Text: © L'Alliance Biblique du Tchad 2006 Audio: ℗ 2008 Hosanna

Sar - 2008 Edition (NT)

Bibəl ta Sar̄ © L'Alliance Biblique du Tchad, 2006, 2010.

Tā anī Jeju ɔr̄ najə̄ kə kósə de gēé ō, kə ngé ndóō yá̰a̰ yān gēé ō, ədadə́ na:
Ngé ndóō de gə̄ ndū najə̄ gə̄ ō, Parijiyḛ gə̄ ō, ndin̄ loo ndi yā Moijə tə́ a ɔjən̄neé de gə̄ kum ndū najə̄ gə̄ yā Moijə. I beé ní, majə kadə̄ ōōī tadə́ ba ī-rāāī yá̰a̰ malang ń a ədan̄sí ní. Ba ī-lōōī ndájə̄ yá̰a̰ rāādə́. Tām̄ yá̰á̰ ń nin̄-ndóōn̄ de gə̄ ní nin̄ kɔ́ gə̄ rāān̄ alé. Nin̄-tó̰ō̰n̄ yá̰a̰ kətō kə́ kɔȳ gə̄ tə́ndān̄ dɔ de gə̄ tə́, banī mbātə́n̄ kəla ta ngōn̄ jīdə́ nāań yá̰a̰ kətō gə̄ ní. Yá̰a̰ rāādə́ gə̄ malang ní, i yā kadə̄ de gə̄ a̰a̰n̄neédə́ ngóy. Nin̄-rāān̄ ngong kə́ dūú gə̄ ń najə̄ gə̄ yā Nə́ɓā i kemeé á do̰ō̰n̄ nodə́ tə́ aláa do̰ō̰n̄ jīdə́ tə́ ní adə̄ lan̄ popəlo o, rāān̄ ta kəlā ro̰ kūbə̄ yādə́ gə̄ adə̄ ngālə̄n̄ tilili ō.
Nel̄də́ ndi loo kə́ to ngol tə́ loo kəsa yá̰a̰ gə̄ tə́ ō, gíŕ kújə́ kán̄ naā gə̄ tə́ ō. Nel̄də́ kadə̄ de gə̄ rāān̄də́ lápə́ya rɔȳn̄neédə́ ndágə loo kə́ bo gə̄ tə́ ō, kadə̄ de gə̄ ɓārə́n̄də́ na i ngoldə́ gə̄ ō. Ba sḭḭ̄, ī-lōōī kadə̄ de gə̄ ɓārə́n̄sí ngoldə́ gə̄, tɔdɔ̄ sḭḭ̄ malang i ngákó̰o̰ naā gə̄ ō, ngolsí i kógə̄ḿ beē ō. Ī-lōōī ɓāŕ deē kógə̄ḿ kə́ dɔ nang tə́ laā bɔbə̄sí, tɔdɔ̄ bɔbə̄sí i kógə̄ḿ beē, i nge ń ndi dɔ rā̰ tə́ ní. Ī-lōōī kadə̄ de gə̄ ɓārə́n̄sí ngé kɔr nodə́ gə̄ ō, tɔdɔ̄ nge kɔr nosí i kógə̄ḿ beē, i Kərist. Deē ń i kə́ bo ngá̰ý dansí tə́ ní a tél nge kəla yāsí. Deē ń a ɔsə rɔ̄n kə̄ dɔɔ́ ní, a télən̄ seneé kə̄ nang tə́, ba deē ń a tél kə rɔ̄neé kə̄ nang tə́ ní, a ɔsənən̄ kə̄ dɔɔ́.


