Daniel 3
3
Camarnu sequesacari na shipinitishano casaa cuaara maniniuhuaqueetasaaria juhua Pueyasojua
1Tamacari, Nabucodonosorri orojiniji shipinitiquiaari casaa juhua pueyano niquishanojua. Treinta metro quijiaari na jiyaconaja. Na queraquiiri tres metro quijia saniniuujia. Nabucodonosorri nera poonijionaa sequequiaari cuno casaa cuaara nujuatesaaria Babilonia jiyajinia, Dura jiyanishano jamatujinia. 2Cuno casaa shipinishaanu nuhuaji, Nabucodonosorri puetunu nio pojori masuunujutequiaari: puetunu nera jiyaca jiitianaa jiyaniijianucua, puetunu na soldadohua jiyaniijianucua, nera jiitianaa shiirijiaa tiacacajinijinio jiyaniijianucua, naajuhuaj, nera nacasunaa pueya, puetunu nera cumaneeca cojuanaa jiyaniijianucuajuhuaj; nio pojorijuhuaj: nujuatejosocoriquiano pueya nequesoreenaa, tamaquiicua camarucuarano jiya jiyaniijia jiyatesano pueyanio, puetunu tiquiyocua jiyacajinijinio jiyaniijianucuajaajanio. Nabucodonosorri naa puetunu nio taucuacajanaa masuunujutequiaari nojori maniniuhuaqueetatunura juhua Pueyasojua na shipinitishano casaa. 3Puetunu tii quiniaajanaari cuno orojiniji shipinishano tacoji rerejoquiaari na maniniuhuaqueetanura cuno casaa. 4Noo pueyano teyonutucuaja pueya numooteriquiano seeratasaaquiaarini, nojuajaari na rupaa paaretaquiaari puetunu tii quiniaajanaa tojitianura. Naa nacareeri:
—Puetunu tiacacajinijinio pueyanaa, puetunu jiyacajinijiniojuhuaj, puetunu tamaatia rupaaca pocuajaca pueyajanaanio, nia tojiri. 5Niaa jaara tojiri trompeta jonenenu, naajua jonenenu, ciitara taquinionu, lira taquinionu, salterio taquinionu, gaita jonenenunio, puetunu niajaniyajanaacua jiyacari mojoquetacore nia maniniuhuaqueetanura orojiniji shipinishano casaa, teyonu camarnu Nabucodonosor jeecaterucuaacuajani. 6Niya quiniaa pueyajinijinio jaara mojoquetaconu paniyaquiri na maniniuhuaqueetanura nio shipinishano casaa, cuno pojoriiri quiarijiaja quejoosocoriquiano nojoriicuajinio riuriotaca noshiyano mani quiquiojinia.
7Naacuatej, puetunu tii quiniaa pueyajanaa jaara tojiquiaari jonenenuusano casaa, taquinionuusano casaajuhuaj, puetunujuanaari cuno orojiniji shipinishano casaacuara mojoquetacoquiaari na maniniuhuaqueetatunura.
8Jiyacaritij, noojiaqueya Caldeo jiyanishano taucuacajinijinioori cuarta jiuujianraca Judiiocuaca mashiquioriicuara saquiriojotaquiaari. Naa saquiriojotatuquiaari camarnu Nabucodonosorri: 9—Canaa camarnunaa, pueyaracaanu quia rishitiriquianij. Quia sesa cuaara pueyaracaanu niishishaariquia. 10Canaa camarnunaa, quiaacuajaari puetunu niya quiniaajanaa numooteteree nojori jaara tojiri jonenenuusano casaa, taquinionuusano casaajuhuaj, puetunujuanaa cuaara mojoquetacoora na maniniuhuaqueetanura orojiniji shipinishano casaa. 11Quiaari tari maatia sequereejuhuaj, naa quia sequesano miyaquijiaca saniniunijia, nojori cuaara mani quiquiojinia quejoosaaria. 12Noo Judiiocuaca saniniuujia, nojoriiri Babilonia jiyajinia jiyaniijianucuara quia jiyatesanotej, nojoriiri quia rerequeteya. Majaari quenaaja na maniniuhuaqueetatunu quiquiaa pa pueyasohuara quia jeecojotesano casami. Majaari quenaaja quiarijia na mojoquetaconu na maniniuhuaqueetanura orojiniji quia jeecatesano quia nujuatesano casaajuhuaj. Cuno pojoricuajaari Sadrac, Mesac, Abed-negoonio.
13Jiyacaritij, Nabucodonosorri jiyanohua juaarii. Na juaaniutia sequereeri cuno Judiiocuaca cuaara nocua nitiasaaria. Tii quiniaari ritia Nabucodonosorcua jiyataquiaari Sadrac, Mesac, Abed-negoo. 14Jiyacari naa nojori nequesotareeri:
—¿Niaatena saa rejeteyajaa cua sequesanote? ¿Majatena nia maniniuhuaqueetanu quiquiaa cua pueyasohuate? Naajuhuaj, ¿majatena orojiniji cua jeecatesano casaacuara nia mojoquetaconu quiriijuhuaj? 15¿Niaatee cua sequesano miiniutianiya, maja soj? Quiarijianij, niaa jaara tojiri shanohua jonenenuunu, shanohua taquinionuununio, ¿niaatucua cua jeecatesano casaacuara jacamature nia maniniuhuaqueetanura cuno casaa? Niaa jaara quiarijia nocuara jacamatuyaquiri na maniniuhuaqueetanura, niaari naacua mani quiquiojinia quejoosaanutaniyaquij. ¿Teyano cumaacaraca quijiatucua saa supueyariquiohua saajaniuhuaj, niaacuaji na tacunurani?
