ಮತ್ತಾಯ 2
2
ಗ್ಯಾನಿ ಖ್ಹಾರು ಪೂರಬ್ಮಾಥು ಯೇಸುನ ದೇಖಾನ ಆಯೂತೆ
1ಹೆರೋದ ರಾಜ಼ ಹುಯಿರ್ಹೊಥೋತೆ ವಖ್ಹತ್ಮ, ಯೂದಾಯ ತಬರ್ಖಾನು ಬೇತ್ಲೆಹೇಮ್ ಕರಿ ಗಾಮ್ಮ ಯೇಸು ಪೈದಹುಯೊ. ಅನಬಾದ್ಮ, ಥೋಡು ಗ್ಯಾನಿ ಅದ್ಮಿಖ್ಹಾರು, ಪೂರಬ್ ದಿಕ್ನು ದೇಖ್ಹ್ಥು ಯೆರೂಸಲೇಮ್ನ ಆಯಿನ್, 2“ಯೆಹೂದ್ಯರ್ನೊ ರಾಜಾ಼ ಹುಯಿನ್ ಪೈದಹುಯುತೆ ಲಡ್ಕು ಕಿಜ಼್ಜಾ ಛಾ಼? ಯೋ ಪೈದಾಹುಯು ಕರಿ ಖ್ಹಣೇದ್ ವತಾಳಸ್ತೆ ಶುಕ್ಕರ್ನ, ಹಮೆ ಪೂರಬ್ ದಿಕ್ಥು ದೇಖಿನ್, ಇನ ಆಡ್ಪಡಿನ್ ಖ್ಹಲಾಮ್ ಕರಾನ#2:2 ಆರಾದನೆ ಕರಾನ ಕರಿ ಮತ್ಲಬ್. ಐರ್ಹಾಸ್” ಕರಿ ಬೋಲ್ಯು.
3ಅನಖ್ಹಮ್ಜಿನ್, ರಾಜ಼ ಹೆರೋದನ ಅಜು಼ ಇನಜೋ಼ಡೆ ಯೆರೂಸಲೇಮ್ನು ತಮಾಮ್ ಅದ್ಮಿನ ದಿಲ್ಮ ಘಣು ಕಲಾವ್ಣಿ ಹುಯು. 4ತದೆ ಹೆರೋದನೆ ಯೆಹೂದ್ಯರ್ನ ಖ್ಹಾರಸ್ ಗಲ್ಢಯಾಜಕರ್ನ ಅಜು಼ ವಚನ್ ಶಿಕಾಡವಾಳ ಪೊಂಡಿತ್ನ ಎಕ್ಟು ಕರೀನ್, “ಕ್ರಿಸ್ತ ಪೈದಾ ಹೋಣುತೆ ಕಿಜ಼್ಜ?” ಕರಿ ಪುಛಾ಼ಯೊ.
5ಇವ್ಣೆ ಇನ, “ಯೂದಾಯ ತಬರ್ಖಾನು ಬೇತ್ಲೆಹೇಮ್ಮಾಸ್, ಶನಕತೊ-ಪ್ರವಾದಿವ್ನೆ ಅಮ್ಬೋಲ್ಯುಕಿ;
6ಯೆಹೂದ ತಬರ್ಖಾನು ಬೇತ್ಲೆಹೇಮ್,
ಯೆಹೂದನು ಮುಖ್ಯ ಖ್ಹಯೇರೇಥಿ, ತೂ ಎತ್ರೇಬಿ ಶಾತ್ ನ್ಹಾನು ಕಾಹೆ.
ಶನಕತೊ ತಾರ ಮಹಿಥು ಏಕ್ ಅದಿಕಾರಿ ಆವ್ಶೆ,
ಯೋ ಮಾರು ಅದ್ಮಿ ಹುಯಿರ್ಹೂತೆ ಇಸ್ರಾಯೇಲ್ನ ಚ಼ಲಾವವಾಳೊ! ಕರಿ ಪ್ರವಾದಿನ ಹಾತೆ ಲಿಖೈರ್ಹುಸ್”#2:6 ಮೀಕ 5:2-4 ಕರಿ ಬೋಲ್ಯೊ.
