Popular Bible Verses from Ifiijan 5

So den, sins unu a Gad pikni an im lov unu, unu fi chrai fi tan jos laik im. Lov unu wan aneda, jos laik ou Krais Jiizas lov unu. Im gi op im laif fi wi laik wan swiit sakrifais we dem bon pan alta gi Gad.

Wach ou unu liv. No gwaan laik unu a fuul. Ak laik se unu av sens. Evri chaans unu get fi du sopm gud, du it, kaaz a bier wikid sitn a gwaan iina dem taim ya.

No bada jringk chrang jringk an get jongk an galang bad an gwaan wid aal kain-a naasinis. Wa unu fi du a mek di Uoli Spirit tek kanchuol a unu laif. Da wie de, wen unu a taak tu wan aneda, unu kyan yuuz saamz, sing som im, an sing di sang dem we di Spirit gi unu. Unu wi kyan sing an mek myuuzik bobl iina unu aat an priez di Laad. Unu fi gi tangks tu Faada Gad aal di taim fi evriting. Unu fi gi im tangks siek-a wa di Laad Jiizas du fi unu.

So no bada gwaan laik unu chupid. Fain out we di Laad riili waahn unu fi du.

Nou, di ozban dem fi lov dem waif siem laik ou Krais Jiizas lov di choch an ded pan di kraas fi it.

Wan taim, unu did a liv iina di daak laik piipl we no nuo Gad. Bot nou dat unu ton di Laad pikni, unu no iina daaknis agen, unu iina lait. So nou, unu mos liv laik piipl we de iina di lait

Kaaz unu av nof rispek fi di Laad Jiizas, unu fi ombl unuself an lisn tu unu wan aneda.

Di uman dem we av ozban mos ombl demself an du we dem ozban se dem fi du jos laik ou dem wuda ombl demself an du we Krais Jiizas se dem fi du.

Bot rait nou stil, mi a tel di ozban dem se dem fi lov dem waif jos laik ou dem lov demself. An di waif dem fi rispek dem ozban.

“Siek-a dat wan man wi lef im mada an faada yaad an go marid tu im waif, an di tuu a dem tugeda a-go komiin laik wan sumadi.”

Unu no fi tek paat iina di rang sitn dem we piipl we no nuo Gad an we a liv iina di daak a du. Wa unu fi du a mek evribadi si se di sitn dem we dem piipl de a du no mek no sens.