റോമക്കാറാര് 5
5
സാമ്യോഡെ റാജി കൂഡിനാദ്‌ക്കുള്ള ഗുണ
1ഏസു ക്‌റ്‌സ്‌ത്ത്‌ണ ണമ്പിനാദ്‌ണാലെ ണമ്മ സാമി മുന്തുക്ക് ണേര്‌മെക്കാറാര് ആനാമ്. അച്ചെ ണമ്മ് ആണ്ടവാ് ഏസു ക്‌റ്‌സ്‌ത്ത് ണമാക്ക് സെയ്‌ദ കാര്യണാലെ ണമ്മാമ് സാമിമ് റാജി കൂഡിര്‌ക്കാമ്. 2ക്‌റ്‌സ്‌ത്ത് ഏസോഡെ ണമ്മ ബെത്തിര്‌ക്ക ണമ്പിക്ക്യാലെ സാമി പ്‌ണ്ണ്യ സെയ്‌ദ ഈ പെ്ളേപ്പ്‌ക്ക് ണമാക്ക് എജ്ജ്യ മുഡിന്ത്‌ദ്. അച്ചെ ണമ്മ സാമിദ് മദ്‌പ്പ്‌ക്ക് പങ്ക്‌ക്കാറാര് ആയില എങ്ക ണെഞ്ചഡേന പറ്റി പെര്‌മെപഡ്‌റാമ്. 3അദ്‌താനെമല്ല ണമാക്ക് ബര കജട്ടാത്തിലി ണമ്മ പെര്‌മെപഡ്‌റാമ്. എന്ത്‌ക്കെന്റ, ണമ്മ പഡ്‌റ കജട്ടഗ ണമാണ പൊറിമെക്കാറാര് ആക്ക്‌ദ് എന്ത്‌മ്, 4ണമ്മ പൊറിമെക്കാറാര് ആഗാട്ടി സാമി മുന്തുക്ക് ണല്ല ഗുണ ഉള്ളവാര് ആരാമ് എന്ത്‌മ്, സാമി മുന്തുക്ക് ണമ്മ ണല്ല ഗുണ ഉള്ളവാര് ആഗാട്ടി ണമാക്ക് ണല്ലാദ് സെയ്‌വാ് എങ്ക ണെഞ്ചഡെ ഉള്ളവാര് ആയി ഇര്‌ക്ക്യ മുഡ്യു എന്ത്‌മ് തെരിദ്. 5ണമ്മ ണെഞ്ചഡെ ബെത്തിര്‌ക്ക ഈ കാര്യ ണഡാക്കാദെ ഇര്‌ക്കമാട്ട. എന്ത്‌ക്കെന്റ സാമി ണമാണ അളാവുക്ക് മീ്റി സീവാ് ബ്‌ഡ്‌റാ്. അദ്‌ദ് തെ്ളുവുക്ക്‌ത്തെ സാമി തന്ന് ണിഗാല്‌ണ ണമാക്ക് തന്താദ്.
6സാമിദ് ആസെപഡി ണഡാക്ക്യ മുഡ്യാദെ ണമ്മ കുറ്റകൊറെ ഉള്ളവാര് ആയിര്‌ക്കാട്ടി താനെ ണമാക്ക് ബേ്ണ്ടി സാമി സൊല്ലി ബെത്ത ഗള്യേലിതാനെ ക്‌റ്‌സ്‌ത്ത് സത്താ്. 7ഒരു ണേര്‌മെക്കാറാന്‌ക്ക് ബേ്ണ്ടി ആരാറ്റ് സാരാദ് സുരുക്കാത്തെ. ആന ഉവഗാര സെയ്‌രവാന്‌ക്ക് ബേ്ണ്ടി ഒരു ബേ്ള്യെ ആരാറ്റ് സായ ഒരുങ്കിനാല് ഒരുങ്കുവാര്. 8ആന ണമ്മ പാവഗ സെയ്‌രവാരായിര്‌ക്കാട്ടി താനെ ക്‌റ്‌സ്‌ത്ത് ണമാക്ക് ബേ്ണ്ടി സത്താ്. അച്ചെ സാമിക്ക് ണമ്മോഡിര്‌ക്ക സീവാന ണമാക്ക് കാട്ടി തന്താ്.
