Tõoma 1

1Ateofili, mam pɔspɔsɩ gõŋɔ la pʋam mam tɔgɛ pa'alɛ fõn Azezi n daan pɔsɛ tõm se'em, dee pa'alɛ nẽrba se'em wuu halɩ 2ka paagɛ daar-sɛka tɩ Nawẽnnɛ tarɩ ẽ zom a yire la mɛ. La ẽn daan nãn ka zom Nawẽnnɛ yire la, a daan tarɩ la Nawẽnnɛ Sɩa la pãŋa pa'ala Tõntõnɩba tɩ a looge la, bãma n wʋn tõnna se'em. 3Azezi kũm na poorʋm, dabsa pinaasɩ pʋam tɩ a dɩkɛ a mẽŋa pa'alɛ a Tõntõnɩba, tõm tõon-yãlma zozo'e n pa'alɩ tɩ ẽŋa vo'oge mɛ, dee tɔgɛ Nawẽnnɛ so'olʋm yɛla pa'alɛ ba. 4La ban lagsɛ bɔna la ẽ na, tɩ a bɔ ba nõorɛ yetɩ: «Da yese-ya Zerizalɛm tẽŋa pʋam, gu'ura-ya bõn-sɛka tɩ mam Sɔ daan bĩŋe nõorɛ tɩ a bɔ ya, tɩ mam yele ya la. 5Se'ere n soe la, Azã daan misri ya la ko'om pʋam, la, la kãn yuuge dee tɩ Nawẽnnɛ mise ya a Sɩa pʋam.»

Azezi zom Nawẽnnɛ yire

6La Tõntõnɩba la n lagsɛ taaba la, soke Azezi mɛ yetɩ: «Zuudãana, la de la lɛɛlɛ wã tɩ fõn wʋn to'oge Ɩsrayɛlɩ dõma na'am le bɔ ba bɩɩ?» 7Tɩ Azezi lerge ba yetɩ: «La ka de ya bãŋɛ wakatɛ la dabs-sɛba tɩ mam Sɔ Nawẽnnɛ looge la a mẽŋa pãŋa. 8La Nawẽnnɛ Sɩa wʋn wa'am ya zuo, wa bɔ ya pãŋa. La ya wʋn dɛna mam kaset-dõma pa'alɛ mam yɛla Zerizalɛm, la Zude, la Samaari tẽnsʋm, halɩ ka paagɛ dũnia tɛka wuu.» 9Ẽŋa n tɔgɛ bɛla ba'asɛ la, dee zɔnna Nawẽnnɛ yire, tɩ ba bɩsra ẽ, tɩ wara lile ẽ.

10La ẽn zonnɩ na, ba ken bɩsra la saazuum zĩi, tɩ bʋraasɩ bayi yɛ fu-pɛɛlsɩ darɛ wa'am wa zɛ ba zẽ'am, 11dee soke ba yetɩ: «Galile nẽrba, bẽm tɩ yãma zɛ bɩsra saazuum? Azezi n yese ya zẽ'am wɛ Nawẽnnɛ yire wã, a wʋn le leme wʋ yãma n yẽ ẽ tɩ a wɛ'ɛsa se'em wã.»

Nẽr-sɛka n wʋn sɔɔgɛ Azudaasɩ zẽ'a

12La Azezi Tõntõnɩba la daan boe la Oliivi tãŋa zuo, yãŋa ze'ele bilam lɛbra Zerizalɛm. Tãŋa la, la Zerizalɛm ka zãagɛ gãŋɛ kilomẽtrɩ ayɩla. 13La ban paagɛ Zerizalɛm tẽŋam na, ba zom na saazuum deego tɩ ba ẽn bɔna mĩ na pʋam. La sɛba n daan boe mĩ na de la Apɩyɛɛrɩ, la Azã, la Azakɩ, la A'ãndre, la Afilipi, la Atoma, la Abatelemi, la Amatie, la Azakɩ n de Alfe bia, la Asimõ sɛka n daan de Zelɔtɩ nẽra, la Azakɩ bia Azudaasɩ. 14Bãma wuu la pɔgsɩ, la Azezi ma Amaari, la Azezi yɩbsɩ n daan ẽn lagsɛ taaba pʋ'ʋsra Nawẽnnɛ la pʋtẽ'erɛ ayɩla wakatɛ wuu.

