माथ 11

जिसु आर जोहान बाबा़प्‌तिसिच्आक् सोमबात

(लु ७:१८-३५)

1जिसु आच्‌रेन गेलबार चेलाको बातलावआकोय मुचा़त्‌केत् खान, ओंडे खोने उठा़वेना ओनकोवाक् नागराहाकोरे चेत्‌आको आर पोरचाराको ला़गित्‌। 2आदो जोहान का़द ओड़ाक्‌रे मा़सियाक् का़मिको रेयाङे आँजोमकेत् खान आच्‌रेन चेलाको कोलकेत्‌कोतेये कुलिकेदेया, 3“उनि हिजुक्‌कानिच् दोम आम कानगेया, से एटागिच्‌ले ञेल होरेया?” 4जिसु दोए रोड़ रुवा़ड़ात्‌कोवा, “दो सेनकाते जोहान ला़इयायपे ओकाकोपे ञेलेत् आरपे आँजोमेत्; 5काँड़ाँ होड़को ञेञेल काना, आर लेडहा होड़को ताड़ामेदा, मुरहुच् जोम होड़को साफाक्‌ काना, आर काला होड़को आँजोमकाना, गोच् होड़को जिवेत् बेरेदोक्‌ काना, आर रेङगेच् ओरेच् ठेन भागे सोमबात ला़इयोगोक्‌ काना, 6आर भा़गान गेयाय उनि दो ओकोय इञ खा़तिरते बाय ता़किजोक्।”

7आदो ओनकोको चालावेन खान जिसु दो ओनको गादेल होड़ जोहान रेयाङ ला़इयाकोय एहोप्‌केदा, “चेत् ञेञेल हाहाङकारते दोपे ओडोक सेनलेना? होयते हिला़उक्‌कान चुछि? 8से चेत्‌ ञेञेलपे ओडोक सेनलेना? मिंहिंयाक् किचरिच् होरोक्‌ आकात् मित्‌टेन होड़? ञेलपे मिंहिंयाक्‌को होरोक्‌एत् होड़ रापाजकोवाक् ओड़ाक्‌रे मेनाक्‌कोवा। 9से चेत् ला़गित्‌पे ओडोक सेनलेना? ना़बि ञेञेल ला़गित्? हें मेतापेकानाञ ना़बि खोन हों माराङिच्‌गे। 10नुय दो उनिगे, ओने उनि रेयाङ ओल आकान,

“ञेलमे इञरेन दुत आम मेंत्‌हाँ लाहा लाहातेञ कोलेकाना,

ओने उनि आमाक् होर लाहा लाहातेये तेयार।”#मालाकि 3:1

11“सा़रिगेञ मेतापेकाना मायजिउको खोन जानाम आकानको मोदरे जोहान बाबा़प्‌तिसिच्‌ खोन माराङिच् दो चेले हों बाय जानामाकाना; एनहों सेरमा राजरे हुडिञिच् दो उनि खोने माराङगेया। 12आर जोहान बाबा़प्‌तिसिच् ओकते खोन नित हा़बिच् सेरमा राज दोको जोरमोटेत्‌ काना, आर दाड़ेयानकोगे ओनाको रेच्‌जोङ काना।#लुक १६:१६ 13एनते जोतो ना़बि आर आ़न दो जोहान हा़बिच्‌को ना़बिलाक्‌आ। 14आर नोवा काथा आङगोचपे मेनजोङकान खान उनि कानगेयाय हिजुक् ला़गिदोक्‌ कान एलिया़ दो। 15लुतुर मेनाक्‌तायिच् दोए आँजोममा। 16मेनखान नोवा पिड़हिरेनको दो ओकोय तुलुच् इञ जुरिकोवा? हाटरे दुड़ुप्‌ आकान गिदरा़ लेकानाको ओने ओनको एटाक्‌को होहोवातेको मेताकोकान, 17तिरिया़ले ओरोङआत्‌पेया आर बापे एनेच्‌लेना, होमोर हालाङकेदाले आर कोड़ाम दो बापे चेटाक्‌ लेना। 18एनते जोहान दो हेच्‌काते जोम हों बाय जोमेत् ताहेंकाना, आर ञु हों बाय ञुयेत् ताहेंकाना, आरको मेनेदा, ‘उनिरे दो बा़ड़िच् जिउ मेनाया।’ 19मानवा होपोन मा हेच्‌कातेये जोम ञुयेत्‌कान, आरको मेनेदा, ‘ञेलपे दा़रदा़हा आर दारखा रासा होक्‌ङगोरिच्, मा़सुल उक्‌ठा़उको आर का़इ होड़कोरेन गाते।’ मेनखान आकेल दो आयाक्‌ का़मिकोते सा़रियाक्‌गेये टारहाव ओचोआकाना।”

