Njakengele mwilu, co njamwene lihunzi lyakama lilinakwizilila ku kunto. Co muhyato wakele nakuhyahyata mu lishelwa lyakama, na lilu lije lyalizengelekele lyakele nakuvyazima. Kwakele muhyato wakele nakuhyahyata, co cuma cimo cafwile ngwe vunengu cavyazimine. Mukati kalije lihunzi lyakama, njamwene vimo vyakufwa ngwe vikashama vawana vakuyoya vakufwa ngwe vanu. Oloni umo na umo wavo wakele na vihanga viwana na mambava awana lalo. Mendi avo apwile akushungama zuu, oloni akele na mapondo akulifwa ngwe a ngombe wa nkomba, vavyazimine ngwe vunengu vwakukwita mufwitilo. Kuwezelela ku vihanga vyavo viwana, na mambava avo awana, voshe umo na umo wakele na mavoko awana a vunu, limo na limo lyakele mwisi ya limbava. Vikashama ava vawana valikengesele vinima vemanene ngeci vishongo vya mambava avo vyalinungasanene. Omo vendele kuvakele nakutenguluka-tenguluka, oloni vendele amolika ku mitambela yoshe kutenguluka mivila yavo.