1 Yohana 3
3
Na̱won Ka̱za
1Yi cyang ka̱sak ka A̱tyyi na̱n za cat i! Cat nu na shii ba̱gingang, har ban za yei na̱won nu na, zi bu na̱ yet di ka̱ryong. Ka̱sa ka a̱ za bvwo ba, rot ka bvwo Ka̱za ba. 2Ba̱rywai nzuk, ba̱nyying zi yet na̱won Ka̱za, ma zi ka̱n bvwo maai kyang a zi ni yet a̱zanson ni ba. Kyang a zi bvwo ni nkpa yet, ka̱ram ka Kristi na̱n brek i, zi ni brak ryi da̱ nu ni, zi ni ku ryi ka̱sak ka na̱n dyi ni. 3A̱yin nu a̱ byyi sak rya nani ka̱yat nu ni a̱ ni tssu rya nu na a̱ wwon ba̱zizrak, ka̱sak ka nu Yesu na̱n yet a̱zizrak a̱yin ni.
4A̱yin nu a̱ yya a̱ka̱tukyya ni a̱ seyak truwang Ka̱za ji, rot yya a̱ka̱tukyya nkpa yet seyak truwang Ka̱za. 5Yi bvwo Yesu a̱ yin ba a̱ ga bu cii a̱ka̱tukyya ba̱nyet, ma nu diccu nu a̱ byyi a̱ka̱tukyya ba. 6Rot a̱mi a̱yin nu a̱ mon diccu nu bu Yesu ni a̱ nin tyyi ka̱ssi i yya a̱ka̱tuk nkyang ba. Ma a̱yin nu a̱ shyi bu yya a̱ka̱tukyya ni a̱ ka̱n dyi Yesu ba, di na̱ ku bvwo ba.
7Na̱won, yi ryok shim a̱yin a̱ ya raai ba; a̱yin nu a̱ yya a̱tsatsak ni nu a̱ yet a̱tsatsak di Yesu ni. 8A̱yin nu a̱ ya bu ka̱son ba̱ a̱ka̱tukyya ni a̱ yet a̱nying a̱gwam a̱ka̱tuk tswa, rot a̱gwam a̱ka̱tuk tswa nu a̱ yya a̱ka̱tukyya nyyai ndoson. Nkpa n byyi Ka̱za kan tom Ka̱won nka ka, ka ga bu ta̱ruk mpfong a̱gwam a̱ka̱tuk tswa na.
9A̱yin nu a̱ yet ka̱won Ka̱za ni a̱ ni ya ka̱son ba̱ a̱ka̱tukyya ba, rot zwa Ka̱za ji shyi a nu. Rot Ka̱za nka a̱ yet A̱tyyi nu, a̱ ni maai ya ka̱son a a̱ka̱tukyya ba. 10Yi cyang ka̱sak ka na̱won Ka̱za na nan bvwon bu na̱nying Ka̱ta̱nyrang a ni. A̱yin nu a̱ yya kyang a yet i ba, ko na̱ cat a̱wumba nu ni ba, a̱ yet ka̱won Ka̱za ba.
Zi gwai ba̱yaan
11Ba̱ryat ba yi hok nyyai ndoson ni mba yet: zi ya gwai. 12Se yi ta̱rwam yi bu tai Kayinu, nu a̱ yin yet a̱nying a̱gwam a̱ka̱tuk tswa a̱ hywat a̱wumba nu nu. A̱nzan a̱ yin byyi na̱n ku hywat? Rot nkyang a nu Kayinu na̱ yin yya ni yin yet a̱ka̱tuk, wwon a̱wumba nu a̱ yya kyang a yet i.
13Rot a̱mi, ba̱wumbeyang nzuk, yi ryok yya ka̱hat ba, ki ka̱sa kani a̱ rak ya ryi. 14Zi ka̱n shot dikwu i shya sucet; zi bvwo a̱mi rot zi ya gwai. A̱yin nu a̱ gwai a̱wumba nu ni ba, a̱ ri shyi an bvak dikwu. 15A̱tuba nu a̱ rak ryi a̱wumba nu ni a̱ yet a̱hywaai ba̱nyet; yi si bvwo a̱hywaai ba̱nyet a̱ byyi sucet wityak an nu ba. 16Zi ryi kyang a yet gwai ba̱nyet i: Yesu a̱ wrak sso nu a̱ ga za san. Rot a̱mi ku myim zi ma̱n wrak sso njit i gi san ba̱wumbeyang njit ba. 17Ka̱ a̱yin a̱ byyi zwa a̱ ryi a̱wumba na̱ sswa ka̱bvung i dizot na̱ rak ku brang, a̱ ni yya ni a̱n hywa da̱ gwai Ka̱za? 18Na̱won nzuk, zi ni tyyei cat njit a bu dika̱nu ba, ba ni ryi cat ka̱ryong a an nkyang a zi yya ni. 19Nkpa n byyi zi nin bvwo zi yet ba̱nyet ka̱ryong, ndya njit a bu pfwi a̱ta̱ssi Ka̱za 20ka̱ram ka zin hok ndya njit a na za tyyi a̱ bun ni. Zi bvwo Ka̱za a̱ ra̱u ndya njit a di cet, a̱ si bo bvwo kozan kyang.
21Rot a̱mi, ba̱rywai nzuk, ki ndya njit a za tyei a̱bvun ba zi bvwo zi sseng ba̱set a̱ta̱ssi Ka̱za, 22ka bo za ryi kozan kyang a zi naai ni, rot zi tssup ba̱ryat nka ba di ka̱ryong i bu yya kyang a ka̱ myim ni. 23Kyang a ka za tyyei ni ku na ni: zi wrak ka̱ryong i diyrek Ka̱won nka ti, Yesu Kristi, i bu gwai ba̱yaan, nkpa brak Ka̱za ka bo za tyyei. 24A̱yin nu a̱ pfong truwang Ka̱za ni a̱ shyi bu Ka̱za, Ka̱za a̱ ma̱n shyi ba̱ nu. Tswa ji Ka̱za ka za ryi ni nji za tyyei ka̱sak ka Ka̱za kan shyi ba̱ njit i.
Zur Zeit ausgewählt:
1 Yohana 3: kaj
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2011, Wycliffe Bible Translators, Inc. All rights reserved.