If you have would like a copy of this version please contact info@davaraudiobibles.org

Inner Seraji New Testament, CC-BY-SA-4.0, The Love Fellowship (Text). Inner Seraji New Testament Audio Bible, CC-BY-SA-4.0, Davar Partners International, The Love Fellowship, 2022 (Audio).

Inner Seraji New Testament

Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.

अब्राहमा रे वंशज, दाऊदा रे वंशज, यीशू मसीहा री बंशाबली। अब्राहम, इसहाका रअ बापू थी। इसहाक, याकूबा रअ बापू थी याकुब, यहूदा होर तेऊरे भाई रअ बापू थी, यहूदा, पेरेस होर जेरहा रअ बापू थी (त्याहरी आमा रा ना तामार थी) फिरिस, हस्रोना रअ बापू थी, होर हस्रोन, एरामा रअ बापू थी। एराम, अम्मीनादाब रअ बापू थी, अम्मीनादाब, नहशोना रअ बापू थी नहशोन, सलमोना रअ बापू थी। सलमोन, बोअजा रअ बापू थी, बोअाजा री आमा राहब थी। बोअज होर रुत ओबदा रअ बापू थी, ओबद, यिशै रअ बापू थी, होर यिशै, दाऊद राजे रअ बापू थी, दाऊद राजा, सुलेमाना रअ बापू थी। सुलैमान री आमा पहिले उरिय्याह री लाड़ी थी। सुलैमान, रहबामा रअ बापू थी, रहबाम, अबिय्याह रअ बापू थी, अबिय्याह, अासा रअ बापू थी, आसा, यहोशाफात रअ बापू थी, यहोशाफात, योरमा रअ बापू थी, होर योराम, उज्जियाह रअ बापू थी। उज्जियाह, योतामा रअ बापू थी। योताम, आहाजा रअ बापू थी होर आहाज, हिजकिय्याह रअ बापू थी। हिजकिय्याह, मनशशे रअ बापू थी मनशे आमोना रअ बापू थी होर आमोन, योशिय्याह रअ बापू थी। योशिय्याह, रे यकुन्याहा रअ होर तेऊरे भाई रअ बापू थी त्या धयाडी बाबेल देशा रे लोके इस्राएली लोका केदी बणाई थी। केदी होई करे बबीलोना पजेरने का बाद यकुन्याह, शालतिएल रअ बापू थी होर शालतिएल, जरूब्‍बाबेल रअ बापू थी जरूब्‍बाबेल, अबिहूद रअ बापू थी, अबिहुदा, इल्याकीम रअ बापू थी होर इल्याकीम, अजोरा रअ बापू थी, अजोर, सदोका रअ बापू थी, सदोक, अखिमा रअ बापू थी अखीम, इलीहुदा रअ बापू थी, इलीहुदा, एलीयाजरा रअ बापू थी, एलीयाजर, मत्ताना रअ बापू थी मत्तान, याकूबा रअ बापू थी, याकूब, यूसुफा रअ बापू थी, जोह मरियमा रअ लाड़अ थी, होर मरियमा का जासूबे यीशु मसीह बोला, सह जन्मू। एउ साबे सारी पीढ़ी अब्राहमा का दाऊदा तणी चौउदा पीढ़ी, होर दाऊदा का इस्राएली लोका बबीलोना बे केदी बणाई करे नीई, तेऊ वक्ते तणी चऊदा पीढ़ी होर इस्राएली केदी बणाई करे नीई, तेऊ वक्ता का मसीह तणी चऊदा पीढ़ी होई।


एबा यीशु मसीहा रा जन्म एउ साबे होऊ कि जेवा एउरी आमा मरियमा री मांगणी यूसुफा संघे होई, तेबा तेऊरे ब्यहा हुणे का पहिले जेबा सह कुआरी ही थी, तेबा सह पवित्र आत्मा रे समर्थे सगे सह सुईन्दी होई। यूसुफ तेस्कअ मगेत्र जोह एक धर्मी मनश थी, जो तेसा सभी रे सम्मने तेसा बदनाम करना नांई चांहदअ थी, तेबा तेऊ चुप-चाप आपणी मागणी चोडने रा विचार करू। जेबा युसफ या गला आपणे मने सोचत लाग थी, तेबा परमेश्वरा रअ दूत तेऊ सुपने में हेरु, होर हेरी करे बोलदअ लागअ, “हे यूसुफ! तूह जो दाऊद राजा री खानदानी का आसा, मरियमा बे आपणी बेटड़ी बणाऊणे का नाँई डरे, किबेकी जोह तेसके पेटे जोह साहा सह पवित्र आत्मा री सामर्थ्या का साहा। तेसा एकी बच्चे बे जन्म दीणा होर तूह तेऊरा ना यीशु डाहे, किबेकि तेऊ आपणे लोका रा त्याहरे पापा का उद्धार करना।”
यह सब एतकी तणी होऊ जोह बचन यशायाह भविष्यद्वक्ता प्रभु यीशु रे जन्मा रे बारे में बोलू थी सह पूरअ होए, “हेरा, एक कुआरी गर्भवती हूँणी होर एक्की बालका बै जन्म दीणा, होर तेऊरा ना इम्मानुएल डाहंणा, जासका मतलब साहा परमेश्वर हांम संघे आसा।” तेबरे तणी यूसुफ निजा का उठी करे परमेश्वर रे दूता री आज्ञा रे साबे, तेऊ मरियमा संगे ब्यहा करू होर सह आपणे घरा बे आँणी। होर जेबरे तणी बालक नांई होऊ, तेबरे तणी त्याहा रे बीचे किछे भी ब्याहा रे कोहे भी सम्बंद नाँई होई, युसपे बालका रा ना यीशु डाहु।

Listen to मत्ती 1