मत्ती 6
6
दान
1“खबरदार हुई जवा! परमेशर चाँह, तिन्हां खरयां कम्मां रा लोकां रे सामणे दिखावा मता करदे नईतां तुहें अपणे पिता ते, सै जे स्वर्गा चा, तिसरा किछ बी ईनाम नीं पाई सकगे।”
2“इस खातर खबरदार ताहली जे तुहें किसी गरीबा जो दान दें, तां इसरा किसी माहणुये जो पता नीं चलो, तियां जे यहूदी सभा घरा च, कने गलियां च कपटी लोक होरीं ते प्रशंसा पाणे रे खातर कराँ ये। हऊँ तुहांजो सच्च बोलां भई तिन्हांजो लोकां ते इसरा पूरा ईनाम प्रशंसा ही मिलया। 3पर ताहली जे तू गरीब माहणुये जो किछ देआं तां किसी जो बी इसा गल्ला रा पता नीं लगो भई तैं क्या दित्या। 4ताकि तेरा दान छुपीरा रौ, इसरा ये नतीजा हुया भई जो किछ तू छुपीने कराँ तिस्सो प्रभु अहांरा पिता बी देक्खां, तिस तिज्जो इसरा ईनाम देणा।”
प्राथना री खासियत
(लूका 11:2-4)
5“ताहली जे तुहें प्राथना करो तां कपटियां साई मत करा, काँह्भई सै यहूदी सभा घराँ च कने सड़कां रे मोड़ां पर खड़ीने प्राथना करना चाँये ताकि लोक तिन्हांजो देखीने तिन्हांरी बडयाई करी सक्को। हऊँ तुहांजो सच्च बोलां भई तिन्हांजो इसरा ईनाम सैई बडयाई मिली। 6पर ताहली जे तू प्राथना करो, तां अपणे कमरे च जा; कने दरवाजा बन्द करीने अपणे पिता ने सै जे गुप्त जगह चा प्राथना कर; फेरी तेरा पिता सै जे सब किछ यनि गुप्त च कित्तिरी प्राथना जो बी देक्खां, तिज्जो तिसरा ईनाम देंगा। 7प्राथना करदे बगत तुहें अधर्मियां साई इयां इ बेमतलब गल्लां जो बार-बार मत दोहरान्दे रौआ, काँह्भई सै ये सोच्चां ये भई तिन्हारे जादा बोलणे ते तिन्हारी सुणी जाणी। 8इस खातर तुहें तिन्हां साई नीं बणा, काँह्भई तुहांरा पिता तुहांरे मंगणे ते पैहले इ जाणाँ भई तुहांरी जरूरत क्या इ।”
9“तुहें इस तरिके ने प्राथना करया करा :
“ ‘हे अहांरे पिता, तू स्वर्गा च बिराजमान आ;
लोक तेरा आदर करो काँह्भई तू पवित्र परमेशर आ।
10तू संसारा रे सारे माहणुआं कने सारियां चिज़ां पर राज करो।
तेरी इच्छा तियां जे स्वर्गा च पूरी हुआं इ, तियां इ धरतिया पर बी पूरी ओ
11हर रोज की रोटी तू हर रोज अहांजो दे।
12कने जियां जे किन्हिये अहांरे बरोधा च पाप कित्या तिन्हांजो अहें माफ कराँ ये,
तियां इ तू बी अहांरे पापां जो माफ कर।
13कने अहांजो परीक्षा च नीं पा, पर शैतान्ना ते बचा;
[काँह्भई राज कने सामर्थ कने महिमा सदा खातर तेरे इ हाये। आमीन।]’ ”
14“इस खातर जे तुहें लोकां रे पाप माफ करगे, तां तुहांरा पिता सै जे स्वर्गा चा तुहांरयां पापां जो बी माफ करगा। 15कने जे तुहें लोकां रे पाप नीं माफ करगे, तां तुहांरे पिता बी तुहांरे पाप माफ नीं करने।”
उपवास
16“ताहली जे तुहें उपवास करो, तां तुहांरे मुँह कपटियां साई उदास नीं हुणे चाहिन्दे, काँह्भई सै अपणा मुँह बणाईने रखां ये, ताकि सै लोकां जो जतलाई सक्को भई अहें उपवास करी रायें। हऊँ तुहांजो सच्च बोलां भई सै अपणा ईनाम पाई बैट्ठे। 17पर ताहली जे तू उपवास रखो तां अपणे सिरा पर तेल मल़ कने मुँह धो, 18ताकि लोक ये नीं जाणे भई तू उपवास करीराँ, पर तेरा पिता तिस्सो जे तू देखी नीं सकदा, सै देक्खो भई तैं उपवास कित्तिरा। फेरी तेरा पिता सै जे तेरे छिपिने कित्तिरे सारयां कम्मां जो देक्खां, तिज्जो तिसरा ईनाम देंगा।”
परमेशर धन-दौलता ते बड्डा
(लूका 12:33-34)
