NINGPAWT NINGHPANG 22
22
Isak Hpe Nawng Ya Na Matu, Karai Kasang Gaw Abraham Hpe Hkang Da Ai.
1Ya aten ram ram na mat ai hpang, Karai Kasang gaw Abraham hpe chyam yu na nga shi hpe, “Abraham!,” ngu nna shaga wu ai. Abraham mung, “Rai sa, ngai nang e nga nga nngai!,” ngu nna htan wu ai.
2Karai Kasang gaw, “Nang grai tsaw ra ai na a shadang sha shingtai Isak hpe woi nna Moria ga de sa wa su. Ngai nang hpe madun na de ai bum ntsa e, shi hpe shagu hkungga shatai nna ngai hpe nawng jau e,” ngu nna tsun wu ai. #2Hl 3:1.
3Hpang jahpawt manap jau jau aten hta, shagu hkungga nat nawng na matu hpun nkau mi hpe Abraham chye ga nna, shi a lawze hta daw byau nhtawm shi hte rau Isak hte shangun ma lahkawng hpe mung woi wu ai. Karai Kasang shi hpe tsun da sai shara de shanhte pru sa mat wa ma ai. 4Masum ya sat hkawm ai hpang, Abraham gaw tsan tsan e nga ai dai shara hpe mu wu ai. 5Dai hpang Abraham gaw shangun ma yan hpe, “Nan nang e lawze hte rau nga nga mala, Ndai ma hte ngai chyawm gaw htawra de lung wa nna nawku na ga ai. Dai hpang, nan hpang de an bai nhtang yu wa na ga ai,” ngu nna tsun wu ai.
6Abraham gaw Isak hpe hkungga nat na hpun jahpai nhtawm shi hkum nan mung nhtu hte wan wut hpang na grung ai wan n-ga ni hpe lang da wu ai. Shan wa lahkawng rau sha hkawm lung wa ma yang, 7Isak mahtang, “Wa e!,” ngu nna shaga wu ai. Shi mung, “Rai sa, ngai sha e!,” ngu nna htan wu ai. Isak gaw, “Nang hta wan n-ga ni hte hpun ni nga nga ai hpe ngai mu nngai; rai ti mung hkungga nat nawng na sagu kasha kanang nga nga a ta?,” ngu nna san wu ai.
8Abraham chyawm gaw, “Karai Kasang shi nan lama ma lajang ya na ra ai,” ngu nna htan wu ai. Dai hpang shan lahkawng rau sha bai matut lung mat wa ma ai.
9Karai Kasang shi hpe tsun ai shara de shan du lung wa ai shaloi Abraham gaw tawn hkungri galaw nhtawm, de a ntsa e hpun mara garai da wu ai. Dai hpang shi a kasha hpe gyit nna tawn hkungri na hpun ntsa e shi hpe mara tawn wu ai. #Yak 2:21. 10Dai hpang Abraham gaw kasha hpe sat na matu nhtu lang da wu ai. 11Rai ti mung, dai Madu a lamu kasa gaw sumsing lamu kaw nna shi hpe, “Abraham, Abraham,” ngu nna shaga wu ai.
Shi mahtang, “Rai sa, ngai nang e nga nga nngai,” ngu nna htan wu ai.
12Lamu kasa gaw, “Dai ma hpe hkum hkra et; shi hpe hpa mung hkum di et. Na a shadang sha shingtai shi hpe jaw na nang n kanung nga nit dai majaw Karai Kasang hpe nang hkrit hkungga ai hte madat mara nga ndai hpe ya ngai chye ni ai,” ngu nna htan wu ai.
13Abraham mung grup yin de mada yu wu yang, sagu la langai mi sumwum hta shi a nrung chya nna dau nga ai hpe mu wu ai. Abraham sa nna dai hpe sa raw la nhtawm shi kasha a malai wan nat hkungga nawng ya wu ai. #Heb 11:17-19. 14Abraham mung dai shara hpe, “Dai Madu karum ai,” ngu nna shamying wu ai. Dai ni na amyu masha ni pyi,” Dai Madu a bum ntsa e, shi karum la ai,” ngu nna tsun ma ai.
15Dai Madu a lamu kasa gaw sumsing lamu kaw nna Abraham hpe lahkawng lang ngu na bai shaga nhtawm, 16“Ngai gaw nye a mying nsang hta dagam ai hte dai Madu tsun nga ai gaw, ndai amu hpe nang galaw ai hte na a shadang sha shingtai ngai hpe jaw na, nang n kanung nga nit dai majaw ngai nang hpe hkum tsup hkra shaman ya na nngai. 17Na a amyu matu ni hpe mung lamu na shagan ni shing n rai panglai zaibru ni zawn ngai nang hpe jaw na nngai. Na amyu matu ni mung shanhte a gumlau hpyen ni hpe dang kau lu na mara ai. #Heb 6:13-14. 18Nye a hkang da ai ga hpe nang madat mara nga ndai majaw na a amyu matu ni yawng hpe ngai shaman ya ni ai zawn amyu baw ni yawng mung shanhte hpe shaman ya na matu, ngai hpe san wa na mara ai. #Kas 3:25. 19Abraham mung shi a shangun ma yan hpang de bai nhtang wa nhtawm shi shanu nga ai Berasheba mare de shanhte rau wa mat wa ma ai.
Nahora A Matu Mara Ni
20Aten ram ram na ai hpang, Abraham gaw shi a kanau Nahora a matu madu jan Milhka kasha matsat shangai ya sai hpe chye da wu ai. 21-24Dai ni gaw kasha alat Uza, shi a kanau Buza, Aram a kawa Kemuela, Hkesed, Hazo, Piledasha, Yidlap, hte Rebeka a kawa Behtuela ni rai ma ai. Milhka gaw Abraham a kanau Nahora a matu ndai shadang sha matsat hpe shangai ya nu ai. Nahora a lashi num Reuma mung Teba, Gaham, Htahasha, Mahka hte hpe shangai ya wu ai.
Επιλέχθηκαν προς το παρόν:
NINGPAWT NINGHPANG 22: JCLB
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Jinghpaw Common Language Bible © Bible Society of Myanmar, 2009.