मत्‍तयाल 12

नोमकेम रोजुना बारेमते येसु कराहता पोल्‍लें

(मरकुस 2:23-28; लूकाल 6:1-5)

1उंदि नोमकेम रोजुने येसु आनि सिस्युल्क पोलाल्‍कुनाल होंचेके मत्‍तुर. अस्‍के सिस्युल्कुंक कर्वेस्‍सि मत्‍ताहेंके हेनकु नल्‍सि तिंचेक मत्‍तुर. 2परिसिल्क अदुन हूळसि, “हूळा! नोमकेम रोजुने बद कबळ अय्ते कियमळ नियम परकारम ओज्‍जोनो, अदे कबळ नीवा सिस्युल्क कीसंतुर,” इंचि येसुन इत्‍तुर.

3अस्‍के येसु ओर्कुन, “दाविदुंक आनि ओना दंटातोर्कुंक कर्वेस्‍तस्‍के ओर बतल कीतोर, मिमेट हदवा हिल्‍लिरा? 4ओर पेनदा गुळिते होळियसि, पेनदुक मोळ्कता हारिन अंटोर तित्‍तुर. अव हारिं तिनमळ इत्‍ते दर्मसास्‍त्रम परकारम विरोदमते मत्‍ता. अव हारिं सिराप पेर्मालोर्क तप्‍पा इंका बोरे तिना पर्रुर. 5अचोने आयका पेर्मालोर्क नोमकेमता रोजु गुळिते कबळ कींतुर इत्‍ता संगति मूसाना नियमते मंता इद मीकु एर्के मंता. अल्हा कियमळ तप्पु आयो. 6-8नना कोरानद दया आंद, मोक्‍कु आयो, इंचि #होसे 6:6 दर्मसास्‍त्रमते रासि मनना पोल्‍लेना अर्तम मीकु तेळियसि मत्‍ते ई दोसेम हिल्वोरपोर्रो मिमेट दोसेम दोस्‍सा कोन्‍नेर. नना वेहनद बतल इत्‍ते, गुळिकन्‍ना पेद्‍दोड वरोर इगे मंतोर. बारित्‍ते मनकना रूपमते पुटतोन नना, नोमकेमता रोजुना मालकगुडा आंदुन.” इंचि इत्‍तोर.

कय वत्‍सोत्‍ता मनकन येसु बेस कींतोर

(मरकुस 3:1-6; लूकाल 6:6-11)

9येसु अगटाल पेय्सि यहुदिल्कुना दर्मसास्‍त्रम कराहना लोते होत्‍तोर. 10अगा वरोर कय वत्‍सोत्‍ता मनकल मत्‍तोर. येसुन बल्हा तप्पुने पियना इंचि, “नियम परकारम, नोमकेम रोजुने बोनना बेस कियमळ बेसा, बेस आयोना?” इंचि परिसिल्क ओन पूसकीतुर.

11अस्‍के येसु ओर्कुन इल्‍हा इत्‍तोर, “मिहागटाल बोनागन्‍ना उंदि गोर्रे मंता इनकुंटु, अदगिंटा नोमकेम रोजुने पोक्‍काते अर्रानय्ते दान तेंडिरा? तेंडांतिर! 12इगे अय्ते, गोर्रेकन्‍ना मनकना जीवाक बच्‍चोरो विलवा मंता! अदुनहाटीं दर्मसास्‍त्रम परकारम नोमकेम रोजुने बेस किया परांतिर,” इंचि इत्‍तोर.

13अस्‍के येसु, “नीवा कय मुन्‍नेळ्‍क हहा,” इंचि कय वत्‍सोत्‍तोन इत्‍तोर. ओर कय मुन्‍नेळ्‍क हाहतस्‍के अद कय इंकुंदि कयदालेसीं बेस आता. 14पजा परिसिल्क अगटाल पलाते पेय्‍स्‍तुर. पेय्सि, येसुन बल्हा हव्कना? इंचि येसुना विरोदमते वळ्‍क्‍कुत्‍तुर.

