Ata loke mi a mira: a lanta un bientu di orkan ku a trese un nubia grandi for di nort. Den e nubia tabatin vlamnan di kandela ta bula bai bini i rondó di e nubia tabatin un splendor ku tabata duna hopi klaridat. For di paden, for di e kandela, tabata lombra meskos ku un metal blanku kayente ta lombra. Mi por a distinguí kuater ser bibu den dje, ku tabatin aparensia di hende. Kada un di nan tabatin kuater kara i kuater ala. Nan palu di pianan tabata règt; nan pianan tabata parse pata di bisé i tabata lombra manera bròns pulí. Tabatin un man di hende bou di kada di e kuater alanan. Kara di e kuater sernan, meskos ku nan alanan, ku tabata mishi ku e alanan di e ser banda di nan, no tabata drei ora nan tabata move bai dilanti; e ora ei nan tabata bai règt dilanti.