Yirugana Yovapositoli 26
26
Paurusa ta lipopere kosipara saAgilipa
1Agilipa ta tantere Paurusa asi: “Tuna ku pe evega lyokuuyunga nyamoge.” Paurusa makura ta gonona kuwoko kwendi ta lipopere asi:
2“Ame kwange eli erago lyokuyalipoperera yininke nayinye eyi va monena nge Vajuda usima, kosipara soge ove hompa Agilipa naina, 3unene po yeeyi wa diva nomukaro nomalitangano goVajuda. Yiyo nye nina kukuhundira asi, yingasi purakena nge tupu.
4“Ukaro wange womoudinkantu ou na tameka kukara, muhoko gwange moJerusarema, Vajuda navenye va yi diva. 5Va diva nge nare, nsene va yi hara ngano tava tanta tupu asi, ame ukaro wange kwa hamena koukerelikarunga wombunga zonkukutu po, ano ni Mufalisayi. 6Ntaantani nyame ogu nina sikama apa, tava pere nge usima ehuguvaro lyomatumbwidiro aga ga pere Karunga ozinyakurwetu. 7Alyo yilyo ga ndindira mazimo getu murongo nagavali, aga aga ruganene Karunga mutenya nomasiku, asi ngali sika mo. Ano ehuguvaro eli, ove hompa Agilipa, yilyo vana kupera nge usima Vajuda! 8Eyi yina kumudigoperera one Vajuda asi Karunga nga pindura vafe yinke?
9“Ame ko kwa gazarere nare asi, edina Jesus goMunasareta ni li rugane yininke yoyinzi yoyidona. 10Makura sili tani yi rugana moJerusarema. Vapristeli wovanene kwa pere nge nonkondo, makura yiyo ngani zedilire sinzi sovantu vaKarunga modorongo. Ano nsene vana va tokwere konomfa, name tani yi pura. 11Rorunzi ngani va hepeke monosinagoge, tani va sininike va swaure Jesus. Ame ngani va hepeke unene dogoro koyitata yokoyirongo.
Paurusa ta sanseke elitezururo lyendi
12“Eyi yiyo ya twere nge koDamasikusi. Vapristeli wovanene yiwo va tumine tava pe nge nonkondo. 13Ano mutwekatji, monzira zange omo, hompa, makura tani mono uzera kutunda meguru, tau tu minikire kumwe nava twa gendere nawo. Site sawo kwa pitakana sezuva. 14Natuvenye makura tatu gwire pevhu, ame tani zuvhu ezwi lina kutantera nge moRuhebeli asi: ‘Sauru, Sauru, yinke ono kuhepekera nge? Ove udigu kusanga sitwa.’ 15Ame makura tani pura asi: ‘Nyove yilye, Hompa?’ Hompa ta limburura asi: ‘Nyame Jesus ogu ono kuhepeka. 16Nye katuka o sikame. Ame kuna ku monekerere asi o kare muntu gwange nombangi zange. Ove ngo tantera vantu eyi ono mono neyi ngani ku likida komeho. 17Ame ngani ku popera koVajuda nokovapagani oku ngani ku tuma; 18ngo ka mahure meho gawo, ngava sige mundema va wize kouzera, ngava tunde mononkondo daSatana, ngava hame kwaKarunga, nkumwe ngava va dongwenene po nonzo, ngava gwane evega mwava va kara vantu vaKarunga.’
Umbangi waPaurusa koVajuda novapagani
19“Ano nye hompa Agilipa, ame kapi na limbire kemoneko olyo lyeguru. 20Ame kwa udisilire Vadamasikusi noVajerusarema nosirongo nasinye saJuda nokovapagani asi va litezurure va tengwire kwaKarunga gwawo, va rugane eyi ya fira elitezururo. 21Morweyi yiyo va kwaterere nge Vajuda montembeli va heteke asi va dipage nge. 22Ano morwa ame kwa gwana sikwafa kwaKarunga, nyame ogu nina sikama naina apa, ni tantere munona nomukurona. Ame kapi nina kuuyunga yapeke, yeeyi va tanta vaporofete naMosesa asi yiyo ngayi horoka, 23asi Kristusa nga nyande, makura nga hove kuvhumbuka koufe, makura nga udisire muhoko gwetu novapagani uzera.”
24Ano Paurusa haga za mokulipopera, makura Fesitusa ta zigire unene asi: “Wa zaruka Paurusa! Erongo lyoge lyenene yilyo lina kukuzarura!” 25Nye Paurusa ta tanta asi: “Ame kapi na zaruka, ove Fesitusa gekuto! Ame kuna kuuyunga nonkango dosili donondunge. 26Yeeyi nahompa si ogu nina kuuyunga nendi memanguruko, yininke eyi ga yi diva. Ame kapi nina kugazara asi poyili eyi mu puka po apa, morwa kapi ya horokera mokahorehore. 27Hompa Agilipa, wa pura vaporofete ndi? Na diva asi wa va pura.” 28Agilipa ta tantere Paurusa asi: “Ove kuna kugazara asi o ninke nge nye paapa ni kare mukriste ndi?” 29Paurusa ta tanta asi: “Yi kare ntaantani ndi komeho, yi kare, nye ame kuna hara asi, kapisi nyovelike nye nava navenye vana kupurakena nge naina, ngano Karunga a mu rugane moomu ga rugana nge ame, ntudi gaaga malyenge gelike!”
30Hompa namupangeli naBerenike nava va kere nawo, makura tava katuka. 31Va za, tava uyunga asi: “Mugara ogu kutupu eyi yokumutwaredesesa konomfa ndi yokumupandekesesa.” 32Agilipa ta tantere Fesitusa asi: “Mugara ogu ngano asi kapi ana tumbura kwahompa gwaRoma, ngano kuna mu sigi a ze.”
© Egwanekerobibeli Lyanamibia 1987, 2003
© Bible Society of Namibia 1987, 2003