Sḭḭ̄ ngé ndóō de gə̄ ndū najə̄ gə̄ ō, Parijiyḛ gə̄ ō, sḭḭ̄ ń i ngé gól̄ kum de gə̄ ní, yāsí i rɔ̄ ndoō! Tɔdɔ̄ sḭḭ̄ ūtī ta róbə Ɓē ko̰o̰ kə́ dɔ rā̰ tə́ kɔ̄ɔ́ ta de gə̄ tə́. Sḭḭ̄ kɔ́ gə̄ údiī kemeé aĺ ō, ngé gə̄ ń gḛyn̄ kudə kemeé ní a sḭḭ̄ ɔ̄gīdə́ kudə kemeé kɔ̄ɔ́ ō.
Sḭḭ̄ ngé ndang makətūbə̄ gə̄ ō, Parijiyḛ gə̄ ō, sḭḭ̄ ń i ngé gól̄ kum de gə̄ ní, yāsí i rɔ̄ ndoō! Sḭḭ̄ ī-táāī yá̰a̰ yā dəyá̰ kə́ ngaa koy gə̄ jīdə́ tə́ malang kɔ̄ɔ́ ō, ī-raī dɔ tə́ noō īlī gidə rɔ̄sí kə ndɔ̄ȳ Nə́ɓā kə́ dan gān̄g aĺ yā kadə̄ de gə̄ rāān̄neésí de kə́ majə gə̄ tə́ ō. I tām̄ najə̄ ń noō tə́ n sḭḭ̄ ā ə́ngeī ndéý kə́ al̄ naā ní.
Sḭḭ̄ ngé ndóō de gə̄ ndū najə̄ gə̄ ō, Parijiyḛ gə̄ ō, sḭḭ̄ ń i ngé gól̄ kum de gə̄ ní, yāsí i rɔ̄ ndoō! Tɔdɔ̄ sḭḭ̄ ī-njə̄rāī mbā āwī kə̄ loo gə̄ tə́ malang dɔ nang tə́ ō, kə̄ loo gə̄ tə́ malang dɔ bā bo gə̄ tə́ ō, yā sāań de kə́ kal kógə̄ḿ beē kə́ yā kadə̄ tél Jipə. Ba loo ń deē ní tél Jipə ɓá ní a, ī-rāāniī ādə̄ tél nge kudə kum hor Gehen tə́ tɔȳ yāsí sḭḭ̄ kɔ́ gə̄ nja jōó.
Sḭḭ̄ ngé kum tɔ̄ɔ̄ kə́ ngé kɔjə de gə̄ ta róbə gə̄, yāsí i rɔ̄ ndoō! Tɔdɔ̄ sḭḭ̄ ə́daī na ré deē túbə kə kújə yā Kɔ́ɔ̄ɓēé anī, nge ń noō na i yá̰a̰ alé. Ba ré deē túbə na i kə lɔ́ŕ kə́ kem kújə yā Kɔ́ɔ̄ɓē tə́ tá na ənī na i ndūn kə́ nja ngár̄ tə́. Sḭḭ̄ i de kə́ mbóo gə̄ ō, ngé kum tɔ̄ɔ̄ gə̄ ō! Yá̰á̰ ń i kə́ bo ngá̰ý ní i rí? I lɔ́r, aké i kújə yā Kɔ́ɔ̄ɓē kə́ nge rāā kadə̄ lɔ́ŕ téĺ yá̰á̰ kə́ yā ɓōĺ gidə ní ḿ? Tá sḭḭ̄ ə́daī ɓáý to̰ na ré deē túbə kə loo tun̄ yá̰á̰ anī, nge ń noō na i yá̰a̰ alé. Ba ré deē túbə na i kə yá̰a̰ ndējə̄ kə́ dɔ tə́ tá na ənī na i ndūn kə́ nja ngár̄ tə́. Sḭḭ̄ i de kə́ ngé kum tɔ̄ɔ̄ gə̄! Yá̰á̰ ń i kə́ bo ngá̰ý ní i rí? I yá̰a̰ ndējə̄, aké i loo tun̄ yá̰á̰ ń rāā adə̄ yá̰a̰ ndējə̄ tél yá̰á̰ kə́ yā ɓōĺ gidə ní