Kalát 2
2
Póole nɔ pɔsɔ́k petúmí mélumen ekelú
1Tuɔŋ túát ne túni mɛɛ́l tútápukan kuétúm aná imɛɛ́l yaátapan Yésus Kilíise, yaand ayɔɔk Yelúsalɛm ɔlɔŋ na Palanápas; yɔɔkɔ́l Tíite kɛ́kɛ́ɛ́yɛ́ yiipɛ nɛɛyɛ́. 2Ímayɔɔ́k ɔ́ kuɔ́pɛn Támbákɛ́ɛ umiímfuún meéne ɛ́ɛ́ yɔ́ɔ́p nuɛyɛ́ɛ; yeelumen kí insumbú no pɔkɔ́n pámaápá ɛ́ wɛɛ́tɛ Kalát, yaaman kuɔyɔn pɔ́ insɔ́m yi indámb yoólée iŋémen epé pátiánípá Pɛyúútɛn; Indimaamba ɛ́ɛ́ puólí yoólée iŋɔtɔ́ kuun ó moomb. 3Tíite, mɔnɔ́ pɛ́kɛlɛ́ɛk, umaápá naamɛ, tɛ ɛ́ɛ́ pákútɛt wɔ ɛ́ɛ́ úpíáns, 4tɛ aná pɔsɔ́k pómotí káásɔ́ ɛ́ kikɛtɛ́kɛtɛ́ɛ, maámbá ɛ́ɛ́ úpíáns. Pɔsɔ́k pakáánɛ́ timapá paandimán páásɔ́ kémuémue á kuátap, pɔ́mɔsípíɔ́sɛ́t insunse naasɔ́ ɛ́ kuɛsifɛ́ɛ́fɛ́ kiáŋa kíásɔ, kítúólinonée é Yésus Kilíis, ɛ́ɛ́ páand otúóndi ɔ́ puɔ́lí pú kikotí. 5Tutimayapɛn pɔsɔ́k pakáánɛ tɛ muɔ́nɔ́ u kiás káánɔ́ pusío ɛ́ɛ́, kémuémue u insɔ́m yi indámb lɔp yá ána unyɛɛ́. 6Á kiáyí kí pɔkɔ́n yɛɛ́l ɛ́ɛ́, epú pámaápá tipá púŋɛlɛ puandá, á kiákí ɛ́ɛ́ Támbák tipá weeye pɛɛnd, pɔ́ɔ tɛɛ́ píiŋɔ́yikinɛn puandá púlotí pú kuɛl. 7Maná kɔk, pɛ́ɛ́kɛɛ́n ɛ́ɛ́ Támbák miimfá pusɔ́m pú kuól kúɔ́yɔn pɛɛnd pátiányípá Pɛyúútɛn insɔ́m yi indámb, yá aná umaátɔ́m Píɛlɛ ó kuól kúɔ́yɔn Pɛyúútɛn insɔ́m yi indámb. 8Á kiákí ɛ́ɛ́ Támbákɛ́ɛ umiíyɔ́ɔ́n ɛ́ɛ́ ímbá etúmí u péepé pátiányípá Pɛyúútɛn, yá aná umaáyɔ́ɔ́n Píɛlɛ ɛ́ɛ́ úpá etúmí u Pɛyúútɛn. 9Sáakɛ, Píɛlɛ ni Isáaŋ, pámaápá posíósíó pɔ́ ɔlɔŋ ú péétépí pé Yésus Kilíis, pɛɛ́n ɛ́ɛ́ kémuémue Támbák miiyɔ́ɔ́n á pusɔ́m pukáánɛ́ kɛ́ɛ́yɛ́ kɔ́ ɔtɛ́m peseé; pɔ́ɔ́túkɔ́l ɔmbɔk na Palanápas naamɛ, é kutíínyi ɛ́ɛ́ tunyɛ ekelú. Tuáminɛn ɛ́ɛ́ pasɔ́ túyɔɔk ku pɛɛnd pátiányípá Pɛyúútɛn, pɔ́ɔ ku Pɛyúútɛn. 10Pɛ́ɛ́pí káásɔ́ kɔ́ɔ́m ɛ́ɛ́ tupítááka pɔsúkɔsukɔ; púúpɔ́ imɛɛ́lɛ, nɔ ɔtɛ́m wáámɛ kitikit.
