AMOS 5
5
Israelte suunna
1Israel innkuonte aw,
noute dou a ka thugen,
ka kaala na ngaiun:
2“Israel nungah siengthou apuata,
athou zou nawn sih ding hi.
Ama gam sung ah taisan in alum a,
ama phong ding koima a um sih hi.”
3Aziehpen Mangpa Pasian in tambang in agen hi:
“Galdou ding a mi tul khat pawtdohna khopi in,
za khat anuasie dinga,
mi za khat pawtdoh na khopi in,
mi sawm khat Israel innkuonte kungah nuasie ding hi.”
Kisia dinga hatna
4Aziehpen Israel innkuonte kungah,
Mangpa’n tambangin agen hi:
“Kei hing sui unlen tualeh hing un.
5Hinanleh Bethel suisih unlen,
Gilgal ah lut sih unlen,
Beersheba#Beersheba: nidanglai bieh inn minthang um na khat ahi. ah galkai sih un;
aziehpen Gilgal sal a puimangin a um dinga,
Bethel zong bangmalou ahing hi ding hi.”
6Mangpa sui unlen tualeh hing un,
Tuachilou in Ama mei bangin akuong dinga,
Joseph innkuonte akatum ding hi.
Tualeh aphel ding Bethel khosungah koima a um sih ding hi.
7Nou vaihawmnadih gamsai khatah suoh sah a,
dihtatna tuol sena neite,
8 #
Job. 9.9; 38.31 Bawmluoi leh zuheisuhtun siem a,
shina lim zingmawng suohsahpa leh,
sun zong zan banga mielsahpa Ama suiun;
Tuipituite hankhawma,
leitunga guo a zusahpa Ama sui un,
Amin khu Mangpa ahi.
9Aman mihatte tungah sietna guobang in azusah a,
Khopi kulpite tungah sietna keh bangin akesah hi.
10Amaun kul kotpi a thuhil mite amuda ua,
dihtah a thugen mite akidah uhi.
11Tuaziehin nouten mizawngte na tuonchil ua,
ama ua pat in tangseute na lahpieh ua.
Suongkhenthawin innte lam nan u’lachin,
asungah na teng sih ding uhi,
Grep huon hoitahte na bawl ua,
hinanleh grep zu na dawn tuom sih ding uhi.
12Aziehpen na tatkhelna uh tampite leh,
na khelna thupitahte uh ka thei a,
midihtatte na sugenthei ua,
golguhnate na la ua,
kulkotpi ah mizawngte tan ding na lehei pieh uhi.
13Tuaziehin tua hun chiengin mi pilvangte asip dide ding uhi,
hun hoilou ahi ziehin.
14Na hin theina dingun,
silhoi sui unlen,
silhoilou sui sih un.
Tuachi’n na gen bangun,
galkapte Mangpa Pasian in ahing umpi ding hi.
15Silhoilou huo unlen,
Silhoi bawl un;
Kulkotpi ah thukhenna dih tungkhie un;
tuachi’n Joseph innkuonte lah a damsunte dingin galkapte,
Mangpa Pasian in hepina anei kha ding hi.
Mangpa ni khu
16Tuazieh in Mangpa Pasian galkapte,
Mangpa’n tami agen hi:
“Kholai chinteng ah ka leh mauna a um dinga,
lamlien dungte ah,
khohna e! Khohna e! achi ding ua,
asuun dingin lou bawl mite ahan ding ua,
akap dingin kaasiemte ahan ding uhi.
17Grep huon tengah ka leh mauna a um ding hi,
aziehpen na lah uh tawnsuoh in kei ka hing pei ding hi,”
Mangpa’n achi hi.
18Nou Mangpa ni hing tunkal ngahlate,
na tung uh agih hi.
Mangpa ni khu noute dinga bang phatuom ding ahiei?
Tam khu miel ahia,
vah ahi sih hi.
19Mi khat humpibahnei akipat tai nanleh,
vompi toh kituoh bang ding ahia,
ahisihleh inn a pei in,
banga akhut ngam a,
gul in ana tuh bang ding hi uteh.
20Mangpa ni khu vah ahisih a,
mielna hilou ahiei mah?
Avahna nangawn taanglou a,
miel keikui ding hilou ahiei mah?
21 #
Isai. 1.11-14
“Na pawite uh ka hua a,
ka kidah hi,
tualeh na khawmpi siengthoute uh tungah zong ka kipah sih hi.
22Halmang sillatte leh ann sillatte hing lan nan u’lachin,
ka sang sih ding hi;
na bawngnou vahthaute uh,
kilemna sillat a na latte u’zong ka pahta sih ding hi.
23Na lasah bil aphuoite uh kei akipat lamang un,
aziehpen na pehging guineite uh,
ging kilawmte ka ngaikhe sih ding hi.
24Hinanleh thukhenna dih tui bangin luongsah unlen,
tualeh dihtatna khu tuipi hattah bangin luongsah zaw un.
25 #
Nasep. 7.42,43 “Aw Israel innkuonte gamdai ah kum sawmli sung,
ka kungah kithoina leh sillatte na hing lankhata uh amah?
26Na kibawlthu uh na leengpa uh Sikkuth#Sikkuth: Babilonte milim pasien ahi. leh na Chiun#Chiun: (Kai un chia lam ding) Molok biehbuh china ahi. milimte uh,
tualeh na Aasi pasiente uh na kipuoh kawi uhi.
27Tuaziehin Damaska khel lam ah,
noute sal in ka hing puisah ding hi,”
Amin galkapte Pasian,
Mangpa’n achi hi.
Currently Selected:
AMOS 5: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.