Popular Bible Verses from Matyu 24

an kaa wikidnis a-go pred laik wail faiya, muos piipl aat a-go ton kuol an dem naa bada lov piipl laik wan taim. Bot aal uu eng aan an tan op chrang no mata wa, a dem a-go get siev.

An da Gud Nyuuz ya bout Gad Kindom afi go priich aal uova di worl. So evribadi wi get di chaans fi ier di chuut. A onggl afta dat, di worl a-go don.

Unu a-go ier se waar a gwaan a woi woi an waar a gwaan anda unu nuoz. Bot mek shuor se unu no fraitn yu no, kaa aal a dem sitn ya afi gwaan, bot non a dem de no miin di worl don yet.

Kaaz wan set a piipl a-go waar gens wan neks set a piipl, an kindom a-go fait gens kindom. Fuud a-go shaat iina nof nof plies an uol iip a piipl a-go staav, pan tap a dat ortkwiek a-go kom shiek op difrant difrant plies. Aal a dem sitn ya a jos di fos set a lieba pien we unu a-go fiil wen di nyuu worl a baan.

Evn an ort naa go de bout fi eva, bot fi mi wod a-go laas fi eva.

Kaaz a uol iip a piipl a-go kom yuuz op yuuz op mi niem, an a se, ‘Mi a Krais, a mi Gad sen fi siev piipl,’ an dem a-go fuul op nof piipl.

“Wen dat apm, dem a-go tek unu, an gi unu uova tu di piipl dem we a-go ponish unu an kil unu. An kaa unu a fala mi, piipl fram aal bout a-go iet unu. Uol iip a piipl a-go gi op an tap fala mi. Dem a-go sel out dem wan aneda an iet dem wan aneda. Nof nof faalz prafit a-go kom bout an chrik chrik op uol iip a piipl

So Jiizas se tu dem se, “Wach out, no mek nobadi fuul unu op.

A siem so unu fi redi, kaa di Man we Gad Pik naa go kom wen unu tingk im a kom.”

“So mek shuor se unu eva a wach an a luk out, kaa unu no nuo a wich die unu Laad a-go kom bak.

“Nobadi no nuo di die an di taim wen aal a dem sitn de a-go apm, nobadi no nuo a wen, no iivn di ienjel dem iina evn — onggl Faada Gad wan nuo dat.

Kaaz piipl a-go kom kom se dem a di wan we Gad sen fi siev piipl, wen notn no go so. An som faalz prafit a-go shuo op tu. Dem piipl de a-go wok aal kain-a mirikl an shuo aal kain-a sain fi chrik op piipl, dong tu aal di piipl dem we Gad pik, di faalz prafit dem wi chrik op tu ef dem get di chaans.

Siem ou tingz did tan iina Nowa taim, a siem so it a-go bi wen di Man we Gad Pik kom bak. Kaaz iina da taim de bifuo di flod kom, piipl did a nyam an jringk, uman a marid an man a marid rait op tu di die wen Nowa go iina di aak. An dem neehn nuo notn til di flod kom kom tek we di uol a dem. A siem ting a-go apm wen di Man we Gad Pik kom bak.