2 PÉTERUS 1
1
1Surat iteu' jin Simon Peterus, kelunan sohoo' éh lawah Yésus Kristus. Surat iteu' nena' ké' ngan kelunan éh ngelan tong Kristus pekua' améé' éh ngelan tong Néh. Yésus Kristus, inah éh Allah éh pepurip lu', maneu' lu' kelu' omok ngelan tong Néh uban Iah éh maneu' kekat éh teneng. 2Uban keh jam Allah ngan Yésus éh Tuhan lu', jian kekat kemurung Allah ngan pengepawah Néh pepit dalem kenin keh kepéh.
Tong Allah tebai ngan ngevéléé' uleu'
3Naneu' penyukat Néh éh nena' Allah ngan lu' pu'un Iah mena' kekat éh tekep tong urip uleu' éh ni'ai, dokoo' urip lu' omok jian barei' éh tekep ngan kelunan éh ngelan Tuhan. Uleu' omok murip jian kenat neu' pengejam lu' tong Allah éh tebai lu' tai pemung ngan Néh dalem kekat pengaren ngan pengejian Néh. 4Kenat péh Iah mena' kuraa' kuraa' arong jajii' éh matek jian mu'un ngan lu'. Dokoo' lem kekat inah béé ka'ah pu'un kivu barék Allah ngan pelepu jin pengagat éh sa'at éh pu'un tong tana' iteu'. 5Uban néh kenat, jian keh ngerakep dokoo' keh petem ngelan tong Kristus, mihau urip éh jian ngan kepéh jam tong pengeloo' Allah. 6Kenat kepéh ka'ah tekep mihau usah keh ngeretep kenin tovoo' keh teneng tong ineu'-ineu' péh ngan ka'ah tekep murip ni'ai. 7Ka'ah tekep murung tong padéé' keh dalem Tuhan ngan pika tong kekat kelunan béé. 8Kekat barék inah éh tekep pu'un ngan keh hun keh alaa' éh ngan kivu éh mu'un, adang urip keh pu'un gunah ngan ka'ah pepit kepéh jam tong Yésus Kristus Tuhan lu' ngan jian. 9Bang séé'-séé' éh bé' pu'un kekat barék éh jian inah, kelunan inah barei' kelunan éh pu'un siik awah ta'an ngan iah ngelepan iah lepah nohéé' jin penyala' néh éh lepah.
10Uban néh kenat o kekat padéé' ké', jian keh mekat pekalai dokoo' pekelenaa', ka'ah éh tenebai Allah ngan éh kevéléé' Néh. Hun keh maneu' kenat, bé' keh peleraa' jin pengelan keh kepéh. 11Hun keh maneu' kenat, boh keh pu'un penyukat omok tai lem Pengihau éh pelinguh jin Tuhan éh purip lu' Kristus.
12Uban néh kenat adang akeu' juk ngelayau petesen ka'ah tong kekat inah, na' péh ka'ah lepah jam éh ngan petem dalem ha' tebaraa' Allah éh lepah nalaa' keh inah. 13Adang akeu' tekep petesen ka'ah tong kekat inah béé kelebéé' ké' murip keto. 14Uban kejam ké' bé' akeu' lebéé' murip tong tana' iteu' la'ah, uban Tuhan Yésus Kristus lepah bara' éh kenat ngan ké'. 15Uban néh kenat akeu' juk ngerakep mu'un-mu'un dokoo' jin la'o akeu' matai péh, ka'au' ngelayau nesen tong kekat iteu' béé.
Tong irah éh na'at tong kemaren Kristus
16Uban bé' améé' kivu ha' suket kelunan hun mé' nebaraa' ka'ah tong Tuhan Yésus Kristus éh juk tuai kepéh dalem kekat penyukat Néh. Maten améé' tengéé' pu'un na'at kekat kemaren Néh hun Néh pu'un tong tana' iteu' rai. 17 Pu'un améé' pemung ngan Néh tovoo' Néh kenajung ngan peparen Allah éh tamen. Tovoo' inah pu'un ha' jin Iah éh matek maren pané ngan Néh. Iteu' néh Anak Ké' éh kemurung Ké'. Iah ngepayoo' kenin Ké' ha' Néh. 18Améé' tengéé' pu'un menéng ha' inah tuai jin seruga tovoo' améé' pemung ngan Néh bau tokong éh ni'ai inah.
19Uban néh kenat améé' makin ngelan kepéh tong ha' éh benara' irah nabi, Ka'ah tekep mihau ha' tebaraa' irah ngan jian-jian, uban ha' tebaraa' irah éh barei', titui éh perema tong retek éh merem pah avéé' dau peka, ngan ada kenyalung teka rema éh perema dalem kenin keh. 20Éh bu'un-bu'un éh tekep keh nesen inah éh, bé' pu'un séé'-séé' péh omok pekelenaa' sin ha' éh benara' Tuhan lem surat Tuhan palaa' pengejam néh tengéé'. 21Uban kekat ha' tebaraa' éh benara' irah nabi, bé' irah bara' éh kivu pengeloo' kenin réh tengéé', bang Sahéé' Ni'ai pekelenaa' éh lem kenin réh tovoo' réh bara' ha' Allah ngan kelunan.
Currently Selected:
2 PÉTERUS 1: PNT
Highlight
Share
Copy
Want to have your highlights saved across all your devices? Sign up or sign in
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia