Pin'ilʋg 1
1
1Pin'ilʋgʋn la Wina'am da maal agɔl nɛ teŋ. 2Si'el da ka' teŋ la nii, ka zin'ig la wʋsa da an yɔɔg-yɔɔg, lik ma'aa da pɛ'ɛl, ka Wina'am Siig da laannɛ giligid ku'om la zug.
3Ka Wina'am yɛl ye, “Kɛl ka li an nyain.” Ka li sid nie nyain. 4Ka Wina'am nyɛ ka nɛɛsim la an sʋm ka o bak nɛɛsim la ka kɛ lik. 5Ka Wina'am buol nɛɛsim la ye, “Nintaŋ” ka buol lik la ye, “Yʋ'ʋŋ.” Ka yʋ'ʋŋ sɔb ka bɛog nie, linɛ da an yiiga dabisir.
6 #
2Pi 3:5
Ka Wina'am yɛl ye, “Kɛl ka si'el bɛɛ an lammiri bɛŋ ku'okanɛ bɛɛ agɔl la nɛ ku'okanɛ bɛ teŋir la.” 7Ka Wina'am kɛ ka bʋnlammir la bɛŋ kuokanɛ bɛɛ agɔl la ka bas kuokanɛ bɛ teŋir la. Ka li sid niŋ ala. 8Ka Wina'am buol bʋnlammir dinɛ bɛɛ agɔl la ye, “Saŋgbauŋ.” Ka yʋ'ʋŋ da sɔb ka bɛog nie dabayi' daare la.
9Ka Wina'am yɛl ye, “Kɛl ka ku'okanɛ bɛ saŋgbauŋ la teŋir la la'as zin'ig yinne, ka kɛ ka li teŋir la nie.” Ka li sid niŋ ala. 10Ka Wina'am buol zin'ikanɛ nie ka kʋdig la ye, “Teŋ,” ka buol ku'om la ye, “Atɛuk.” Ka Wina'am nyɛ ka li an sʋm. 11Ka Wina'am yɛl ye, “Kɛl ka bʋmbʋʋda buudi wʋsa bul teŋinɛ yina. Bʋmbʋʋdbanɛ du'ad bielim nɛ tiis buudi wʋsa banɛ wan wala ka mɔr biili.” Ka li sid niŋ ala. 12Ka teŋ la pɛ'ɛl nɛ zʋʋd nɛ tiis. Ka bʋmbʋʋda wʋsa du'a li buudi. Ka Wina'am nyɛ ka li an sʋm. 13Ka yʋ'ʋŋ sɔb ka bɛog nie daba atan' daare la.
14Ka Wina'am yɛl ye, “Kɛl ka bugum bɛɛ agɔl dinɛ na bak nintaŋ nɛ yʋ'ʋŋ ka an zanbin linɛ pa'an sɛɛung nɛ ʋʋn, nɛ dabisa nɛ yʋma. 15Ka kɛ ka bugum bɛ saŋgbauŋ la ni dinɛ na tis teŋgbauŋ la nɛɛsim.” Ka li sid niŋ ala. 16Wina'am da maal nɛ bugum kanda ayi'. Bugum tita'ar la da tisid nɛɛsim nintaŋ ka bugum si'asiŋ la tisid nɛɛsim yʋ'ʋŋ. O da lɛm maal nwadbibis. 17Wina'am da maali ba niŋ saŋgbana la ni ye ba tis teŋgbauŋ la nɛɛsim 18ka sʋ'oe nintaŋ nɛ yʋ'ʋŋ ka wɛlig nɛɛsim yi likin. Ka Wina'am nyɛ ka li an sʋm. 19Ka yʋ'ʋŋ da sɔb ka bɛog nie daba anaasi daare la. 20Ka Wina'am yɛl ye, “Kɛl ka ku'om la mɔr zimi nɛ bʋnvʋya banɛ bɛ ku'omin wʋsa, ka kɛ ka niis buudi wʋsa ian'ad agɔla.” 21Ka Wina'am maal bʋnvʋbɛda banɛ bɛɛ atɛukʋn la, nɛ zimi nɛ ba buudi nɛ niis nɛ ba buudi. Ka Wina'am nyɛ ka li an sʋm. 22Ka Wina'am niŋi ba zug bareka ka yɛl ye, “Kɛl ka zimi la wiaki pɛ'ɛl atɛuk la ka kɛ ka niis la mɛ wiaki pɛ'ɛl teŋgbauŋ la.” 23Ka yʋ'ʋŋ da sɔb ka bɛog nie daba anu daare la.
24Ka Wina'am yɛl ye, “Kɛl ka teŋgbauŋ la mɔr bʋnvʋya nɛ li buudi wʋsa, yin bʋnkɔnbid nɛ bʋnvʋya banɛ vuud teŋin nɛ sian'arin bʋnkɔnbid wʋsa nɛ ba buudi.” Ka li da niŋ ala. 25Wina'am da maal sian'arin bʋnkɔnbid la nɛ ba buudi, nɛ yin bʋnkɔnbid nɛ ba buudi nɛ bʋnkɔnbid banɛ vuud teŋin la wʋsa nɛ ba buudi. Ka Wina'am nyɛ ka li an sʋm.
26Ka Wina'am yɛl ye, “Kɛl ka ti maal ninsaal nwɛnɛ ti mɛŋi an si'em la, ka kɛ ka o sʋ'oe zimi linɛ bɛ ku'omin la, nɛ niis banɛ ian'ada agɔla nɛ bʋnkɔnbid banɛ bɛ teŋgbauŋʋn la, hali nɛ bʋnvʋya banɛ vuud teŋin la wʋsa.” 27Ala ka Wina'am da maal ninsaal nwɛnɛ o mɛŋi an si'em la. Dau nɛ pu'a ka o da maal. 28Ka Wina'am niŋi ba zug bareka ka yɛl ye, “Du'am nɔbigi pɛ'ɛli teŋgbauŋ la, ka sʋ'oe teŋ la, nɛ zimi banɛ bɛɛ atɛukʋn, nɛ niis banɛ bɛɛ agɔl, nɛ bʋnvʋya banɛ wʋsa ken teŋin la.” 29Ka Wina'am yɛl ye, “M tisi ya zʋʋd linɛ du'ad bielim teŋgbauŋ la zug wʋsa, nɛ tiis banɛ wan wala ka mɔr biili la wʋsa. Ba na an diibi tisi ya. 30M tis bʋnkɔnbid banɛ bɛ teŋin la nɛ niis banɛ bɛɛ agɔl nɛ bʋnvʋya banɛ ken teŋin hali nɛ linɛ wʋsa mɔr vʋm nɛ mɔma'asa ye li aan ba diib.” Ka li da niŋ ala. 31Wina'am da nyɛ on maal si'el la wʋsa ka li an sʋm. Ka yʋ'ʋŋ sɔb ka bɛog nie daba ayuobʋ daare la.
Zur Zeit ausgewählt:
Pin'ilʋg 1: kus_gh
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2023, Ghana Institute of Linguistics, Literacy and Bible Translation