येसु, पेन पेर्कुत्‍ता सेवक आंदुर

15ओर वळकानद कन्‍कुंचि येसु अगटाल पेय्सि होत्‍तोर. वेल्‍लेटुर लोकुल्‍क ओना पज्जो होत्‍तुर. अस्‍के येसु ओर्कुन अंटोर्कुन बेस कीतोर. 16पजा, “नावा बारेमते बोर्के बतले वेहमट इंचि अंटोर्क हुकुम हीतोर.” 17इत्‍ते यसायाह इनना पेनदा कबुरतोर इत्‍तव पोल्‍लें पूरा आयना इंचि येसु सामि इल्‍हा कीतोर. 18यसयाना बविस्यवानि इल्‍हा मत्‍ता:

“ईर नावा सेवक आंदुर, ईन नना पेर्कुत्‍तन.

नना ईन पावरम कींतन ईना बारेमते कूस मंतन.

नना नावा पवित्र आत्मा ईना पोर्रो इर्रंतन,

ईर नावा न्‍यायमतुन अन्‍नि जातिनोर्क वेहांतोर.

19ईर बोनतोने तेरहानोर आयोर, जोरते वरगेयानोर आयोर,

हरकुन पीसि लोकुल्‍कुंक ईना अल्किर केंजा वायो.

20नावा न्‍यायम गेल्सनाजेम ईर दुरसोत्‍ता बोंगुनगुडा उरहोरु,

इंका पिर्रना वेडसितुनगुडा पिरहोर.#12:20 इद वचनमता अर्तम बतल इत्‍ते, विस्वासमते कमजोर मत्‍तोर्कुन आनि परेसानते मत्‍तोर्कुन येसु होळसोर. गानि ओर्कु सहायम कींतोर.

21दानहाटीं अन्‍नि जातिनोर ईना पोरोलते आसेते मंदनुर.”#यसायाह 42:1-4

येसु आनि देय्याल्कुना मुक्‍यल

(मरकुस 3:20-30; लूकाल 11:14-23)

22पजा वरोर देय्यम पीता गुड्‍डि-मूकन लोकुल्‍क येसुनगा तत्‍तुर. येसु ओन बेस कीतोर. अस्‍के आ मनकल हूळालय-वळकालय दल्‍गतोर. 23इदुन हूळसि अगाटा अंटोर लोकुल्‍क इचंत्रमते, “वरोर दाविद राजाना तंतुने पुट्‍टनोर मत्‍तोर, ओर ईरे आयोर गदा?” इंचि इत्‍तुर.

24गानि अगा मत्‍ता परिसिल्क दीन केंजसि, “ईर अय्ते बेलजेबुल इनना देय्याल्कुना मुक्‍यना बलमते देय्याल्क तेंडांतोर” इंचि इत्‍तुर.

25परिसिल्कुना मनसुना विचाराल्कुन एरपाट कीसि येसु ओर्कुन इल्‍हा इत्‍तोर, “बद राज्येम लोप्पो वरोना पोल्‍ले-वरोंक अर्राकोंटा आंता, अद राज्येम पाडासि दांता. अल्‍हेने लोते आयि, नाटे आयि वरोना पोल्‍ले-वरोंक अर्राकोंटे बतले नित्‍तापर्रो. 26अल्‍हेने देय्यम दाना दंटाता देय्याल्कुन पेचाह्‍चि गेदुमते, अवुना लोप्पेन अर्राकोंटा आंता. अस्‍के अवुना राज्येम बल्हा नित्‍तंता? 27मिमेट इत्‍ताप नना ओक्‍कला बेलजेबुलना सहायमते देय्याल्कुन गेदमंतन इन्‍कुंटु. गानि मीवा लोकुल्‍कगुडा देय्याल्कुन गेदमंतुर, ओरगुडा देय्यमता सहायमतोने गेदमंतुरा? अदुनहाटीं मीवा लोकुल्‍के मीवा न्‍यायम कींतुर. 28गानि नना ओक्‍कला पेनदा आत्माता सहायमते देय्याल्कुन गेदमानय्ते, पेनदा राज्येम मीवा दग्गेर्क एव्ता इंचि एरपाट कीम्‍टु. 29बोरे आयिर, वरोर ताकतवर मनकना लोते होळियसि ओना सामानतुन दोंगा कियना इत्‍ते, मोदाला आ ताकतवर मनकन दोहचि वाटतेन, दोंगा किया परांतोर. 30बोर अय्ते नावा दंटाते मन्‍नोर, ओर नावा विरोदमते मंतोर, बोर अय्ते नाकु सहायम किय्योर, ओर नाहगटाल पायिचना कबळ कींतोर.”