15La daarɛ ayɩla, sɛba n bɔ Azezi sɩra la daan lagsɛ mɛ, ba kãllɛ daan de wʋ kɔbga la pisyi. Tɩ Apɩyɛɛrɩ isge ze'ele ba tẽŋasʋka yetɩ: 16«M sɔbiisi, la sãn dɛna Azudaasɩ n pa'alɛ nẽrba sore tɩ ba yõkɛ Azezi la, Nawẽnnɛ Sɩa yʋʋn dẽŋɛ botɩ naba Adavidi tɔgɛ a yelle mɛ halɩ kʋrʋm kʋrʋm. Bõn-sɛka n ẽŋɛ la masɛ la Nawẽnnɛ yetɔga n yʋʋn tɔgɛ se'em na. 17Azudaasɩ, a daan de la tõma nẽra ayɩla, Nawẽnnɛ n daan looge ẽ tɩ a tõnna a tõoma.»

18(La ẽn daan tõm be'em na tɩ ba yɔ ẽ, tɩ a da va'am la a tõon-be'ero la yɔɔrɔ, lui aliko, tɩ a pʋʋrɛ pusge, tɩ a yõorɔ wuu yurge. 19Zerizalɛm tẽŋa nẽrba wuu wõm bɛla mɛ, tɩ ba wi'ira va'am na yʋ'ʋrɛ la ba tẽŋa yetɔga yetɩ «Akeldama». A võorɛ de la zɩɩm va'am.) 20Apɩyɛɛrɩ ken tɔgɛ yetɩ: «La gʋlsɛ Nawẽnnɛ yõoma gõŋɔ pʋam yetɩ:

‹A yire wʋn lebge daboogo,

tɩ nẽra nẽra da le kẽ'era mĩ.›

Dee ken gʋlsɛ yetɩ:

‹Nẽra wʋn sɔɔgɛ a zẽ'am tõm.›

21-22Bɛla, dẽnɩ tɩ nẽra ayɩla pa'asɛ tõma Tõntõnɩba la pʋam pa'alɛ Azezi vo'ore la sɩra. La masɛ tɩ nẽr-ẽŋa dɛna la nẽr-sɛka n daan põn bɔna tɩ pʋam wakat-sɛka wuu tɩ Zuudãana Azezi daan boe la tõma la, lan pĩ'ilum la Azã n daan misri nẽrba ko'om pʋam na, wa paagɛ wakat-sɛka tɩ Azezi daan yese tõma sʋkam zom Nawẽnnɛ yire la.» 23Tɩ ba bãm yetɩ nẽrba bayi. Ayɩla de la Azozɛfʋ, tɩ ba wi'iri tɩ Abarsabasɩ, dee tɩ a yʋ'ʋrɛ ken dɛna Azustusi. Tɩ ayẽma la mẽ yʋ'ʋrɛ dɛna Amatɩyasɩ. 24Tɩ ba yãŋa pʋ'ʋsɛ Nawẽnnɛ yetɩ: «Tɩ Zuudãana, fõn mi nẽrsaalba wuu sũure. Pa'alɛ tɔ nẽrba bayi wã pʋam, fõn looge nẽr-sɛka 25tɩ a wʋn sɔɔgɛ Azudaasɩ zẽ'am lagɩm na Tõntõnɩba la, tõm tõon-sɛka tɩ Azudaasɩ basɛ dee sẽŋɛ lan masɛ tɩ a sẽŋɛ zẽ'am na.» 26Ba pʋ'ʋsɛ bɛla dee pɔsɛ mɛ, tɩ la yõkɛ Amatɩyasɩ, tɩ ba botɩ a naagɛ la Tõntõnɩba pia la ayɩla la.

Currently Selected:

Tõoma 1: gurDBL

Highlight

Copy