaa. Mamĩda mãɨrãpa mãgajida:
—¿Sãapꞌeda jãɨramãi jɨrɨ pꞌanɨma ajida, iru chokꞌai bɨta? 6Iru nama wẽ–e. ¡Chokꞌai pꞌirabaiji! Kꞌirãpátɨ iru atꞌãri Galilea eujãde bakꞌãri, 7jaraji ichi, chi Eperã Akꞌõre Truadepema, kꞌachia beerã juade bɨdaitꞌee; ãrapa kurusode baijira bɨdaitꞌee piumerã mãikꞌaapa ewari õpeemaa ichi chokꞌai pꞌirabaiitꞌee.
8Mãga ũridakꞌãri, ma wẽraarãpa Jesupa jarada kꞌirãpajida. 9Mãpai iru kꞌapꞌɨa ɨadapꞌedaamãiipa wãdakꞌãri, ma jõmaweda nepɨrɨnajida Jesús kꞌõpꞌãyoorã oncemaa mãikꞌaapa awaraarãmaa. 10Chi mãga nepɨrɨnadapꞌedaarã paji María Magdalena, Juana, Santiago nawe María mãikꞌaapa awaraa wẽraarã. 11Mamĩda ãrapa nepɨrɨdapꞌedaa ũridakꞌãri, Jesús kꞌõpꞌãyoorãpa kꞌĩsiajida pariatua pedeemaa pꞌanɨ. Mapa ijãa kꞌiniada–e paji.
12Mãga jarajida mĩda, Pedro pꞌiradachi Jesús kꞌapꞌɨa ɨadapꞌedaamaa mãikꞌaapa edajãde akꞌɨkꞌãri, chi kꞌapꞌɨa lienzode beda bada unu–e paji. Jĩpꞌa chi pꞌaru aupai unuji. Mãpai pꞌera pɨkꞌa teedaa cheji. Kꞌawa–e paji kꞌãata ooitꞌee.
Jesús unudapꞌedaa ode wãdade Emaús pꞌuurudee
(Marcos 16.12-13)
13Ma ewate weda Jesús ome nipapatapꞌedaarã omé wã nipajida Emaús pꞌuurudee. Ma pꞌuuru Jerusalendeepa perá once kilometros bɨ. 14Ma ode wãdade ãchi pedee wã nipajida ma jõma Jesús ome pꞌasadade. 15Mãgá pedee wãdade, Jesús cheji ãchi ikꞌaawa mãikꞌaapa aukꞌa tꞌɨa wãji. 16Unu pꞌanajida mĩda aukꞌa wãru awaraa eperã ãchi ome, kꞌawada–e paji kꞌaita mãga bɨ. 17Mãpai Jesupa iidiji ãramaa:
—¿Kꞌãaredeta parã pedee wãdama? aji.
Mãpai ãchi kꞌĩra pia–ee bainɨ̃ pꞌaneejida 18mãikꞌaapa ãchidepema Cleofás apatapꞌedaapa pꞌanauji:
—¿Pɨ Jerusalende badata kꞌawa–e bɨkꞌã aji, mama pꞌasada?
19Mãpai ichia iidiji:
—¿Kꞌãata pꞌasajima? aji.
Ãchia mãgajida:
—Jesús Nazaretdepema Akꞌõre pedee jarapari paji. Ne–inaa pi–ia oopachi mãikꞌaapa pedee pia jarateepachi Tachi Akꞌõre kꞌĩrapite mãikꞌaapa pꞌuuru pidaarã kꞌĩrapite. 20Pꞌaareerã poroorãpa mãikꞌaapa tachi poro waibɨarãpa iru ateejida Romadepema poro waibɨa Pilatomaa kurusode peepitꞌaamerã. 21Taipa ijãa pꞌanajida ma Jesupata tachi Israel pidaarã uchiapiitꞌee Romadepemaarã juadeepa. Mamĩda ewari õpee paru mãgɨ́ ne–inaa jõma pꞌasada. 22Ma awara wẽraarã tai ome nipapataarãpa tai pꞌerapijida. Taujaaweda wãjida Jesús ɨadapꞌedaamaa. 23Mamĩda iru kꞌapꞌɨa unuda–e pakꞌãri, ãpɨtee chejida teedaa mãikꞌaapa taimaa nepɨrɨjida angeleerã unudapꞌedaa. Mãɨrãpa jarajidada ajida, Jesús chokꞌai bɨ. 24Mãga ũridakꞌãri, tai kꞌõpꞌãyoorã ũkꞌuru wãjida iru ɨadapꞌedaamaa mãikꞌaapa ununajida ma wẽraarãpa jaradapꞌedaakꞌa. Mamĩda iru unuda–e paji.
