ROM 7

नियमशास्त्रकेल मुक्त

1हे आक्का तम्मुळ्ळालाला, (नियमशास्त्र यवारकी यरका उंडाद वारकी निन शपतुनान) मनशी याड नंताक जित्ता उंडाड आड नंताक वान मिंदा नियमशास्त्रद अधिकार उंडाद इदी मिक यरका लेद येम? 2उदाहरणार्थ यादाना आंडीदानकी मोगुड उंडाड, इंगा दान मोगुड जित्ता उंडाड आड नंताक आदी नियमशास्त्र लेका दान मोगुन जताक कट्टीनेद उंडाद; पण दान मोगुड सच्ची फोयते, तर आदी मोगुन नियम लोन्केल मोकळा आयताद. 3दिनिचांग मोगुड जित्ता उंडीनाप्पुड, जर आदी इंगोगो मनशी जताक संबंध फेटताद तर दानकी व्यभिचारीनी इदी फेर शिक्की. पण दान मोगुड सच्ची फोयते तर आदी आ नियम लोन्केल मोकळा आयताद. मंग आदी इंगोगो मनशीद जरी आयते तर दान व्यभिचारी आनाक फोयार. 4इंगा दिनिचांग, हे ना आक्का तम्मुळ्ळालाला, यप्पुड मीर ख्रिस्तन जताक सच्ची फोयतीर, तर नियमशास्त्र अधिकार इचांग सच्ची फोयतीर; इप्पुड मीर ख्रिस्तन उंडार, यवाड सच्चीनोर लोन्केल लेशीनाड; दिनिचांग की परमेश्वर इचांग फळवंत जीवन जगायाला. 5येनटीक की यप्पुड मनाम पापी स्वभाव नियंत्रणला उंटीम तर मना फयला पापी इच्छाल फनी शेयदु, इंगा नियमशास्त्र आ इच्छालनी लेप्या, याय मनालनी साव तीकुड येका फोयतुन्या. 6पण मनाम यवान बंधनला उंटीम वान इचांग सच्चीगास इप्पुड नियमशास्त्रकेल मोकळा आयनाम, आदी दिनिचांग की, मनाम कोत्ता आत्माता सेवा शेयाला, शास्त्रलेखलोन जुनापनता लेद.

नियमशास्त्र इंगा पाप

7मंग येम आनाला? नियमशास्त्र पाप उंडाद येम? अजिबात लेद. पण नाक नियमशास्त्रता पापदी ओळख आयताद, येनटीक की 'लालच शेयाक' इल्ला नियमशास्त्र शेप्पीनशे नाक लालच तेल्वाद.#निर्गम 20:17. 8पण पाप आज्ञा सुशी ना लोना आन्नी प्रकारी लालचलु उत्पन्न शेशा येनटीक की नियमशास्त्र इडशी पाप निर्जीव उंड्या. 9येनटीक की निन वगादम नियमशास्त्र इडशी जगायदुन, पण यप्पुड आज्ञा वच्या आप्पुड पाप सजीव आय्या इंगा निन सच्ची फोयतीन. 10इंगा जीवन इचांग इच्चीनेद आज्ञा सावकी कारण आय्या, इदी नाक कमशा. 11पण पाप आज्ञाता संधी सुशी नन्नु फसाय मत्या इंगा दानिचांग निन सच्ची फोयतीन. 12आंका नियमशास्त्र पवित्र उंडाद, आल्ले आज्ञा पवित्र, न्याय इंगा शिंगार उंडाद. 13तर आदी नियमशास्त्र याद शिंगार उंड्या, ना इचांग सावदी कारण आय्या येम? अजिबात लेद! पण पाप इदी आ शिंगार माटा तीकेल ना इचांग सावकी कारण आय्या, दिनिचांग की आदी पाप उंडाद इदी प्रकट कावाला, आंका ना लोना, आदी साव इदी परिणाम घडामतुताद; आंटे पाप इदी आज्ञा इचांग शेंगेम पापिष्ट आय्या.

मनशीद शारीरिक इंगा आत्मिक लढाई

14येनटीक की मनाक इदी यरका उंडाद की, नियमशास्त्र इदी आत्मिक उंडाद, पण निन शारीरिक उंडान; इंगा पाप नोकर उंडान. 15येनटीक की निन येम शेस्तुनान आदी नाक तेल्वाद; येनटीक की निन येमटीद इच्छा शेस्तान आदी निन शेयान पण निन येमटीद कोफाम शेस्तान आदी निन शेस्तान.#रोम 7:22-23; गलती 5:17; याकोब 4:1. 16मंग निन येनटीद इच्छा शेयान आदी वाईट फनुल जर निन शेस्तान, तर नियमशास्त्र शिंगार उंडाद इदी निन स्वीकार शेस्तान. 17दिनिचांग इ वाईट फनुल निन शेयान पण ना लोना निलचेद पाप शेस्ताद. 18येनटीक की नाक यरका उंडाद की, ना लोना, आंटे ना पापी स्वभावला येमीच शिंगार निलवाद येनटीक की शिंगार फनुल शेशेद नाद इच्छा तर उंडाद, पण शिंगार फनुल ना शेयता काव. 19येनटीक की निन येम शिंगार फनुल शेशेद इच्छा शेस्तान आय निन शेयान, पण या वाईट फनुलान नाक शेशेद इच्छा लेकुंटाद आय्ये शेस्तान. 20मंग इप्पुड निन येमटीद इच्छा शेयान आदी जर निन शेस्तान, तर निन आदी शेयाकुंडा ना लोना निलचेद पाप आदी शेस्ताद.

21नाक जीवनला इदी नियम कमस्ताद, की यप्पुड निन शिंगार शेशेद प्रयत्न शेस्तान, तर ना शेयता वाईटे शेस्काडतान. 22येनटीक की ना लोनुडदी आत्मा परमेश्वर नियमता खुश आयताद; 23पण नाक ना फय अवयवलाला इंगोगोट इल्ला नियम कमस्ताद; याद ना मनलोन नियम जताक लढाशी, नन्नु ना फय अवयवला उंडीने पाप नियमदी दास शेस्ताद. 24निन यंता दुर्भाग्यवान मनशी उंडान! नन्नु इ नाश आय्ये शरीर लोन्केल यवाड इडपीच्ची?#रोम 8:1-2; गलती 2:20; फिलिपी 3:21. 25परमेश्वरकी धन्यवाद इस्तान यवाड मना प्रभु येशु ख्रिस्तन तीकेल मनालनी स्वतंत्र शेस्ताड. दिनिचांग की निन बुद्धीता तर परमेश्वर नियमकी दास उंडान पण शरीरता पाप नियमकी दास उंडान.

Zur Zeit ausgewählt:

ROM 7: WNT

Markierung

Kopieren

Vergleichen