ḿ? Deē ń túbə kə loo tun̄ yá̰á̰ ní, túbə i kə loo tun̄ yá̰á̰ ō, kə yá̰a̰ malang kə́ dɔ tə́ ō. Deē ń túbə kə kújə yā Kɔ́ɔ̄ɓēé ní, túbə i kə kújə yā Kɔ́ɔ̄ɓē ō, kə Nə́ɓā ń ndi kemeé ní ō. Deē ń túbə kə dɔ rā̰á̰ ní, túbə i kə kōr̄ kāgə̄ mbang yā Nə́ɓā ō, i kə Nə́ɓā ń ndi dɔ tə́ ní ō.
Sḭḭ̄ ngé ndóō de gə̄ ndū najə̄ gə̄ ō, Parijiyḛ gə̄ ō, sḭḭ̄ ń i ngé gól̄ kum de gə̄ ní, yāsí i rɔ̄ ndoō! Tɔdɔ̄ kámbə kotə yāsí gə̄ ń i kámbə kotə ō, penuwil ō kumḛ̄ḛ ō ní, sḭḭ̄ ɔ̄rī dɔ kə́ nge ko̰ kutə ādī Nə́ɓā. Ba ré i yá̰á̰ kə́ bo bo gə̄ kə́ tū ndū najə̄ tə́, kə́ tītə̄ yá̰á̰ kə́ gōtə́ ō, rāā kem majə ō, ra dɔ ndū kə́ kənī tə́ ō, ɓáa sḭḭ̄ ī-mānī dɔ tə́ kɔ̄ɔ́. Tá i yá̰a̰ gə̄ ń noō n majə kadə̄ ī-rāāīdə́ kanjə̄ kəya̰ gotə gə̄ kɔ̄ɔ́ ní. Sḭḭ̄ de kə́ kum tɔ̄ɔ̄ gə̄ kə́ ngé kɔjə de gə̄ ta róbə gə̄! Sḭḭ̄ ī-taāī kum man̄ ka̰ȳsí kə kūbūú ɔ̄gīneé yḭ́l̄ mān̄ kum tə́, ba ré i jámbal ɓáa sḭḭ̄ úriīn̄!
Sḭḭ̄ ngé ndóō de gə̄ ndū najə̄ gə̄ ō, Parijiyḛ gə̄ ō, sḭḭ̄ ń i ngé gól̄ kum de gə̄ ní, yāsí i rɔ̄ ndoō! Tɔdɔ̄ sḭḭ̄ ī-tə́goī gidə kópə ka̰ȳ yá̰a̰ ō, gidə səmbē kə́ laa ō, banī kemdə́ rosə kə yá̰a̰ gə̄ ń ə́ngeī loo ɓogə tə́ ní ō, kə yá̰a̰ gə̄ ń ə́ngeī sɔɔ̄ń ngur kə́ majaĺ gə̄ kə́ kemsí tə́ ní ō. Ḭ̄ Parijiyḛ kə́ nge kum tɔ̄ɔ̄ ń toō, ī-tə́go kem kópə ka̰ȳ yá̰á̰ ō, kem səmbē kə́ laa ō, kété pá tá gō tə́ anī ādə̄ gidədə́ unjə̄ njáý njáý ō.
Sḭḭ̄ ngé ndóō de gə̄ ndū najə̄ gə̄ ō, Parijiyḛ gə̄ ō, sḭḭ̄ ń i ngé gól̄ kum de gə̄ ní, yāsí i rɔ̄ ndoō! Tɔdɔ̄ sḭḭ̄ ī-toī i tītə̄ dɔ ɓádə gə̄ kə́ rāān hō̰rō̰ tū tə́ beē. Adə̄ ré deē a̰a̰ gidə kə́ ndágá ɓáa majə, banī kemdə́ rosə kə kə̄ngā de kə́ koy gə̄ ō, kə yá̰á̰ kə́ yḛr kə́ tayā tayā gə̄ ō. Sḭḭ̄ ī-toī i beé ō, gidəsí kə́ ndágá i kə́ majə ta kum de gə̄ tə́, banī kemsí rosə kə gól̄ looó ō, kə yá̰á̰ kə́ majaĺ ō.