25Mãpai Jesupa mãgaji:
—¡Parã kꞌĩsia kꞌawada–ee pꞌanɨ! ¿Ijãada–e pꞌanɨkꞌã Akꞌõre pedee jarapataarãpa chonaarãweda jaradapꞌedaa? 26¿Tachi Akꞌõrepa pëida mãgá chupɨria nɨ̃baitꞌee paji–ekꞌã aji, Akꞌõrepa iru ateei naaweda ichi truadee?
27Mãpai Jesupa jarateemaa beeji ichi pꞌasaitꞌee bada Tachi Akꞌõre Ũraa pꞌãdade jara bɨkꞌa. Jarateeji Moisepa pꞌãdadeepa, Akꞌõre pedee jarapataarãpa pꞌãdapꞌedaade jara bɨ parumaa.
28Chi pꞌuuru wãdapꞌedaamaa panadakꞌãri, Jesús kꞌĩra jiwaa wãyaaitꞌee paji, pꞌuurude bee–ee. 29Mamĩda ãchia mãgajida:
—Tai ome béeji kꞌewara bairã mãikꞌaapa pꞌãriu wã perã.
Mãpai Jesús aukꞌa teedaa wãji ãra ome. 30Tꞌẽepai mesade su–akꞌɨ pꞌaneedakꞌãri nekꞌodaitꞌee, Jesupa ichi juade pan ataji. Mãpai ɨtꞌaa tꞌɨ̃ji gracias jaraitꞌee Tachi Akꞌõremaa mãikꞌaapa tꞌoopꞌeda ãramaa teeji. 31Mata Tachi Akꞌõrepa aweda ãra tau eratɨkꞌoopiji mãikꞌaapa ãramaa Jesús kꞌawapiji. Mamĩda mamãikꞌaapa iru wẽpadachi. 32Mãpai mãgajida:
—¿Wãara–ekꞌã? ajida. ¡Iru paji! Tachi tꞌãripa mãga jara nɨ̃baji, ode Akꞌõre Ũraa pꞌãda tachimaa jaratee che wã nipakꞌãri.
33Aramata waya ãpɨtee chejida Jerusalendee. Mama unu chejida iru kꞌõpꞌãyoorã once awaraa nipapatapꞌedaarã ome see nɨ̃bɨ. 34Mãgɨ́ see nɨ̃badaarãpa mãgajida:
—Wãarada ajida, Jesús chokꞌai bɨ. Simón Pedromaa ichiaba unupijida ajida.
35Mãpai ãchi omeerãpa nepɨrɨjida ode pꞌasada mãikꞌaapa Jesupa pan tꞌoopꞌeda, jedekꞌãri kꞌawaadapꞌedaa.
Jesupa chi kꞌõpꞌãyoorãmaa unupida
(Mateo 28.16-20; Marcos 16.14-18; Juan 20.19-23; Hechos 1.6-8)
36Atꞌãri mãgá nepɨrɨmaa pꞌanɨde, Jesús ãra esajĩakꞌa bainɨ̃ ba cheji mãikꞌaapa mãgaji:
—Kꞌãiwee pꞌanapatáatɨ.
