1 കൊരിന്തിയിര് 16
16
തെയ്‌വനമ്പ്കാറ്ക്കൊള്ള പിര്‌വ്
1എര്ശലേമിലൊള്ള തെയ്‌വനമ്പ്കാറ്ക്കൊള്ള പിര്വ്നപ്പെറ്റി ഇന്നിയും നിങ്ങ എന്നോട കേട്ടത്ക്ക് നാന് തിരിച്ച് പേശട്ടൻ, കെലാത്തിയിലൊള്ള പള്ളിക്കാറ കൂട്ടങ്ങളോട നാന് പേശീത് പേലതിന്ന നിങ്ങയും ചെയ്യണം. 2ഒക്ക നാറായിച്ചിയും നിങ്ങ്ക്കൊള്ളത്‌ന്റ ഒര പങ്ക് പേണിവെക്കണം; ആണ ചെയ്ഞ്ഞെ നാന് വന്ത്കെയിഞ്ഞ് ഒര പിര്‌വ് പിരിപ്പാല. 3നാന് വന്ത്കെയിഞ്ഞ് എര്ശലേമ്കാറ്ക്ക് നിങ്ങ പേണിവെച്ച ഉറവായ് എട്ത്ത് പോവാനിക്കി നിങ്ങ തേടിയെടത്ത ആള്കള കെയ്യീല് നാന് എയ്‌ത്ത്‌ കൊട്ത്ത് വിട്‌വിൻ. 4നാനും പോന്റത് നെല്ലതിന്റ് എക്കും തോന്നിയേ അവങ്ങയം എന്റ കൂട്ടത്ത് വെര്ട്ട്.
പവ്‌ലോശ് പോന്റ താവ്കള്
5നാന് മക്കതോനിയ വെയിക്കാണും വെര്‌വാനിരക്കന്റത്; അത്കൊണ്ട് നാന് അവട പീയ്‌ക്കെയിഞ്ഞ് നിങ്ങളാട്ടക്കി വെര്‌വിൻ. 6ചെലപ്പ് കൊറച്ച് കാലം നാന് നിങ്ങള കൂട്ടത്ത് കുടിയിര്പ്പിൻ; ചെലപ്പ് നരങ്ക് കാലം കെയ്യിന്റത് വെരയം. ആണയിന്റെ എക്ക് വേറ താവ്ക്ക് പോവാനിക്കൊള്ള ഒതവി നിങ്ങ്ക്ക് ചെയ്ഞ്ഞ് തെര്‌വാനിക്കി പെറ്റും. 7പിടിയിന്റ് വന്ത് പോവാനിക്കില്ല ഇപ്പൻ നാന് ആശിക്കിന്റത്; കർത്താവ്ക്ക് ഇട്ടമിന്റെ ഇത്ത്റിക്കാലം നിങ്ങള കൂട്ടത്ത് കുടിയിരപ്പാനിക്കി നാന് ആശിക്കിന്റൻ. 8ഇന്റെ പെന്തക്കോശ് ഉലശവം വെരയം നാന് ഇവട എപശോശില് തിന്ന കുടിയിര്പ്പിൻ. 9ഒരിന്ന ശത്ത്റ്ക്കാറ് ഇവട ഒണ്ടങ്കിലും തെയ്‌വവേലക്കി ഒതവിയാകന്റ ഒര വെലിയ തക്കം എക്ക് ഇവട കിട്ടീത്. 10തിമ്ത്തിയോശ് വന്തെ അവൻ നിങ്ങള കൂട്ടത്ത് പേടിയില്ലാണ്ടി കുടിയിരപ്പാനിക്കി നിങ്ങ പാക്കണം; അവനം എന്നപ്പേല കർത്താവ്ന്റ വേല ചെയ്യന്റാനില്ലോ. 11അവന ഒരത്തനം കെയ്യേപ്പാനിക്കി മെടിക്കേറ്; അവന നിമ്മ്തിയോട എന്നാട്ടക്കി തില്‌പ്പി വിടണം; അവൻ വേറ നമ്പ്കാറ കൂട്ടത്ത് എന്നാട്ടക്കി വെര്മിന്റ് നാന് കാത്തിരക്കന്റൻ.
