जकर्याह 8
8
यरूशलेमो रे दुबारा बनाणे री प्रतिज्ञा
1तेबे सेना रे यहोवे रा ये वचन मांगे पऊँचेया, 2“सेना रा यहोवा ईंयाँ बोलोआ: आऊँ यरूशलेमो रे लोका साथे बऊत प्यार करूँआ, आऊँ सिय्योनो रे लोका ते इतणा प्यार करूँआ कि आऊँ तिना रे दुश्मणा ते रोषे आ।” 3परमेशर ईंयाँ बोलोआ, “आऊँ सिय्योनो ते वापस आई रा ओर मां यरूशलेमो दे वास करना फेर लोका यरूशलेमो खे सच्चाईया रा शईर बोलेया जाणा ओर सेना रे यहोवे रा पाह्ड़, पवित्र पाह्ड़ बोलेया जाणा।” 4सेना रा यहोवा ईंयाँ बोलोआ, “स्याणे ओर स्याणियां फेर यरूशलेमो रिया सड़का दे बैठणे, ओर सेयो आपणे-आपणे आथो दे सोठी लई की ऊणे, कऊँकि सेयो जादा उम्रा रे ऊईगे दे ए। 5ओर शईरो रे खुले मैदान खेलणे वाल़े-पाऊ-मुन्निया साथे परे दे रणे।” 6सेना रा यहोवा ईंयाँ बोलोआ, “बाबेलो री गुलामिया ते वापस आए दे लोका खे इना आऊणे वाल़ी कटणा पाँदे परोसा करना मुश्किल लगी सकोआ। पर क्या यो कटणा मेरिया तँईं इतणी मुश्किला वाल़ी ऊणिया कि तिना खे पूरा नि करी सकूँ? ना। एड़ा नि ऊणा! सेना रे यहोवे री येई बाणी ए।” 7सेना रा यहोवा ईंयाँ बोलोआ, “देखो, मां तिना रा उद्धार करी की सेयो पूर्ब ओर पच्छमा रे देशा ते कट्ठे करने। 8मां सेयो ल्याई की यरूशलेम शईरो बीचे बसाणे ओर सेयो मेरी प्रजा ठईरने ओर आऊँ तिना रा परोसे वाल़ा ओर तर्मी परमेशर ठईरना, ये तो सच्चाई ओर तर्मो साथे ऊणा।”
9सेना रा यहोवा आपणे लोका ते ईंयाँ बोलोआ, “एबे तुसे इना वचना खे सुणो, आपणे आथ मजबूत करो ताकि तुसे मेरे मन्दरो खे फेर बणाई सको। ये गल्ल हाग्गै ओर जकर्याह भविष्यबक्तेया बी बोली थी। जेबे मेरे मन्दरो रा काम फेर शुरू ऊआ, तेबे तिने तुसा खे बोली थी। 10तेस बखतो ते पईले, माणूंआ डांगरा रे जरीये कित्ते दे कामा खे देणे खे पैसा नि था। कोई बी माणूं सलामत नि था कऊँकि मैं सबी माणूंआ खे एकी-दूजे पाँदे गुस्सा दलाया था। 11पर मां एबे एसा प्रजा रे बचे रे लोका साथे एड़ा बर्ताओ नि करना जेड़ा कि पईले करुँ था, सेना रे यहोवे री येई बाणी ए। 12कऊँकि तेती शान्तिया रे बिऊ बाये जाणे। अंगूरा री बेला फैलणियां, जमीना आपणा नज्ज जमाणा, ओर सर्गो ते तेल़ पड़नी। ओर मां एसा प्रजा रे बचे दे लोका खे ये सब चीजा देणियां। 13यहूदा ओर इस्राएलो रे लोको, सबी देशा रे लोके तुसा रे नाओं ते स्राप देणा शुरू करिता दा ए। पर एबे ये तेड़ा नि ए। डरो नि एबे मां तुसा खे आशीष देणी ओर तुसे बचाणे।”
14कऊँकि सेना रा यहोवा ईंयाँ बोलोआ, “जिंयाँ तुसा रे बुजुर्ग माखे रोष चढ़ाओ थे, तेबे मैं तिना रा नुकशाण करने री ठाणी लई थी ओर तेबे पछताया नि। 15तिंयाँ ई मैं इना दिना दे यरूशलेम शईर ओर यहूदा प्रदेशो रे ओरी शईरा रे लोका री पलायी करने री ठाणी ली री, इजी री खातर तुसे नि डरो। 16जो-जो काम तुसा खे करने चाईयो, सेयो यो ए: एकी-दूजे साथे सच्च बोलेया करना, तुसा रे न्यायिया खे सई ओर बिना भेदभावो ते फैंसला करना चाईयो। 17आपणे-आपणे मनो दे एकी-दूजे री बुराईया रे बारे दे नि सोचणा। जेबे तुसे सच्च बोलणे रा वादा करोए तो चूठ नि बोलणा। कऊँकि माखे इना सबी कामा ते नफरत ए, परमेशरो री येई बाणी ए।” 18तेबे सेना रे यहोवे रा ये वचन मांगे पऊँचेया, 19“सेना रा यहोवा ईंयाँ बोलोआ, चौथे, पाँजुए, सातुए ओर दसुए मीन्ने दे, जो-जो बअरतो रे दिन ओए, सेयो यहूदा प्रदेशो रे कराने खे खुशी, आनन्द ओर त्योआरो रे ओर पर्वो रे दिन ऊई जाणे, इजी री खातर तुसे एबे सच्चाई ओर शान्तिया ते प्यार करो।”
20सेना रा यहोवा ईंयाँ बोलोआ, “एड़ा बखत आऊणे वाल़ा ए कि ओरी देशा रे लोक ओर बऊत शईरा रे रणे वाल़े आऊणे।” 21तेबे एकी शईरो रे रणे वाल़ेया लोका, दूजे शईरो रे रणे वाल़ेया गे जाई की तिना गे बोलणा, आओ, आसे छोड़ करी की यरूशलेम शईरो खे चलूँए ओर यहोवे ते दया रिया तँईं बिनती करूँए। 22ओर बऊत सारे देशा रे लोक ओर सामर्थी जातिया यरूशलेम शईरो दे सेना रे यहोवे खे टोल़ने ओर यहोवे ते दया खे बिनती करने आऊणे। 23सेना रा यहोवा ईंयाँ बोलोआ: तिना दिना दे कई प्रकारा री पाषा बोलणे वाल़े दस लोक आऊणे, एक यहूदी मर्दो रे टाल्ले रा कनारा ये बोली की पकड़ी लणा ओर बोलणा, “आसे तां साथे यरूशलेम शईरो खे चलणा चाऊँए। आसे सुणी राखेया कि परमेशर तां साथे ए।”
Επιλέχθηκαν προς το παρόν:
जकर्याह 8: BGH
Επισημάνσεις
Αντιγραφή
Σύγκριση
Κοινοποίηση
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
This work is licensed under Creative Commons Attribution-ShareAlike 4.0 License.