Popular Bible Verses from Wiripu 4

Pyno yt eiwanetup koꞌi koꞌi i ran o. Poꞌog waku wahẽtup Tupana kape aipowyro hamuat hap. Waku watoꞌe Tupana pe -Etum o uruepe uruwat yt kat i rakat. Uruikuap kahato raꞌyn egyiꞌat hap Tupana waku uruhẽtup. Miꞌi pote urutuwehum kahato ewowi urupyꞌa pyi Tupana waku watoꞌe Tupana pe.

Miꞌi tã watunug pote yt kat i hin i aiwanetup koꞌi koꞌi hap atunik kahato. Aiwanetup hawe woꞌowese hap yn topyhuꞌat. Tupana ainug waku pe kahato aiwanetup hawe yt miitꞌin mikuap oktan i tutum ahepe aiperupꞌi kahato hap. Towese hap ewy tutum ahepe. Miꞌi pote toihep ahesoꞌok hap koꞌi. Miꞌi hawyi aiwanetup hap Iesui wanetup hap ewy wẽtup miit ewy kahato raꞌyn ainug. Aipotypot timoma raꞌyn aiwanetup hap aipyꞌa piat yt naku i nug hap iꞌewyte aiwanetup saꞌag hawiat.

Kurin poꞌog ahenoi hawyi waku. Uheꞌywytꞌin uheinytꞌin watipyhyp aiwanetup hap yt naku i hap. Miꞌi hawyi wẽtup kape yn aiwanetup hap. Wakuat kape yn watuwanetup aikotã miitꞌin miat wakuat rakat ewy aiwanetup hap aikotã pywuat wanetup hat ewy aikotã miitꞌin mimotypot kahato hap wanetup hap ewy aikotã hãpyk kahato rakat ewy waku watuwanetup. Waku ihainia haryporia weꞌeg nakaria ewy watuwanetup. Waku iwese kahato rakat ewy aiwanetup hap. Miꞌi hawyi -Meimuẽwaria wyti waku kahato rakaria iꞌatuꞌe hap ewy waku aiwanetup hap. Kat e hap kat e hap poꞌog poꞌog waku miꞌi ewywuat waku watuwanetup. Kat e hap kat e hap ete Tupana -Waku e pyno miꞌi hap ete waku watuwanetup aat kaꞌap.

Maꞌato yt uiwekaipyi i tuut uhesaika hap maꞌato Aipotypot Iesui kaipyi atipuẽti. Miꞌi ti kat e hap kat e hap etiat -Uimoesaika hap wuatꞌi etiat kuap hap ete uimowatetup are Tupana pe. Iꞌewyte waku kahato eipe miꞌi e hap ti ereꞌe Tupana pe.

Pyno uiwyriaꞌin woꞌomowepiit haria ewywuaria wo o eweikupteꞌen. Wuatꞌi eꞌat pe waku -Tupana urumowepiit hat kahato En waku watoꞌe aat kaꞌap. Tupana urumowepiit hat kahato En waku watoꞌe Tupana pe are.

Tupana tum aru yne yt kat i aikawiat rakat ahepe. Taꞌi Uhetupana tum aru wuatꞌi yt kat i eiwat rakat tekat iwato kahato hap kaipyi. Aikotã tekat iwato kahato atipy pe hap ewy te tutum ehepe. Taꞌi hegyiꞌat kahato aru ahepe katupono Haꞌyru Aipotypot Iesui ikuꞌuro aikawiatno haype. Miꞌi pote toĩ yne aipo pe imiium koꞌi.

Iꞌewyte atikyꞌesat kahato ehewyry uhepiat einapin hap nug haria wo. Atikyꞌesat uimipoꞌoro einapin hamuat eweikyꞌe kahato hap. Saꞌawyꞌi ti areineꞌen eitokpe turan wakuat yn atunug ehepuo. Waku ewetunug aikotã uheko eweiꞌakasa hap ewy wakuap nug hap ete. Miꞌi tã ewetunug mote woꞌokyꞌe hap eiwoꞌopiat hap eweipuẽti Tupana mikyꞌesat ewy. Miꞌi hawyi ti aru eiperupꞌi hap topyhuꞌat aikai are.

Iꞌewyte ti waku yt ipyꞌahak takaria wo i watukupteꞌen e. Waku yne miitꞌin wesat hatno watoineꞌen. Yt eweiwaure teiꞌo Aikaꞌiwat uut hamuat hap eꞌat katupono taꞌaipok irane Aiꞌakag koro are. Miꞌi pote waku wakuaria ewy watukupteꞌen wuatꞌi eꞌat pe.

Atikuap kahato sehakyꞌeꞌi hap etiat iꞌewyte atikuap kahato sekat hap etiat. Saꞌawyꞌi meimuẽwat yt atikuap i yt kurin i maꞌato koitywy atikuap taꞌyn uhesyꞌat pykai uiwepiit iꞌewyte uiꞌok pote uiwepiit. Uhekat kurin hawyi arehum iꞌewyte iwato uhekat pote arehum ne. Koitywy ahepap taꞌyn wehum hap.

Saꞌawyꞌi te ti yt kat i sẽtup uiꞌe hap. Yt ahenoi i iraniaꞌin me yt kat i uiat e hap katupono koitywy atikuap taꞌyn uiwepiit sio uhekat iwato hap etiat sio kurin uiat uiwepiit hap atikuap.