37Jesús unudakꞌãri, ãchi pꞌeradachida, iru jaureta unu pꞌanɨ jĩakꞌaapa. 38Mamĩda Jesupa mãgaji:
—¿Sãapꞌeda pꞌera jõnɨma? aji. ¿Sãapꞌeda pãchi tꞌãride atꞌãri ijãada–e pꞌanɨma? aji. 39Akꞌɨ́tɨ mɨ jua, mɨ bɨɨrɨ ome. Mɨpɨ. Mɨ kꞌapꞌɨa tꞌõbáitɨ mãikꞌaapa akꞌɨ́tɨ. Eperã jaure chiara wẽe bɨ, bɨɨrɨ jida mɨa iru bɨkꞌa.
40Mãga jarapꞌeda, ãramaa akꞌɨpiji ichi jua mãikꞌaapa ichi bɨɨrɨ. 41Mamĩda atꞌãri pia ijãada–e pꞌanajida, audú o–ĩa pꞌanadapꞌedaa perã mãikꞌaapa pꞌera pɨkꞌa pꞌanadapꞌedaa perã. Jesupa ichi kꞌawapi kꞌinia bada perã, iidiji:
—¿Nama ne–inaa kꞌoparii iru pꞌanɨkꞌã? aji.
42Mãpai ãchia chikꞌo paada esajĩakꞌa teejida. 43Irua jitaji mãikꞌaapa ãchi taide kꞌotꞌaaji. 44Maapꞌeda mãgaji:
—Mɨmaa pꞌasajida aji, mɨa jaradakꞌa, atꞌãri parã ome bakꞌãri. Jaraji ne–inaa jõmaweda pꞌasaitꞌee paji Moisepa pꞌãdade jara bɨkꞌa mãikꞌaapa Tachi Akꞌõre pedee jarapataarãpa pꞌãdapꞌedaade jara bɨkꞌa, Salmos libro pꞌãdade jara bɨkꞌa paara.
45Mãpai jarateeji Tachi Akꞌõre Ũraa pꞌãdade jara bɨ Mesiade. 46Mãgaji:
—Tachi Akꞌõre Ũraa pꞌãdade jara bɨ Mesías ichita piutꞌee mãikꞌaapa ewari õpeemaa chokꞌai pꞌirabaiitꞌee. 47Akꞌõrepa kꞌaripapꞌeda, Jerusalendeepa na pꞌekꞌau eujã eperãarã paraamaa jarateenátɨ pꞌekꞌau kꞌachia oo amaadamerã mãikꞌaapa Tachi Akꞌõrede ijãapataadamerã. Mãgá irua ãchia pꞌekꞌau kꞌachia oopata wẽpapiitꞌee. 48Parãpa mɨ pꞌasada jõmaweda kꞌawa pꞌanɨ, unudapꞌedaa perã. 49Mapa parãmaa mɨa ne–inaa pëiitꞌee mɨ Akꞌõrepa jaradakꞌa. Mamĩda mãga ooru misa, nama pꞌanéetɨ Jerusalén pꞌuurude. Tꞌẽepai ɨtꞌariipa Tachi Akꞌõrepa ichi jaure pëiitꞌee parã ome bapariimerã.
Jesús Akꞌõre eujãdee wãda
(Marcos 16.19-20; Hechos 1.9-11)
50Maapꞌeda Jesupa ãra ateeji ma pꞌuurudeepa Betania pꞌuuru kꞌaitꞌa. Mama ichi jua ɨtꞌaa ɨapꞌeda, ãra bendiciaji. 51Mãpai mãgá pedeemaa bɨde Tachi Akꞌõrepa iru ɨtꞌaa ateeji ãra ikꞌaawaapa. 52Tꞌẽepai chi kꞌõpꞌãyoorãpa ɨtꞌaa tꞌɨ̃dapꞌeda, pedee pia jarajida irude mãikꞌaapa tꞌãri o–ĩa ãpɨtee chejida Jerusalendee. 53Maadamãiipa ewari chaa Tachi Akꞌõre te waibɨade pꞌanapachida ɨtꞌaa tꞌɨ̃maa mãikꞌaapa pedee pia jaramaa Tachi Akꞌõremaa.
Currently Selected:
Lucas 24: sjaB
Highlight
Share
Copy
Want to have your highlights saved across all your devices? Sign up or sign in
©2005, 2010, 2015 Wycliffe Bible Translators, Inc. All rights reserved.