Sḭḭ̄ ngé ndóō de gə̄ ndū najə̄ gə̄ ō, Parijiyḛ gə̄ ō, sḭḭ̄ ń i ngé gól̄ kum de gə̄ ní, yāsí i rɔ̄ ndoō! Tɔdɔ̄ sḭḭ̄ ī-rāāī dɔ ɓádə ngé koō ta gə̄ ādī majə ō, ī-súūī dɔ ɓádə de kə́ súmūú gə̄ ō, ba ə́daī na ré sḭḭ̄ na ī-ndiī na i ɓāl̄ yā kaasí gə̄ tə́ anī, na ā ī-ɓooī naā sedə́ loo tɔ̄l̄ ngé koō ta gə̄ tə́ alé. I beé n sḭḭ̄ kɔ́ gə̄ ə́daīneé najə̄ kə́ dɔ rɔ̄sí tə́ kadə̄ sḭḭ̄ na i ngán kaa ngé tɔ̄l̄ ngé koō ta gə̄ ní. Ní, ī-naaī kə̄ loo rāā tə́, ī-tɔ̄lī ta kəla ń kaasí gə̄ əlan̄ gíŕ ní! Sḭḭ̄ i lī gə̄, gír kaa lī kakə́m gə̄! Hor Gehen ń i yá̰á̰ kə́ tōr̄ kə́ kadə̄ rāāsí tām̄ majaĺ yāsí tə́ ní, ā ásiī ka̰ȳ ta tə́ i ba̰ý? I tām̄ najə̄ ń noō tə́ n m-ā m-ə́lá ngé koō ta gə̄ ō, ngé kum kedə̄ gə̄ ō, ngé ndóō de gə̄ ndū najə̄ gə̄ ō, kə̄ rɔ̄sí tə́ ní. Ā ī-tɔ̄lī kə́rēý gə̄ ō, ā ə́ndaī ngé kə́rēý gə̄ tū kāgə̄ kə́ dēsə́ tə́ kə máyá̰ ō, ā ə́ndaī kə́rēý gə̄ kə mərawaá kem kújə́ kán̄ naā yāsí tə́ ō, ā ī-ngɔ̄dīdə́ kə gō ɓē gə̄ ō. Yā kadə̄ mósə de kə́ súmūú gə̄ ń a̰ȳ nang tə́ laā ní əsō dɔsí tə́ malang. Əla gír dɔ mósə Abel ń ni i de kə́ súmūú tə́, bátə́ ugə̄ń dɔ mósə Jakari kə́ ngōn̄ Barasi ń ī-tɔ̄l̄niī dɔ dán loo tun̄ yá̰á̰ tə́ kə loo kə́ táĺ ní tə́. Ādə̄ m-ə́dásí najə̄ kə́ bo ngá̰ý, yá̰a̰ gə̄ ń noō malang a télən̄ yā kəsō dɔ de kə́ ngɔlaā gə̄ tə́.


Ɓē kə́ Jerusalem, ɓē kə́ Jerusalem, ḭ̄ ń i nge tɔ̄l̄ ngé koō ta gə̄ ō, nge tə́nī ngé gə̄ ń Nə́ɓā əladə́ looí ní kə mbalá tə́nī tɔ̄l̄də́ ō ní! Nja i kóndóńg n m̄-gḛy kán̄ ngání gə̄ kə̄ naā tə́, tītə̄ ń kó̰o̰ kə̄njá a kánəń ngánən gə̄ gír bɔ̄gə̄n tə́ ní? Ba ngání gə̄ gḛyn̄ alé! I beé ní, a əya̰n̄ kújə yāsí ní jīsí tə́ yā kadə̄sí kadə̄ a ra kemən karī. Tɔdɔ̄ ādə̄ m-ə́dásí, əla gír ngɔr ń toō tə́ ní, ā á̰a̰mī to̰ alé, bátə́ kadə̄ ə́daī na:
Ādə̄ Nə́ɓā rāā majə kə nge ń reē kə rī Kɔ́ɔ̄ɓēé ní!

Listen to MATIYE 23