9ക്‌റ്‌സ്‌ത്ത് ണമാക്ക് ബേ്ണ്ടി സൂസിന സോരെണാലെ ണമ്മ സാമിദ് മുന്തുക്ക് ണേര്‌മെക്കാറാര് ആനാമ്. അച്ചെ ണേര്‌മെക്കാറാര് ആന പ്‌റ സാമിക്ക് കോവ ബന്ത് ദണ്ടിക്ക ണാള് ക്‌റ്‌സ്‌ത്ത് ണമാണ ഒറേപ്പായിമ് ദെങ്ക്‌സുവാ്. 10ണമ്മ സാമിക്ക് പോട്ടിക്കാറാര് ആയിര്‌ക്കാട്ടി താനെ സാമി തന്ന് മഗാന സായ ബെത്താ്. അദ്‌ണാലെ ണമ്മാമ് സാമിമ് റാജി കൂഡിനാമ്. അച്ചെ സാമ്യോഡെ റാജി കൂഡിന പ്‌റ ണമ്മ ക്‌റ്‌സ്‌ത്ത്‌ക്കിര്‌ക്ക ഉജുറാലെ ദെങ്കി കഡാക്കാദ് എത്തറ ഒറേപ്പുള്ള കാര്യ. 11അദ്‌താനെമല്ല ണമ്മ ഇപ്പ് സാമിന പറ്റി പെര്‌മെപഡ്‌റാമ് എന്ത്‌ക്കെന്റ സാമി ണമ്മ് ആണ്ടവാനാന ഏസു ക്‌റ്‌സ്‌ത്ത്‌ണ ബെത്ത് ണമാണ തന്നോഡെ റാജി കൂഡിസിനാ്.
ആദാമ്‌മ് ക്‌റ്‌സ്‌ത്ത്‌മ്
12ഒരുത്താ് സെയ്‌ദ പാവണാലെത്തെ ഉലഗാക്കെ പാവ ബന്താദ്. അവാ് പാവ സെയ്‌ദണാലെ ഉലഗാക്ക് സാവുമ് ബന്ത്‌ദ്. അദ്‌ണാലെ മുച്ചുഡ മന്‌സാര്‌മ് പാവ സെയ്‌ദ് സാര ഗെദി ബന്ത്‌ദ്. 13മോസെ ബെത്ത സാമി സട്ട കെ്ഡേക്കാത്ത മുദതാനെ ഉലഗാത്തില്യ മന്‌സാര് പാവ സെയ്‌ദിര്‌ന്താര്. ആന സട്ട ഇല്ലാത്താദ്‌ണാലെ അവാര് സെയ്‌ദ പാവഗണ കണാക്ക് ബെക്കാലെ. 14ആന ആദാമ് പെ്ളേത്തിര്‌ന്ത കാലാത്തിലിര്‌ന്ത് മോസെ പെ്ളേത്തിര്‌ന്ത കാലമാട്ട് പെ്ളേത്തിര്‌ന്ത മന്‌സാര്‌ഗാക്ക്‌മ് സാവു ബന്ത്‌ദ്. ആദാമ് സട്ടപഡി ണഡാക്കാദെ പാവ സെയ്‌ദ പാസെ പാവ സെയ്യാത്തവാര്‌ക്ക്‌മ് സാവു ബന്ത്‌ദ്. ബര്യ ഇര്‌ന്ത ക്‌റ്‌സ്‌ത്ത്‌ദ് ഉരുവ ആയിര്‌ന്ത്‌ദ് ആദാമ്.
