แปร กาฮ็อห 23
23
1อาบาลาอัม วี ต็อห ดี คูนดีคัม, “แตห แม โบง กาโช็ง หลู ดี นี อาดา บู โบ็ง. แรน ตัห บอ มัก อาโล็ง บู โดว บอ มาบู อาโล็ง บู โดว, ดัว ดี โอว.” 2คูนดีคัม อาบาลาก มืร โบง โดบ ปี กาลาง อาบาลาอัม ตี. เฆ บอ ดึห มามัก อู โดว บอ มาบู อู โดว, หลู แดง กาโช็ง ดอน กาโช็ง.
3แฮะ ฮอต, อาบาลาอัม วี ต็อห ดี อัน, “แตห แม ตัห จ็อง โคบ กาโช็ง หลู แม นี. โอว ดี วี ฮาว ปอ โปละ, แตห โอว นับ โยว เฌาพรา ดี ตัห กาตูณ โอว. แคะ ปี กาลาง อัน ดี โอว, โอว ดี วี กาลาง ดี แม คูนดีคัม.” แฮะ ฮอต ปาย ตี อาบาลาอัม บอ โฮะ แดง นอน จา อาดา อู โปละ.
4เฌาพรา บอ กาตูณ อัน. อัน บอ กาลาง ดี เฌาพรา ต็อห, “โอว แฮะ โบง กาโช็ง หลู บู โบ็ง. โอว แฮะ ดึห บอ มามัก บอ มาบู อู โมยว อู โดว, หลู แดง กาโช็ง ตี ดอน โบ็ง.”
5เฌาพรา บอ แตห อัน นับ โฆรห ปี โลว กาลาง อัน ดี อาบาลาก. แฮะ ฮอต, เฌาพรา ต็อห, “แตห แม วี โลง โดง กอย คูนดีคัม อาบาลาก, แตห แม กาลาง ปี จัร โอว ดี แม นี.”
6อัน บอ วี โลง, บอ ยึร คูนดีคัม อาบาลาก ซี จ็อง โคบ กาโช็ง หลู อัน. บอ เฆ ดา ตาง แคง มืง โมวอาบ ตึอน แฮะ กอย ดี ตี.
7อาบาลาอัม บอ กาลาง โฆรห แปะ แฮะ กาลาง เฌาพรา ดี อัน. อัน ต็อห, “คูนดีคัม อาบาลาก แฮะ แดะ โอว ตัห ดี มืง อาราม. คูนดีคัม อี อึบ มืง โมวอาบ แฮะ แดะ โอว ตัห ดี นอน อี กอย นา เลห ซีแง. อัน แฮะ ต็อห, ‘ตัห ดืง ดูอี อาโมยว อายาโกบ อาดา โอว. ตัห กาลาง โฆรห อี แนนัะ เฆ ดูอี อีซาเรลัะ.’
8โอว ยี ตู ปึอน ดี ดืง ดี เอห ดูอี ปี ตู ดืง ตู เอห เฌาพรา. โอว ตู ปึอน แนนัะ ดูอี ปี ตู แนนัะ เฌาพรา.
9โอว แฮะ กอย กาแดะ นอน ดาอาง เนณ, โอว แฮะ ยึร เฆ. โอว แฮะ กอย แดง นอน, วี ยอด เฆ. เฆ มูห ดูอี อี กอย ราง เฆ. เฆ มืร ตู กอย กาซู กาวัร โดบ ดูอี อาโมยว เฮา.
10ครึร เฆ ดูอี อีซาเรลัะ ตี, เฆ แฮะ กืน กอ แหนน กาปูห. เซ เบ ปี บอ กาย็อห เฆ แบน พวน บูน, อู บูน มืร, เบ ตู แป ดี ตีห. โอว หมาณ, แตห โอว ยัม ปี ดูอี เฆ ตี. แตห โอว ปึอน ดี ยัม ดาคึย, ยัม ซีคยา ปี ดูอี เฆ อี มึห น็อห ซืร น็อห หมาน ตี.”
11คูนดีคัม อาบาลาก วี ต็อห ดี อาบาลาอัม, “มาเซ อึณ มูห ปี โบง แม ดี โอว? โอว แฮะ แดะ ตัห แม ต็อห, แตห แม ดืง รันซู โอว. มาแล, แคะ ปี ต็อห แม ดอน โมยว, แฮะ วี มูห โตต โฆรห ม็องการา.”
12อัน วี ต็อห, “โอว แฮะ ฮอต กาลาง ดี แม, โอว ปึอน กาลาง มี ปี จัร เฌาพรา โอว กาลาง.”
13คูนดีคัม อาบาลาก ปี วี ต็อห ดี อาบาลาอัม, “ตัห แม ฮาว โดบ โอว, แตห อาย ฮาว ปอ โปละ, แตห แม ปึอน ยึร โดง คยัะ เฆ ดูอี อีซาเรลัะ ปอ บลาก, ยี ตู ปึอน ยึร โตต. แตห แม ดืง เฆ ดี ตี อาดา โอว.” 14ฆาย บอ กาโดบ ฮาว ดี ฆลัง อี จืร จอพีม อี กอย แดง นอน ปีซากา. ดี ตี อาบาลาก ปี วี โบง กาโช็ง หลู ปอ บู โบ็ง. อัน บอ ดึห มามัก อู โดว บอ มาบู อู โดว, หลู แดง กาโช็ง ดอน โบ็ง.