31नना मीकु वेहनद बतल इत्‍ते, मनकना अन्‍नि पापाल्कुन, ओर कीता अपमानमतुन पेन मापि किय्‍यार. गानि पवित्र आत्माता अपमानम कियानोन मात्रम पेन माप किय्‍यो. 32अल्‍हेने मनकना रूपमते पुटतोन नाकु विरोदमते बोर वळ्‍किना, पेन ओना तप्‍पुकुन मापि किय्‍यार. गानि पवित्र आत्माकु विरोदमते वळ्‍कानोन मात्रम पेन माप किय्‍यो. इद कालमते आयि, वायना कालमते आयि, बस्‍केने माप किय्‍यो.

मरा आनि पंडि

(लूकाल 6:43-45)

33पजा येसु परिसिल्कुनतोनि इल्‍हा वळकालय दल्‍गुतोर. “केंजट, पंडितुन हूळसे मिमेट मरातुन एरपाट कीकिर, मरा बेसतद इत्‍ते दाना कायां इंका बेसतवे. अल्‍हेने मरा कराबतद इत्‍ते दाना कायां इंका कराबतवे. 34ए कट्‍ला तरास पोरिह्कुनसंटोरिटा, मिमेट कराबतोर आसि, मीवा तोळ्‍दाल बेसतां पोल्‍लें बल्हा पेय्‍सनुं? बारित्‍ते मनसुने मनना पोल्‍लेंगे तोळ्‍दाल पलाते पेय्‍संतां. 35बेसता मनकल ओना मनसुने मनना बेसता पोल्‍लेंगे पेच्‍हांतोर, अल्‍हेने कराब मनकल ओना मनसुने मनना कराब पोल्‍लेंगे पेच्‍हांतोर. 36इंका नना मीकु वेहानद बतल इत्‍ते, पज्जो-मुन्‍ने विचारम कियाका मीवा तोळ्‍दाल पेय्सता उंद-उंदि वट्‍टि पोल्‍लेता लेक्‍का आकिर न्‍यायम कियना#12:36 आकिर न्‍यायम दुनिया मुळंगनेंके मनम कीता कबाह्कुनद आकिरते उंदि न्‍यायम आंता. रोजु पेन मीवाहेंदाल एतार. 37मी पोल्‍लेना पोर्रोटाले मिमेट दोसेम हिल्‍वोरा लेक्‍काते वांतिर, इंका मिमेट वळ्कता पोल्‍लेना पोर्रोटाले मीपोर्रो दोसेम दोसमळ जर्गंता.” इंचि इत्‍तोर.

यहुदि लोकुल्‍क येसुना परिक्‍सा हूळंतुर

(मरकुस 8:11,12; लूकाल 11:29-32)

38अस्‍के इच्‍चुर परिसिल्क आनि दर्मसास्‍त्रम कराहना गुरुल्क येसुनगा वासि, “गुरु, नीवा कयदाल माकु उंदि चिन्‍ह हूळना मंता,” इंचि इत्‍तुर.