15ആന ആദാമ് സെയ്‌ദ പാവാദ് കാര്യാമ് സാമി ക്‌റ്‌സ്‌ത്ത്‌ണ ബെത്ത് പ്‌ണ്ണ്യ സെയ്‌ദ കാര്യാമ് ഒരേപാസെ അല്ല. ആദാമ് എങ്ക ഒരുത്താ് സെയ്‌ദ പാവണാലെ എത്തിന്യൊ ആള്‌ഗ സത്താര്. ആന ഏസു ക്‌റ്‌സ്‌ത്ത് എങ്ക ഒരു മന്‌സാ് സെയ്‌ദ പ്‌ണ്ണ്യണാലെ എത്തിന്യൊ ആള്‌ഗാക്ക് സാമിദ് ദാനാക്ക് എജ്ജ്യ മുഡിന്ത്‌ദ്. അയ്യി സാമി പ്‌ണ്ണ്യ എത്തറാഗൊ ബെല്ല്യാദ്‌ത്തെ. 16ഒരുത്താ് പാവ സെയ്‌ദാദ്‌ണാലെ ബന്ത ഗെദിമ് സാമിദ് ദാനാമ് ഒരേപാസെ അല്ല. ഒരുത്താ് പാവ സെയ്‌ദാദ്‌ണാലെ ദണ്ടണെ കെ്ഡേക്കാദ്‌ക്കുള്ള ബിദി ബന്ത്‌ദ്. ആന സാമിദ് ദാന എത്തിന്യൊ ആള്‌ഗാദ് പാവണ തീത്ത് ണേര്‌മെക്കാറാര് ആക്ക്യ ബെക്ക ബിദി ബന്ത്‌ദ്. 17ഒരുത്താ് പാവ സെയ്‌ദണാലെ മുച്ചുഡ മന്‌സാര്‌മ് സാവുക്ക് ആളാനാര്. ആന അളാവുക്ക് മീ്റിന സാമി പ്‌ണ്ണ്യ കെ്ഡേത്തവാര്‌മ് സാമി പാവണ കണക്കാക്കാദെ ണേര്‌മെക്കാറാര് ആക്കിന ആള്‌ഗാമ് ആനവാര് ഏസു ക്‌റ്‌സ്‌ത്ത് എങ്ക ഒരുത്തനാലെ എപ്പേക്ക്‌മ് പെ്ളേക്കുവാര്.
18അച്ചെ ഒരു തപ്പ് സെയ്‌ദാദ്‌ണാലെ മുച്ചുഡ മന്‌സാര്‌ക്ക്‌മ് ദണ്ടണെ കെ്ഡേക്കാദ്‌ക്കുള്ള ബിദി ബന്ത പാസെ ഒരുത്താ് സെയ്‌ദ ണേര്‌മെ ആന കാര്യണാലെ മുച്ചുഡ മന്‌സാര്‌ണാ‌മ് ണേര്‌മെക്കാറാരാക്കി ഉജുറുണ കെ്ഡേക്ക്യ ബെത്ത്‌ദ്. 19ഒരുത്താ് സാമി സൊല്ലുപഡി ണഡാക്കാത്താദ്‌ണാലെ എത്തിന്യൊ ആള്‌ഗ പാവ സെയ്‌രവാര് ആന പാസെ ഒരുത്താ് സാമി സൊല്ലുപഡി ണഡാക്കവാ് ആനാദ്‌ണാലെ എത്തിന്യൊ ആള്‌ഗ ണേര്‌മെക്കാറാര് ആവാര്.
20മോസെ ബെത്ത സാമി സട്ട ബന്താദോഡെ സാമി സട്ടപഡിക്ക് ണഡാക്കാദെ സെയ്‌ര കാര്യഗാമ് പെര്‌ഗിറ്റ്. ആന പാവ സെയ്‌ര കാര്യഗ പെര്‌ഗി ഗൂഡി സാമി മന്‌സാര്‌ക്ക് സേത്തി സേത്തി പ്‌ണ്ണ്യ സെയ്‌ദാ്. 21പാവ ണമാണ സാവുക്ക് ആളാക്കി ണഡാത്തിന പാസെ സാമിദ് പ്‌ണ്ണ്യാമ് ണമ്മ് ആണ്ടവാ് ഏസു ക്‌റ്‌സ്‌ത്താലെ ണേര്‌മെക്കാറാര് ആക്കി എപ്പേക്ക്‌മ് ഇര്‌ക്ക പെ്ളേപ്പ് കെ്ഡേക്ക്യ ബേ്ണ്ടി ണഡാത്ത്‌ദ്.
Επιλέχθηκαν προς το παρόν:
റോമക്കാറാര് 5: സാമിദ് സേദി
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
New Life Literature