बाङ कासतावक्‌ कान नागराहा

(लु १०:१३-१५)

20उनरे ओनाको नागराहा, ओने ओकारे आयाक्‌ आ़डि उता़र दाड़े का़मिको होयलेन, निनिसड़ा़वे एहोप्‌एना, मोन बाको आ़चुरलेत् इया़ते 21“हाय आमरे ए खोरासिन, हाय आमरे ए बेथसायदा, एनते तुर आर सिदोनरे ओनाको दाड़े का़मिको होयलेन खान ओकाको आबेनरे होय आकान, एनडेखान ओंडेनको दो सेदायरे गोंड़ें किचरिच् होरोक्‌काते आर तोरोच्‌रे दुड़ुप्‌काते मोनको आ़चुरकेताकोवा। 22मेनखान इञ मेतापेकाना बिचा़र दिनरे दो आबेनाक् खोन तुर आर सिदोन रेयाक्‌गे बोरोङ साहावक्‌आ। 23आर आम ए काफारना़हुम बाङ दो सेरमा हा़बिच्‌एम उसुल ओचोकोक्? पातालपुरि हा़बिच्‌एम ञुरहा़क्‌आ, एनते सोदोमरे ओनाको दाड़े का़मि होयलेन खान ओकाको आमरे होय आकान, एनडेखान ओना दो तेहेञ हा़बिच् ताहेंकोक्‌आ। 24मेनखान इञ मेतापेकाना बिचा़र दिनरे दो आमाक् खोन सोदोम नागराहा रेयाक्‌गे बोरोङ साहावक्‌आ।”

मा़सिरे जिरा़उ

(लु १०:२१-२२)

25ओना ओकतेरे जिसुइ मेनकेदा, “सारहावेत्‌मे कानाञ, ए बाबा सेरमा आर ओतरेन प्रोभु, एनते नोवाको दो आकेलान आर बुदानको खोनेम ओकोआकादा आर का़टिच् गिदरा़को ठेनेम सोदोर आकादा; 26हें बाबा, एनते नोनकायगे आम सामाङरे कुसियाक् दो होयोक्‌ काना।”

27“आ़पुञ दो सानामाक्‌कोय जिमा़ आकावादिञा, आर बाबा छाडाकाते होपोन दो ओकोय हों बाको बाडायेदेया, आर ओकोय हों बाबा बाको बाडायेदेया होपोनतेत् छाडा दो आर ओनको होंको बाडायेया ओकोय ठेन होपोन दो बाबा सोदोरेये मोनेजोङ।”

28“देला इञ ठेन हिजुक्‌पे, ए आपे जोतो लाङगा आर बोजहाते तेन आकानको, इञगेञ जिरा़उ ओचोपेया। 29इञाक् आराँड़ गोगतिञपे, आर इञ ठेन चेत्‌जोङपे, एनते मा़ँहिंर आर मोनरेञ निंधा़नगेया आर आपेयाक्‌ जिवि ला़गित् जिरा़उपे ञामा, 30एनते इञाक् आराँड़ दो जुतगेया आर इञाक् बोजहा दो रावालगेया।”

Zur Zeit ausgewählt:

माथ 11: NTSPt25

Markierung

Kopieren