7ತದೆ ಹೆರೋದನೆ ಕಿನಾಬಿ ಮಾಲುಮ್ಕೊಂತೆ ಇಮ್, ಯೋ ಗ್ಯಾನಿ ಅದ್ಮಿಖ್ಹಾರಾನ ಬುಲೈನ್, ಯೋ ಶುಕ್ಕರ್ ದೆಖಾಯೂತೆ ಬರೋಬರ್ನಿ ವಖ್ಹತ್ನ ಪುಛೈ಼ಲಿದೊ. 8ಅಜು಼ ಇವ್ಣುನ, “ತುಮೆ ಜೈ಼ನ್ ಬರೋಬರ್ಥಿ ಯೋ ಲಡ್ಕಾನ ಢೂಂಡೊ, ಅಜು಼ ಯೋ ಮಳಾನ ಬಾದ್ಮ ಮನ ಬೋಲೊ, ಮೇಬಿ ಅಯಿನ್ ಯೋ ಲಡ್ಕಾನ ಆಡ್ಪಡಿನ್ ಖ್ಹಲಾಮ್ಕರುಸ್” ಕರಿ ಬೋಲಿನ್ ಇವ್ಣುನ ಬೇತ್ಲೆಹೇಮ್ನ ಮೋಕ್ಲಿದಿದೊ. 9-10ಇವ್ಣೆ ರಾಜಾ಼ನಿ ವಾತೆ ಖ್ಹಮ್ಜಿನ್, ವಳ್ಯುಜಾ಼ತುಥೂತೆ ತದೆ ಪೂರಬ್ ದೇಖ್ಹ್ಮ ಇವ್ಣುನ ದೆಖಾಯುಥೂತೆ ಯೋ ಶುಕ್ಕರ್ ಇವ್ಣುನ ಪಾಛು಼ ದೆಖಾಯು. ಇವ್ಣೆ ಯೋ ಶುಕ್ಕರ್ನ ದೇಖಿನ್, ಘಣು ಖ್ಹುಶಿಖಾದು! ಯೋ ಶುಕ್ಕರ್ ಇವ್ಣ ಖ್ಹಾಮ್ಣೆ-ಖ್ಹಾಮ್ಣೆ ಚಾ಼ಲ್ತುಹುಯಿನ್, ಲಡ್ಕು ಥೂತೆ ಝ಼ಗೋಕನ ಆಯಿನ್ ಭೀರಿಗಯು. 11ತದೆ ಇವ್ಣೆ ಯೋ ಘರ್ಮ ಜೈ಼ನ್, ಯೋ ಲಡ್ಕಾನ ಇನಿ ಆಯ ಮರಿಯನ ದೇಖಿನ್, ಇನ ಆಡ್ಪಡಿನ್ ಆರಾದನೆ ಕರ್ಯು. ಅಜು಼ ಇವ್ಣೆ ಲೈರಾಖ್ಯುಥೂತೆ ಇನಾಮ್ನ ಬುತ್ತಾವ್ನ ಛೋ಼ಡಿನ್ ಇನಾಮಾಥು ಖ್ಹೊನ್ನು, ಖ್ಹಾಲರ್ಯೊ ಅಜು಼ ರಕ್ತಬೋಳನ ಕಾಡಿನ್ ಇನ ಕಾಣ್ಕೆ ದಿದು.
12ಅನಬಾದ್ಮ ದೇವ್ ಇವ್ಣ ಖ್ಹೋಣ್ಯಮ ದೆಖೈನ್, “ತುಮೆ ಹೆರೋದಕನ ಪಾಛು಼ ಫರಿ ನಾ ಜಾ಼ವ್ಣು” ಕರಿ ಝೇತಾವಖ್ಹತರ್, ಇವ್ಣೆ ಬಿಜೇಕ್ ವಾಟೆಕರಿ ಇವ್ಣ ದೇಖ್ಹ್ನ ಪಾಛು಼ಫರಿ ಚ಼ಲ್ಯುಗಯು.
