संत.लुकास 16

चरपट भंडारी

1तेकर ईसु चेला ताय के कंहड़ीओ लिकुआय, “मियांड गीरहत होड़ आली भंडारी ताहिनाय, तेकर नुई गोमके आला जामा खरचा के छितीर-बितीर दाय मेन केते होड़कु हुनी तेङ रे दोस कु लगाव लआ, 2तेकर हुनी, ‘गीरहत भंडारी के राअः केते आम बारे एतानिंग आयुम दा? आम आला भंडारी काम रेनअः लेखा एमाईङ मे आम नहाअः दो भंडारी एरोम ताही दड़ीआ’ बेता लियाय। 3हुनी भंडारी एतानिंग एतानेआ मेन केते आएंग मन रे उयहारे केनाय, ‘नहाअः दो गोमके तिंग भंडारी काम के ईङ तरअः रेःग दाय। हास ला दो काईङ दाड़ीआ? हेतरअ भीख कोय रेदो लाजोईङ। 4हाँ, भंडारी काम तरअः उड़ूंगियाय! दो ईङ के होड़कु, आकु आला ओड़ाअ रे रागीङा कु लःअय एतानिंग एतानेआ सेके उईहार किदिंग।’

5“तेकर हुनी गोमके ताय आला रिंड़ जोम लिनकु के मि-मिहोंड़ के राअः लिकुआय। हेतरअ सुरू रिनी के, ‘आम गोमके तिंग तरअः उकिन केन रींड़ तनाम?’ मेन केते कुली लियाय। 6हुनी, ‘साव टिङ सुनूम’ बेता लियाय। तेकर हुनी भंडारी ‘बाही-खाता के ने हेतरअ दुड़ूः केते पचास टिङ लिखा गुल तामे’ बेता लियाय। 7तेकर एटाःई के, ‘आम उकिन केन रिंड़ तनाम?’ बेता लियाय ‘हुनी मि साव मन गोहोम’ मेन लःअय। तेकर भंडारी हुनी के ‘बाही-खाता के ने’ हेतरअ ‘आस्सी लिखा गुल तामे’ बेता लियाय। 8बेलुरा भंडारी चलांक से कामी तदाय के गोमके ताय हुनी के तरीफ लियाय; नोःआँ जुग रिनकु होड़ बेवहार रे परमेसर आलकु होड़ तरअः जादे चरपट एदान कुआ।”

9ईङ कंहड़ीओ दिपीईङ, “आपे अधरम रेनअः धन रे गाती पे बनाव जुनोः, होना चबा जुनोआ, हिमीन रे हुंकू आपे के का-अन्तोः ताहीनोः ठाँव रे ईदी पेकु। 10जामा तरअः थोड़हे बात रे ईमान एदानिया हुनी बगरा रे होः ईमानदार एदानिया; तेकर जे जामा तरअः थोड़हे रे बयमान एदानिया हुनी बगरा रे होः बयमानाय। 11हिना लःअय, जब आपे, नोःआँ अधरम रेनअः धन रे बिसवास कापे ताहीनोः, रेदो सचा धन ओके एमा केपे आय? 12आपे एटाअ होड़ आला खरचा रे ईमानदार कनेपेआ, दो आपे के अपन खुद आला धन ओके एमा केपेआय।

13 # सं.मत्‍ती 6:24 “जाहें धाँगड़ बरिया गोमके के मिसा तेरे एरे सेवा दड़ीआ, हुनी मियांड लोः खीस कोआय; तेकर मियांड लोः दुलार कोआय, चाहे मिहोंड़ लोः मिलाव ताही कोआय एटाअ लोः घींड़ कोआय। निआँ लकान आपे परमेसर हेतरअ खरचा बनार के एरपे सेवा दड़ीआ।”

ईसु आला एटाअ-एटाअ उपदेस

(संत.मत्‍ती 11:12–13; 5:31–32; संत.मरकुस 10:11–12)

14तेकर थोड़ेक फरीसी जे लोभी ताही नेनाकु, जामा कंहड़ी आयुम केते, ईसु के लन्दाउई केनाकु 15तेकर हुनी हुंकू के कंहड़ीओ लिकुआय, “आपे दो होड़कु मड़ांग रे धरमी पे उदूगोः ताना, बकिर परमेसर आपे आला मन के पाड़ी आय। जे जिनीस होड़ आला देखार रे महान एदनाआ, होना परमेसर आला देखार रे घींड़ा।

16 # सं.मत्‍ती 11:12,13 “मुसा आला कनहुन तेकर आगमजानीकु, तरअः लिखा लअः बात रआ परचार जोहन बतिस्मा एमोई जगुत लिखा लअकु; बकिर जोहन बेरा तरअः ईदी केते परमेसर आला राईज रेनअः बेस खभाईर रआ परचार हुयाव दराआ, आउर जामेकु परमेसर आला राईज रे बोलोयोः लःअय मुरुक जोर तदाकु। 17#सं.मत्‍ती 5:18सिरमा हेतरअ ओत टलाव सकाअ, बकिर परमेसर आला कनहुन मियांड-मिन होः एरे टगआ।