12നമ്മള നമ്പ്കാറനാഞ്ഞ തമ്പി അപ്പല്ലോശ്‌ന്റ കാരിയം നാന് ഇന്നി പേശട്ടൻ, അവൻ നമ്പ്കാറാഞ്ഞ തമ്പിമാരപിറ്റ നിങ്ങള താവ്ക്ക് വെര്‌വാനിക്കി നാന് അവനോട കെഞ്ചിപ്പേശിയിൻ. ഇന്റെ ഇപ്പൻ വെര്‌വാനിക്കി അവന്ക്ക് ഒട്ടും ഇട്ടം ഇല്ലാഞ്ഞ്ത്; ഇന്റാലും തക്കം കിട്ട്വ്നിക്കി അവൻ നിങ്ങളാട്ടക്കി വെരും.
13നെല്ല പാത്തിരവൻ, നമ്പീല് ഒറച്ച്നെവൻ; തക്‌രിയം കാട്ടൻ, ശക്ക്തിപ്പെടൻ. 14നിങ്ങ ചെയ്യന്റതൊക്ക ശ്‌നേകത്തീല് ചെയ്യൻ.
15-16അകായി ഇന്റ് പേശന്റ താവീല് ആത്തിയമാഞ്ഞ് തെയ്‌വത്ത്ന നമ്പിയ ആള്കള് തെപാനോശ്‌ന്റ കുട്മ്പക്കാറാണ്‌മിന്റ് നിങ്ങ്ക്ക് തിക്കൊണ്ടില്ലോ? നമ്പ്കാറ പെര്കാരിപ്പാനിക്കി അവങ്ങ അവങ്ങളത്തിന്ന ഏപ്പിച്ചിരക്കന്റാര്; ആണയൊള്ള ആള്കള്ക്കും തെയ്‌വവേലയില് പങ്ക്കൂടി വേലയെടക്കന്റ കൂട്ടറ്ക്കും താന്നിരക്കണം ഇന്റ് നാന് നിങ്ങ്ക്ക് പുത്തിപേശന്റൻ. 17തെപാനോശും പൊറ്ത്ത്നാത്തോശും അകായിക്കോശും വന്തതീല് നാന് കൂയ് എടക്കന്റൻ; എന്തനിന്റെ നിങ്ങയില്ലാത്തത്‌ന്റ കൊറവ് അവങ്ങ നെകത്തിയിരക്കന്റാര്. 18അവങ്ങ എക്കും നിങ്ങ്ക്കും ഒതവിയാഞ്ഞ്ത്; ഈണയൊള്ള ആള്കള നിങ്ങ മാനിക്കിണം.
കടശിപ്പേശത്ത്
19ഏശിയ താവീലൊള്ള പള്ളിക്കാറ കൂട്ടങ്ങള് നിങ്ങള കേട്ടാര്; അക്കില്ലാവും പ്റ്ശ്ക്കില്ലയും അവങ്ങള വീട്ടീല് വെന്റ ഏശുവീല് നമ്പ്ന്റ ഒക്കളം കർത്താവ്ന്റ പേരില് നിങ്ങള കേട്ടാര്. 20ഏശുവീല് നമ്പന്റ ഒക്ക ആള്കളും നിങ്ങള കേട്ടാര്; നിങ്ങ തമ്മ്ളിത്തമ്മ്ളി ശ്‌നേകത്തീല് വണക്കം പേശൻ. 21പവ്‌ലോശ് ഇന്റ് പേശന്റ നാന് തിന്ന എന്റ കെയ്‌കൊണ്ട് നിങ്ങ്ക്ക് വണക്കം എയ്‌തന്റൻ. 22കർത്താവ്ന ശ്‌നേകിക്കാത്ത ഏവനം ശാപ്പ്ത്തി കിട്ടീവൻ; കർത്താവേ, പിടിയിന്റ് വെരണമേ. 23കർത്താവാഞ്ഞ ഏശുകിര്ശ്തുവ്ന്റ കിറ്പ നിങ്ങള കൂട്ടത്ത് ഒണ്ടാകട്ടെ. 24നിങ്ങ്ക്ക് ഒക്കളക്കും കിര്ശ്തുഏശുവീല് എന്റ ശ്‌നേകം ഒണ്ടാകട്ടെ. ആമേൻ.
Επιλέχθηκαν προς το παρόν:
1 കൊരിന്തിയിര് 16: മുതുവാൻ
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© New Life Literature