39अस्‍के येसु ओर्कुन इल्‍हा इत्‍तोर, “सेड्‍डोर्क आनि बोगमतनम कियाना पीळिता लोकुल्‍क, चिन्‍ह हुप्‍सा इंतुर. गानि योनाल इनना पेनदा कबुरतोना चिन्‍ह तप्‍पा ओर्कु इंकुंदि चिन्‍ह हुपिच्‍मळ जर्गो. 40इत्‍ते योनाल बल्हा नर्का-पिय्यल मूड रोजकु पेद्‍दा जिम्माता पीटा लोप्पो मत्‍तोर, अल्‍हेने मनकना रूपमते पुटतोन नना, नर्का-पिय्यल मूड रोजकु बूमिता पीटा लोप्पो मनंतन. 41योनाल वेहता कबुर केंजसि निनवे सहरतोर अय्ते ओरा मनसु मार्सकुत्‍तुर. गानि हुळाट, योनांकन्‍ना पेद्‍दोड इंदके मी मुन्‍ने नित्‍तिसि मंतोर. अय्नागानि मिमेट मनसु मार्सकुंचेके हिल्‍लिर. अदुनहाटीं आकिर न्‍यायमता रोजुने निनवे सहरतोर नित्‍तिसि इद पीळिता लोकुल्‍कुनपोर्रो दोसेम दोस्‍सनुर.”

42“अल्‍हेने सिबा देसेमता रानि सुलेमान राजाना तेल्‍विता पोल्‍लें केंजालय वेरे देसेमताल अगा वासि मत्‍ता. हुळाट, सुलेमानुंकन्‍ना पेद्‍दोड वरोर मी मुन्‍ने नित्‍तिसि मंतोर. अय्नागानि मिमेट नावा बुद्‍दिता पोल्‍लें केंजसेक हिल्‍लिर. अदुनहाटीं आकिर न्‍यायमता रोजुने आ रानि इद पीळिता लोकुल्‍कुनपोर्रो दोसेम दोस्‍सार.”

43“उंदि देय्यम बस्के अय्ते वरोर मनकानाल पेय्सि दांता, अस्‍के अद आराम कियालय एर हिल्वा जेगा पह्‍कंता, गानि दान्क असंटा जेगा दोर्को. 44अस्‍के अद देय्यम, ‘नना बद लोताल अय्ते पेय्सि वातानो, अदे लोते मर्रा मल्सि दांतन,’ इन्‍कुंता. मर्रा अगा होंचि हूळतस्‍के मुन्‍नेटा लोन रिकम आताप, मंचिगा ऊसताप दानकु बेस दिसंता. 45अस्‍के अद देय्यम तिरियसि होंचि दानकन्‍ना एक्‍को सेड्‍डातव एडुं देय्याल्कुन पीसि वांता. पजा अंटव कलियसि अदे लोते मनालय दल्‍गंतां. इल्‍हा आ मनकना परिस्तिति मोदाटा परिस्तितिकन्‍ना एक्‍को कराब मनंता. इद कालमता लोकुल्‍कुना जीवाते पेनदा पोल्‍लेक जेगा हिलाकोंटे इसोंटा गोसे आयार,” इंचि इत्‍तोर.

येसुना निजम जीवातोर बोर?

(मरकुस 3:31-35; लूकाल 8:19-21)

46मंदितोनि येसु वळ्कसेक मननेंके ओना यावल, ओना तम्मुह्‍क वासि, ओनतोनि वळकानद मंता इंचि लोता पलाते नित्‍तिसि मत्‍तुर. 47अस्‍के, “गुरु, नीवा यावल, नीवा तम्मुह्‍क नीतोनि वळकानद मंता इंचि पलाते नित्‍तिसि मंतुर,” इंचि बोरो येसुंक वेहतोर. 48अस्‍के, “बद ना यावल, बोर ना तम्मुह्‍क?” इंचि येसु ओन्क वेहता मनकन पूसकीतोर. 49पजा ओना सिस्युल्कुनहेके कय हुपिच्‍चि, “हुळाट, ईरे ना यावल, ईरे ना तम्मुह्‍क आंदुर. 50बोर अय्ते नावा स्वर्गमता बाबाल वेहताप ताकंतोर, ओरे नावा तम्मुर, हेलड आनि यावनलेसीं दग्‍गेटोर आंदुर,” इंचि येसु इत्‍तोर.

Zur Zeit ausgewählt:

मत्‍तयाल 12: esg-Deva

Markierung

Kopieren

Vergleichen