Khuurakikha 46
46
Yakobo ni be muungo batsya i Misiri
1Yakobo waabuusilisa bibiindu byeewe byoosi byeesi aaba nabyo, waatsya woola i Berisheba. Nga woolele ibweene iyo, wawaanayo tsisaayilo isi Wele mweene isi paapa weewe Isaaka esaayatsaka. 2Mu shilo sheene isho, Wele waamubonekhela mu khubonekhelwa, waamulaanga lisiina ari, “Yakobo! Yakobo!”
Yakobo naye waafukila ari, “Iseese niyooyu.”
3Wele waamulomela ari, “Ise ndi Wele, Wele isi paapa woowo esaayatsaka. Ukharya khuutsya i Misiri ta. Ibweene iyo, ikhabalaayise lisaaye lyoowo, likyele linaambo liboofu naabi. 4Ise kane intsye i Misiri atweela ni nawe, ne mbuka ikhoole, ikhaakobose babetsukhulu boowo khu liswa lino. Yozefu umweene akhaabewo nga utsya khufwa, akhumine tsimoni tsoowo.”
5Lwanyuma Yakobo waarakikha lukyeendo lweewe khukhwaama i Berisheba. Basooleli beewe baamusuta niye, ni babaana baabwe bakyeekhe, atweela ni baakyelama baabwe mu bikaari byeesi Faraawo aarumanisa khuubayila i Misiri. 6#Bur 7.15Baatsya ni bibyaayo byaabwe, atweela ni bye buyiindifu byaabwe byoosi byeesi baafuna nga bali i Kanaani. Aryo Yakobo waatsya ni lisaaye lyeewe lyoosi, 7nga mulimo basooleli beewe, babetsukhulu beewe, bakhaana beewe, ni babetsukhulu beewe bakhaana.
8Ari kano niko kamasiina ke babaandu babaaba be muungo mwa Yakobo, babaatsya ni naye i Misiri. Mu bano mwabamwo Rewubeni, umusooleli weewe umukhulu. 9Basooleli ba Rewubeni baaba nibo: Hanoki, Palu, Hezuroni, ni Karimi. 10Basooleli ba Simeoni baaba nibo: Yemuweli, Yamini, Ohadi, Yakini, Zohari, ni Shaulu uwaba umusooleli uw'omukhasi umu Kanaani. 11Basooleli ba Levi baaba nibo: Gerishoni, Kohasi, ni Merari. 12Basooleli ba Yuda baaba nibo: Eri, Onani, Shela, Perezi, ni Zera. (Ne shonyene ndi Eri ni Onani baafwa nga bali mu shibala sha Kanaani.) Basooleli ba Perezi baaba nibo Hezironi ni Hamulu. 13Basooleli ba Isakaari baaba nibo: Tola, Puwa, Yashubu, ni Shimuroni. 14Basooleli ba Zebuluni baaba nibo: Seredi, Eloni ni Yahileeli. 15Bano nibo basooleli beesi Leya aasaala ni Yakobo nga bashiili i Padani Aramu, nga mulimo n'umukhaana Dina. Lisaaye lyeewe mu mukhasi Leya, atweela boola babaandu kamakhumi kasesaba na bataru (63).
16Basooleli ba Gadi baaba nibo bano: Zefoni, Hagi, Eziboni, Eri, Arodi, ni Areli. 17Basooleli ba Asheri ni bano: Imuna, Ishiva, Ishivi, Beriya, atweela n'umukooko waabwe Sera. Beriya naye aasaala basooleli bano: Heberi ni Malukiyeli. 18Bano boosi baaba lisaaye lya Yakobo mu mukhasi Zilupa, nga niye umukhaana umukulwa isi Labani aawa Leya khuuba umwakaanisi weewe.
19Umukhasi Rakeli aasaalila Yakobo basooleli babili, nga nibo bano: Yozefu ni Benyamini. 20#Rak 41.50-52Mu shibala she Misiri, Yozefu aasaala basooleli babili nga nibo: Manase ni Efurayimu, nga abasaala mu mukhasi Asenasi, uwaba umukhaana wa Potifera, umusaayi we Heliyopolisi. 21Nabo basooleli ba Benyamini baaba nibo bano: Bela, Bekeri, Ashibeli, Gera, Naamani, Ehi, Roshi, Mupimu, Hupimu, ni Aridi. 22Bano baaba likhumi na bane nga nibo lisaaye lyeesi Yakobo aafuna mu mukhasi Rakeli.
23Dani aaba n'umusooleli weewe Hushimu. 24Basooleli ba Nafutali baaba nibo bano: Yahizeli, Guni, Yezeri, ni Shilemu. 25Bano baaba musaafu, nga nibo lisaaye lyeesi Yakobo aafuna mu mukhasi Bila, nga umukhaana umukulwa isi Labani aawa umukhaana weewe Rakeli, khuuba umwakaanisi weewe.
26Babaandu boosi atweela babaaba lisaaye lya Yakobo lilyeene babaatsya i Misiri, baaba kamakhumi kasesaba na basesaba (66), nga waakhurakho bakhasi be basooleli beewe ta. 27#Bur 7.14Babaana ba Yozefu babili baasaalikhila mu Misiri. Nga waatubaasilekho babeene abo, atweela lisaaye lya Yakobo lyoosi boola babaandu kamakhumi musaafu (70).
Yozefu abona khu paapa weewe luundi
28Lwanyuma Yakobo waarumana iburaangisi weewe Yuda khuutsya isi Yozefu, atsye amuloombe abaakanane i Gosheni. Nabo ni boola i Gosheni, 29Yozefu waaŋoonaŋoona likaari lyeewe khuutsya i Gosheni, akaanane ni paapa weewe Yakobo. Baryo nga baakanaane, Yozefu waakwa paapa weewe mu shifuba, waalila kamasika khuumala imbuka ndeeyikho. 30Lwanyuma Yakobo waalomela Yozefu ari, “Ari inyala naafwa na khufwa! Lwekhuuba ari naakhuboonekho, naamanyile ndi uli umulamu.”
31Lwanyuma lwa bino byoosi, Yozefu waalomela babaandaaye, atweela ni baalebe be muungo mwa paapa weewe ari, “Ari naakha khuutsya imboolele Faraawo ndi babaandaayase, ni baalebe be mu ntsu ya paapa wase boosi, abe babaamenya mu Kanaani, ari beetsile. 32Ise kane imuboolele ndi, inywe muli babaayi be kamasheese ni tsimbusi, ate muli ni bibyaayo bibiindi. Imuboolele indi, mweetsile ni nabyo byoosi, nga mulimo kamasheese ni tsimbusi, ni tsikhaafu, ni bibyaayo bibiindi. 33Nashiryo nga Faraawo waabalaangile, ne waabareeba ari, ‘Kumulimo kweenywe mulimo shiina?’ 34Inywe mumwiilamwo muri, ‘Ifwe khuli babaayi be bibyaayo, buulamu bweefwe bwoosi, nga baakuuka beefwe ni baakholatsaka.’ Ni lwe lomo iyo, kane abafukiilise inywe khuumenya i Gosheni.” Yozefu aaloma shino lwekhuuba abe ba Misiri si bakana baaba babesanwa be babaandu babaali babaayi be kamasheese ta.
Επιλέχθηκαν προς το παρόν:
Khuurakikha 46: LCE
Επισημάνσεις
Αντιγραφή
Σύγκριση
Κοινοποίηση
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Lumasaaba Catholic Bible © The Bible Society of Uganda, 2017.