1 BATHESALONIKA 1
1
Moapostola o thabela tumelo ya Bathesalonika
1Paulo le Silibano le Timotheo re ngwalela phuthego ya Bathesalonika. Ka Modimo Tata wešo le Morena Jesu Kriste re re:
Kgaugelo le khutšo a di be le lena di etšwa go Modimo Tata wešo le go Morena Jesu Kriste,
2Re le lebogela go Modimo ka mehla ge re le gopola dithapelong tša rena. 3Ge re le pele ga Modimo Tata wešo, ga re kgaotše go gopola modiro wa lena wa tumelo, ge le itapiša ka tša lerato, le kgotlelela le holofetše Mong wa rena Jesu Kriste. 4Gobane bana bešo, baratwa ba Modimo, re tseba ge le le ba ba hlaotšwego, 5ka ge Ebangedi ya rena e sa ka ya le tlela ka polelo fela; e le tletše ka maatla le ka Moyamokgethwa ka mokgwa o kgodišago ruri, bjalo ka ge le tseba se re bego re le sona re na le lena, le tše re di dirilwego ka baka la lena, 6Lena la tla la ba baetši ba rena le ba Morena, la amogela lentšu ka lethabo la Moyamokgethwa mola ditlaišego e le tše ntši, 7la ba la ba dikgwadi tša badumedi ka moka ba Matsedonia le ba Akaya. 8Gobane lentšu la Morena ge le etšwa moo go lena le tumile, la se ke la enela naga ya Matsedonia fela le ya Akaya; tumelo ya lena ya ge le dumetše Modimo ya napa ya kwala gohle, gwa se hlwe go nyakwa se se kago bolelwa ke borena. 9Bona ka noši ba re anegela tša matseno a rena a re a hweditšego go lena, ka mo le sokologetšego go Modimo, la lahla medimo ya diswantšho, la ba bahlanka ba Modimodimo o a phelago. 10La ba ba go letela Morwa wa gagwe ya a mo tsošitšego bahung, ge a tlo boa kua magodimong, e a tlogo re namolela mohla wa bogale bjo bo tlogo tla.
Currently Selected:
1 BATHESALONIKA 1: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.