Popular Bible Verses from याकुब 1

आमिःम् फुॽनुसाॽ नु ने़ॽनुसाॽसे, खिनिॽ काक् परिक्‍ले़न् इनोगे़न् तुक्‍खेओ के़ध्‍ये़ॽइल्‍ले़ खे़ङ्‌ग साॽरिक् सःप्‍मनाबा पाःन्‍लो फाॽआङ् इःत्ते़म्‍मे़ॽओ, थेआङ्‌भे़ल्‍ले़ आक्‍ख्‍यारिक् नसाःन्‍साबा के़जोगि फाआङ् निङ्‌वाॽ साॽमो के़ध्‍ये़ॽइल्‍ले़ खिनिॽ नासि थःप्‍मान् पोरो के़लॽबान् के़निसुम्‍लो॥

कर खिनिॽ सिक्‍कुम्‍दिङ् निङ्‌वाॽ चाहाबा के़जोगिने़ फाॽग्र निङ्‌वाॽफुमाङ्‌ङिन् नाःक्‍ते़म्‍मे़ॽ हे़क्‍क्‍याङ् खुने़ॽ के़बिरिॽरो, थेआङ्‌भे़ल्‍ले़ कुयाःक् मे़ल्‍ले़ॽए कुनिङ्‌वाॽ हन्‍दुआङ् के़नाःक्‍पाहाॽ के़रे़क् पिरुसिॽरो॥

आमिःम् फुॽनुसाॽ नु ने़ॽनुसाॽसे, नाघे़म्‍माओ के़रे़क् चात्ते़म्‍मे़ॽओ, कर पाःप्‍माओ नु सिक् पोःक्‍माओ सुःसे़म्‍मे़ॽओ फाॽआङ् कुसिङ् निःत्ते़म्‍मे़ॽओ॥

हे़क्‍क्‍याङ् नासि थःप्‍मान् कुलिङ्‌दो के़त्‍ल थारिक् पोर पोङ्‌लो, हे़क्‍केलॽरिक् खिनिॽ के़धुम्‍बा नु कुलिङ्‌दो के़गे़प्‍पा के़बोःक्‍खिआङ् खिनिॽओ कुलिङ्‌दो मे़ङ्‌गे़प्‍मनाबा पान् थेआङ् मे़बोङ्‌ने़ल्‍लो॥

कर पाःन्‍जाक्‍किल्‍ले़ पाःत्तुबा कुइसिक् चोगे़म्‍मे़ॽओ॥ पाःन्‍जाक् के़घे़म्‍बारक् के़बोःक्‍खिॽने़ फाॽग्र आबाङे इङ्‌गे़ले़क्‍कासिॽरो॥

इनोगे़न् तुक्‍खेन् नासि के़धःप्‍पे़ङ्‌ग मुॽइसाबारो, थेआङ्‌भे़ल्‍ले़ खे़न् निङ्‌वाॽसाॽमाओ थाःल्‍ले़ कुलिङ्‌दो के़गे़प्‍पा पोःक्‍खे़आङ् निङ्‌वाॽफुमाङ्‌ङिल्‍ले़ खुने़ॽ मिःम्‍जि के़मे़प्‍पाहाॽ पिमासि फाॽआङ् माङ्‌हे़क् चोगुबा मे़न्‍नुप्‍मनाबा हिङ्‌मन्‍ले़न् तिचःन् खे़ल्‍ले़ खोसुॽरो॥

काक् नुबा नु कुलिङ्‌दो के़गे़प्‍पा पर्धाःम्‍मिङ्‌ग थाःङ् ताङ्‌साक्‍पो के़ओःप्‍पा ओःत्तिहाॽ के़जोःक्‍पा पानुदिङ् पाः निङ्‌वाॽफुमाङ्‌लाम् युरो॥ खे़न् ओःत्तिहाॽग साम्‍ब्रिःप्‍पा कुइसिक् ले़ङ्‌बेःक्, कर खुने़ॽ आप्‍फाल्‍ले़आङ् मे़ले़ङ्‌ने़न्‍लो॥

पाःन्‍जाक्‍किन् के़घे़प्‍सुम् कर खे़न् कुइसिक् के़न्‍जोगुम्‍मिन्‍ने़ फाॽग्र से़ल्‍ले़ङ्‌घोओ खिनिॽ नारा ओगे़मे़त्तुम्‍बा कुइसिक् चोक्‍लो॥ खिनिॽ आबाङे ओगे़मे़त्तासिआङ् आनिगे आक्‍तङ्‌बा चोगिगे़ फाॽआङ् के़निसुम्‍बान् के़बेगिनुमे़ःन्‍ने निङ्‌वाॽ के़भेःत्‍छुम्‍लो॥

पानुदिङ् पा निङ्‌वाॽफुमाङ्‌ङिल्‍ले़ ते़न्‍दिङ् चोगुबा सुत्‍थो नु सेसेबा साम्‌योसाबा पोङ्‌माङ्‌ग बा कन्‍लो—ये़त्‍छाबाहाॽ नु मेमेदुमाहाॽ खुनिॽ इनोगे़न् तुक्‍खेहाॽओ कम्‍ब्राङ् मे़प्‍मासि, हे़क्‍क्‍याङ् इक्‍सादिङ् खाम्‍बेःक्‍मोबा याप्‍मि के़जिःम्‍बा पाःन्‍हाॽलाम् माःङ्‌घा वाॽमारो॥

हे़क्‍क्‍याङ् हङ्‌साॽमो के़धाबाल्‍ले़ निङ्‌वाॽफुमाङ्‌ङिल्‍ले़ हङ्‌साॽराङ्‌लो फाॽआङ् आप्‍फाल्‍ले़आङ् मे़बाःत्तुन्‍लरो, थेआङ्‌भे़ल्‍ले़ निङ्‌वाॽफुमाङ्‌ङिन् फे़न्‍पान् लाम्‍बा हङ्‌मे़साॽने़न्‍लो, हे़क्‍क्‍याङ् खुने़ॽआङ् आत्तिन्‍हाॽआङ् हङ्‌मे़साॽरुन्‍छिन्‍लो॥ कर काक् मनाहाॽ आबाङे फे़न्‍निङ्‌वाॽइल्‍ले़ मुरा मे़त्तुसिआङ् हङ्‌साॽमो मे़धारो॥

याङ्‌गे़साॽबा नसानिबान् हाराॽ निङ्‌वाॽफुमाङ्‌लाम् मिङ्‌सो इङ्‌धाङ् खोसुल्‍ले़ सःत्‍ल पोङ्‌लो॥