ಈಜಿಫ್ಟ್ ದೇಖ್ಹ್ನ ಮಿಲೈಗಯೂತೆ
13ಇವ್ಣೆ ಜಾ಼ವಾನ ಬಾದ್ಮ, ದೇವ್ನದೂತ ಯೋಸೇಫ್ನ ಖ್ಹೋಣ್ಯಮ ದೆಖೈನ್, “ಹೆರೋದ ಆ ಲಡ್ಕಾನ ಮಾರಿನಾಕ್ಣು ಕರಿ ಢೂಂಡುಕರಾಸ್, ಇನಖ್ಹಾಜೆ ತೂ ಉಠೀನ್, ಲಡ್ಕಾನ ಅಜು಼ ಇನಿ ಆಯನ ಬುಲೈಲಿನ್, ಈಜಿಪ್ಟ್ ದೇಖ್ಹ್ನ ಮಿಲೈ ಜಾ಼. ಅಜು಼ ಮೇ ಬೋಲಾತೋಡಿ ಹಿಜ್ಗಾ಼ಸ್ ರ್ಹೇ” ಕರಿ ಬೋಲ್ಯೊ.
14ತದೆ ಯೋಸೇಫ ಉಠೀನ್, ರಾತ್ನಿ ವಖ್ಹತ್ಮಾಸ್, ಯೋ ಲಡ್ಕಾನ ಅಜು಼ ಇನಿ ಆಯನ ಬುಲೈಲಿನ್, ಈಜಿಪ್ಟ್ನ ನಿಕ್ಳಿಗಯೊ. 15ಹೆರೋದ ಮರಾತೋಡಿ ಯೋ ಹಿಜ್ಗಾ಼ಸ್ ಥೊ. “ಮಾರ ಛಿಯ್ಯಾನ ಮೇ ಈಜಿಪ್ಟ್ ದೇಖ್ಹ್ಮಾಥು ಬುಲಾಯೊ”#2:15 ಹೋಶೆಯ 11:1 ಕರಿ ಪ್ರಭುನ ಪ್ರವಾದಿನ ಮ್ಹೋಡಥಿ ಬೋಲಾಯೋತೆ ವಾತೆ ಅಮ್ ಪೂರಹುಯು.
ಲಡ್ಕಾವ್ನ ಮಾರ್ಯೂತೆ ಬಾರೇಮ
16ಯೋ ಗ್ಯಾನಿ ಅದ್ಮಿಖ್ಹಾರು ಇನ ಠಗೈನಾಖ್ಯು ಕರಿ ಹೆರೋದನೆ ಘಣು ಖೀಜ಼್ ಕರೀನ್, ಇವ್ಣೇಥಿ ಪುಛಾ಼ಯೊಥೋತೆ ವಖ್ಹತ್ನ ಬರೋಬರ್ಥಿ ಮಾಲುಮ್ ಕರ್ಲಿನ್, ಆಳ್ನ ಖ್ಹಾರು ಮೋಕ್ಲಿನ್, ಬೇತ್ಲೆಹೇಮ್ ಅಜು಼ ಇನ ಅಶ್ಪಿಶ್ ಖ್ಹಾರುಸ್ ಗಾಮ್ನು, ಬೇ ವರಖ್ಹ್ನ ಮಹಿನು ಖ್ಹಾರಸ್ ಪರ್ಖ್ಹಾ ಲಡ್ಕಾನ ಮಾರಿನಾಖಿದೆವ್ಣು ಕರಿ ಹುಕುಮ್ ದಿದೊ.
17ಯೆರೆಮೀಯ ಕರಿ ಪ್ರವಾದೀನೆ ಬೋಲ್ಯೋತೆ ವಾತೆ ಯೋ ಹಗಾಮ್ಮ ಪೂರಹುಯು ಯೋ ಶಾತ್ಕತೊ,
18“ರಾಮಾಮ ಬಳೆಳ್ಹಾಟ್ ಖ್ಹಮ್ಜಾ಼ಯು,
ರೊವಣ್-ಝೊವಣ್ಣು ಅವಾಜ಼್ ಹುಯು;
ರಾಹೇಲ್ ಇನ ಲಡ್ಕಾವ್ನಖ್ಹಾಜೆ ರದನ್ಯಕರಿನ್,
ಇವ್ಣೆ ಮರಿಗಯೂತೆ ಇನಖ್ಹಾಜೆ,
ಸಮಾಧಾನ್ ಕೋಹುಯಿನಿ”#2:18 ಯೆರೆಮೀಯ 31:15 ಕರಿ ಬೋಲಾನುಸ್.
ಈಜಿಪ್ಟ್ಥು ಪಾಛು಼ಫರಿ ಆಯೂತೆ
19ಹೆರೋದ ಮರಿಜಾ಼ವಾನ ಬಾದ್ಮ, ಈಜಿಪ್ಟ್ಮ ದೇವ್ನದೂತ ಯೋಸೇಫ್ನ ಖ್ಹೋಣ್ಯಮ ದೆಖೈನ್, 20“ತೂ ಉಠೀನ್, ಲಡ್ಕಾನ ಅಜು಼ ಇನಿ ಆಯನ ಬುಲೈಲಿನ್, ಪಾಛು಼ಫರಿನ್ ಇಸ್ರಾಯೇಲ್ ದೇಖ್ಹ್ನ ಜಾ಼, ಶನಕತೊ ಲಡ್ಕಾನು ಜಾನ್ ಕಾಡ್ಣುಕರಿ ಥೋತೆ ಯೋ ಮರಿಗಯೊ” ಕರಿ ಬೋಲ್ಯೊ. 21ತದೆ ಯೋಸೇಫ್ನೆ ಉಠೀನ್, ಲಡ್ಕಾನ ಅಜು಼ ಇನಿ ಆಯನ ಬುಲೈಲಿನ್, ಪಾಛು಼ಫರಿ ಇಸ್ರಾಯೇಲ್ ದೇಖ್ಹ್ನ ಗಯೊ.
22ಕತೋಬಿ ಆರ್ಖೆಲಾಯನೆ ಇನೊ ಬಾ ಹೆರೋದಾನ ಬದಲ್ ಯೂದಾಯನ ಚ಼ಲವ್ಕರಾಸ್ ಕರಿ ಖ್ಹಮ್ಜಿನ್, ಹಿಜ಼್ಜಾ ಜಾ಼ವಾನ ಡರ್ಯೊ. ತದೆ ಯೋಸೇಫ್ನೆ ಖ್ಹೋಣ್ಯಮ ದೇವ್ನಿ ಹುಕುಮ್ನ ಲೀನ್, ಗಲಿಲಾಯ ತಬರ್ಖಾನ ಗಯೊ. 23ಅಜು಼ ನಜ಼ರೇತ್ ಕರಿ ಗಾಮ್ಮ ಆಯಿನ್ ಹಿಜ್ಗಾ಼ ಘರ್ ಕರೀನ್ ಥೊ. ಅನೇಥಿ ಇನ, “ನಜ಼ರೇತ್ವಾಳೊ ಕರಿ ನಾಮ್ ಆವ್ಶೆ” ಕರಿ ಪ್ರವಾದಿಯೇನೆ ಬೋಲ್ಯೂತೆವಾತೆ ಪೂರಹುಯು.
Zur Zeit ausgewählt:
ಮತ್ತಾಯ 2: WVe25
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
The Waghri Booli Bible © The Word for the World International and Waghri Translation Samiti, Karnataka, 2025.