Póol ɛ́ɛ́tɛmbɛlɛn Piɛlɛ
11Maná, Piɛl mɛɛ́l woólon Antíos, tuám mosió mandɛ́ nɛɛ́yɛ́, yeenuenesi wɔ́ ké eŋis ya mɔɔnd kitikit, á kiákí ɛ́ɛ́ utimɛndɛ é kémuémue u insɔ́m yi indámb. 12Anakáánɛ́ kúnyɛɛ́ ɛ́ɛ́ Sáak matɔ́m pɛɛnd ɔ́ kuɔsituwɔɔkɛn. Pɛ́mɛɛlɛ́ pámanyi pátiasíám, Piɛl mapá unyáán ɔlɔŋ na paándimán páásɔ pá kuátap pɛ́mɛɛ́l pɛtiɛlɛ́ imbíéne imbíéne si Pɛyúútɛn. Pɛɛnd Sáak maátɔ́m mɛɛlɛ́ páasiaman, Piɛlɛ waapínyáŋɛ́t, waapíátɔn pɔsɔ́k umaányáán nɔɔpɔ́ ó pusíó ɛ́ɛ́ umetine imbíéne imbíéne sí pɛyutɛn pamaápá pámanyi ɛ́ kuɛndɛ ɛ́ nuu Yúútɛnɛ. 13Paándimán páásɔ́ pólotí, imbíéne imbíéne si Pɛyúútɛn, pámaápa naasɔ́, pɔɔ́ŋ kɔ́kɔ́ɔ́p ɔ́ kikɔ́nd kí Piɛl, Palanápasɛ wɔ́ muɛ́t weepíkin kɔ́ɔ́p kɔ́ ɔlɔŋ ú pɛɛnd pɛɛndɛnɛ́ɛ ambaná yi iŋɔs. 14Imɛɛ́l yɛɛ́nɛn ɛ́ɛ́ meélíe mɔ́ɔ́p típá mélumenen ne kémuémue u Insɔ́m yi indámb, ke eŋis yɛ pɛɛnd peem yɛɛ́pi ɛ́ɛ́ Piɛl ɛ́ɛ́: «Aŋúɛ ɛnyɛɛ́ Yúútɛn, ɔmɔ́sɔ́tɔ́n akɛ ɛlɛɛ́ epé patiánipá Pɛyúútɛn; ɔtiɔ́sɔ́tɔn aná Pɛyúútɛn sɔ́tɔnɛ́ɛ, kí iŋɔ́pinɔ si pikotí pi Moyíis. Tiɛ́kiɛ́ kɔk ɛnyɛɛ́ pakukúta epé pátiányípá imbíéne imbíéne sí Pɛyúútɛn ɛ́ɛ́ pɔ́sɔ́tɔn asɛ Pɛyúútɛn?» 15Pasúɛ, tunyɛɛ́ imbíéne imbíéne sí Pɛyúútɛn! Tutipá tuólonin á punya pitɔŋɛ pilotí pitiányípá pimenyen pikotí pí Támbák. 16Tɛ nɔ, tuémenyen ɛ́ɛ́ mɔɔnd nyɛ indɛ́ndɛ́nɛ ke eŋis ya Támbák ó pipíóndínyí ɔtɛ́m píɛ́yɛ́ é Yésus Kilíis píéŋényí, kútipá ó pusíó ɛ́ɛ́ woówóónyósi pikotí pí Moyíis. Kúúkɔ́ pasɔ́ kákáásɔ́ tumaátáp Kilíise ɛ́ɛ́ túpá indɛ́ndɛ́nɛ ke eŋis ya Támbák káásɔ́ ó pipíóndínyí ɔtɛ́m é Yésus Kilíis píéŋényí, kútipá ɛ́ɛ́ tumówóónyí pikotí. Ó pusíó ɛ́ɛ́ tɛ mɔɔnd omoómí tiɛ́nyɛɛlɛ́ indɛ́ndɛ́nɛ ke eŋis ya Támbákɛ́ɛ umówóónyósí pikotí. 17Pasɔ́ tuákaamba ɛ́ɛ́, é Kilíis, Támbák túɛ́n indɛ́ndɛnɛ́. Índɛ kɔk púsiɛ́nɛk ɛ́ɛ́ pasɔ́ kákáásɔ́ tunyɛ pafalfál ɛlɛɛ́ pá kati Pɛyúútɛnɛ, anakáánɛ́ kúnyɛ kiákí é? Ɛ́ɛ́ɛ Kilíis áákaákanɛn kutáám ɛ́ kuɛlɛ pifal á? Tɛ ɛ́ɛ́! 18Púnyɛ ɛ́ɛ́, índɛ insiand kuond á kuakan pipíóndínyí ɔtɛ́m píámɛ ó pikotí yéényítúm pi kélém, iŋú muɛt imányanda opíondi kiɔ́lí kí kifal. 19Á puandá kitikit púyoosonée pikotí inyɛ ekúén, pikotí píí muɛt pinyɛɛ́ piiŋɔnɔ́n, ɛ́ɛ́ ínsɔ́tɔn ó pusíó pú Támbák. Imapá apílatá Kilíise aká pɔ́mɔɔ́tɔ́ndɔ́n wɔ́ ó kolóse, yeekú embúl nɛɛyɛ́. 20Kɔ́ɔ́k kunyɛ ɛ́ɛ́ indipa iŋɔúɛ inyɛɛ́ andíkɛ́k ɔ́ kusɔ́t, Kilíise usɔ́tɔ́nɛ́ɛ káámɛ. Ninuan, kusɔ́t kúámɛ kú mɔɔnd, yɔɔ́sɔ́tɔn ó pípíóndínyí ɔtɛ́m ɔ Muɔ́nɔ́ u Támbák, umiiŋɔyɛ́t woond weeki kusɔ́t kúɛ́yɛ́ káámɛ ó pusíó. 21Indipá iŋɔ́lɔn nupoo nú Támbák anɛ sɛ́kí sɛ́kíɛ u puandá. Índɛ kuwóónyosi pikotí kúú kuɛlɛnɛ́ɛ ɛ́ɛ́ mɔɔnd pá indɛ́ndɛ́nɛ ke eŋis ya Támbák, anakáánɛ́ kúnyɛɛ́ ɛ́ɛ́ Kilíis mekú ɛ́ɛ́ sɛ́kísɛ́k.
Zur Zeit ausgewählt:
Kalát 2: yav
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2026, CABTAL