18 # सं.मत्‍ती 5:32; 1 कुरि 7:10,11 “जाहें होः अपन आउराईत के बाई केते एटाअ लोः बिहायोआय; दो हुनी ब्यबिचारेआय तेकर जे बाई लिनी आउराईत लोः बिहायोआय हुनी होः ब्यबिचारेआय।

गीरहत होड़ हेतरअ राङगेगी लाजरुस

19“मियांड गीरहत होड़ ताहिनाय, हुनी जरलया घतीक गेन्दरअ सोलोंगे केनाय तेकर रोज सुख-सुख हेतरअ पुरा ठाठमाठ रे ताहीनोः केनाय। 20हेतरअ लाजरुस नुमू रिनी मियांड रांगेःग होड़ ताहिनाय, नुई घाव पेरेःग उनी ताहिनाय, तेकर हुनी के गीरहत आला दुवार दुबाःड़े बाईःग तुई केनाकु 21तेकर नुई गीरहत होड़ आला सखड़ी रे आएंग आला लाहीःग पेपेरेःग नाम केनाय। हेतरअ नोःआँ जगुत ची सेताकु होः हीःग केते हुनी आला घाव के जाले केनाकु 22तेकर नुई रांगेःग होड़ गोएःग नाय हेतरअ सिरमादूतकु हुनी के ईदी केते अब्राहम आला कोयोङ रे सोदोर लियाकु, हेतरअ हुनी गीरहत होड़ होः गोएःग नेनाय तेकर तेपेःड लियाकु, 23तेकर हुनी पताल रे बिपाईत रे ताही केते साँगील लःअय, तेकर लंका तरअः, लाजरुस के अब्राहम आला कोयोङ रे नेल लियाय। 24तेकर हुनी हकाव केते, ‘ए बा अब्राहम! ईङ के दयाईङ मे हेतरअ लाजरुस के कुलगोःडिमे हुनी अंगड़ी ताय के जोबराव केते ईङ आला आलांग के ठंडायाय, एता लःअय ची ईङ दो नोःआँ धाईध रे कालपाः तानिङ’ बेता लियाय! 25बकिर अब्राहम बेता लियाय, ‘ए होपोन, उयहारे मे ची आम दो अपन जिनगी रे बेस जिनीस मे नाम चुकाव तनाम, हेतरअ हिना लकान लाजरुस काबेस जिनीस नाम चुकाव तनाय, बकिर नोःआँ उयहारे मे नहाअः दो हुनी के संतवाना भेटाअः ताना, तेकर आम कालपाः तनाम। 26नोःआँ जामा बात के बाई केते, आपे हेतरअ आले तलारे मियांड मुरुक जादे गड़हा एदनाअ, हेतरअ जे नोआँड़े तरअः होना पखी आपे दुबाःड़े सेनोः नामाकु, हुंकू सेन एरकु दड़ीआ, तेकर होना पखी तिनकु नोःआँ पखी आले दुबाःड़े हिजोअ एरकु दड़ीआ,’ बेता लियाय। 27तेकर हुनी बेता लियाय, तब दो ‘ए बाबा, लाजरुस के बाबा तिंग ओड़ाअ रे कुलगोःडिमे, निआँ ईङ आम तरअः गोहराअ तानिङ, 28एता लःअय ची ईङ आलकु पाँच गो बोको तिंग एदान कुआ, दो हुंकू दुबाःड़े सेन केते चेताव कुआय, जेकर से ची, हुंकू होः नोःआँ दुख ठाँव रे हिजोअ तरअः बंचाअ कु’ मेन लःअय। 29बकिर अब्राहम बेता लियाय, ‘मुसा हेतरअ आगमजानीकु आला पुथी हुंकू दुबाःड़े एदनाआ, हिंकु आला आयुमेकु तेकर मनाअकु।’ 30हुनी बेता लियाय, ‘कोवान, ए बाबा अब्राहम! बकिर जाहें गोएःग उनकु तरअः हुंकू दुबाःड़े सेनाकु, होले हुंकू जरूर पाप तरअः मन रूवाड़ केआकु।’ 31बकिर हुनी, ‘हुंकू मुसा हेतरअ आगमजानीकु आला कंहड़ी के काकु आयुमेआ, दो जाहें गोएःग उनकु तरअः जिवीःड बिरिःड उनकु आला होः एरकु मनाअ’ कंहड़ी रूवाड़ोः लियाय।”

Zur Zeit ausgewählt:

संत.लुकास 16: ASR

Markierung

Kopieren

Vergleichen