15อาบาลาอัม วี กาลาง ดี คูนดีคัม อาบาลาก ต็อห, “แตห แม จ็อง โคบ กาโช็ง หลู นี. โอว ดี ฮาว, แตห โอว กาตูณ เฌาพรา เหน ดี เนณ.”
16เฌาพรา บอ กาตูณ อาบาลาอัม บอ แตห อัน นับ โฆรห ปี โลว อัน กาลาง ดี อาบาลาก. แฮะ ฮอต, อัน ต็อห, “แตห แม วี ฮาว โดง กอย คูนดีคัม อาบาลาก, แตห แม กาลาง แคะ ปี บยัะ โอว ดี แม.”
17อัน บอ วี ฮาว โดง กอย คูนดีคัม อาบาลาก ตึอน. อัน บอ ยึร คูนดีคัม ยี ซี จ็อง โคบ กาโช็ง หลู อัน, บอ เฆ ดา ตาง แคง มืง โมวอาบ ตึอน ซี กอย ดี ตี. อาบาลาก วี ดีหมอด อัน ต็อห, “มาเซ ปี ต็อห เฌาพรา ดี แม?”
18อาบาลาอัม บอ กาลาง โฆรห แปะ แฮะ กาลาง เฌาพรา ดี อัน. อัน ต็อห, “อึย อาบาลาก อี มูห ฆอน อาจีพอ, แตห แม โทม โฆรห โอว.
19เฌาพรา ตู ปี ดูอี อี นับ ดี กาลาง โฆรห กาโลว. อัน เฌา ตู มูห อาโมยว ดูอี อี กาปลูะ น็อห, อี บยอง น็อห. แคะ ปี กาแซณ อัน เฌา ดี โบง, อัน ดี โบง. แคะ ปี กาลาง อัน เฌา, อัน ดี โบง แตห อึณ กอ ฮอต โตต ดอน โมยว.
20โอว แฮะ คัม โฆรห ม็องการา โกบ แฮะ ม็องการา ดัว อัน เฌา. โอว มืร ตู ปึอน ปยาต ปี ม็องการา ดัว อัน เฌา ตี.
21โอว ตู ปึอน ยึร ดูก มาเซ อี ตัห ฌัม กาแต เฆ ดูอี อาโกบ. โอว ตู ยึร มาเซ อี ดี หณาบ กาแต เฆ ดูอี อีซาเรลัะ. เฌาพรา ปี กรึบ เฆ, อัน แฮะ กอย รึม โดบ เฆ. เฆ บอ กาลาง โฆรห ตาง ต็อห, ‘อัน เฌา มูห คูนดีคัม อี อึบ เฆ.’
22เฌาพรา แฮะ แยต เลห เฆ แคง มืง แอฆึบ. อัน เฌา บอ จอย เฆ กาโฆห. เฆ แฮะ มึห แฮณ ปี มัก แปร อี แฮณ กาเซา.
23อาว มึห อางยาน เฆ กาทา มาเซ. บอ อาว มึห อาดาด มาเซ อี ซี ดี แป เฆ ดูอี อีซาเรลัะ. ดูอี บอ กาดาย ดี บอ กาลาง ลอง เฆ ดูอี อีซาเรลัะ ต็อห, ‘ยอด อี หมึอม แปะ แฮะ โบง เฌาพรา ดี เฆ.’
24ดูอี อีซาเรลัะ เฆ นี, เฆ ดี ปี มาครังซี อี แฮณ กาเซา. อัน ดี ยีต จ็อง บอ บยัะ โดว อัน ดี อี เฮา. เซ อัน หณัม ฮอต โฮม ยัง โดว ปี เหมต อัน, หณัม ฮอต หณอด บอ หนาม โดว แปะ แฮะ ง็อห ยัม อัน, อัน มืร ตู วี อีด ดอ เหมา.”
25อาบาลาอัม แฮะ ฮอต กาลาง ปาย ตี คูนดีคัม อาบาลาก วี ต็อห ดี อัน, “จู แคะ ตี. อาว ฮู โลว ดืง เฆ ดูอี อีซาเรลัะ, บอ อาว ฮู โลว ม็องการา ดัว ดี เฆ.”
26อาบาลาอัม วี ต็อห, “โอว แฮะ ฮอต กาลาง ดี แม, โอว โลว โบง มี ปี จัร เฌาพรา โอว โบง.”
27คูนดีคัม อาบาลาก วี ต็อห ดี อาบาลาอัม, “ตัห โดบ โอว, โอว ดี แยต ฮาว แม ปอ โปละ, โยว เฌาพรา ปี ซอ แตห แม ดืง เฆ อาดา โอว ดี ตี.” 28ฆาย บอ กาโดบ โฮะ กาแดะ นอน เบอูรา, แตห ฆาย วี ปึอน ยอด โลง แคง แปร กาฮ็อห ตึอน.
29อาบาลาอัม วี ต็อห ดี คูนดีคัม อาบาลาก, “แตห แม โบง กาโช็ง หลู บู โบ็ง อาดา โอว. แรน ตัห บอ มัก อาโล็ง บู โดว บอ มาบู อาโล็ง บู โดว.” 30คูนดีคัม อาบาลาก บอ โบง โดบ ปี ต็อห อาบาลาอัม ตี. อาบาลาอัม บอ ดึห มามัก อู โดว มาบู อู โดว, หลู แดง กาโช็ง ตึอน ดอน โบ็ง.
Επιλέχθηκαν προς το παρόν:
แปร กาฮ็อห 23: pce
Επισημάνσεις
Αντιγραφή
Σύγκριση
Κοινοποίηση
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2021, Wycliffe Bible Translator, Inc. All rights reserved.