19“अपणे खातर धरतिया पर भण्डार मत भरा, काँह्भई तिस कीड़ा कने जंग लगीने खराब हुई जाणा, चोर सेन्ध मारीने तिस्सो चुराई सक्कां ये। 20जे तुहें खरे काम्म करगे तां सै स्वर्गा च धन कट्ठा करने साई हूणा, तित्थी नांत कीड़ा, कने न जंग खराब करी पान्दे, कने तित्थी चोर न सेंध लगान्दे कने न चोरी पान्दे। 21काँह्भई तित्थीजे तेरा धन आ, ऊत्थी तेरा मन बी लगीरा रैहणा।”
शरीरा री लोय
(लूका 11:34-36)
22“तुहांरियां आक्खीं तुहांरे शरीरा खातर दिऊए साई आं: काँह्भई ये तुहांजो हर चीज़ देखणे च काविल बणां इयां, (जे ये स्वास्थ ईं कने देक्खी सक्कां इयां) जे तू चिज़ां जो तियां देक्खी सक्कां तियां जे परमेशर देक्खां, तां तुहांरे सारे शरीरा बी ठीक ढंगा ने काम्म करना। 23पर जे तू लगातार बुराई करदा रैहन्गा, तां इक दिन येढ़ा औणा ध्याड़ी जे तू अन्हे हुई जाणा; इस खातर तिसजो जे तू ज्योति समझां सै हकीकत च अन्धकार आ, अन्धकारा च रैहणा त बुरा, पर अन्धकारा च रैईने ये सोचणा भई हऊँ ज्योतिया चा सै होर बी जादा बुरा!”
परमेशर कने धन
(लूका 16:13; 12:22-31)
24“कोई बी माहणु इक वगता च दुईं स्वामियां री सेवा नीं करी सकदा, काँह्भई जे कोई येढ़ा कराँ तां तिस इक्की ने नफरत करनी कने दुज्जे ने प्यार, या इक्की रे परति बफादार रैहणा कने दुज्जे रा निरादर करना। तुहें धन कने परमेशर दुईं री इक साथ सेवा नीं करी सकदे। 25इस खातर हऊँ तुहांजो बोलां, भई अपणे जीवना रे खातर ये फिक्र नीं करयां भई अहें क्या खांगे कने क्या पींगे, कने शरीरा रे खातर भई क्या पैन्हगे, क्या जिन्दगी रोटिया ते, कने शरीर कपड़यां ते बधीने निआं? 26अम्बरा रे पंछियां जो देक्खा! सै न बिजाई कराँ ये, न कटाई कराँ ये, न भण्डार भराँ ये; तां बी तुहांरा स्वर्गीय पिता तिन्हांरा तिन्हांजो ख्वां। क्या तुहें तिन्हांते जादा मुल नीं रखदे? 27तुहां चाते क्या कोई येढ़ा हाया सै जे चिन्ता करीने अपणियां जिन्दगिया च इक मिनट बी होर बधाई सक्कां?”
28“कने कपड़यां रे खातर फिक्र कजो कराँ ये? जंगली फुलां पर बचार करा, भई सै कियां बधां यें, सै न मेहणत कराँ ये, न कपड़े बुणां ये; 29तां बी हऊँ तुहांजो बोलां, भई राजा सुलैमान बी अपणे सारे राज-पाठा च, तिन्हां चते किसी इक्की फूल्ला साई सुन्दर कपड़े नीं पैहनी सक्कया। 30इस खातर ताहली जे परमेशर जंगली पौध्यां जो, सै जे आज्ज ये, कने कल अग्गी च पाई दित्ते जाणे, येढ़ि सुन्दरता देआं, तां अरे भाईयो तुहांरा विश्वास इतणा कमजोर काँह, तुहांजो सै काँह नीं पैहनांगा?”
31“इस खातर तुहें चिन्ता करीने ये नीं बोलणा, भई ‘अहें क्या खांगे, या क्या पींगे, या क्या पैहनगे?’ 32इस खातर चिन्ता नीं करा काँह्भई होरीं जातियां रे लोक इन्हां सारियां चिज़ां रिया खोज्जा च रैं, कने तुहांरा स्वर्गीय पिता जाणाँ, भई तुहांजो ये सारियां चिज़ां चाहिन्दियां। 33इस खातर तुहें परमेशरा रे राज्जा कने सच्चाईया ने जीणे जो तियां जे परमेशर चाँह सब्बीं ते पैहला दर्जा देआ, तां ये सारी चिज़ां तुहांजो मिली जाणियां। 34इस खातर कल की चिन्ता मता करदे, काँह्भई कल की त अहां रियां होर चिन्ता हुणियां; आज्ज के दिना खातर अजकी परेशानियां इ बौहत इयां।”
Επιλέχθηκαν προς το παρόν:
मत्ती 6: KFSNT
Επισημάνσεις
Κοινοποίηση
Σύγκριση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
This work is licensed under Creative Commons Attribution-ShareAlike 4.0 License.