Luke 16
16
1ထွို့မဲ့ကိုယ်တော်အွယ့် မိန့်ဆက်တာ တပည့်ဖုန်းအွယ့် အလိုင်ကု သဌေအပလားဒီ့ ခန့်ပလူးအပလားပျန့်နောင်မန်နေဂျာ ဖီကကျေရင်ဖီ အာတမိုးဖုန်းတာ။ ဒေါင့်မာလဲ့ အာသိကေ့ မန်နေဂျာအွယ့်ပလား အန်လိမ်းအကွမ့်ဖုန်း။ 2အွယ့်ကြားမဲ့ သဌေအွယ့် ဟောင့်မန်နေဂျာအွယ့်ပလားထွို့ "ငါးကဟွမ့်ဒါ နားခရာဒွို ပျန့်နိန်းမာ။ ငါးလီဒင်ဒါဒွမ့်ဟာနား မန်နေဂျာခမ်းလန်ကုအွယ့်မဲ့ ဒင်နေဖီ နားကကျေရင်စာရင်းဖုန်းလုဲင်" ဒေါင့်နိန်းအွယ့်။ 3ထွို့မဲ့ မန်နေဂျာအွယ့်လဲ့ "ငါးအီမိုးဘားနိန်းမာ။ ငါးသဌေဒီ့ ချီ့ထန်ကေ့လိဟ တမိုးကု။ ငါဒွို ခွော်ဟန်းတာလဲ့ အာလီအိုဟ၊ကွူ့အန်းတာလဲ့ ချန်းကာသ။ 4ခံချိဘာ မန်နေဂျာကုထွို့ ပလူးဖုန်း ဖီကာလက်ခံကြိုကာငါးအာကာယွမ်ကုထွို့ ဖီကာကူညီကာငါးတာ အီမိုးဘာနိန်းမာဒွို ငါးသိလိ" အိုယူနိန်းအွယ့်။ 5ထွို့မဲ့ မန်နေဂျာအွယ့် ဟောင့်လေး ပလူးလူဖီးနီ သဌေဆောင့် အပလားထွို့ အပလားထွို့မဲ့ အကီစွက်ပလားအွယ့် "နားနုဲင့် အိုလူဖီနီ ငါးသဌေဆောင့် တျာမာ" တစီ့နိန်းအွယ့်။ 6ပလူးအွယ့်ပလားအွယ့် "အိုလူဖီ နမ်မန်သံလွင် အန်တွမ့်ရိန့် လီတာပြန်ဖရေနိန်းအွယ့်။ မန်နေဂျာအွယ့် "ချွော်မွိုင်မွိုင်း စာရင်စာရွက်ထွို့ တျန်အရိန့်အန်ငေယားလီတာလုဲင်" ဒေါင့်နိန်းအွယ့်။ 7ထွို့မဲ့ မန်နေဂျာအွယ့် "နီအိုတျာမာ" တစီ့ ဒါ့အပလားနိန်းအွယ့်ထွို့ ပလူးအွယ့်ပလားအွယ့် "ဂျုံဘွို့အိတ်အယား" ဖရေနိန်းအွယ့်။ မန်နေဂျာအွယ့်လဲ့ "တျန် အန်စူးစီ့ စာရင်းကုဒီ့လုဲင်"ဒေါင့်နိန်းအွယ့်။ 8ထွို့မဲ့ သဌေအွယ့် အန်ဖရာ မန်နေဂျာအွယ့်ပလား မိုးတမိုး အာနန်ကျိုတာ နောင်တကေနပ်။ ဗွမ့်နောင်နိန်းအွယ့် ကမ်ဖားလောင်ကအိုဒါ ပလူးမျိုဆက်ဒွိုးဟိုဒွို မိုးတမိုး အာကာတာခါ့ လွိုထိုင်ဖရာဖုဖုန်း အီအန်းဒင်ရေထွို့ အီမိုးလိုကာဘို့ အာကာနန်ကျိုတာ။ 9ဒါ့အလိုင် ကိုယ်တော်ယေရှု မိန့်အာတပည့်ဖုန်းဒွို "ငါးဒေါင့်နားက့ဒွို၊ နားကဖီကလ ဖောဝ်ဟေဟေတာ စုံကားနောင်လောကီစည်စိမ်ဖုန်းလုဲင်။ လောကီစည်စိမ်ဖုန်းမေလူးခါ့ နိစ္စထာဝရယွမ်အွယ့် အီကြိုလက်ခံတိုနားက့။ 10ပလူးသစ္စာအိုကိစ္စပီပီလောင်စာကားကအိုဒွို ကိစ္စအရေဒူဖုန်းကုလဲ့ သစ္စာအိုအို။ ပလူးလီရိုစာဟ တကိစ္စပီပီကုဒီ့ တကိစ္စအရေဒူဖုန်းကုလဲ့ လီရိုစာဒါဟာ။ 11နားနုဲင့် လောကီစည်စိမ်ဖုန်းနောင်နိန်းအွယ့်မသဲ မေလိစုံမှန်မှန်ဟအွယ့် တစည်စိမ်အစစ်ဒွို့ လမာအီအပ်နားက့ဆောင်။ 12ဖီကဆုံစစ်မှန် ပလူးလငါ့တကလွိုင်ဥစ္စာဖုန်းတာ နားက့သစ္စာမေလိအိုဟအွယ့် နားက့ပွိုင်ဆိုင်ဥစ္စာတာ လမာအီဖီနားက့။ 13စွမ်းလမားမားယောဝ် ခံပျန့်စွမ့် ဗွယ်အန်တငြီ့ဆောင့် လီဒါဟ၊အကြောင်ခရာနိန်းမာအွယ့် အာဒွို ကျင်းတပလားထွို့ အီရက်အပလား။ မေဟလဲ့ အာမေအန်ဒင်သစ္စာအပလားကုအွယ့် အာအီစွင့်ဟ ဒါ့အပလား။နားက့ဒွို့ ခံစွမ်း ဗွယ်ဘုရာ နောင် လောကီစည်စိမ်းဖုန်း တလိုင်ချင် လီဒါကာဟ" မိန့်နိန်းအွယ့်။ 14ဖာရိရှဲမက်ကွမ့်စာဖုန်းအွယ့် ထွိုင်ဟွမ့်ကိုယ်တော်ယေရှုငိုထွို့ တငါးပလာလိုကာ။ 15ဒေါင့်မာလဲ့ ကိုယ်တော်အွယ့် "နားကနုဲင့် ပလူးဖုန်းမေငါ့ကု နေ့လိုကာနားက့နန် ပျန့်ပလူးတွို့။ဒေါ့င်မာလဲ့ ဗွယ်ဖရာဒွို အိုသိနားက့သသာ။ ပလူးကဒင်တန်ဖိုဒါတာဖုန်းဒီ့ ဗွယ်ဖရာမေငါ့ကု ပျန့်တို တကီကာခရာ။ 16တွိုတွို့ ငွတ်သျှီ့မင်္ဂလာဆရာယောဟန်ခေတ် ပလူးဖုန်းဒွို လွိုက်နာလိုကာ မောရှေဥပဒေဖုန်းနောင် အရိယာဆူတော်ကောင် စည်းကမ်းဖုန်းအတွိုင်။ ဒေါင့်မာလဲ့ အခိန်းအွယ့်ဘာမေတွိုခါ့ ပလူးဖုန်း ဟွမ့်သိလိုကာ ဗွယ်ဖရာသာသနာတော်အကြောင် မင်္ဂလာစတင်ဖုန်းအွယ့်ကြားမဲ့ ပလူးဖုန်းကြိုစာလိုကာ ဖီကနွူးဒါ သာသနာတော်ကု။ 17ဒေါင့်မာလဲ့ မုနောင်ဟန်ယာ အီတမာတာဒွို ယွူ့ထိုင်
ဗွယ်ဖရာနှူတ်ကပါတ်တော်ကုဒီ့ကပါဒါ လိတ်ပလုံအပီစွက်အမာ့ အီတမာ။ 18အန်းကေ့ကေ့ မာ့တိုးထွို့ အန်နီထိုင်ဒါ့ ပမွော်လငါ့ကားကအိုစာဒွို့ ပျန့်တိုပလူး ဖောက်ပလန်အိမ်ထောင်ရေစာဖုန်း။ အန်နီပမွော် ဝါးအန်ကေ့ထွို့စာလဲ့ ဗွမ့်ဗွမ့်နိန်းအွယ့်ဟို" ဒေါင့်နိန်းအွယ့်။ 19ထွို့မဲ့ ကိုယ်တော်အွယ့် "တလိုင်ကုဒီ့ အိုတို့နောင် ကွမ်လာငူးဒူထွို့မိုပွဲတအန်အိုငူးဒူကျွမ်ငြီးငြီးစာ သဌေအိုပလား။ 20ပလူးနျန်းလာဇရု နန်လောင်အဘာအာ့ နာဖုန်းအိုပေါက်တာ ဆင်ရဲစာအပလားဒီ့လဲ့ အိုငြီ့တာ သဌေအွယ့်ပလား ယွမ်ကန်တင်းငွာ့ကု။ 21အာအွယ့် သဘာသအန်းထန် သဌေယျန်ခုံကု ကအိုလွို့ဒါ အအန်ဖုန်း။ချွူဖုန်းလဲ့ အန်လျှက်လိုကာ အာနာဖုန်း။ 22ထွို့မဲ့ ပလူးဆင်ရဲစာအွယ့်ပလား ထွိုင်စီ့ထွို့ လွှော်ဖုန်းအွယ့် ဟောင့်လေလိုကာအာ ကပျန့်ဒါ အာမွိုပလားဖပလား အာဗြဟံဆောင့်။ သဌေအွယ့်လဲ့ ထွိုင်စီ့ထွို့ ခံဘာ တစင်ကြို။ 23သဌေအွယ့်ပလားအွယ့် ခံစာဘာတခုဲင်ဒူ မရဏကန်ကုထွို့ အာထွိုင်ဟွိုင့်ထန်အာခမ်လွို့ခါ့ အိုယားယားသျှီလေး လာဇရု အိုအာဗြဟံဆောင့်။ 24ထွို့မဲ့ အာအွယ့် အိုငွိုက့ထွို့ "ဖာ့ အာဗြဟံ၊ သညင်ပန်ငါး။ ငါးဒွိုခံစာဘာယွမ်တွို့ ဝေဒနာ မီးအိုတင်ဒွိုးဘာကုအွယ့်မဲ့ ကျွမ်လာဇရုကျွော့်မွိုင်နောင်သျှီ့ထွို့ ဖီကမိုးကျုံ့ဖီ ငါးပလီးတာ အန်ကြွလေဖီအာ" ကွူ့နိန်းအွယ့် 25ဒေါင့်မာလဲ့ အာဗြဟံပြန်ဒေါင့်ချာဒါ့ဒွို "ငါးဖုခု၊ ယူလလုဲင်။ နားကအိုမွမ့်ခါ့ဒီ့ အန်အွူအွူဘာထွို့ အိုနားစာယာဘာသ။ လာဇရုအွယ့် ခုဲင်ဘာတာ ကျွမ်းစွိုစွို။ ဒွိုးခါ့ အာဒွို့အိုပျော်ဘာလိတာထွို့ နားနုဲင့် အိုခံစာဘာယွမ်တွို့ ဝေဒနာ။ 26အွယ့်ထွို့လီကာဟ နားက့နောင် က့ခါကုဒွို လမားဖြတ်လေဒါဟ စုံ့ယိုးအိုခါတဘာအွယ့်မဲ့ အိုဒွိုးကုလေးနားက့ဆောင့်ခယောဝ်း၊ အိုနားက့ကုထွို့ လေးက့ဆောင်ခယောဝ်း၊ ဘာသကာလေလဲ့ လမားလဲ့ လီကာလေးဒါဟ" ဒေါင့်နိန်းအွယ့်။ 27သဌေအွယ့်လဲ့ " ဖား အာဗြာဟံ၊ မေနိန်းအွယ့်ကြားလဲ့ ငါးတောင်ပလန်းတို ဖီကကြွလေဖီး လာဇရု ငါးဖာ့ယွမ့်ကု။ 28ငါးဒွို ပွော်ဝေအို အန်းတငေ။ ဖီအာကာ ကျန်တွိုမာ တခံဘာဝေဒနာ နောင်ရပ်ဒွိုကုမာထွို့ ဘာသအန်းချန်လေဖီစတိအာကာဖုန်း" လျှောက်နိန်းအွယ့်။ 29ဒေါင့်မာလဲ့ အာဗြဟံအွယ့်လဲ့ "နားပွော်ဝေဖုန်းကုဒီ့ အိုတိုနောင် မောရှေနောင် အရိယာဆူတော်ကောင်စည်ကမ်းဖုန်း။ဖီအာကာလွိုက်နာကာဘို့နောင် ပလူးအွယ့်ဟို ကတျန်စေးကန်းတာဖုန်းငါးမထွို့။ 30ဒေါင့်မာလဲ့ သဌေအွယ့် "ဖား အာဗြဟံ၊ နိန်းအွယ့်လီမေဟာ။ ပလူးစီ့ထွို့စာအပလားပလား မေကျိန်းအာကာဆောင်မဲ့ အာကာအီလ နောင်တသံဝေဂတရာ" ဒေါင့်နိန်းအွယ့်။ 31ထွို့မဲ့ အာဗြဟံအွယ့် "အာကာအွယ့် မောရှေ နောင် အရိယာဆူတော်ကောင် စည်းကမ်းဖုန်း မသဲ မေလီနာကာဟအွယ့် ပလူးစီ့ထွို့ကျိန်းချာဒါ့စာအပလားငိုလဲ့ အီနားကား လီမေဟာ" မိန့်နိန်းအွယ့်။
Zur Zeit ausgewählt:
Luke 16: ltpv-rv
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
This translation of the Lahta Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