16Jiyacaritij, cuarta jiuujianraca mashiquioriiri naa sequeturee Nabucodonosortej:
—Canaatucua casaara sanaa quia tojitiareni. 17Quiarijia canaa quia tojiri. Cuno, canaa Pueyasojuanaa cutarani, canaari nojuajanaa tojiquiaani. Nojuajanaari canaa cojuanutaniya quiaa jaara canaa quejootere mani quiquiojinia. Camarnunaa, nojuajaari puetunu sesa canaa quia miiniu panishanojinijijanaa canaa cojuanutaniyacuaja. 18Nojuaja jaara canaa cojuaaquiri, naajaa. Canaari seetanujuanaa quia sequeyani canaa camarnunaa, maja canaa maniniuhuaqueetanu quiniutianiya cuno, quia pueyasohuara quia jiyatesanoni. Majaari canaa mojoquetaconu quiniutianiya orojiniji quia jeecatesano casaacuarajuhuaj.
Pueyaso tojijiaca mashiquiori tohuatasacari tequeyaquishoo manijiniji
19Naa Nabucodonosor tojishacari cuarta jiuujianraca Judiiocuaca mashiquiori sequesanotej, naataniquiacara quiquiiri jiyanohua na juaaniutia. Jiyacari na pueya na mani quiquio cojuanaa sequereeri cuno mani quiquio cuaara jiyanohua nasanajosaaria socua siete caminiujiushano noshiritianu socua, jiyanohua naseecara. 20Nabucodonosorri jiyacari socua jiyanohua cumueeca na soldadohuajinijinio sequeree na morojotunura Sadrac, Mesac, Abed-negoonio. Naa na morojosaanu nuhuajitij, cuaara noshiyano mani quiquiojinia quejoosaaria. 21Jiyacaritij, cuarta mashiquioriiri na maniniuquiya na cushiyoqueyataja jiyaniijianucua toqueyataja morojosaaree. Na nuhuaji cuno noshiyano mani quiquiojinia quejoosaareeri. 22Camarnu Nabucodonosor sequenuucua na sequesano cuaara ritia nera miishaaria, naajuhuaj, mani quiniuucua jiyanohua naseeca, maniiri mashiquiori quejoyano soldadohua cusojuanuuquiaari ritia. 23Cuarta mashiquioriiri morojonucuacaja noshiyano manijiniacuma totetaquiaari.
24Nabucodonosorri jiyacari ritia sanequiaari. Na naacuriquiano jiyaniijianucuarano na jiyatesano pueya sequeree na jiuujiatenutaari:
—¿Majatee jiuujianraca pueya quejoosaanu quiriicuaja cuno noshiyano manijiniani?
Nojoriiri naa na riucuatureequij:
—Taaquiriirinij, naacuaaquiniatejaj.
25Camarnuuri socua sequeree:
—Janiya manijiniacuma niquiya caqueetaca pueya rucoojiyanoni. Tariucua saacarejenoori juhuajaniya rucoojiya. Niquiriyatu nojorijinijinioori juhua Pueyaso seru niquishiya.
26Naa na sequenu nuhuajitij, Nabucodonosorjanaari cuno mani quiquio rupaa casaqueyaji cateconuquiaari. Naa nacareeri:
—¡Sadac, Mesac, Abed-negoonio! ¡Niaaqui jiyocuacaanu quijia Pueyaso seyacuaja! ¡Miji, nia tohuareetamohua!
Jiyacaritij cuarta jiuujianraca mashiquioriiri tohuareetamohua. 27Cuno jiyacajinijinio tii quianaa jiyaniijianucuaari mashiquioriicua cateconuquiaari nojori shootianura catecaji. Mashiquiori cuaqueyari maja quenaaja na tequenu quirii. Nojori muecacaari maja quenaaja mayojua naata na jaanunu quiriquiaajuhuaj. Nojori toqueyari na quiniutia quiriquiaajaa, maja quenaaja rerequetuqueya. Cuno mashiquioriiri tojetaarucuajanaa maja quenaaja mani naata na jaanunu quiriquiaa.
28Jiyacaritij, Nabucodonosorri naa sequereequij:
—Sadac, Mesac, Abed-negoo Pueyaso cuaara pueyaracaanu timitiasano quiiria. Nojuacuajaari na seru jiyaroree nio nocua tiuujiaca pueya na cojuanura. Nojoricuajaari cua sequesano miyaquirii na pueretunuucua nojori Pueyaso. Nojoriiri tama na cuaqueyajaaja panitiaree cutara na puecoosaanura. Nojoricuajaari niishiriquiaa, majaari maninia nojori mojoquetaconura nojori timitianura nojori niishishoo pueyasohua, jaara nojori Pueyasojuanaa quiyaquiri. 29Majaari jiyano cojuaja Pueyaso quiniu socuatej. Naacuatej, janiyari quiarijia puetunu pueyajanaa equeyani, quiarijiani, cante nio mashiquiori Pueyasoocuara rimiaaqueyani, nojori cuaara tojetaarucuajanaa rapitiasaaria. Nojori tiaca cuaara tojetaarucuajanaa niyarequetasaariajuhuaj. Naajaa, jaara quiri tamonu jiyacajiniji, tamaquiicuaji tahue, tamaatia rupaaca pocuajaca soj, nojoriiri mosaariquiano naa na rimiaaquenuucua.
30Cuno nuhuaji, Nabucodonosorri cuarta jiuujianraca mashiquiori jiyatequiaari jiyajeneta poonijiosano miijiaca nojori quiniuria nera cuno na Babilonia jiyajiniani. Nojoriiri naacua socua tojishano pueya quijia.
Zur Zeit ausgewählt:
Daniel 3: arl
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 1986, 2008, Wycliffe Bible Translators, Inc. All rights reserved.
