3 Yohana 1
1
1Nyyai di Yohana a̱yekwo ba̱nyet tssup --
Naat da̱ a̱rywai nzuk Gayat u n cat i.
2Gayat, n naai Ka̱za kozan kyang nwan i ya ka̱son, ka na̱ ryi cet rwam ka̱sak ka an byyi cet ka̱yat ntswa nwan ka ni. 3N gwai ka̱sak ka ba̱wumbeyang ba̱yaan ban cong a̱n tyyei ka̱sak ka an breng ka̱ryong ka ni, da̱ni an shyi ka̱yat ka̱ryong ka ni. 4A̱gba̱dang hok ansham nzuk a̱nu ni: n hok na̱won nzuk na cong ka̱yat ka̱ryong.
Ba dyep Gayat
5Gayat, a̱rywai nzuk, n gwai bu ka̱sak ka an tyyi ka̱ssi i brang ba̱wumbeyang ba ni sa̱rei bu ba̱nyet ba a̱ yet ba̱yecen ni. 6Kozan ka̱ram ba kok ba̱nyet tssup ba mi kyi ka̱sak ka an ba̱ gwai i. N tyyi ka̱ssi ba̱ brang ka̱yat ka̱cyet mba ka, kankaani a̱ ni myim Ka̱za ni. 7Rot ba wruk ka̱cyet mba ka a̱ yya pfong Yesu, a̱ rak brang ba̱nyet witssup ba. 8Rot a̱mi ku myim njit ba̱nyet tssup zin tyyi mbvak a̱ ba̱ brang, koyan a̱ ga n byyi bvak an pfong ka̱ryong ani.
Diyotarifit bu Dimitriyut
9N jem kpa n tom ba̱nyet tssup ba mi, ma Diyotarifit a̱ cat yet a̱kwak ka̱son mba ni a̱ rak hok kyang a zi hywa ni. 10Rot a̱mi n bai mbvak nzuk n bu tyyei nkyang a na̱ yya ni ba̱ a̱ka̱tuk nkyang u na̱ ryat tazwa njit i, ma a̱ yemi na̱ ku maai ba na̱ si bo rak tyyi ba̱wumbeyang ba maba̱n a̱ bon bvwo ba̱yanyet ba a̱ cat ba̱ tyyi na mi ni, a̱ cat a̱ ba̱ nyying ka̱yat ba̱nyet tssup ka.
11A̱rywai nzuk, ryok tssup a̱ka̱tuk nkyang ba; tssup bu ka̱ryong. A̱yin nu a̱ yya a̱tsak nkyang ni a̱ yet a̱nying Ka̱za. A̱yin nu a̱ yya a̱ka̱tuk nkyang ni a̱ bvwo Ka̱za ba.
12Koyan a̱ wwat ka̱sham shaida tazwa Dimitriyut. Kyang a ba ryat i ku yet ka̱ryong. Njit ma zi ma̱n wrak ka̱sham shaida; a bu bvwo kyang a zi shaida ni ku yet ka̱ryong.
A̱ngbom byet
13N byyi nkyang ba̱gingang n ni na̱ tyyei ni, ma n ni na̱ jem ba. 14N hwa ki zi mon a̱zi nom ani zi ryat a̱ssi ba̱ a̱ssi.
15Ka̱za a̱ na̱ wwon nda.
Ba̱rywai ba kyi a̱ ya byei. Byei ba̱rywai njit ba a̱ shyi ka̱ yemi ni ba̱yayring.
Zur Zeit ausgewählt:
3 Yohana 1: kaj
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2011, Wycliffe Bible Translators, Inc. All rights reserved.